Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Hadia Nifaha’ö Zura Ni’amoni’ö Khöda?

 FAZA LIMA

Höli—Buala Fondrege Zebua Moroi khö Lowalangi

Höli—Buala Fondrege Zebua Moroi khö Lowalangi

1, 2. (a) Hana wa ta’andrö saohagölö mbuala nibe’e khöda? (b) Hana wa höli andrö buala Lowalangi fondrege zebua?

HADIA mbuala sabölö sökhi si no irai ötema? Tenga börö wa ebua mböli mbuala awena ta’andrö saohagölö. Na möi fangomuso dödöu mbuala andrö mazui moguna sibai khöu, tatu ö’andrö sibai saohagölö.

2 Moroi ba ngawalö mbuala nibe’e Lowalangi, so sambua mbuala sabölö moguna khöda. Da’a mbuala sabölö ebua nibe’e Lowalangi ba niha. Ifatunö khöda ba faza da’a, no ifatenge Nononia Yehowa sotöi Yesu Keriso ba gulidanö, ena’ö tasöndra wa’auri si lö aetu. (Baso Matai’o 20:28.) Tandra wa’omasi Yehowa ba niha gulidanö, ya’ia da’ö ifatenge Yesu tobali höli.

HADIA HÖLI ANDRÖ?

3. Hana wa mate niha?

3 Ibe’e höli Yehowa ba wangefa’ö ya’ita ba horö ba ba wa’amate. (Efeso 1:7) Ena’ö aboto ba dödöda hana wa moguna khöda höli, datafuli tatörö tödöda hadia zalua ngahönö fakhe ba zilalö khö Gadamo ba Khawa ba kabu Edena me aekhu ira ba horö. Börö me no lafalua horö, andrö wa mate ira. Andrö göi wa mate ita, börö horö ondröita moroi khöra.—Faigi Gonönöta 9.

4. Haniha Gadamo, ba hadia nibe’e Yehowa khönia?

 4 Me ifazökhi niha si föföna Yehowa sotöi Adamo, ibe’e khönia mbuala sebua, ya’ia da’ö fa’auri so’ahonoa. Botonia hegöi fangera-ngerania mo’ahonoa, lö göna ia fökhö, lö atua ia, ba lö mate. Börö me Yehowa zamazökhi Adamo, andrö wa hulö namania Yehowa. (Luka 3:38, NW) Asese fahuhuo ira Yehowa. Ifatunö Lowalangi hadia ni’andrönia khö Gadamo, aefa da’ö ibe’e khönia halöwö si sökhi.I Moze 1:28-30; 2:16, 17.

5. Hadia geluahania me imane Sura Ni’amoni’ö ’famaedo’ Lowalangi Gadamo?

5 Ifazökhi Gadamo Lowalangi ”famaedonia”. (I Moze 1:27) Eluahania, so khö Gadamo gamuata Yehowa simane fa’omasi, fa’atua-tua, fa’atulö ba fa’abölö. Itehegö khö Gadamo wangai angetula, tenga simane robot. Eluahania tola ifili samösa hadia nifaluania ba wa’aurinia, hadia satulö mazui si lö atulö. Na i’o’ö niwa’ö Lowalangi Adamo, isöndra wa’auri si lö aetu ba Waradaiso.

6. Hadia zi no itayaigö Adamo me lö i’o’ö niwa’ö Lowalangi? Ba hadia lua-luania khöda?

6 Me no ifili Adamo ba wolawa Lowalangi, lua-luania mate ia. Taya wahuwusania khö Yehowa, fa’auri so’ahonoa, ba lö hadöi nahiania ba Waradaiso. (I Moze 3:17-19) Börö me no lafili ba wolawa Lowalangi ira Adamo faoma Khawa, aetu wanötönara sa’ae. Börö me no ifalua da’ö Adamo, andrö imane Sura Ni’amoni’ö, ”Simane böröta horö andrö ba gulidanö, wa no ha samösa niha [Adamo] zamobörö awö lua-lua horö andrö ba fa’amate, awö wa no  ikhamö niha fefu fa’amate andrö börö wa no dozi samazökhi horö ira.” (Roma 5:12) Me ifalua horö Adamo, no ’ifamawa’ ia hegöi ma’uwunia tobali sawuyu horö ba fa’amate. (Roma 7:14) Hadia so wanötönada nasa? So.

7, 8. Hadia geluahania höli?

7 Hadia nifotöi höli andrö? So dombua geluahania. Si oföna, kefe nibe’e ba wosanu ena’ö mangawuli khöda hadia zi no tagadegö. Si dua, kefe nibe’e ba wogati hadia zi no tekiko.

8 Samösa lö hadöi niha ba gulidanö si tola mangefa’ö ya’ita moroi ba horö nifalua Gadamo hegöi ba wa’amate. Hiza’i, ibe’e lala Yehowa ba wangefa’ö ya’ita moroi ba da’ö. Datafaha’ö ita hadia mbörö wa so höli ba hadia gunania khöda.

LALA YEHOWA BA WAME’E HÖLI

9. Hewisa zinangeania zi tobali höli?

9 Hana wa lö hadöi niha si tola mangefa’ö ya’ita moroi ba horö nifalua Gadamo? Börö me fefu niha lö mo’ahonoa. (Zinunö 49:8, 9) Börö me niha so’ahonoa zangekhugö ya’ita ba horö, andrö wa niha so’ahonoa göi zangefa’ö mangawuli. Da’ö wa lafotöi ia ”höli” so’ahonoa. (I Timoteo 2:6) Höli andrö fagölö wa’ebua mbölinia simane si no itayaigö Adamo.

10. Hewisa wame’e Yehowa höli?

10 Hewisa wame’e Yehowa höli andrö? Ifatenge Yesu ba gulidanö, Ono ni’omasi’önia, sia’a nifazökhi dangania. (I Yohane 4:9, 10) Omasi Yesu wondröi Amania hegöi nahiania ba zorugo. (Filifi  2:7) Ifawu’a wa’auri Yesu ba gulidanö Yehowa, ba tumbu ia tobali niha so’ahonoa.Luka 1:35.

Ibe’e Nono ni’omasi’önia Yehowa sangöhöli ya’ita

11. Hewisa wa tola ihöli niha sato si samösa niha?

11 Börö me no isawö goroisa Yehowa Adamo, andrö wa lö mo’ahonoa niha gulidanö fefu. Hadia so niha sangefa’ö ya’ita moroi ba horö Gadamo? So. (Baso Roma 5:19.) Ya’ia da’ö Yesu, niha so’ahonoa, ibe’e wa’aurinia tobali höli. (I Korindro 15:45) Ha fa’auri so’ahonoa zi tola mangefa’ö ya’ita moroi ba horö Gadamo.I Korindro 15:21, 22.

12. Hana wa itaögö wamakao Yesu?

12 Itutunö khöda Sura Ni’amoni’ö hadia zalua khö Yesu fatua lö mate ia. Laleasi ia, la’osö ba döla geu, ba mate ba wa’afökhö. (Yohane 19:1, 16-18, 30) Hana wa itaögö da’ö fefu Yesu? Ba wanema li tandrawa nibe’e Zatana. Ifobahulu niha, wa laröi Lowalangi na göna ira fanandraigö. I’oroma’ö Yesu wa so niha so’ahonoa si lö faröi khö Lowalangi hewa’ae göna ia famakao. Khalaigö atö hewisa wa’omuso dödö Yehowa ba nifalua Yesu!Gamaedola 27:11; faigi Gonönöta 15.

13. Hewisa wame’e höli?

13 Hewisa wame’e höli? Ibe’e wa’aurinia so’ahonoa Yesu tobali sumange khö Namania. Me 14 Nisa döfi 33 ba zura mbaŵa niha Yehuda, itehegö Yehowa mate Yesu ba danga zi fa’udu khönia. (Heberai’o 10:10) Tölu ngaluo aefa da’ö, ifuli isusugi ia Yehowa tobali boto eheha. Aefa da’ö, möi Yesu khö Namania ba zorugo ba wame’e fa’aurinia so’ahonoa tobali höli. (Heberai’o 9:24) Awena te’efa’ö niha  moroi ba horö ba ba wa’amate.Baso Roma 3:23, 24.

HADIA GUNA HÖLI KHÖU

14, 15. Hadia nifaluada ena’ö aefa horöda?

14 No ta’ila mege hadia mbuala fondrege zebua nibe’e Lowalangi khöda. Datafaigi hadia gunania khöda iada’a hegöi ba zi so föna.

15 Te’efa’ö horöda. Abua khöda wamalua amuata si sökhi ero inötö. Asese fasala ita ba wehede hegöi ba gamuata. (Kolose 1:13, 14) Hewisa ena’ö tola aefa horöda? Tafalalini gera-erada, ba ta’andrö wangefa horö khö Yehowa si fao fangide-ngide’ö. Aefa da’ö, mamati ita wa hasambalö i’efa’ö horöda.I Yohane 1:8, 9.

16. Hewisa ena’ö so khöda dödö side-ide sohau-hau?

16 So khöda dödö side-ide sohau-hau. Itegu ita tödöda side-ide na tafalua zala, so khöda waniasa, aetu wanötöna, ba hulö niha si lö moguna ita. Hiza’i, böi tabusi dödöda. Na ta’andrö wa’ebolo dödö Yehowa, faduhu dödöda wa ifondro-ndrongo khöda ba i’efa’ö horöda. (Heberai’o 9:13, 14) Omasi Yehowa na tatutunö khönia gabula dödöda ba si tebai ikhamö fa’abölöda. (Heberai’o 4:14-16) Lua-luania, tola ta’okhögö dödö side-ide sohau-hau föna Lowalangi.

17. Hadia howu-howu khöda me no mate Yesu?

17 So khöda wanötöna fa’auri si lö aetu. ”Luo horö sa, ba fa’amate, ba buala fa’ebua dödö Lowalangi andrö, ba no fa’auri si lö aetu ba khö Keriso Yesu, So’aya ya’ita.” (Roma 6:23) Börö me no ihöli  ita Yesu, tola tasöndra wa’auri si lö aetu, ba lö göna ita fökhö. (Fama’ele’ö 21:3, 4) Hewisa ena’ö tola tatema howu-howu andrö?

HADIA OMASI NDRA’UGÖ ÖTEMA HÖLI?

18. Hadia dandra wa’omasi Yehowa khöda?

18 Khalaigö wa’omuso dödöu na ötema mbuala si sökhi sibai. Simanö göi höli andrö no buala fondrege zi sökhi, andrö moguna ta’andrö saohagölö khö Yehowa. Imane Yohane 3:16, ”Simanö sa wa’omasi Lowalangi nösi gulidanö, no ibe’e Nononia andrö si ha sambua.” Börö wa’omasi Yehowa khöda, ifatenge Nononia ba gulidanö. Ba ta’ila wa’omasi Yesu göi, itehegö mate ia salahida. (Yohane 15:13) Höli andre dandra wa’omasi Yehowa hegöi Yesu khöda.Galatia 2:20.

Na tafaha’ö ita sanandrösa khö Yehowa, tobali ita si fahuwu khönia ba monönö wa’omasida khönia

19, 20. (a) Hewisa ena’ö tola fahuwu ita khö Yehowa? (b) Hadia dandra wa ta’andrö saohagölö höli nibe’e Yesu?

19 No ta’ila wa’omasi Lowalangi khöda, ba hewisa ena’ö tola fahuwu ita khönia? Lö ta’ila ta’omasi’ö niha si lö fa’ila khöda. Imane Yohane 17:3, tola aboto ba dödöda Yehowa. Na no so khöda wa’aboto ba dödö haniha ia, tedou wa’omasida khönia, ba tobali ita si fahuwu khönia. Börö da’ö, böi taböhöli wamaha’ö ya’ita khö Yehowa ba Zura Ni’amoni’ö.I Yohane 5:3.

20 Mamati ita ba höli nibe’e Yesu. Imane Sura Ni’amoni’ö, ”Khö zamati khö Nono andrö so wa’auri si lö aetu.” (Yohane 3:36) Hadia geluaha mamati? Eluahania tafalua niwa’ö Yesu. (Yohane  13:15) Tenga ha asala tawa’ö, mamati ndra’o khö Yesu, moguna taforoma’ö ba mbua-buada. Simane niwa’ö ba Yakobo 2:26, ’Famati andrö, lö fa’auri, na lö bua-bua.’

21, 22. (a) Hana wa moguna ta’ondrasi Wanörö Tödö fa’amate Keriso ero röfi? (b) Hadia nifatunöda ba Faza 6 ba 7?

21 Ondrasi Wanörö Tödö fa’amate Keriso. Fatua lö mate Yesu, no i’oroisi ena’ö tatörö tödö wa’amatenia. Tafalua da’ö sakali ba zi döfi, ba lafotöi ia Bongi Watomesa Zo’aya. (Matai’o 26:26-28) Omasi Yesu na tatörö tödö höli si no ibe’e. Imane, ”Mitörö-törö tödömi ndra’o, ba zimane.” (Baso Luka 22:19.) Na ö’ondrasi Wanörö Tödö fa’amate Yesu, lö solifu ndra’ugö höli awö wa’omasi Yehowa hegöi Yesu khöda.—Faigi Gonönöta 16.

22 Höli no buala fondrege zebua si no irai tatema. (II Korindro 9:14, 15) Ba Faza 6 ba 7 ifatunö khöda wa moguna göi höli andre ba niha si no mate zuta wa’ato.