Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Fahaʼö Ndra’ugö ba Cerita-Cerita Zura Niʼamoniʼö

 FAMAHAʼÖ 71

Yehowa Ilumöʼö Yesu

Yehowa Ilumöʼö Yesu

Faduhu dödö niha tanö ba gatumbukha Gizaraʼeli wa tola tobali fanuturu lala ndröfi. Samuza inötö me bongi, so mato hadauga ndra matua moroi ba Gatumbukha zangila si hulö ndröfi ba mbanua. Lagoʼö-goʼö me mofanö ndröfi daʼö. Iʼohe ira ”döfi” daʼö ba Yeruzalema. Laʼila wa so ndraono si tobali razo niha Yahudi. Andrö wa lasofu ba niha si toröi ba daʼö hezo so nono andrö börö me omasi ira mangalulu khönia.

Me no irongo Herode razo Yeruzalema wa so razo tanö böʼö, abu sibai dödönia. Manofu ia khö ndra ere, ’Hezo nono si tobali razo andrö?’ Lamane khönia, ’Ba Mbetilekhema tumbu ia lawaʼö ira samaʼeleʼö.’ Börö daʼö, ikaoni ndra matua moroi ba Gatumbukha andrö Herode ba imane, ’Miʼaeʼe ba Mbetilekhema ba miʼalui nono daʼö. Mifatunö khögu hezo so ia. Omasido göi mangalulu khönia.’ Sindruhunia sa faya-faya Herode.

Ibörögö zui mofanö ”ndröfi” daʼö ba lagoʼö-goʼö ira matua no mege ofeta ba Mbetilekhema. Aefa daʼö, tebato ”ndröfi” andrö ba gamaudu zagö zi sambua omo ba möi ira bakha ba nomo daʼö. Laʼila Yesu faoma inania Maria. Latuhi danö föna Yesu ba mamuala ira khönia yaʼia daʼö anaʼa, kumöyö, hegöi igu (gitö somuhua). Hadia nifatenge Yehowa ndra matua daʼö ba wangalui Yesu? Tenga.

Bongi daʼö, fahuhuo Yehowa khö Yosefo ba wangifi, ’Omasi Herode wamunu Yesu. Ohe woʼomou hegöi onomö ba Miserai. Ba daʼö miʼiagö irege ufatunö khömi hawaʼara tola mangawuli ami.’ Iʼanemai mofanö Yosefo awö nösi nomonia ba Miserai.

No iwaʼö Yehowa khö ndra matua si otarai Gatumbukha andrö enaʼö böi lafuli ira khö Herode. Börö me lö iʼila tohare ira, mofönu sibai Herode. Ba börö me lö iʼila hezo so Yesu, ifaretakö enaʼö labunu fefu nono matua ba Mbetilekhema si fagölö döfi khö Yesu. Hizaʼi, lö sametaʼu Yesu ba Miserai.

 Ba gafuriata, mate Herode. Imane Yehowa khö Yosefo, ’Tola mangawuli ami.’ Börö daʼö, mangawuli Yosefo, Maria hegöi Yesu ba Gizaraʼeli, toröi ira ba Nazareta.

’Simanö daromaligu andrö, si otarai mbawagu mofozu zomasido ibeʼe ba ifalua nifaʼoheʼögu yaʼia.’​—Yesaya 55:11