Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Hadia Nifaha’ö Zura Ni’amoni’ö Khöda?

 FAZA FELEZIWA

Böi Famalö-malö Hatö’ögö khö Yehowa

Böi Famalö-malö Hatö’ögö khö Yehowa

1, 2. Hezo tasöndra nahia ena’ö lö te’ala ita?

KHALAIGÖ na ötörö dalu deu toho. Ogömi danö, ilau gari mbanua, mo’ugu mbanua, awena aekhu deu. Ö’alui nahia wolombaseu. Hawa’omuso dödöu na ösöndra nahia wolombase si lö abasö ndra’ugö!

2 Simanö zalua ba gulidanö andre, itugu lö sökhi. Te manofu dödöu, ’Hezo usöndra nahia si lö fangala?’ Imane sanura sura zinunö, ”Umane khö Yehowa: ’Saŵatögu ndra’ugö ba hatigu, Lowalangigu, tötönafögu.’” (Zinunö 91:2) Atulö wa Yehowa nahia wolombaseda moroi ba ngawalö gabula dödö, ba no ibe’e khöda dötönafö si sökhi ba zi so föna.

3. Hewisa ena’ö tobali nahia wolombaseda Yehowa?

3 Hewisa wolumö’ö Yehowa ya’ita? Itolo ita ena’ö tola tataögö fefu gabula dödö salua, abölö ia moroi ba zama’ala ya’ita. Na göna ita abula dödö iada’a, faduhu dödöda wa iheta fefu da’ö Yehowa ba zi so föna. I’o’ou ita Sura Ni’amoni’ö, ”Mi’aro’ö ami, ba wa’omasi Lowalangi.” (Yuda 21) Böi mamalö-malö tahatö’ö ita khö Yehowa ena’ö itolo ita na so gabula dödö. Hewisa wamalua ya’ia?

TEMA WA’OMASI LOWALANGI

4, 5. Hewisa wangoroma’ö Yehowa fa’omasinia khöda?

4 Ena’ö böi mamalö ahatö ita khö Yehowa, moguna ta’ila wa i’omasi’ö ita. Angeraigö zi no ifalua  khöda. No ibe’e gulidanö si sökhi si tobali nahiada, si so urifö ba sinanö. No ibe’e gö ni’a ba idanö nibadu. Ba Zura Ni’amoni’ö, no ifatunö khöda haniha döinia hegöi amuatania si sökhi. Aefa da’ö, tandra wa’omasinia sebua ya’ia da’ö me ifatenge Nononia Yesu ba gulidanö, ba wangöhöli ya’ita. (Yohane 3:16) Börö höli andrö wa so dötönaföda si sökhi ba zi so föna.

5 No ifasindro Yehowa wamatörö Mesia ba zorugo si lö aratö mangeheta abula dödö ba gulidanö. Banua Lowalangi zombali’ö ulidanö faradaiso, safönu fa’ohahau dödö. (Zinunö 37:29) Tandra wa’omasi Yehowa nasa, ifaha’ö ita ena’ö tola sökhi lala wa’aurida ba ginötö andre. Ikaoni ita ba wangandrö khönia, ba ibe’e ginötönia wamondro-ndrongo fangandröda. Sindruhu-ndruhu no iforoma’ö Yehowa wa’omasinia khöda zamösana.

6. Hewisa wotema’ömö fa’omasi Yehowa andrö?

6 Hewisa wotema’öu fa’omasi Yehowa? Foroma’ö wa ö’andrö saohagölö ba zi no ifalua khöu. Alimagö me ato niha ba ginötö andre si lö mangila mangandrö saohagölö. Simanö zalua me so Yesu ba gulidanö. Samuza inötö, ifadöhö dafulu zofökhö bou auri, ba ha samösa zangandrö saohagölö khönia. (Luka 17:12-17) Omasi ita ta’o’ö zangandrö saohagölö khö Yesu. Moguna ta’andrö saohagölö khö Yehowa.

7. Hawa’abakha wa’omasiu khö Yehowa?

7 Moguna taforoma’ö wa ta’omasi’ö Yehowa. Ifaha’ö ndra nifaha’önia Yesu ena’ö la’omasi’ö Yehowa moroi si’aikö ba dödöra, era-erara, hegöi nosora. (Baso Matai’o 22:37.) Hadia geluahania?

8, 9. Hewisa wangoroma’öda wa ta’omasi’ö Yehowa?

 8 Ambö na ha tawa’ö ta’omasi’ö Yehowa. Na sindruhu ta’omasi’ö Yehowa moroi si’aikö ba dödöda, era-erada, hegöi nosoda, taforoma’ö ba mbua-buada. (Matai’o 7:16-20) No ifaha’ö ita Sura Ni’amoni’ö dandra wa’omasi khö Lowalangi ya’ia da’ö na ta’o’ö fefu goi-goinia. Hadia abua wamalua da’ö? Lö’ö, börö me ’tenga safökhö wolo’ö oroisa’ Yehowa.Baso I Yohane 5:3.

9 Na ta’o’ö goroisa Yehowa, ohahau dödöda. (Yesaya 48:17, 18) Na simanö, hadia zanolo ya’ita ena’ö böi mamalö ahatö ita khö Yehowa? Datafaigi wanema linia.

BÖI TEBULÖ HATÖ’ÖGÖ KHÖ YEHOWA

10. Hana wa lö taböhöli wamaha’ö ya’ita sanandrösa khö Yehowa?

10 Hana wa tola fahuwu ndra’ugö khö Yehowa? Börö me no öfaha’ö ndra’ugö ba Zura Ni’amoni’ö, irege monönö wa’aboto ba dödöu sanandrösa khönia ba aro wahuwusami. Fahuwusa andrö amaedola na mufedo’ö galitö. Ena’ö böi mate, lö mubato wame’e eu. Simanö göi wahuwusa khö Yehowa, böi tebulö öfaha’ö ndra’ugö sanandrösa khönia ena’ö aro wahuwusami.Gamaedola 2:1-5.

Simane alitö, fa’omasida khö Yehowa moguna murorogö ena’ö böi mate

11. Hewisa lua-lua wamaha’ö Zura Ni’amoni’ö khöu?

11 Na öfaha’ö ndra’ugö ba Zura Ni’amoni’ö, so wamaha’ö sadöni dödöu. Simanö zalua khö nifaha’ö Yesu si darua me larongo wamaha’önia sanandrösa ba nifa’ele’ö Zura Ni’amoni’ö. Lamane, ”Tenga no aukhu-aukhu bakha dödöda, me fahuhuo ia khöda ba lala, me ibotokhi khöda zi so ba Zura?”Luka 24:32.

12, 13. (a) Hana wa tadou’ö wa’omasida khö Lowalangi? (b) Hewisa ena’ö böi taya wa’omasida khö Yehowa?

 12 Adöni dödöu me ibörögö ö’ila geluaha nösi Zura Ni’amoni’ö, simane me adöni dödö ndra nifaha’ö Yesu ba Ayati sawena mubotokhi khöra. Da’ö zanolo ya’ugö ena’ö aboto ba dödöu sanandrösa khö Yehowa ba monönö wa’omasiu khönia. Tatu lö omasi ndra’ugö taya wa’omasiu khönia.Matai’o 24:12.

13 Na no fahuwu ami Lowalangi, moguna öforege ba wandrorogö ya’ia. Böi böhöli öfaha’ö ndra’ugö sanandrösa khönia hegöi khö Yesu ba angeraigö hewisa wamalua ba wa’auriu si no aboto ba dödöu. (Yohane 17:3) Ba ginötö öfaha’ö ndra’ugö ba Zura Ni’amoni’ö, sofu khöu samösa, ’Hadia wamaha’ö moroi ba ayati andre sanandrösa khö Yehowa Lowalangi? Hana wa moguna u’omasi’ö ia moroi si’aikö ba dödögu, hegöi ba gera-eragu?’I Timoteo 4:15.

14. Hewisa wa aro wa’omasida khö Yehowa na mangandrö ita?

 14 Na asese fahuhuo ndra’ugö khö zi fahuwu khöu, aro wahuwusami. Simanö göi, moguna asese fahuhuo ita khö Yehowa ba wangandrö ena’ö monönö wa’omasida khönia. (Baso I Tesalonika 5:17.) Fangandrö no buala si sökhi moroi khö Namada si so ba zorugo, ba moroi ba dödöda na fahuhuo ita khönia. (Zinunö 62:9) Böi fangandrö nitanö ba dödö wangandröda. Na lö taböhöli tafaha’ö ita ba Zura Ni’amoni’ö, ba fangandrö soroi ba dödö wangandröda, monönö wa’omasida khönia.

FATUNÖ BA NIHA SANANDRÖSA KHÖ YEHOWA

15, 16. Hewisa ba dödöu halöwö fanuriaigö?

15 Ena’ö itugu ahatö ita khö Yehowa, moguna tafatunö ba niha bö’ö wamatida. Da’ö sambua halöwö si sökhi sibai. (Luka 1:74) Da’ö halöwö nibe’e Yesu ba niha Keriso sindruhu. Andrö, moguna fao ita ba wanuriaigö turia Mbanua Lowalangi. Hadia no fao ndra’ugö?Matai’o 24:14; 28:19, 20.

16 Molo’ö Faulo, amaedola harato halöwö fanuriaigö; ifotöi ia ”girö-girö”. (II Korindro 4:7) Moguna öfatunö ba niha bö’ö sanandrösa khö Yehowa ba ohitö dödönia. Da’ö lala ba wamosumange Yehowa, ba i’osinangegö halöwöu. (Heberai’o 6:10) Na möi’ö manuriaigö, no ötolo ndra’ugö hegöi niha bö’ö ba wangokhögö fahuwusa khö Yehowa ba ba wanöndra fa’auri si lö aetu. (Baso I Korindro 15:58.) Hadia so halöwö tanö bö’ö sabölö sökhi moroi ba halöwö fanuriaigö?

17. Hana wa aösö sibai halöwö fanuriaigö?

 17 Aösö sibai wamalua halöwö fanuriaigö. Moguna ’ö’ombakha’ö daromali’, ba ”böi bulö’ögö, he baŵa, ba he tenga baŵa”. (II Timoteo 4:2) Moguna lafarongogö ba niha fefu Mbanua Lowalangi. Imane Sura Ni’amoni’ö, ”No ahatö mbaŵa sebua andrö khö Yehowa; no ahatö ia, ba alio sibai irugi!” Ba, ”lö zi lö alua” da’ö. (Zefania 1:14; Habakuki 2:3) Lö aratö, ifakiko gulidanö tana khö Zatana Yehowa. Fatua lö alua, moguna lafangelama niha ena’ö lahalö gangetula ba wamosumange Yehowa.

18. Hana wa moguna fao ita khö ndra talifusöda niha Keriso ba wamosumange Yehowa?

18 Omasi Yehowa na fao ita khö ndra talifusöda niha Keriso ba wamosumange ya’ia. Imane Sura Ni’amoni’ö, ”Ba datafaoma tafaigi nawöda, ba wamarou tödö ba wa’omasi andrö, ba ba mbua-bua si sökhi. Ba böi taböhöli we’amöi ba migu khöda, simane nifolau-lau danö bö’ö ösa, tafarou dödö nawöda, ba mendrua manö, me itugu mi’ila, ahatö mbaŵa andrö.” (Heberai’o 10:24, 25) Taforege wangondrasi angowuloa. Da’ö ginötö khöda ba wamarou tödö ndra talifusöda.

19. Hadia zanolo ya’ita ena’ö monönö wa’omasida khö ndra talifusöda niha Keriso?

19 Me ö’ondrasi gangowuloa, ösöndra zi fahuwu khöu sanolo ya’ugö ba wamosumange Yehowa. Fabö’ö-bö’ö ndra talifusöda si falukha khöu. Simane ya’ugö göi, omasi ira lafosumange Yehowa. Ba simane ya’ugö, ya’ira andrö göi lö mo’ahonoa ba asese fasala. Börö da’ö, moguna ebolo dödöu khöra. (Baso Kolose 3:13.) Haogö töngöni gamuatara si sökhi,  ena’ö lö taha-taha khöu ba wangomasi’ö ya’ira hegöi ba wangahatö’ö ya’ugö khö Yehowa.

FA’AURI SINDRUHU

20, 21. Hadia nifotöi ”zindruhu fa’auri andrö”?

20 Omasi Yehowa na ohahau dödö zi fahuwu khönia. No ifaha’ö ita Sura Ni’amoni’ö wa faehu wa’aurida ba zi so föna moroi ba wa’aurida iada’a.

Omasi Yehowa na ötema ”zindruhu fa’auri”. Hadia omasi’ö?

21 Ba zi so föna, tola tasöndra wa’auri si lö aetu, tenga ha 70 ma 80 fakhe ndröfida. Tasöndra ”wa’auri si lö aetu” so’ahonoa, lö fökhö, ba ohahau dödöda ba gulidanö faradaiso. Andrö wa ifotöi ia Sura Ni’amoni’ö ”zindruhu fa’auri andrö”. No ifabu’u Yehowa wa ibe’e khöda wa’auri sindruhu, hiza’i moguna taforege ena’ö ’takhamö’.I Timoteo 6:12, 19.

22. (a) Hewisa ena’ö ’takhamö zindruhu fa’auri andrö’? (b) Hana wa tenga sinangea tatema ia?

22 Hewisa ena’ö ’takhamö zindruhu fa’auri andrö’? ’Tatolo nawöda’ ba ’fahöna khöda mbua-bua si sökhi’. (I Timoteo 6:18) Eluahania, tafalua zi no tafaha’ö ya’ita ba Zura Ni’amoni’ö. Hiza’i, tatema wa’auri sindruhu andrö tenga börö wa’abölöda, ba tenga sinangea tatema ia. Da’ö no buala Yehowa khö nono mbanuania, tandra ’wa’ebua dödönia’. (Roma 5:15) Sindruhu-ndruhu omasi Namada si so ba zorugo wame’e buala khö nono mbanuania si lö faröi.

23. Hana wa öfalua iada’a na so zinangea öbulö’ö ba wa’auriu?

23 Sofu khöu samösa, ’Hadia faudu ba zomasi Lowalangi wamosumangegu ya’ia?’ Na so zinangea öbulö’ö ba wa’auriu, falua da’ö iada’a. Na ta’odaligö Yehowa ba taforege wolo’ö ya’ia, tobali nahia wolombaseda ia. Irorogö nono mbanuania si lö faröi  Yehowa ba gulidanö tana khö Zatana andre safönu fa’alösökhi, ba irugi tobali Faradaiso gulidanö andre, simane si no ifabu’u. Andrö, tola ökhamö wa’auri sindruhu na öhalö gangetula satulö iada’a!