Asese faröi niha Yehuda khö Yehowa ba lafosumange lowalangi faya. Ba zi hauga fakhe, iʼalui lala Yehowa ba wanolo yaʼira. Ato ifatenge zamaʼeleʼö ba wamangelama yaʼira hizaʼi lö lafondrondrongo. Laʼoʼaya-aya ndra samaʼeleʼö andrö. Hadia nifalua Yehowa enaʼö laböhöli wanömba adu?

Oya soi zi no ifatörö Nebukanesa razo Mbabilona. Me isuwö Yeruzalema siföföna sibai, iraʼu razo Yoyakhi simanö göi ndra sohalöwö sebua faka, ira saradadu ba tuka sogonekhe iʼohe ba Mbabilona. Ihalö göi fakake segebua böli ba gosali Yehowa. Aefa daʼö, ifili Zedekia tobali razo Yehuda.

Ba wamobörö, moloʼö Zedekia khö Nebukanesa. Hizaʼi, soi ba zi fasui daʼö awö ndra samaʼeleʼö sofaya lawaʼö khö Zedekia enaʼö lalawa Mbabilona. Ifangelama ia Yeremia, ’Na molawa ndraʼugö Tua, ba alua wabunusa ba Yehuda, lofo ba fökhö.’

Me no aefa walu fakhe mamatörö Zedekia, molawa ia khö Mbabilona. Iʼandrö wanolo moroi khö ndra saradadu Miserai. Andrö ifatenge zaradadunia Nebukanesa ba wanuwö Yeruzalema, ba lafazökhi nosera ba zi fasui banua andrö. Imane Yeremia khö Zedekia, ’No iwaʼö Yehowa, na mangala ndraʼugö khö Mbabilona Tua, teʼorifi ndraʼugö hegöi banua daʼa. Hizaʼi na löʼö, latunu Yeruzalema ira niha Mbabilona ba labeʼe ndraʼugö bakha ba gurunga.’ Imane Zedekia, ’Lö mangala ndraʼo!’

 Döfi amatonga aefa daʼö, laboʼai dowa Yeruzalema ira saradadu Mbabilona ba möi ira bakha aefa daʼö latunu gosali, labunu niha sato ba ribu niha laraʼu.

Moloi Zedekia moroi ba Yeruzalema hizaʼi lagohi ia ira niha Mbabilona. Laraʼu ia ahatö ba Yerikho ba laʼohe ia khö Nebukanesa. Labunu fefu ndraononia föna hörönia. Aefa daʼö, lakoe nono hörö Zedekia ba labeʼe ia bakha ba gurunga. Ba gafuriata, mate Zedekia ba daʼö. Hizaʼi, no fazazi Yehowa ba niha Yehuda, ’Na no aefa zi 70 fakhe, uʼohe ami mangawuli ba Yeruzalema.’

Hadia zalua khö ndra si bohou ebua niʼohe ba Mbabilona? Hadia lö faröi ira khö Yehowa?

”He Lowalangi Yehowa Fondrege Zabölö, sindruhu ba atulö gangetulamö.”​—Famaʼeleʼö 16:7