Faigi nösi

Faigi ba gangolifa

Samaduhu’ö Yehowa

Fili li Nias

 FAZA SIWA

Hadia No Ahatö Wa’atua Danö?

Hadia No Ahatö Wa’atua Danö?

1. Hezo ta’ila zalua ba zi so föna?

TE NO irai manofu dödöu na örongo duria, ’Hadia itugu tedou wa’alösökhi ba gulidanö?’ Börö me oya ngawalö zi lö sökhi salua awö wamakao, andrö wa ato zi faduhu tödö wa no ahatö wa’atua danö. Hadia sindruhu da’ö? Hadia so zangombakha khöda salua ba zi so föna? So. Hewa’ae lö la’ila niha hadia zalua, tobali i’ila Yehowa Lowalangi. Ifatunö khöda ba Zura Ni’amoni’ö hadia zalua ba niha hegöi ba gulidanö ba zi so föna.Yesaya 46:10; Yakobo 4:14.

2, 3. Hadia zomasi sibai la’ila ira nifaha’ö Yesu, ba hewisa wanema Yesu lira?

2 Na tabaso ba Zura Ni’amoni’ö ngawua wehede fa’atua danö, tenga Ulidanö zatua, tobali niha si lö sökhi nifakiko. Imane Yesu, mamatörö Mbanua Lowalangi ba gulidanö andre. (Luka 4:43) Omasi sibai ndra nifaha’ö Yesu la’ila hawa’ara tohare Mbanua Lowalangi, andrö lasofu khö Yesu, ”Ombakha’ö khöma, hawa’ara da’ö, ba hadia dandra we’asomö ba tandra wa’atua danö?” (Matai’o 24:3) Lö i’ombakha’ö khöra Yesu ginötö wa’atua danö, hiza’i ifatunö khöra dandra wa’atua danö. Hadia nifa’ele’ö Yesu ba no alua iada’a.

3 Ba faza da’a tafatunö wa no auri ita ba ginötö  safuria. Si oföna, moguna aboto ba dödöda wasuwöta si no alua ba zorugo, ena’ö ta’ila hana wa oya ngawalö wa’alösökhi ba gulidanö.

FASUWÖTA BA ZORUGO

4, 5. (a) Hadia zalua ba zorugo me no tobali Razo Yesu? (b) Molo’ö Fama’ele’ö 12:12, hadia zalua ba gulidanö me no tetibo’ö sitou Zatana?

4 No tafaha’ö ita ba Faza 8 wa no mamatörö Yesu tobali Razo ba zorugo me döfi 1914. (Danieli 7:13, 14) Imane ba zura Wama’ele’ö, ”Ba tesao wanuwö ba mbanua siawa: Mikhaeli [Yesu] andrö ba mala’ikania, ba fasuwö ba naga [Satana] andrö. Ba fasuwö naga andrö, awö mala’ikania.” * Kala Zatana awö mala’ikania ba wasuwöta andrö ba tetibo’ö ira ba gulidanö. Khalaigö wa’omuso dödö ndra mala’ika ba zorugo! Hewisa niha si so ba gulidanö? Imane Sura Ni’amoni’ö wa tefakao niha gulidanö. Hadia mbörö? Börö me no ebua wönu Gafökha, ”me no i’ila, lö ara nitehe khönia”.Fama’ele’ö 12:7, 9, 12.

5 Börö Gafökha wa so ngawalö wamakao ba gulidanö. Mofönu sibai ia me no i’ila lö aratö ifakiko ia Lowalangi. Datafaigi hadia niwa’ö Yesu salua ba ngaluo safuria.—Faigi Gonönöta 24.

NGALUO SAFURIA

6, 7. Hadia ni’ilada sanandrösa ba lofo hegöi ba wasuwöta ba ginötö andre?

6 Fasuwöta. Imane Yesu, ”Maoso dania zi sambua soi, udu zi sambua; ba si sara öri, udu zi sara.”  (Matai’o 24:7) Ato niha si mate ba wasuwöta ba ginötö andre moroi ba wasuwöta ba zilalö. So duria moroi ba Lembaga Pengamat Dunia, i’otarai ndröfi 1914, töra 100 zuta niha si mate ba wasuwöta. Fa’ato niha si mate i’otarai ndröfi 1900 irugi ndröfi 2000 börö wasuwöta, töra tölu kali fa’ato zi mate fatua lö döfi 1900. Khalaigö hewisa wa’afökhö ba fa’abu dödö nirasoi niha si töra ha’uga zuta wa’ato börö wasuwöta!

7 Fa’olofo. Imane Yesu, ’So so lofo ba mbanua misa.’ (Matai’o 24:7) Hewa’ae oya ngawalö gö ni’a’asogö ba ginötö andre moroi ba ndröfi si lalö, ambö manö balazo niha nasa. Hadia mbörö? Börö me lö kefera ba wowöli balazo, mazui lö tanöra ba wananö sinanö. Ba töra miliaran niha si mate börö me ambö gefera ba wowöli gö. Imane Organisasi Kesehatan Dunia, töra sazuta ndraono si mate ero röfi börö wa’ambö balazo.

8, 9. Hadia zangoroma’ö wa no alua zi no ifa’ele’ö Yesu sanandrösa ba ndruru danö ba fökhö waba?

 8 Duru danö. Ifa’ele’ö Yesu, ”So ndruru danö sabölö-bölö.” (Luka 21:11) Asese alua ndruru danö sabölö-bölö ero röfi. Töra dua zuta mate niha ba ndruru danö i’otarai ndröfi 1900. Hewa’ae so wa’atua-tua niha ba wangila na alua ndruru danö, ato niha si mate nasa.

9 Fökhö waba. Ifa’ele’ö Yesu wa so ’wökhö sebua’. Alio sibai göna ba niha wökhö waba andrö ba ato zi mate ibe’e. (Luka 21:11) Hewa’ae so doto sangila mamadöhö fökhö, ba oya wökhö nasa si tebai lafadöhö. So zangombakha wa töra sazuta niha mate ero röfi börö wökhö TBC, malaria, ba kolera. Tenga ha da’ö, no lasöndra ira doto 30 ngawalö wökhö sawena so, ba so ba gotaluania zi lö dalu-dalu.

AMUATA NIHA BA NGALUO SAFURIA

10. Hewisa wa’alua zi no tesura ba II Timoteo 3:1-5 ba ginötö andre?

10 Imane ba zura II Timoteo 3:1-5, ”So dania mbaŵa si lö  sökhi, ba götö safuria andrö.” Ifatunö sinenge sotöi Faulo hewisa gamuata niha ba ngaluo safuria. Imane, niha ba da’ö

  • ha tana khöra la’alui

  • somasi ana’a

  • si lö mamondrongo li zatuara

  • si faröi

  • si lö mangomasi’ö ösi nomora

  • si lö fanaha tödö

  • si tebai ahono ba samu’i

  • somasi isö-isö dödöra moroi ba wa’omasira Lowalangi

  • hulö solo’ö khö Lowalangi ira wamaigida, ba no sa la’osilö’ögö ia

11. Molo’ö Zinunö 92:8, hadia zalua ba niha si lö sökhi?

11 Hadia simanö gamuata niha ba zi tefasui ya’ugö? Simane da’ö gamuata niha ba zi sagörö ulidanö. Hiza’i, so zi lö aratö ifalua Lowalangi. No ifabu’u, ”Na manöi zebua horö andrö, hulö ndru’u ba danö, ba na mobowo  zamazökhi si lö sökhi, ba ena’ö tefakiko ira, si lö fangorifi.”Zinunö 92:8.

TURIA SOMUSO DÖDÖ BA NGALUO SAFURIA

12, 13. Hadia nifaha’ö Yehowa ya’ita ba ngaluo safuria andre?

12 No ifa’ele’ö Sura Ni’amoni’ö wa alua dania wamakao ba fangabu dödö ba ngaluo safuria. Hiza’i, ifa’ele’ö göi wa so zi sökhi salua dania.

”Ba teturiaigö dania Mbanua Lowalangi andrö, turia somuso dödö, ba gulidanö misa, ma’asagörö.”Matai’o 24:14

13 Fa’aboto ba dödö Zura Ni’amoni’ö. Ifa’ele’ö Danieli wa ”tedou-dou dania wa’aboto ba dödö” ba ngaluo safuria. (Danieli 12:4) I’atua-tua’ö nono mbanuania Lowalangi ena’ö tedou wa’aboto ba dödöra nösi Zura Ni’amoni’ö töra moroi ba zi no numalö. No ifalua da’ö Yehowa i’otarai ndröfi 1914. Duma-dumania, ifaha’ö ita hana wa moguna ta’oguna’ö döinia, hadia gohitö dödönia, hadia geluaha höli, hadia zalua ba niha si no mate, ba femaoso zi mate. No tafaha’ö ita wa ha Banua Lowalangi zi tola mangeheta fefu ngawalö gabula dödö. No ta’ila hewisa ena’ö so khöda wa’ohahau dödö ba hewisa wangohahau’ö tödö Lowalangi. Hiza’i, hadia nifalua nono mbanua Lowalangi me no so khöra wa’aboto ba dödö? So wanema li ba Zura Ni’amoni’ö.—Faigi Gonönöta 21 ba 25.

14. Hezo manö teturiaigö duria somuso dödö sanandrösa ba Mbanua Lowalangi, ba haniha zamalua ya’ia?

14 Fanuriaigö ba zi sagörö ulidanö. Sanandrösa ba ngaluo safuria, imane Yesu, ”Ba teturiaigö dania Mbanua Lowalangi andrö, turia somuso dödö, ba gulidanö misa, ma’asagörö.” (Matai’o 24:3, 14) No teturiaigö duria somuso dödö ba zi töra 230 soi, ba ba zi töra 700 ngawalö li. Ira Samaduhu’ö Yehowa  moroi ’ba ngawalö soi ba ba ngawalö mado’, latolo niha ena’ö so khöra wa’aboto ba dödö hadia geluaha Mbanua Lowalangi ba hadia zi lö aratö ifalua ba niha gulidanö. (Fama’ele’ö 7:9) Lö lagazi ira wamalua da’ö. Hewa’ae fatiu dödö niha khöra ba tefakao ira, ba lö si tola manaisi ya’ira simane si no ifa’ele’ö Yesu.Luka 21:17.

HADIA NIFALUAU?

15. (a) Hadia faduhu dödöu wa no so ita ba ngaluo safuria, ba hadia mbörö? (b) Hadia zalua ba niha solo’ö khö Yehowa ba ba niha si lö molo’ö khönia?

15 Hadia faduhu dödöu wa no so ita ba ngaluo safuria? Oya dandra ngaluo safuria si no alua nifa’ele’ö ba Zura Ni’amoni’ö. Lö aratö ibatogö Yehowa halöwö fanuriaigö, aefa da’ö ”fa’atua danö”. (Matai’o 24:14) Hadia geluahania wa’atua danö? Eluahania Hamagedo, inötö wangohori niha si lö sökhi. Yesu faoma ira mala’ika ni’oguna’ö Yehowa ba wangohori niha si lö molo’ö khönia hegöi si lö molo’ö Ononia. (II Tesalonika 1:6-9) Lö ifaelungu niha sa’ae Satana awö mala’ikania. Fefu niha solo’ö khö Lowalangi ba si faduhu tödö ba Mbanuania, la’ila wa alua zi no ifabu’u.Fama’ele’ö 20:1-3; 21:3-5.

16. Börö me no ahatö wa’atua danö, hadia zinangea öfalua?

16 Lö aratö tekiko gulidanö nifatörö Zatana andre. Börö da’ö moguna tasofu khöda samösa, ’Hadia zinangea ufalua?’ Omasi Yehowa na ö’odödögö wamaha’ö ya’ugö nasa ba Zura Ni’amoni’ö. (Yohane 17:3) So gangowuloa khö ndra Samaduhu’ö Yehowa ero migu ba wanolo niha ena’ö aboto ba dödöra nösi Zura Ni’amoni’ö. Tandraigö ae’e ba gangowuloara  andrö. (Baso Heberai’o 10:24, 25.) Na no so khöu wa’aboto ba dödö ba omasi’ö öfalalini gera-erau, böi ata’u ndra’ugö wamalua ya’ia, ena’ö itugu aro wahuwusami Yehowa.Yakobo 4:8.

17. Hana wa tokea niha na tohare wa’atua danö?

17 Imane Faulo, alua wa’atua danö ba zi lö mudöna-döna, ”hulö we’aso zanagö, ba zi bongi”. (I Tesalonika 5:2) Ifa’ele’ö Yesu wa ato niha si lö faduhu tödö wa no so ita ba ngaluo safuria. Imane, ”Ba hulö simane me luo Noakhi, simanö göi we’aso Nono niha andrö dania. Hulö simane ya’ira sa, me luo föna Wa’anönö Danö andrö, manga-manga ira ba mamadu-madu hadia ia, mangowalu ba mame’e nihalö, irugi luo möi baowo Noakhi, ba lö aboto ba dödöra, irege so wa’anönö andrö ba irege ahori ira fefu, simanö göi dania we’aso Nono niha andrö.”Matai’o 24:37-39.

18. Hadia wamangelama nibe’e Yesu khöda?

18 Ifangelama ita Yesu ena’ö böi arörö dödöda ba ”wemanga-manga ba ba wemabu-mabu ba ba wa’abu dödö ba mbalazo”. Imane wanguma’ö, tohare wa’atua danö ba zi lö mudöna-döna, ’simane tandrawa’. Ba ”ihawui fefu zi so ba gulidanö, ma’asagörö, misa”. Aefa da’ö imane zui, ”Ba böi miförö, ero ma’ökhö, mi’angandrö-ngandrö, ena’ö tola moloi ami ba da’ö fefu, si törö dania, ba ena’ö tola föna Nono niha nahami.” (Luka 21:34-36) Hana wa moguna tafondro-ndrongo wamangelama Yesu? Börö me lö aratö tefakiko gulidanö tana khö Zatana andre. Niha ni’omasi’ö Yehowa ba Yesu zauri irugi zi lö aetu ba gulidanö si bohou.Yohane 3:16; II Fetero 3:13.

^ par. 4 Mikhaeli töi Yesu Keriso tanö bö’ö. Ena’ö ö’ila danö bö’ö nasa, faigi Gonönöta 23.