Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Fahaʼö Ndra’ugö ba Cerita-Cerita Zura Niʼamoniʼö

 FAMAHAʼÖ 72

Yesu si bohou ebua

Yesu si bohou ebua

Ba Nazareta toröi Yosefo, Maria hegöi Yesu, awö nononia matua ba ononia alawe tanö böʼö. Mohalöwö Yosefo tobali tuka geu ba wamönökhi soguna ba nösi nomonia. Ifahaʼö göi nösi nomonia sanandrösa khö Yehowa hegöi Oroisania. Owölö-ölö sibai zi sambua omo andrö wamosumange Yehowa ba nahia waʼowulo, ba möi ira ba Yeruzalema ero röfi ba wamalua Fasa.

Me 12 fakhe ndröfi Yesu, möi nösi nomonia ba Yeruzalema simane si toʼölö. Rami sibai mbanua andrö, börö me ato niha si tohare ba wamalua Fasa. Me no aefa gowasa andrö, mangawuli Yosefo hegöi Maria. Lawai so Yesu ba gotalua niha sato si fao khöra. Hizaʼi, me laʼalui ia ba lö lasöndra.

Börö daʼö, mangawuli ira ba Yeruzalema, tölu hari laʼalu-alui Yesu. Ba gafuriata, möi ira ba gosali. Laʼila Yesu, no dumadao ia ba gotalua ndra samahaʼö, ihaogö wamondrondrongo ba ibeʼe wanofu-nofu si baga. Ahöli-höli dödö ndra samahaʼö irege ibörögö  manofu ira khönia. Me larongo wanema li moroi khö Yesu, itugu ahöli-höli dödöra börö me aboto ba dödö Yesu Goroisa Yehowa.

Abu sibai dödö Yosefo faoma Maria. Imane Maria, ’He nogu, maʼalu-alui manö ndraʼugö. Hezo manö ölauʼö?’ Imane Yesu, ’Hadia lö miʼila wa hasambalö ba nomo Namagu so ndraʼo?’

Aefa daʼö, fao Yesu khö zatuania wangawuli ba Nazareta. Ifahaʼö Yesu amania Yosefo tobali tuka geu. Moloʼö yaʼugö, ono si hewisa Yesu andrö me ibörögö ebua-bua ia? Itugu tedou waʼebua-bua Yesu ba monönö göi waʼatua-tuania irege laʼomasiʼö ia niha hegöi Lowalangi.

”Foloʼö somasi ndraʼugö, yaʼugö Lowalangigu, ba no faʼomasigu; ba oroisamö, ba no so ba dödögu bakha.”​—Zinunö 40:9