Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Hadia Nifaha’ö Zura Ni’amoni’ö Khöda?

Onönöta

Onönöta

1 YEHOWA

Töi Lowalangi ya’ia da’ö Yehowa ba lafo’eluaha ia ”Ya’ia Mbörö Wa Alua”. Yehowa andrö Lowalangi si fahöna fa’abölö, ba samazökhi hadia ia. So khönia wa’abölö ba wamalua somasi ia.

Ba li Heberai’o, tesura döi Lowalangi öfa hurufo. Ba li Inggris, lasura ia tobali YHWH mazui JHVH. Me awena lasura Zura Ni’amoni’ö ba li Heberai’o tesöndra döi Lowalangi arakhagö 7.000 kali. Fabö’ö-bö’ö wanötöi töi Yehowa si faudu ba li ni’oguna’ö niha.

Faza 1, ngenoli 15

2 SURA NI’AMONI’Ö ”EHEHA LOWALANGI ZAME’E BA DÖDÖ NIHA”

Lowalangi Zama’anö ösi Zura Ni’amoni’ö, i’oguna’ö niha ba wanura ya’ia. Simane kafalo wohalöwö i’andrö khö sekretarisnia ba wanura bua gera-erania. Simanö göi Lowalangi i’oguna’ö gehehania ba wanuturu lala ba zanura Sura Ni’amoni’ö ena’ö lasura mbua gera-erania. Oya lala ni’oguna’ö geheha ba wangombakha bua gera-era Lowalangi, i’odela gangilata mazui fangifi, awena lasura.

Faza 2, ngenoli 5

3 GOI-GOI

Dane-dane wamaha’ö ba Zura Ni’amoni’ö zanolo ya’ita ba wangai angetula si sökhi. Duma-dumania, so goi-goi sanguma’ö, ”ifakiko mböwö si sökhi huhuo si lö sökhi”, da’a zi tobali famaha’ö khöda wa tola tobali ita niha si sökhi mazui niha si lö sökhi, te’odaligö ha’ökhö fariawö ita. (I Korindro 15:33) So göi goi-goi sanguma’ö ”hadia  nitaru niha sa, da’ö göi nibasinia dania”, da’ö zi tobali famaha’ö khöda wa hasambalö tatema zulö ba nifaluada.Galatia 6:7.

Faza 2, ngenoli 12

4 FAMA’ELE’Ö

Turia moroi khö Lowalangi. Ifatunö khöda gohitö dödö Lowalangi, amuata si sökhi, ba samatunö oroisa ba fanguhukunia. So duria samatunö hadia zalua ba zi so föna. Oya ngawalö wama’ele’ö ba Zura Ni’amoni’ö si no alua.

Faza 2, ngenoli 13

5 FAMA’ELE’Ö SANANDRÖSA KHÖ MESIA

Oya wama’ele’ö ba Zura Ni’amoni’ö sanandrösa khö Mesia salua ba wa’auri Yesu. Faigi kotak ” Fama’ele’ö sanandrösa khö Mesia”.

Faza 2, ngenoli 17, nisura ba gahe zura.

6 OHITÖ DÖDÖ YEHOWA BA GULIDANÖ

Ifazökhi gulidanö faradaiso Yehowa si tobali nahia niha sangomasi’ö ya’ia. Lö si tebulö gohitö dödönia. Ba zi lö aratö, ihori fefu wa’alösökhi Lowalangi ba ibe’e wa’auri si lö aetu khö nono mbanuania.

Faza 3, ngenoli 1

7 AFÖKHA SATANA

Satana ya’ia da’ö mala’ika si oföna molawa Lowalangi. Lafotöi ia Satana, eluahania ”Solawa”, börö me ilawa Yehowa. Ba lafotöi göi ia Afökha, eluahania ”Samöbögö si Lö Duhu”. Labe’e töinia da’ö börö me itandrawaisi Lowalangi ba ilimo niha gulidanö.

Faza 3, ngenoli 4

  8 MALA’IKA

Ifazökhi Yehowa ndra mala’ika ara fatua lö nifazökhinia gulidanö. Lafazökhi ira ena’ö toröi ba zorugo. So ngaotu zuta wa’ato ndra mala’ika. (Danieli 7:10) So döira ba fabö’ö-bö’ö gamuatara, ba ira mala’ika si lö faröi si so fangide-ngide’ö lö latema zumange nibe’e niha khöra. Fabö’ö-bö’ö ngawawara, ba fabö’ö-bö’ö halöwöra. So zohalöwö föna dadaoma Yehowa, so zohalöwö ba wama’ema oroisania, so zohalöwö ba wanolo ba sanuturu lala ba nono mbanuania si so ba gulidanö, so zamalua fanguhuku Lowalangi, ba so göi zanuriaigö turia somuso dödö. (Zinunö 34:8; Fama’ele’ö 14:6; 22:8, 9) Ba zi so föna, fao ira khö Yesu ba wasuwöta ba Hamagedo.Fama’ele’ö 16:14, 16; 19:14, 15.

Faza 3, ngenoli 5; Faza 10, ngenoli 1

9 HORÖ

Gofu hadia nirasoida, ni’era-erada mazui nifaluada si lö faudu ba zomasi Yehowa lafotöi da’ö horö. Börö horö wa tola tekiko wahuwusada khö Lowalangi, andrö ibe’e khöda goroisa ba goi-goi si tola manolo ya’ita ena’ö böi tafalua horö ni’odödögö. Fefu niwöwöi Yehowa ba mböröta oi mo’ahonoa, hiza’i me molawa Gadamo ba Khawa khö Yehowa, aekhu ira ba horö ba lö mo’ahonoa ira sa’e. Andrö atua ira ba mate, ba börö horö ondröita moroi khö Gadamo wa atua ita iada’a ba mate.

Faza 3, ngenoli 7; Faza 5, ngenoli 3

10 HAMAGEDO

Fasuwöta Lowalangi ba wangohori ulidanö tana khö Zatana ba ngawalö wa’alösökhi.

Faza 3, ngenoli 13; Faza 8, ngenoli 18

 11 BANUA LOWALANGI

Banua Lowalangi ya’ia da’ö famatörö nifasindro Yehowa ba zorugo. Yesu Keriso nituyu tobali Razo. Ba zi so föna i’oguna’ö Mbanuania Yehowa ba wangohori fefu si lö sökhi. Mamatörö dania Mbanua Lowalangi ba gulidanö.

Faza 3, ngenoli 14

12 YESU KERISO

Yesu zi oföna ifazökhi Lowalangi moroi ba danö bö’ö. Ifatenge ia Yehowa ba gulidanö, mate salahi niha. Me no aefa labunu Yesu, isusugi ia Yehowa. Iada’a mamatörö ia ba zorugo tobali Razo ba Mbanua Lowalangi.

Faza 4, ngenoli 2

13 FAMA’ELE’Ö SI 70 MIGU

No ifa’ele’ö Sura Ni’amoni’ö hawa’ara tohare Mesia. Tohare ia ba gangohorita zi 69 migu, nibörötaigö me döfi 455 SM ofeta ba ndröfi 29 M.

Hana wa ta’ila wa ba da’ö ofeta ia ba ndröfi si 29 M? Si 69 migu tebörögö me döfi 455 SM, me ofeta Nehemia ba Yeruzalema ba ibörögö wamazökhi banua andrö. (Danieli 9:25; Nehemia 2:1, 5-8) Simane na lawa’ö ”salusi”, si so ba wangera-ngerada 12 ngawua, simanö göi na lafotöi ”migu”, tatu si so ba wangera-ngerada 7 ngaluo. Migu si so ba wama’ele’ö andrö tenga eluahania migu si fitu ngaluo, tobali migu si fitu fakhe. Simane sasese la’oguna’ö ba Zura Ni’amoni’ö ”sara ngaluo ba döfi labe’e”. (IV Moze 14:34; Hezekieli 4:6) Eluahania ero samigu fitu fakhe wa’arania, si 69 migu eluahania 483 fakhe (69 x 7). Na ta’erai zi 483 fakhe i’otarai me döfi 455 SM, aekhu ia ba ndröfi 29 M. Tefaudu me tebayagö idanö Yesu ba tobali Mesia!Luka 3:1, 2, 21, 22.

 So wama’ele’ö nasa sanandrösa ba migu bö’ö, ya’ia da’ö so gonönöta ndröfi fitu fakhe. Bakha ba zi fitu fakhe andre ba da’ö labunu Mesia, me döfi 33 M. Ba ndröfi 36 M, tebörögö wanuriaigö turia somuso dödö sanandrösa ba Mbanua Lowalangi ba ngawalö soi tenga ha ba niha Yehuda.Danieli 9:24-27.

Faza 4, ngenoli 7

 14 FAMAHA’Ö FAYA SANANDRÖSA LOWALANGI SAMBUA TÖLU

No ifaha’ö Sura Ni’amoni’ö wa Yehowa Lowalangi andrö Samazökhi, ba ya’ia zamazökhi Yesu fatua lö iwöwöi danö bö’ö. (Kolose 1:15, 16) Yesu andrö tenga Lowalangi Fondrege Zabölö. Lö irai tumbu ba dödönia ena’ö fagölö ia khö Lowalangi. Simane me iwa’ö, ”No sebua moroi khögu Nama.” (Yohane 14:28; I Korindro 15:28) Oya agama samaha’ö Lowalangi Sambua Tölu, ya’ia da’ö Ama, Ono, ba eheha ni’amoni’ö. Ngawua wehede ”Lowalangi Sambua Tölu” lö si tesura ba Zura Ni’amoni’ö. Famaha’ö faya da’ö.

Eheha ni’amoni’ö no fa’abölö Lowalangi si lö oroma ni’oguna’önia ba wamalua somasi ia. Lö moboto ia. Duma-dumania, niha Keriso si föföna, ”fahöna khöra geheha ni’amoni’ö”, ba imane Yehowa, ”Ulau ba niha fefu wöfö gehehagu.”Halöwö Zinenge 2:1-4, 17.

Faza 4, ngenoli 12; Faza 15, ngenoli 17

15 RÖFA

Niha Keriso sindruhu lö la’oguna’ö röfa ba wamosumange Lowalangi. Hadia mbörö?

  1. No ara la’oguna’ö röfa ba agama faya. Meföna la’oguna’ö ia ba wamosumange talu mbanua hegöi ba wamalua upacara seks kekafiran. 300 fakhe me no aefa mate Yesu, lö la’oguna’ö röfa niha Keriso ba wamosumange Lowalangi. Hiza’i, Kaisar Romawi Konstantin ifazökhi röfa tobali tandra niha Keriso. La’oguna’ö da’ö ena’ö abölö tehöngö niha Keriso. Hiza’i, lö mo’amakhaita röfa andrö khö Yesu Keriso. Imane New Catholic Encyclopedia, ”No so röfa fatua lö si so niha Keriso hegöi ba zi tenga niha Keriso.”

  2.    Tenga ba röfa simane si faduhu dödö niha mate Yesu. Sindruhunia ngawua wehede ”röfa” ba li ndrawa Heleni ya’ia da’ö ”eu sadölö”, mazui ”si sara töla geu”. Imane The Companion Bible, ”Ngawua wehede andrö ba li ndrawa Heleni tenga da’ö geluahania dua rozi geu nifariwa.” Mate Yesu ba zi sara töla geu.

  3. Lö omasi Yehowa na ta’oguna’ö nadu mazui hadia ia ba wamosumange ya’ia.II Moze 20:4, 5; I Korindro 10:14.

Faza 5, ngenoli 12

16 FANÖRÖ TÖDÖ FA’AMATE YESU

Ibe’e goroisa Yesu khö ndra nifaha’önia ba Wanörö Tödö fa’amatenia. Lafalua da’ö ero röfi ba zi 14 Nisa, si fagölö ba ginötö me lafalua gowasa Fasa iraono Gizara’eli. Roti ba agu, no amaedola mboto ba do Yesu, lafa’ema khö zangondrasi Fanörö Tödö andrö. Niha si fao khö Yesu ba wamatörö ba zorugo, la’a roti ba labadu agu. Niha sanötöna fa’auri si lö aetu ba gulidanö, la’ondrasi Wanörö Tödö andrö, hiza’i lö la’a roti ba lö labadu agu.

Faza 5, ngenoli 21

17 NOSO

Ngawua wehede ”noso” manandrösa ia ba (1) zi samösa niha, (2) ba gurifö, mazui (3) fa’auri niha ba urifö. Duma-dumania:

  • Samösa niha. Me iwöwöi Gadamo Lowalangi, imane ba I Moze 2:7, ”Tobali sonoso niha andrö.”

  • Urifö. ”Me Anönö Danö Idanö, imane Sura Ni’amoni’ö, ”He fofo ba he urifö niha ba he utu ndru’u, fefu hadia ia zanana-nana ba gulidanö, ba dozi niha. Fefu zi so noso ba nikhu, si so ba danö yawa, ba mate.”I Moze 7:21, 22.

  • Fa’auri niha ba urifö. Imane Yehowa khö Moze, ”Noa sa ahori mate zangalui nosou fefu.”II Moze 4:19, NW.

     Baero da’ö, na so nifalua niha soroi ba ’nosonia ma’asambua’, eluahania aoha gölönia wamalua, ihorigö wa’abölönia.Matai’o 22:37; V Moze 6:5.

Faza 6, ngenoli 5; Faza 15, ngenoli 17

18 EHEHA

Ngawua wehede ”geheha” ba li Heberai’o hegöi ba li ndrawa Heleni fabö’ö-bö’ö geluahania ba Terjemahan Dunia Baru li Inggris. Tola da’ö geluahania si tebai i’ila niha, simane angi, noso niha mazui urifö. Tola göi da’ö geluahania boto eheha mazui eheha ni’amoni’ö, fangabölö moroi khö Lowalangi. Lö ifaha’ö ita Sura Ni’amoni’ö wa auri noso niha si no mate.Zinunö 104:29; Matai’o 12:43, NW; Luka 11:13.

Faza 6, ngenoli 5; Faza 15, ngenoli 17

19 GEHENA

Gehena ya’ia da’ö töi mbawa danö sahatö ba Yeruzalema, nahia wanunu sasao. Tenga eluahania ba ginötö Yesu so gurifö mazui niha nitunu auri ba da’ö. Gehena andre ha amaedola nahia niha si no mate si lö fanötöna. Me iwa’ö Yesu wa so nitibo’ö ba Gehena, eluahania fa’atekiko si lö aetu.Matai’o 5:22; 10:28, NW.

Faza 7, ngenoli 20

20 FANGANDRÖ ZO’AYA

Da’ö wangandrö nibe’e Yesu me ifaha’ö ndra nifaha’önia ba wangandrö. Lafotöi ia fangandrö Zo’aya. Duma-dumania, ifaha’ö ita Yesu ena’ö ta’angandröi:

  • ”Yate’amoni’ö döiu”

    Ta’andrö ena’ö te’amoni’ö döi Yehowa moroi ba ngawalö zi lö sökhi. Ena’ö si so ba zorugo ba ba gulidanö lafosumange ba la’amoni’ö döi Lowalangi.

  •  ”Yatobali Banuau fefu niha”

    Ta’andrö ena’ö ihori gulidanö tana khö Zatana famatörö Lowalangi, ena’ö mamatörö ia ba gulidanö, ba ibali’ö faradaiso gulidanö.

  • ”Ya’itörö zomasi ndra’ugö . . . ba gulidanö”

    Ta’andrö ena’ö alua gohitö dödö Lowalangi ba gulidanö, lasöndra wa’auri si lö aetu ba Waradaiso niha so’ahonoa simane ohitö dödö Yehowa ba mböröta.

Faza 8, ngenoli 2

21 HÖLI

Ibe’e höli Yehowa ba wangefa’ö niha gulidanö moroi ba horö ba ba wa’amate. Höli no amaedola ba wowöli mangawuli fa’auri so’ahonoa si no itayaigö Adamo, ba ba wanga’azökhi mangawuli amakhaita niha khö Yehowa. Ifatenge Yesu Lowalangi ba gulidanö ena’ö mate ba wangöhöli niha. Me no mate Yesu, awena so dötönafö ba niha gulidanö ba wanöndra fa’auri si lö aetu ba ba wogamö fa’amo’ahonoa.

Faza 8, ngenoli 21; Faza 9, ngenoli 13

22 HANA WA TEBAI TA’OLIFUGÖ NDRÖFI 1914?

Nifa’ele’ö Danieli nitutunö ba faza 4 ba mbuku andre, zamaha’ö ya’ita wa no mosindro Mbanua Lowalangi me döfi 1914.

Fama’ele’ö: Ibe’e wangifi khö Razo Nebukanesa Yehowa sanandrösa ba geu sebua ni’obö. Ba wangifi andrö no murate faoma si’öli mbörö geu ni’obö andrö ena’ö lö moliwiö irugi zi ”mewitu fakhe” si no muhonogöi khönia. Na no ahori zi mewitu fakhe, awena tola moliwiö geu andrö.—Danieli 3:31; 4:7-13.

 Hadia geluaha wama’ele’ö andrö: Eu amaedola wamatörö Lowalangi. Ba zi ha’uga fakhe, ifataro razo ba Yeruzalema Yehowa ba wamatörö iraono Gizara’eli. (I Nga’ötö 29:23) Fefu razo nifataro Lowalangi andre lalawa ia, andrö lö a’ozu wamatöröra. Adudu Yeruzalema me döfi 607 SM. Ba da’ö ibörögö si ”mewitu fakhe” andrö. (II Razo 25:1, 8-10; Hezekieli 21:25-27) Aefa da’ö imane Yesu, ”Ba nihundra-hundra niha baero dania Yeruzalema, irege no mo’ahonoa götö niha baero andrö”, eluaha niwa’önia andrö manandrösa ba zi ”mewitu fakhe”. (Luka 21:24) Lö sahori zi ”mewitu fakhe” andrö me so Yesu ba gulidanö. No ifabu’u Yehowa wa ifataro Razonia dania ba gafuriata zi ”mewitu fakhe” andrö. Yesu zi tobali Razo ba wamatörö andre, solohe howu-howu sebua ba nono mbanua Lowalangi ba gulidanö sagötö fa’ara.Luka 1:30-33.

Fa’ara zi ”mewitu fakhe”: Fa’ara zi ”mewitu fakhe” ya’ia da’ö 2.520 fakhe. Na ta’erai zi 2.520 fakhe i’otarai ndröfi 607 SM, aekhu ia ba ndröfi 1914. Ba da’ö ibörögö Yehowa ifataro Yesu Keriso tobali Razo ba Mbanua Lowalangi ba zorugo.

Hana wa tesöndra zi 2.520 fakhe? Ifatunö ba Zura Ni’amoni’ö wa si tölu amatonga fakhe fa’arania 1.260 ngaluo. (Fama’ele’ö 12:6, 14) Si ”mewitu fakhe” ya’ia da’ö dua kali tölu fakhe amatonga, mazui 2.520 ngaluo. Si 2.520 ngaluo fagölö ira zi 2.520 fakhe, börö me so ba zura, ”sara ngaluo, ba döfi labe’e.”IV Moze 14:34; Hezekieli 4:6.

Faza 8, ngenoli 23

 23 MIKHAELI SALAWA MALA’IKA

Fehede ”salawa mala’ika” eluahania ”satua mala’ika”. Ba Zura Ni’amoni’ö ha samösa nifotöi salawa mala’ika, töinia Mikhaeli.Danieli 12:1; Yuda 9.

Mikhaeli andrö Salawa mala’ika si lö faröi khö Lowalangi. Imane ba Wama’ele’ö 12:7, ”Mikhaeli andrö ba mala’ikania, ba fasuwö ba naga andrö . . . awö mala’ikania.” Imane sura Wama’ele’ö, Yesu andrö dania zi tobali Salawa mala’ika Lowalangi, ba Mikhaeli andrö töi bö’ö khö Yesu.Fama’ele’ö 19:14-16.

Faza 9, ngenoli 4

24 NGALUO SAFURIA

Eluahania inötö wa’alua ngawalö zi lö sökhi ba gulidanö fatua lö ihori gulidanö tana khö Zatana Banua Lowalangi. Fagölö ia na lawa’ö ”fa’atua danö” mazui ’fe’aso Nono niha’, inötö sasese ifatunö Sura Ni’amoni’ö sanandrösa ba zalua andrö. (Matai’o 24:3, 27, 37) Tebörögö ’ginötö safuria’ andrö me mamatörö Mbanua Lowalangi ba zorugo ba ndröfi 1914, ba afuriatania dania ba Hamagedo na ifakiko gulidanö tana khö Zatana.II Timoteo 3:1; II Fetero 3:3.

Faza 9, ngenoli 5

25 FEMAOSO ZI MATE

Me isusugi niha si no mate Lowalangi da’ö nifotöi femaoso zi mate. So dasiwa niha si no tesusugi nisura ba Zura Ni’amoni’ö. Nisusugi Gelia, Elisa, Yesu, Fetero, ba Faulo. Wa tola lafalua dandra sahöli-höli dödö andrö börö wa’abölö moroi khö Lowalangi. No ifabu’u Yehowa wa isusugi dania ’niha satulö ba si lö atulö’ ba wanöndra fa’auri ba gulidanö. (Halöwö Zinenge 24:15) So göi  nisusugi si möi ba zorugo nifatunö ba Zura Ni’amoni’ö. Ya’ira andre si no ibayoini Lowalangi si fao awö Yesu.Yohane 5:28, 29; 11:25; Filifi 3:11; Fama’ele’ö 20:5, 6.

Faza 9, ngenoli 13

26 BEKHU (SI FAKELEMU)

Fakelemu sambua lala wahuhuosa ba mbekhu, tola fahuhuo samösa ira, ba so göi zangodela duku ma sama’ele’ö. Lafalua zimane da’ö börö me faduhu dödöra wa auri noso niha si no mate ba tobali bekhu si so fa’abölö. Bekhu andre göi ladönisi dödö niha ba wolawa Lowalangi. Oya gamuata so’amakhaita ba mbekhu, simane famaigi döfi, mama’ele’ö, mame’e fokasi, fakelemusa, nifaduhusi tödö niha meföna. Oya mbuku, majalah, horoskop, film, gambara, sinunö so’amakhaita ba mbekhu, hulö na lö fasala wamaigida. Oya nifalua na lako’o zi mate, simane na labe’e wangasi, latörö tödö wa’amate, fame’e gö ba zi no mate, ritus kejandaan, mazui owasa so’amakhaita ba niha si no mate, fefu da’ö göi mo’amakhaita ba mbekhu. So göi niha sangoguna’ö dalu-dalu ba ginötö la’alui lala wangoguna’ö fa’abölö moroi ba mbekhu.Galatia 5:20; Fama’ele’ö 21:8.

Faza 10, ngenoli 10; Faza 16, ngenoli 4

27 FA’ASALAWA YEHOWA

Yehowa no Lowalangi Fondrege Zabölö, ba ya’ia zomböi banua siawa awö danö. (Fama’ele’ö 15:3) Andrö wa ya’ia Zangokhögö fefu hadia ia ba ya’ia zalawa ba nifazökhinia. (Zinunö 24:1; Yesaya 40:21-23; Fama’ele’ö 4:11) Ya’ia zanga’asogö goi-goi ba nifazökhinia. Yehowa zi tola motatugöi haniha zi tobali samatörö. Ta’o’awögö wa’asalawa Lowalangi na ta’omasi’ö ba ta’o’ö linia.I Nga’ötö 29:11.

Faza 11, ngenoli 10

 28 FONDRU-NDRUGÖ ONO BA DALU

Fondru-ndrugö ono ba dalu no amuata ni’odödögö ba wamunu ono si lö tumbu nasa. Tenga börö wa no alabu mazui börö wökhönia. I’otarai me awena so ia ba dalu ninania, lafotöi ia sa’e samösa niha.

Faza 13, ngenoli 5

29 TRANSFUSI DARAH

Da’a nifalua ndra doto ba wame’e do si no muhenaigö mazui do niha bö’ö ba mboto zi samösa niha. Itaria ahori la’oguna’ö fefu ndro andrö mazui fazambua moroi ba zi öfa ngawalö komponen utama darah. Si öfa komponen utama darah ya’ia da’ö, plasma, sel darah merah, sel darah putih, ba keping darah.

Faza 13, ngenoli 13

30 DEGU-DEGU

Ba Zura Ni’amoni’ö, ngawua wehede ”degu-degu” tenga eluahania lahuku. Na lategu ita, labe’e khöda wanuturu lala, famaha’ö, ba mene-mene. Lö irai amu’i Yehowa ba niha nitegunia. (Gamaedola 4:1, 2, NW) Yehowa duma-duma si sökhi ba zatua. Ibe’e degu-degu si sökhi irege omasi niha latema. (Gamaedola 12:1) I’omasi’ö nono mbanuania Yehowa ba ifaha’ö ira. Ibe’e wanuturu lala na itaria fasala ni’era-erara ba itolo ira ena’ö la’okhögö wangera-ngera ba amuata somasi Lowalangi. Satua, labe’e degu-degu ba ndraonora ena’ö aboto ba dödöra hana wa moguna so khöra wolo’ö. Moguna göi mufaha’ö ira ba wangomasi’ö Yehowa, fangomasi’ö Taromalinia, Sura Ni’amoni’ö, ba ena’ö aboto ba dödöra goi-goinia.

Faza 14, ngenoli 13

 31 BEKHU

Tebai ta’ila mbekhu börö me boto eheha ira si so fa’abölö. Ya’ira andre mala’ika si lö sökhi. Börö me lö la’o’ö li Lowalangi, andrö wa tobali ira mala’ika si lö sökhi si fa’udu khö Lowalangi. (I Moze 6:2; Yuda 6) Fao ira khö Zatana ba wolawa Yehowa.V Moze 32:17; Luka 8:30; Halöwö Zinenge 16:16; Yakobo 2:19.

Faza 16, ngenoli 4