Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Hadia Nifaha’ö Zura Ni’amoni’ö Khöda?

 FAZA FELE’ÖFA

Tola Ohahau Dödöu ba Wongambatö

Tola Ohahau Dödöu ba Wongambatö

1, 2. Hadia zomasi Yehowa ba zi no mongambatö?

LOWALANGI YEHOWA zanga’asogö fongambatö si föföna. Imane Sura Ni’amoni’ö, me no aefa ifazökhi ndra alawe andrö ba ”ifasao ba niha”. Omuso sibai dödö Gadamo, andrö imane wanguma’ö, ”Töla föfö dölagu da’ö ba nagole föfö nagolegu.” (I Moze 2:22, 23) Da’ö zangoroma’ö wa omasi Yehowa na ohahau dödö zi no mongambatö.

2 Alimagö sibai, ba ginötö andre ato niha si lö fa’ohahau dödö ba wongambatö. Hiza’i, oya goi-goi ba Zura Ni’amoni’ö sinangea mufalua ena’ö mofozu ba ohahau dödö ba zi sambua omo.Luka 11:28.

NI’ANDRÖ LOWALANGI KHÖ WO’OMO IRA MATUA

3, 4. (a) Hadia nifalua wo’omo ira matua ba ndra alawenia? (b) Hana wa moguna ba zi no mongambatö ena’ö faoma la’efa’ö zala nawöra?

3 Imane Sura Ni’amoni’ö, fo’omo ira matua si sökhi amuata i’omasi’ö ba ifosumange wo’omonia. Baso Efeso 5:25-29. Lö tebulö wa’omasi wo’omo ira matua khö wo’omonia. Irorogö, ba lö ifalua gamuata si möi fangabu dödö wo’omonia.

4 Hadia nifalua wo’omo ira matua na fasala wo’omonia? Ni’andrö khö wo’omo ira matua ena’ö ’böi tebulö mi’omasi’ö ndra alawe, ba böi abao dödömi khöra’. (Kolose 3:19) Ya’ami fo’omo ira matua böi  olifu ami wa asese fasala ami. Na omasi ami i’efa’ö zalami Lowalangi, mi’efa’ö göi zala wo’omomi. (Matai’o 6:12, 14, 15) Na faoma mi’efa’ö zala nawömi, ba so wa’ohahau dödö ba wongambatömi.

5. Hana wa moguna ifosumange ndra alawenia fo’omo ira matua?

5 I’andrö Yehowa khö wo’omo ira matua ena’ö lafosumange ba la’angeraigö zoguna khö wo’omora. Moguna sibai mufalua da’a. Na lö sökhi gamuata wo’omo ira matua khö ndra alawenia, lö ifondro-ndrongo wangandrönia Yehowa. (I Fetero 3:7) Wa i’omasi’ö zi samösa niha Yehowa börö me la’omasi’ö ia. Lö ebua dödönia ba ndra matua moroi ba ndra alawe.

6. Hadia geluahania ”ha sambua boto” zi no mongambatö?

6 Ifatunö Yesu wa ira alawe ba ira matua si no mongambatö ”tenga sa’ae darua ira, ha sambua boto”. (Matai’o 19:6) Tebai faröi ira khö nawöra. (Gamaedola 5:15-21; Heberai’o 13:4) Faoma latörö gömöra khö nawöra ba wa’orudu. (I Korindro 7:3-5) Tebai olifu wo’omo ira matua wa ”lö irai fa’udu niha ba nösinia, irorogö, ba ihaogö-haogö”. Andrö i’omasi’ö ba ifosumange ndra alawenia. Baero da’ö, omasi göi wo’omo ira alawe na la’omasi’ö ia ba lahaogö-haogö khönia.Efeso 5:29.

NI’ANDRÖ LOWALANGI KHÖ WO’OMO IRA ALAWE

7. Hana wa moguna so zondrönia’ö ba zi sambua omo?

7 Moguna so zondrönia’ö ero sambua ngambatö ena’ö so khöra wahasara dödö ba wamalua ngawalö halöwö. Imane ba zura I Korindro 11:3, ”Högö ndra matua fefu, ba ya’ia Keriso, ba högö ndra alawe ndra matua, ba högö Keriso Lowalangi.”

8. Hewisa wamosumange ndra alawe fo’omonia?

 8 Asese fasala wo’omo ira matua. Hiza’i, na i’o’ö gangetula wo’omo ira matua ira alawe ba falulu fohalöwö ira, tola ohahau dödöra yomo ba nomo. (I Fetero 3:1-6) Imane Sura Ni’amoni’ö, ”Ira alawe, ba ena’ö na i’ata’ufi ndra matua.” (Efeso 5:33) Hewisa na tenga si sara lala wamati ira? Hasambalö ifosumange wo’omonia ira matua ira alawe. Imane Sura Ni’amoni’ö, ”Simanö göi ndra alawe, ndra mu’o’ö li ndra matuara, ena’ö tedönisi da’ö, ba mbua-bua ndra alawe andrö, he lö hede-hede, na so ösa, zi lö mamati ba daromali andrö, na lanehegö mbua-buami, wa mi’ata’ufi zi lö sökhi, awö wa no ohau-hau ami.” (I Fetero 3:1, 2) Na sökhi mbua-bua ndra alawe, i’osinangegö wamatinia fo’omonia ira matua.

9. (a) Hadia nifalua wo’omo ira alawe na lö fao dödönia gangetula wo’omonia? (b) Hadia mene-mene khö wo’omo ira alawe si so ba zura Tito 2:4, 5?

9 Hadia nifalua wo’omo ira alawe na lö fao dödönia  ba gangetula wo’omonia? Tola iwa’ö zi so ba dödönia fao wangata’ufi. Simane Sara, iwa’ö zi so ba dödönia si lö fatema ba dödö Gaberahamo. Tobali, imane Yehowa khö Gaberahamo, ”O’ö niwa’ö Zara” andrö. (I Moze 21:9-12) Ha fawaraö fabö’ö moroi ba Zura Ni’amoni’ö gangetula nihalö wo’omo ira matua niha Keriso, andrö wa moguna la’o’ö niwa’önia fo’omonia ira alawe. (Halöwö Zinenge 5:29; Efeso 5: 24) I’onorogö tödö nösi nomonia fo’omo ira alawe si sökhi bua-bua. (Baso Tito 2:4, 5.) Na la’ila iraono ba fo’omonia nifaluania ba nösi nomonia, monönö wa la’omasi’ö ba lafosumange ia.Gamaedola 31:10, 28.

Hewisa wa tobali duma-duma Zara ba wo’omo ira alawe?

10. Hadia niwa’ö Zura Ni’amoni’ö sanandrösa ba wabalisa mazui ba wondröi ngambatönia?

10 Itaria so zi no mongambatö salio mangai angetula ba wabalisa mazui ba wondröi ngambatönia. Hiza’i, imane Sura Ni’amoni’ö, ”Böi fabali ndra alawe ba ndra matua” ba ena’ö ”ira matua göi, ba böi ya mutibo’ö ndra alawe”. (I Korindro 7:10, 11) So gabula dödö salua ba zi sambua ngambatö wa tola iröi ngambatönia niha, hewa’ae simanö, moguna muhaogö mu’angeraigö. Na simanö, hadia tola fabali zi no mongambatö? Imane Sura Ni’amoni’ö ha sambua mbörö wa tola fabali zi no mongambatö, ya’ia da’ö na no mohorö ira fazamösa.Matai’o 19:9.

NI’ANDRÖ LOWALANGI BA ZATUA

Yesu zi tobali duma-duma ba zi sambua omo

11. Hadia zabölö moguna ba ndraono?

11 Ya’ami satua, mibe’e ginötömi ba ndraonomi me moguna ami khöra, ba mifaha’ö ira sanandrösa khö Yehowa me da’ö zabölö moguna khöra.V Moze 6:4-9.

12. Hadia zinangea lafalua satua ba wondrorogö iraonora?

 12 Itugu lö sökhi gulidanö tana khö Zatana andre, so niha somasi mamakiko iraonomi, lafaelungu ba gamuata wohorö. So zatua saila mamatunö khö nononia hewisa wa’orudu ndra matua ba ndra alawe. Hiza’i, moguna itutunö satua khö nononia hadia dandra na so niha somasi mamakao ya’ira, ba hewisa lala ena’ö la’aröu’ö ira ba niha simane da’ö. Ya’ami satua, mirorogö ndraonomi. *I Fetero 5:8.

13. Hadia zinangea ifaha’ö satua ba ndraono?

 13 Moguna la’onorogö tödö satua ba wamaha’ö iraonora ba gamuata si sökhi. Hewisa lalania? Böi fatöni dödö ndraonou na öfaha’ö ira ba na öbe’e degu-degu. (Yeremia 30:11) Böi amenesi ira ba ginötö mofönu’ö. Tatu manö lö omasi ndra’ugö na ”hulö nikhu gari” wehedemö khöra, sangafökhöi’ö tödöra. (Gamedola 12:18) Faha’ö nonou ena’ö la’ila hana wa moguna so khöra wolo’ö.Efeso 6:4; Heberai’o 12:9-11; faigi Gonönöta 30.

NI’ANDRÖ LOWALANGI BA NDRAONO

14, 15. Hana wa moguna la’o’ö li zatua iraono?

14 I’o’ö fefu niwa’ö Namania Yesu hewa’ae afökhö. (Luka 22:42; Yohane 8:28, 29) I’andrö göi Yehowa ba ndraono ena’ö la’o’ö li zatuara.Efeso 6:1-3.

15 Ya’ami iraono, hewa’ae afökhö khömi wolo’ö li zatuami, mitörö tödömi na so khömi wolo’ö, omuso dödö zatuami hegöi Yehowa. *Gamaedola 1:8; 6:20; 23:22-25.

Hadia zanolo si bohou ebua ena’ö lö faröi ira khö Lowalangi na so zondrönisi tödöra ba wamalua si lö sökhi?

16. (a) Hewisa wondrönisi Zatana tödö ndraono ba wamalua si lö sökhi? (b) Hana wa sökhi na ba zangomasi’ö Yehowa fariawö ita?

16 I’oguna’ö Afökha nawö-awömi ba wondrönisi tödömi ba wamalua si lö sökhi. I’ila wa abua khömi wotimbagö niwa’öra. Duma-dumania, ono Yakobo sotöi Dina, fariawö ia ba niha si lö mangomasi’ö Yehowa. Fangabu dödö lua-lua. (I Moze 34:1, 2) Na ba zi lö mangomasi’ö Yehowa fariawö ami, tola tedönisi dödömi wamalua si fatuwu khönia, si möi fangabu dödömi ba ösi nomomi, hegöi Lowalangi.  (Gamaedola 17:21, 25) Andrö wa moguna fariawö ami ba niha sangomasi’ö Yehowa.I Korindro 15:33.

FA’OHAHAU DÖDÖU BA ZI SAMBUA OMO

17. Hadia zi tobali noro dödö yomo ba zi sambua omo?

17 Na fefu nösi nomo la’o’ö goi-goi Lowalangi, tola te’aröu’ö ira moroi ba gabula dödö. Na fo’omo ira matua ndra’ugö, omasi’ö wo’omou ira alawe. Na ya’ugö fo’omo ira alawe, fosumange ba o’ö li wo’omou ira matua, ba o’ö gamuata wo’omo ira alawe simane si no musura ba Gamaedola 31:10-31. Na satua ami, mifaha’ö ndraonomi ba wangomasi’ö Lowalangi. (Gamaedola 22:6) Na ama ndra’ugö ba nomo ’haogö wamatörö soroi yomou’. (I Timoteo 3:4, 5; 5:8) Ya’ami iraono, mi’o’ö li zatuami. (Kolose 3:20) Törö tödöu wa fefu nösi nomo oi fasala, andrö moguna so khöda wangide-ngide’ö, ba faoma tabologö dödöda khö nawöda. So ba Zura Ni’amoni’ö wanuturu lala moroi khö Yehowa soguna ba zi sambu-sambua omo.

^ par. 12 Tola mi’ila lala tanö bö’ö hewisa wondrorogö iraono moroi ba wa’atekiko, ba faza 32 moroi ba mbuku Belajarlah dari Sang Guru Agung nifazökhi ndra Samaduhu’ö Yehowa.

^ par. 15 Na so niwa’ö zatua ba ndraono si lö tefaudu ba goi-goi Lowalangi, lö moguna la’o’ö iraono.Halöwö Zinenge 5:29.