Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Hadia Nifaha’ö Zura Ni’amoni’ö Khöda?

 FAZA FELELIMA

Lala ba Wamosumange Lowalangi

Lala ba Wamosumange Lowalangi

1. Haniha zamatunö khöda lala satulö ba wamosumange Lowalangi?

OYA agama sanguma’ö no lafaha’ö zatulö sanandrösa khö Lowalangi. Sindruhunia sa faya, fabö’ö nifaha’öra sanandrösa khö Lowalangi, awö lala wamosumange ya’ia. Hewisa ena’ö ta’ila lala sindruhu ba wamosumange Lowalangi? Ha Yehowa zi tola mamatunö khöda.

2. Hewisa ena’ö ta’ila lala satulö ba wamosumange Lowalangi?

2 No ibe’e khöda Zura Ni’amoni’ö Yehowa ena’ö ta’ila lala satulö ba wamosumange ya’ia. Andrö, faha’ö ndra’ugö ba Zura Ni’amoni’ö, itolo’ö Yehowa ba ösöndra howu-howu ba wamaha’önia börö me so so dödönia ndra’ugö.Yesaya 48:17.

3. Hadia ni’andrö Lowalangi khöda?

3 So zanguma’ö fefu agama itema Lowalangi, hiza’i tenga simanö wamaha’ö Yesu. Imane, ”Lö dozi molala dania ba Mbanua zorugo andrö zi fa so’aya khögu, wanguma’ö: He So’aya! He So’aya! Ha solo’ö somasi Namagu andrö, si so ba zorugo.” Andrö moguna tafaha’ö ita ba zomasi Lowalangi ba tafalua. Börö me ifagölösi Yesu niha si lö molo’ö li Lowalangi simane ”solau si lö atulö”.Matai’o 7:21-23.

4. Hadia niwa’ö Yesu so’amakhaita ba wamalua somasi Lowalangi?

4 Ifangelama ita Yesu, oya wanaisi na ta’o’ö li Lowalangi. Imane, ”Mitörö mbawa göli sise-ise andrö,  me no ebua mbawa göli ba me no ebolo lala saekhu ba wa’atekiko andrö, ba me no ato zanörö ya’ia. Ba me no ide-ide mbawa göli ba me no ise-ise lala saekhu ba wa’auri andrö, ba me lö ato zanöndra ya’ia.” (Matai’o 7:13, 14) Lala sise-ise, mazui lala sindruhu ba wamosumange Lowalangi zolohe ya’ita ba wa’auri si lö aetu. Lala sebolo, mazui lala selungu ba wamosumange Lowalangi zolohe ya’ita ba wa’amate. Hiza’i, lö omasi Yehowa na mate niha. Andrö ibe’e ginötö ba niha fefu wamaha’ö ya’ira ba zindruhu sanandrösa khönia.II Fetero 3:9.

LALA SINDRUHU BA WAMOSUMANGE LOWALANGI

5. Hewisa ena’ö ta’ila haniha zindruhu zamosumange Lowalangi?

5 Imane Yesu tola ta’ila haniha zindruhu zamosumange Lowalangi, hadia zi faduhu dödöra, ba hadia nifaluara. Imane nasa, ”Ba mbua-buara aboto ba dödömi ira.” Aefa da’ö imane zui, ”I’owua mbua si sökhi fefu geu si sökhi.” (Matai’o 7:16, 17) Tenga eluahania fefu zamosumange Lowalangi mo’ahonoa. Hewa’ae simanö, laforege wamalua satulö. Datafaigi hadia zanolo ya’ita ena’ö ta’ila haniha zindruhu zamosumange Lowalangi.

6, 7. Hana wa te’odane-dane wamaha’ö agama sindruhu ba Zura Ni’amoni’ö? Hadia duma-duma nibe’e Yesu?

6 Te’odane-dane ba Zura Ni’amoni’ö wamaha’öda. Imane Sura Ni’amoni’ö, ”Fefu nösi zura andrö, ba eheha Lowalangi zame’e ba dödö niha, ba moguna ia ba wamaha’ö, ba ba wangotu’ö ba ba wanga’azökhi, ba ba wamamaha ba wa’atulö dödö, ena’ö mo’ahonoa genoni Lowalangi andrö, si no to’ölö ba ngawalö  mbua-bua si sökhi andrö fefu.” (II Timoteo 3:16, 17) Imane Faulo ba niha Keriso, ”Me no mifonaha Daromali Lowalangi andrö, nirongomi khöma, tenga simane taromali niha, no simane sindruhunia, simane taromali Lowalangi.” (I Tesalonika 2:13) Famaha’ö sindruhu te’odane-dane ba Daromali Lowalangi, ya’ia da’ö Sura Ni’amoni’ö. Tenga ba wa’atua-tua niha, mazui hada, ba ma tanö bö’önia.

7 Fefu wamaha’ö Yesu te’odane-dane ba Daromali Lowalangi. (Baso Yohane 17:17.) Asese i’oguna’ö Yesu Nösi Zura. (Matai’o 4:4, 7, 10) La’o’ö duma-duma nibe’e Yesu niha solo’ö khö Lowalangi ba la’oguna’ö Zura Ni’amoni’ö ba wamaha’öra.

8. Hadia nifaha’ö Yesu ya’ita ba wamosumange Yehowa?

8 Ha Yehowa nifosumangeda. Imane Zinunö 83:19, ”Wa no ha ya’ugö zotöi Yehowa, wa ha ya’ugö Wondrege Zalawa ba gulidanö ma’asagörö.” Omasi Yesu na aboto ba dödö niha haniha Lowalangi, andrö ifatunö khöra döi Lowalangi. (Baso Yohane 17:6.) Imane Yesu, ”Khö Zo’aya Lowalangiu, mangalulu ndra’ugö ba ha ya’ia öfosumange.” (Matai’o 4:10) Ta’o’ö duma-duma nibe’e Yesu börö me ya’ita solo’ö khö Lowalangi. Ha Yehowa nifosumangeda, ta’oguna’ö döinia, ba tafaha’ö niha bö’ö sanandrösa ba döi Lowalangi ba hadia nifaluania khöda.

9, 10. Hewisa wangomasi’öda awöda?

9 Ta’omasi’ö nawöda soroi ba dödö. Ifaha’ö ndra nifaha’önia Yesu ena’ö faoma la’omasi’ö nawöra. (Baso Yohane 13:35.) He fabö’ö-bö’ö mbanua ni’otaraida, he na kayo mazui tosasa, fa’omasi zangosambua’ö ya’ita simane si fatalifusö. (Kolose 3: 14) Lö fao ita ba wasuwöta, ba lö tabunu niha. Imane Sura Ni’amoni’ö, ”Ba da’ö oroma, haniha nono Lowalangi, ba haniha nono Gafökha. Dozi si lö molau satulö, ba tenga moroi ba Lowalangi ira, awö zi lö mangomasi’ö talifusönia.” Aefa da’ö imane zui, ”Faoma ta’omasi’ö nawöda. Böi simane Ka’ino andrö, soroi ba Gafökha, samunu akhinia.”I Yohane 3:10-12; 4:20, 21.

10 Ta’oguna’ö wa’abölöda, inötö, kefeda ba wanolo ba ba wamarou tödö nawöda. (Heberai’o 10:24, 25) ’Talau sa’ae zi sökhi ba niha fefu.’Galatia 6:10.

11. Hana wa fao dödöda wa Yesu lala sofeta khö Lowalangi?

11 Faduhu dödöda wa börö Yesu Keriso tola takhamö wa’auri. Imane Sura Ni’amoni’ö, ”Ba lö fangorifi ba danö bö’ö, ba lö’ö sa göi töi bö’ö nibe’e ba niha, ba gulidanö, ba wangorifi ya’ita.” (Halöwö Zinenge 4:12) No tafaha’ö ita ba Faza 5 ba mbuku andre, wa no ifatenge Yesu Yehowa ba wangöhöli niha samati. (Matai’o 20:28) Yehowa zamili Yesu tobali Razo samatörö ba gulidanö. Andrö wa iwa’ö ba Zura Ni’amoni’ö, o’ö li Yesu na omasi’ö ösöndra wa’auri si lö aetu.Baso Yohane 3:36.

12. Hana wa tebai fao ita ba politik?

12 Lö fao ita ba politik. Lö fao Yesu ba politik. Imane khö Wilato sanguhuku ba Roma, ”Tenga moroi ba gulidanö andre Mbanuagu andrö.” (Baso Yohane 18:36.) Lö faröi ita ba Mbanua Lowalangi simane nifalua Yesu, andrö wa lö fao ita ba politik. Hiza’i, i’o’ou ita Sura Ni’amoni’ö ena’ö ta’o’ö ”li zalawa”, ya’ia da’ö famareta. (Roma 13:1) Ta’o’ö goi-goi famareta ba mbanua si toröi ya’ita.  Na so goi-goi ndra famareta si lö faudu ba zomasi Lowalangi, ta’o’ö simane nifalua ndra sinenge Yesu, sanguma’ö, ”Ni’o’ö khö Lowalangi, moroi ba wolo’öda ba niha.”Halöwö Zinenge 5:29; Mareko 12:17.

13. Hana wa moguna taturiaigö Mbanua Lowalangi?

13 Faduhu dödöda wa Banua Lowalangi zi tola mangefa’ö ya’ita ba ngawalö gabula dödö. Imane Yesu, ”Teturiaigö dania Mbanua Lowalangi andrö” ba zi sagörö ulidanö. (Baso Matai’o 24:14.) Lö hadöi famatörö niha gulidanö samalua simane nifalua Mbanua Lowalangi. (Zinunö 146:3) Ifaha’ö ita Yesu ba wo’angandröi Banua Lowalangi me imane, ”Yatobali Banuau fefu niha. Ya’itörö zomasi ndra’ugö, hulö ba zorugo, yasimanö göi ba gulidanö.” (Matai’o 6:10) Ifatunö Sura Ni’amoni’ö wa ifakiko fefu wamatörö niha gulidanö Banua Lowalangi, ba ya’ia ”lö tebulö, irugi zi lö aetu”.Danieli 2:44.

14. Molo’ö ya’ugö haniha zindruhu zamosumange Lowalangi?

14 Me no aefa tadunö-dunö da’a fefu, sofu khöu samösa: ’Haniha zangodane-dane famaha’öra ba Zura Ni’amoni’ö? Haniha zanuriaigö töi Lowalangi? Haniha zi faoma mangomasi’ö awöra, ba si faduhu tödö wa Lowalangi zamatenge Yesu ba wangefa’ö ya’ita? Haniha zi lö fao ba politik? Haniha zanuriaigö wa Banua Lowalangi zangeheta ya’ita ba ngawalö gabula dödö?’ Ha ira Samaduhu’ö Yehowa.Yesaya 43:10-12.

HADIA ZOMASI’Ö ÖFALUA?

15. Hadia nifaluada ena’ö itema Lowalangi zumange nibe’eda?

15 Ambö na ha asala faduhu dödöda wa so Lowalangi. Bekhu manö faduhu dödöra wa so ia,  hiza’i lö la’o’ö linia. (Yakobo 2:19) Na omasi ita itema Lowalangi zumange nibe’eda, böi ha faduhu dödöda wa so ia, tobali tafalua zomasi ia.

16. Hana wa ta’aröu’ö ita ba agama sofaya?

16 Na omasi ita itema Lowalangi zumange nibe’eda, ta’aröu’ö ita ba agama sofaya. Imane sama’ele’ö sotöi Yesaya, ”Miheta ami khöra! Mihaogö ami.” (Yesaya 52:11; II Korindro 6:17) Andrö wa ta’aröu’ö ita ba zo’amakhaita ba agama sofaya.

17, 18. Hadia ”Mbabilona Sebua” andrö, ba hana wa ta’aliokö wondröi ya’ia?

17 Hadia agama faya andrö? Ya’ia da’ö samaha’ö lala wamosumange Lowalangi si lö faudu ba Daromali. Tefotöi ia ba Zura Ni’amoni’ö ”Babilona Sebua”. (Fama’ele’ö 17:5) Hadia mbörö? Me no aefa Anönö Danö Idanö ba ginötö Noakhi, oya wamaha’ö agama faya si otarai Mbabilona, si no muzawili ba zi sagörö ulidanö. Duma-dumania, niha si so ba Mbabilona, lafosumange lowalangi si sambua tölu. Simanö göi ba ginötö andre, oya agama samaha’ö wa so Lowalangi si Sambua Tölu. Hiza’i, ifatunö Sura Ni’amoni’ö wa ha samösa Lowalangi sindruhu sotöi Yehowa ba töi Nononia, Yesu. (Yohane 17:3) Faduhu dödö niha Mbabilona wa auri noso niha si no mate, ba noso andrö dania nifakao ba galitö narako. Faya da’ö.—Faigi Gonönöta 14, 17, ba 18.

18 No ifa’ele’ö Lowalangi, lö aratö tefakiko agama faya. (Fama’ele’ö 18:8) Hadia aboto ba dödöu hana wa mu’aliokö wondröi agama faya? Omasi Yehowa Lowalangi na öfalua da’ö fatua so ginötö.Fama’ele’ö 18:4.

Na fao ndra’ugö ba zamosumange Yehowa, awena tobali ösi nomo wa’afatalifusöta ndra’ugö ba zi sagörö ulidanö

19. Hewisa wangosinangegö Yehowa ya’ugö na no ö’o’ö ia?

 19 Na no öhalö gangetula ba wondröi agama faya ba ö’o’ö Yehowa, ato nawöu mazui ösi nomou si lö fao tödö khöu ba lagohi ndra’ugö. Hiza’i, lö iröi ndra’ugö Yehowa. Tobali ndra’ugö ösi nomo ba wa’afatalifusöta ba zi sagörö ulidanö si faoma mangomasi’ö awöra, ba ösöndra wa’auri si lö aetu ba gulidanö si bohou khö Lowalangi. (Mareko 10:28-30) Tola manö awöu mazui ösi nomou solohi ya’ugö börö me öfosumange Yehowa, ifuli adöni dödöra ba wamaha’ö ya’ira ba Zura Ni’amoni’ö.

20. Hana wa moguna tafosumange Lowalangi si faudu ba zomasi ia?

20 Lö aratö ihori Lowalangi fefu zi lö sökhi, ba musindro Mbanuania ba gulidanö. (II Fetero 3:9, 13) Inötö sahöli-höli dödö da’ö! Fefu niha lafosumange Yehowa si faudu ba zomasi ia. Andrö, aliokö wangai angetula iada’a, ba fosumange Lowalangi si faudu ba zomasi ia.