TUHO FAZA DA’A

Hewisa wama’anö ono mbanua Lowalangi ba wa’atefasindro Mbanua Lowalangi

1, 2. Hadia zalua si tebai ta’olifugö ba sejarah gulidanö, ba hana wa lö oroma ia ba niha gulidanö?

HADIA no irai manofu-nofu ndra’ugö hewisa rasonia wa’auri ba ginötö alua wa’afabö’ö sabölö-bölö ba sejarah gulidanö? Ato zanofu-nofu simane da’ö. Hiza’i, angeraigö: Na so ndra’ugö me luo da’ö, hadia ö’ila zalua si tola manga’asogö fa’afabö’ö? Te lö’ö. Sasesenia, lö la’ila niha sato hadia manö zalua fatua lö adudu wamatörö si no ara hegöi si no tesura ba ngawalö mbuku sejarah. Oya zalua si lö la’ila niha sato—bakha ba istana, ba mbate’e sololohe famatörö, mazui ba gödo ndra samatörö. Hewa’ae simanö, salua andrö tola ifabö’öni wa’auri niha si hauga zuta fa’ato.

2 So zalua si tebai ta’olifugö ba sejarah gulidanö. Salua andre tola molua-lua ia ba wa’auri niha si hauga zuta. Hiza’i, lö oroma ia ba niha gulidanö. Tatu manö, eluaha niwa’öma ya’ia da’ö fa’atefasindro Mbanua Lowalangi ba zorugo. Da’a wamatörö Mesia si no ara tefabu’u ba wangohori fefu famatörö si so ba gulidanö. (Baso Danieli 2:34, 35, 44, 45.) Börö me lö la’ila niha wa’atumbu si tebai mu’aohasi ba dödö, hadia da’ö geluahania ibini’ö Yehowa zalua andre ba niha gulidanö? Mazui ifa’anö nono mbanuania si lö faröi ba zalua andrö? Datafaigi.

”Nifatengegu Andrö, Ena’ö Ihaogö Lala Fönagu”

3-5. (a) Haniha nifotöi ”tenge-tenge wawu’usa li” ba Maleakhi 3:1? (b) Hadia zalua fatua lö tohare ba gosali ”tenge-tenge wawu’usa li”?

3 I’otarai me föna, ohitö dödö Yehowa ya’ia da’ö ba wama’anö ono mbanuania ba wa’atefasindro Mbanua Mesia. Duma-dumania, faigi atö wama’ele’ö ba Maleakhi 3:1, ’Hiza, nifatengegu andrö, ena’ö ihaogö lala fönagu; ba lö mudöna-döna, ba möi ba gosalinia Zo’aya andrö, ni’aluimi, tenge-tenge wawu’usa li andrö, somasi ami, zi so.’

4 Ba wa’aluania ba ginötö andre, hawa’ara tohare Yehowa, ’So’aya’, ba wamareso niha sohalöwö ba golayama gosali wamati ba gulidanö? Ba wama’ele’ö andrö itutunö wa fao ”tenge-tenge wawu’usa li” andrö ba we’aso Yehowa. Haniha ia? Ya’ia andrö Razo Mesia, Yesu Keriso! (Luk. 1:68-73)  Börö me ya’ia zi no tefataro tobali Samatörö, möi ia wamareso hegöi ba wo’amoni’ö ono mbanua Lowalangi ba gulidanö.—I Fet. 4:17.

5 Tobali, haniha ’denge-tenge’ tanö bö’ö nitötöi ba wamobörö Maleakhi 3:1? Oföna so niha nifa’ele’ö da’a fatua lö tohare Razo Mesia. Ngafulu fakhe fatua lö 1914, hadia so ’zangehaogö lala’ khö Razo Mesia?

6. Haniha ’denge-tenge’ si no tefa’ele’ö si oföna sibai tohare ba wama’anö niha si lö faröi ba zi lö aratö alua?

6 Tola tasöndra wanema li ba publikasi da’a sanandrösa ba sejarah sahöli-höli dödö ba nono mbanua Yehowa ba ginötö andre. Tebörögö sejarah da’a ba gangohorita abad si 19, me oroma niha satulö soroi ba dödö si lö atoto tobali niha Keriso sindruhu ba gotalua nowi walimosa. Ya’ira andre tefotöi Ono Zekola Zura Ni’amoni’ö. Niha sondrönia’ö me luo da’ö simane Charles T. Russell hegöi ira awönia sahatö khönia, tobali ira ”tenge-tenge” nifa’ele’ö andrö. Labe’e wanuturu lala ba wamati ba nono mbanua Lowalangi ba lafa’anö ira ba zi lö aratö alua andrö. Datafaigi zi öfa ngawalö lala nifalua ”tenge-tenge” andrö.

Famosumange Lowalangi ba Zindruhu

7, 8. (a) Me döfi 1800-an, haniha zi oföna sibai mangombakha falimosa sanandrösa ba wamaha’ö noso si lö mate? (b) Hadia manö wamaha’ö faya ni’ombakha’ö C.T. Russell hegöi iro awönia sahatö khönia?

7 Ono Zekola Zura Ni’amoni’ö andre la’andrö wanuturu lala moroi khö Yehowa; ba lahalö gangetula sanandrösa ba wamaha’ö si tefaudu, la’owuloi, ba lafazökhi. Ba zi hauga abad fa’ara, no ogömi Agama-Agama Niha Keriso ba wamati. Oya wamaha’öra si otarai niha baero. Duma-duma siföföna ya’ia da’ö famaha’ö sanandrösa ba noso si lö mate. Sagötö 1800-an, so Nono Zekola Zura Ni’amoni’ö si lö atoto, lafareso wamaha’ö andrö ba aboto ba dödöra wa lö tefaudu ia ba nösi Daromali Lowalangi. Lö fa’ata’u khö Henry Grew, George Stetson, ba George Storrs ba wanura hegöi ba wama’ema huhuo ba wangombakha falimosa Zatana. * Ebua lua-lua nifaluara andrö khö C.T. Russell hegöi ira awönia sahatö khönia.

8 Aboto ba dödö Nono Zekola Zura Ni’amoni’ö wa famaha’ö tanö bö’ö so’amakhaita ba noso si lö mate oi fasala ba möi fangafökhö högö niha. Duma-dumania, so wamaha’ö wa fefu niha si sökhi amuata möi ba zorugo mazui ifakao niha si lö sökhi Lowalangi ba galitö narako sagötö fa’ara. Lö ata’u Russell hegöi ira awönia sahatö khönia ba wangombakha falimosa andrö ba zi hauga ngawua artikel, buku, pamflet, risalah hegöi huhuo sebua.

9. Hewisa wangombakha Zion’s Watch Tower walimosa sanandrösa ba wamaha’ö Lowalangi Sambua Tölu?

9 La’ombakha’ö göi Ono Zekola Zura Ni’amoni’ö wa faya wamaha’ö Lowalangi Sambua Tölu nifosumange niha misa. Me 1887, imane Zion’s Watch Tower, ”No ihaogö itutunö khöda Sura Ni’amoni’ö hewisa wa’afabö’öra Yehowa  ba So’aya ya’ita Yesu hegöi amakhaitara.” Imane nasa artikel andrö wa ahöli-höli dödönia ”me tehöngö ba latema niha sato wamaha’ö Lowalangi sambua tölu—tölu Lowalangi ba zi sambua, ba endronga samösa Lowalangi ba zi tölu. Da’a zangoroma’ö wa abölö sibai wemörö niha gosali me iböbö ia udunia faoma bilagu wamaha’ö faya”.

10. Hewisa wangombakha Watch Tower wa döfi 1914 no döfi si no lafotandro?

10 Simane si no tesura ba duhonia, omasi sibai jurnal Zion’s Watch Tower and Herald of Christ’s Presence ba wama’ele’ö so’amakhaita ba wa’atohare Keriso. La’ila ira niha nibayoini si lö faröi sanura jurnal andrö wa mo’amakhaita wama’ele’ö Danieli sanandrösa ba zi ”mewitu fakhe” ba wa’alua gohitö dödö Lowalangi sanandrösa ba Mbanua Mesia. I’otarai 1870-an, no latatugöi wa tebato zi mewitu fakhe andrö ba ndröfi 1914. (Dan. 4:22; Luk. 21:24) Hewa’ae lö ahori aboto ba dödö ndra talifusöda me luo da’ö geluaha ndröfi si no lafotandro andrö, hiza’i möi ira laturiaigö gofu hezo so misa irege molua-lua ia ofeta mane ma’ökhö.

11, 12. (a) Haniha nisuno dalifusöda Russell ba wamaha’önia? (b) Hawa’amoguna halöwö nifalua Russell hegöi awö-awönia ba zi hauga wulu fakhe fatua lö 1914?

 11 Lö omasi Russell hegöi ira awönia si lö faröi na lasuno ira niha ha börö me no la’ila ba aboto ba dödöra zindruhu andrö. Isuno Russell niha si tohöna mangila fatua lö ya’ira. Sabölö isuno ya’ia da’ö Lowalangi Yehowa, börö me Yehowa zamaha’ö ono mbanuania hadia zinangea la’ila ba hawa’ara moguna la’ila ia. Ifahowu’ö halöwö Russell Yehowa hegöi ira awönia ba wotafi’ö sindruhu moroi ba wamaha’ö faya. Hauga fakhe aefa da’ö, itugu aröu wa’afabö’öra moroi ba Agama-Agama Niha Keriso tanö bö’ö.

La’o’awögö zindruhu moroi ba Zura Ni’amoni’ö ira talifusöda Russell hegöi ira awönia sahatö khönia

12 Sökhi sibai halöwö nifalua ndra matua si lö faröi andrö ba wango’awögö sindruhu ba zi hauga wulu fakhe fatua lö 1914! Imane The Watch Tower and Herald of Christ’s Presence 1 mbaŵa si Felezara 1917, ”Aefa niha si hauga zuta fa’ato ba ginötö andre moroi ba wa’ata’u sanandrösa ba wamaha’ö alitö narako, hegöi famaha’ö faya tanö bö’ö . . . Itugu tedou manö wangi’ila Sindruhu si no mubörögö öfa wulu fakhe ba zi lalö, ba lö aetu tedou irugi inönöi zi sagörö ulidanö; ba niha somba’agö ena’ö böi tefazaewe Zindruhu ba zi sagörö ulidanö, hulö zolawa dulu sabölö-bölö.”

13, 14. (a) Hewisa wama’anö ”tenge-tenge” andrö lala khö Razo Mesia? (b) Hadia zi tobali famaha’ö khöda moroi khö ndra talifusöda sauri ba zi töra otu fakhe si lalö?

13 Angeraigö: Na lö la’ila ono mbanua Lowalangi gamaehuta Yesu moroi khö Namania, Yehowa, hadia tola lafa’anö ira ba wa’atohare Keriso? Tatu manö lö’ö! Lö göi nifa’anöra ira na lawalinga lö latörö wa’amate fefu niha hewa’ae sindruhunia da’ö no buala sebua böli ba niha si lö atoto sotara lahe Keriso; lö nifa’anöra ira na lawalinga ifakao niha Lowalangi ba galitö narako sagötö fa’ara! ”Tenge-tenge” andrö zama’anö lala khö Razo Mesia!

14 Hewisa ita ba ginötö andre? Hadia wamaha’ö si tola tahalö moroi khö ndra talifusöda sauri ba zi töra otu fakhe si lalö? Moguna omasi ita wombaso hegöi ba wamaha’ö ya’ita ba Daromali Lowalangi simane ya’ira. (Yoh. 17:3) Börö me itugu awuwu wamati niha gulidanö solohi ana’a, yamonönö wa’omasida ba gö wamati!—Baso I Timoteo 4:15.

”Miheta Ami Khönia, Ya’ami Banuagu”

15. Hadia zawena aboto ba dödö Nono Zekola Zura Ni’amoni’ö? (Faigi nisura ba gahe zura.)

15 Lafaha’ö niha Ono Zekola Zura Ni’amoni’ö wa moguna laheta ira moroi ba gosali niha gulidanö. Me 1879, itutunö Watch Tower ”gosali Mbabilona”. Hadia da’ö geluahania ira paus? Mazui Osali Katolik Roma? Molo’ö orahua Protestan ba zi hauga abad, da’ö zi no mufo’amaedola ba Zura Ni’amoni’ö sanandrösa ba Mbabilona. Hiza’i, la’ila Ono Zekola Zura Ni’amoni’ö wa fefu Agama-Agama Niha Keriso iada’a, da’ö nifotöi ”Babilona” ba ginötö andre. Hadia mbörö? Börö me lafaha’ö waya simane si no tatutunö  moroi yawa. * Ba gafuriata, lö ibini’ö wangombakha publikasida hadia zinangea lafalua ösi gosali Mbabilona satulö tödö.

16, 17. (a) Hewisa mbuku Millennial Dawn Jilid III hegöi majalah Watch Tower ba wamarou tödö niha ena’ö laheta ira moroi ba agama faya? (b) Hadia mbörö wa ambö abe’e wamangelama nibe’e me luo da’ö? (Faigi nisura ba gahe zura.)

16 Duma-dumania, me 1891, itutunö Millennial Dawn Jilid III hewisa me itimbagö Lowalangi Mbabilona ba ginötö andre ba imane, ”Mutimbagö fefu zo’amakhaita khönia—fefu ngawalö lala halöwöra.” Aefa da’ö, imane wa fefu niha ”si lö fao tödö ba wamaha’ö faya hegöi si to’ölö lafalua, tekaoni ena’ö laheta ira khönia”.

17 Me baŵa si Sara 1900, ibe’e mene-mene Watch Tower ba niha si lö mangeheta töira ba nösi gosali ba sangalu-ngalui tahi sanguma’ö, ”Omasido zindruhu ba lö asese möido ba kebaktian tanö bö’ö.” Isofu artikel da’ö, ”Hiza’i, hadia atulö ia andre—matonga baero ba matonga bakha ba Mbabilona? Hadia da’a wolo’ö ni’andrö . . . somasi ba si tefaudu ba dödö Lowalangi? Tatu manö tenga. Fawu’u li ia [ösi gosali] föna niha sato na fao ia ba zi sambua orahua ba moguna i’o’ö fefu zi no lafakhoi ba mbu’usa li andrö irege . . . iheta mazui lö i’o’ozui wefao ba da’ö föna niha sato.” Itugu abe’e goroisa andrö ba zi hauga fakhe. * Fefu nono mbanua Yehowa moguna laheta ira ba ngawalö zo’amakhaita ba agama faya.

18. Hadia mbörö wa moguna laheta ira moroi ba Mbabilona Sebua?

18 Na mubato wama’ema famangelama ena’ö aheta ba Mbabilona Sebua, hadia so khö Razo si bohou tefataro, sotöi Keriso, ngawawa si no mama’anö ya’ira, ya’ia da’ö niha nibayoini ba gulidanö? Tatu manö lö’ö, börö me ha niha Keriso si no te’efa’ö moroi ba mbilagu wamaha’ö Mbabilona zi tola mamosumange Yehowa ”ba geheha ba . . . ba wa’aduhu”. (Yoh. 4:24) Hadia tahalö gangetula ba ginötö andre ena’ö ta’efa’ö ita moroi ba agama sofaya? Ya lö tebulö ta’o’ö fareta, ”Miheta ami khönia, ya’ami banuagu”!—Baso Fama’ele’ö 18:4.

Owulo ba Wamosumange Lowalangi

19, 20. Hewisa Watch Tower wamarou tödö nono mbanua Lowalangi ena’ö owulo ira ba wamosumange Lowalangi?

19 Lafaha’ö niha Ono Zekola Zura Ni’amoni’ö wa moguna owulo niha si sara lala wamati ba wamosumange Lowalangi, na tola. Molo’ö niha Keriso sindruhu, lö ibönö na ha aheta moroi ba agama sofaya. Moguna göi mu’o’ö wamosumange sindruhu. I’otarai mböröta me tefazökhi Watch Tower, ifarou niha somasi mombaso ena’ö faoma owulo ira ba wamosumange Lowalangi. Duma-dumania, me baŵa si Fitu 1880, ifatunö talifusöda Russell me möi ia misa ba wama’ema huhuo, i’ombakha’ö wa tefarou dödö ndra talifusöda börö gangowuloa si no mufalua. Aefa da’ö, ifarou niha sombaso ena’ö lafa’ohe’ö kartu ba wangombakha fa’atedou  gangowuloa nifaluara. So ösa nifalemba ba nga’örö-nga’örö jurnal andrö. Hadia gunania? ”Ena’ö ta’ila . . . hewisa wame’e Yesu khöda fa’ohahau dödö, me lö aetu-aetu owulo ami ba niha sangokhögö famati sebua.”

Charles Russell hegöi ngawawa Nono Zekola Zura Ni’amoni’ö me mböröta ba Copenhagen, Denmark, me 1909

20 Me 1882, so sambua artikel ba Watch Tower, tuhonia ”Fao Wa’owulo”. Ifarou niha Keriso ena’ö lafalua gangowuloa-gangowuloa ”ba wondrou’ö, ba wamarou tödö, hegöi ba wanga’aro’ö”. Imane, ”Hewa’ae so ba gotaluami zi lö sekola mazui si lö nekhe-nekhe danga, mi’ohe Zura Ni’amoni’ö, karate, ba fese, ba mihaogö mi’oguna’ö Konkordansi. Fili duhonia; andrö wanolo moroi ba Geheha; aefa da’ö baso, angeraigö, fatimbaisi ayatinia, ba hasambalö ibe’e khöu wanuturu lala ena’ö ö’ila zindruhu.”

21. Hadia duma-duma si sökhi moroi ba mbanua niha Keriso si so ba Allegheny, Pennsylvania sanandrösa ba gangowuloa hegöi fokubaloi?

21 So gödo sebua Nono Zekola Zura Ni’amoni’ö ba Allegheny, Pennsylvania, AS. Ba soi andrö, labe’e duma-duma si sökhi, owulo ira ba wolo’ö mene-mene si no i’ehehaini ba zura Heberai’o 10:24, 25. (Baso.) Ba gafuriata, itörö tödö dalifusöda si no alawa döfi sotöi Charles Capen  gangowuloa-gangowuloa si no irai i’ondrasi me ide-ide ia. Isura, ”Lö olifudo ayati nigambaraini ba dowa nahia gangowuloa Lembaga. ’Ha samösa Zamaha’ö ya’ami, ya’ia da’ö Keriso; ba si fatalifusö ami fefu.’ Toröi-röi ba dödögu ayati da’ö—lö hadöi amaehuta zondrönia’ö ba niha si to’ölö ba gotalua nono mbanua Yehowa.” (Mat. 23:8) Itörö tödö dalifusöda Capen gangowuloa-gangowuloa si möi fanga’aro’ö ba samarou tödö hegöi fa’owölö-ölö dalifusöda Russell ba wokubaloi ono mbanua Lowalangi ero samö-samösa.

22. Hadia nifalua niha si lö faröi me mufarou ira ena’ö la’ondrasi fefu gangowuloa niha Keriso, ba hadia wamaha’ö si tola tahalö moroi khöra?

22 Niha si lö faröi la’o’ö duma-duma hegöi fanuturu lala si no mube’e. Oya mbanua niha Keriso sawena tefasindro ba negara bagian tanö bö’ö simane Ohio hegöi ba Michigan, aefa da’ö ba zi sagörö Amerika Utara hegöi ba soi tanö bö’ö. Angeraigö: Na lö mufaha’ö niha si lö faröi ba wolo’ö mene-mene Zura Ni’amoni’ö ena’ö owulo ira ba wamosumange Lowalangi, hadia tola lafa’anö ira ba wa’atohare Keriso? Tatu manö tebai! Hewisa göi ita ba ginötö andre? Moguna tahalö gangetula ena’ö owölö-ölö ita we’amöi ba gangowuloa ba ta’odödögö wefao ba wamosumange Lowalangi hegöi ba wanga’aro’ö famatida.

Owölö-ölö ba Wanuriaigö

23. Hewisa wanutunö Watch Tower wa fefu niha nibayoini lö tola lö’ö tobali ira sanuriaigö sindruhu?

23 Ono Zekola Zura Ni’amoni’ö lafaha’ö wa fefu niha nibayoini lö tola lö’ö tobali ira sanuriaigö sindruhu. Me 1885, imane Watch Tower, ”Böi olifu ita wa fefu niha  nibayoini andrö tebayoini ira ena’ö manuriaigö.” (Yes. 61:1) So wamangaösö ba nifazökhi me 1888, ”Lö si tobini halöwöda . . . Na ta’osiwawöi ia ba ta’alu-alui lala ena’ö lö tafalua, tobali ita sawuyu sareu ba tenga sinangea tatema dadaoma salawa me tekaoni ita.”

24, 25. (a) Hadia göi nifalua Russell hegöi ira awö-awönia sahatö khönia baero wamarou niha ena’ö möi ira manuriaigö? (b) Hadia nidunö-dunö samösa kolportir sanandrösa ba halöwönia me lö oya moto me luo da’ö?

24 Tenga ha lafarou niha ira Russell hegöi awö-awönia sahatö khönia ena’ö möi manuriaigö. Lafazökhi göi risalah Bible Students’ Tracts, mazui töinia ba gafuriata Old Theology Quarterly. Latema risalah-risalah da’a ira sombaso Watch Tower ba labe’e ba niha misa, lö la’andrö mböli.

Moguna manofu ita ba ginötö da’a, ’Hadia halöwö fanuriaigö andre no tobali ohitö dödögu ba wa’auri?’

25 Niha sanehegö fa’aurinia ba wamalua halöwö safönu inötö lafotöi ira kolportir. Samösa moroi ba gotaluara ya’ia da’ö Charles Capen si no mutötöi moroi yawa. Itörö tödönia, ”U’oguna’ö peta moroi ba Lembaga Survei Geologis Amerika Serikat ba wangohalöwögöigö banua Pennsylvania. Oroma fefu lala ba peta andre irege utörö tanö ba wo’anöröi ya’ia. Itaria na no tölu hari utörö tanö ba mbanua andrö ba wanofu ba niha hadia omasi ira mbuku seri Studies in the Scriptures, usewa kudo hegöi kureta ba wamasao buku andrö khöra. Asese tebatodo ba mörö ndra’o ba nomo niha sohalöwö ba danö. Lö oya moto me luo da’ö.”

Samösa kolportir. Faigi ”Bagan Segala Zaman” ba zinga gureta

26. (a) Hadia mbörö wa moguna owölö-ölö nono mbanua Lowalangi ba halöwö fanuriaigö? (b) Hadia zinangea tasofu khöda samösa?

26 Tatu manö moguna wa’abarani hegöi fa’owölö-ölö ba wanuriaigö me luo da’ö. Na lö mufaha’ö niha Keriso sindruhu wa moguna halöwö fanuriaigö, hadia tola lafa’anö ira ba wamatörö Keriso? Tatu manö lö’ö! Mendrua manö me halöwö andrö no tobali tandra wa’atohare Keriso. (Mat. 24:14) Moguna mufa’anö nono mbanua Lowalangi ena’ö labali’ö ohitö dödöra halöwö andre. Moguna manofu ita ba ginötö da’a, ’Hadia halöwö fanuriaigö andre no tobali ohitö dödögu ba wa’auri? Hadia aoha gölögu ba wamalua halöwö fanuriaigö andre?’

Tefasindro Mbanua Lowalangi!

27, 28. Hadia ni’ila Yohane ba gangilatania, ba hadia nifalua Zatana hegöi ira mala’ikania me no tefasindrö Mbanua Lowalangi?

27 Ba gafuriatania, tohare ndröfi 1914 andrö. Simane si no mututunö ba wamobörö faza da’a, samösa lö sangila salua solakhömi andrö ba zorugo. Hiza’i, tebe’e khö Yohane gangilata sangoroma’ö fefu zalua andre si no mufo’amaedolagö. Khalaigö da’a: I’ila ”dandra sebua” Yohane ba zorugo. ”Ira alawe” khö Lowalangi si no amaedola organisasinia si fao ira mala’ika ba zorugo, manabina ba tumbu khönia samösa nono matua. Ono si no mufo’amaedola andre ’ikubaloi dania fefu soi si’o si’öli’ ba zi lö aratö. Hiza’i, me no tumbu ia, ”te’ohe khö Lowalangi nononia andrö, föna dadaomania”. So li si’ao ba zorugo imane,  ”Awena to’ele wangorifi andrö khö Lowalangida, ba fa’abölö andrö ba famatörö andrö; ba fa’atola andrö, khö nibayoini andrö khönia.”—Fam. 12:1, 5, 10.

28 Sindruhu-ndruhu no i’ila Yohane ba gangilata, wa no tefasindro Mbanua Mesia. Molakhömi sibai zalua andrö. Hiza’i, lö fefu so zomuso tödö. Fa’udu Zatana hegöi ira mala’ikania khö ndra mala’ika si lö faröi nidönia’ö Mikhaeli mazui Keriso. Hadia lua-luania? Databaso, ”Ba tetibo’ö naga sebua andrö, ulö satua andrö, sotöi Afökha ba Satana, samaelungu niha ba gulidanö, fefu; tetibo’ö si tou ia ba danö ba tetibo’ö göi mala’ikania andrö, awönia.”—Fam. 12:7, 9.

Me 1914, ibörötaigö la’ila Ono Zekola Zura Ni’amoni’ö dandra we’aso Keriso si lö oroma

29, 30. Me no aefa tefasindro Mbanua Mesia, hadia zalua (a) ba gulidanö? (b) ba zorugo?

29 Fatua lö 1914, no lawa’ö Ono Zekola Zura Ni’amoni’ö wa tebörögö mbaŵa wamakao ba ndröfi si no lafotandro. Lö irai lakhalaigö wa tefaudu sibai zi no la’angeraigö andrö. Simane salua ba gangilata Yohane, itugu abölö Zatana ba wolohi hegöi ba wanuwö niha gulidanö: ”Ba alai gulidanö, awö nasi, me no möi mitou Gafökha andrö khömi, ba me no ebua wönunia, ba me no i’ila, lö ara nitehe khönia.” (Fam. 12:12) Me 1914, alua wasuwöta gulidanö siföföna ba zi sagörö ulidanö, tandra we’aso Keriso ba wamatörönia. Tebörögö göi ”götö safuria” andre.—II Tim. 3:1.

30 Hiza’i, so wa’omuso dödö ba zorugo. Tetibo’ö Zatana hegöi ira mala’ikania irugi zi lö aetu. Imane Yohane, ”Andrö mi’omusoi’ö dödömi, ya’ami banua si yawa, awö zi so nahia ba da’ö.” (Fam. 12:12) Me no ohahau zorugo ba tefataro Yesu tobali Razo, iada’a no ifa’anö ia Banua Mesia ba wamalua soguna ba nono mbanua Lowalangi ba gulidanö. Hadia nifaluania? Simane ni’ilada ba wamobörö faza da’a, Keriso si no amaedola ”tenge-tenge wawu’usa li” si oföna ibohouni nono mbanua Lowalangi ba gulidanö. Hadia geluahania?

Inötö Wanandraigö

31. Hadia nifa’ele’ö Maleakhi sanandrösa ba mbaŵa wamohouni, ba hewisa wa alua nifa’ele’ö andrö? (Faigi nisura ba gahe zura.)

31 No ifa’ele’ö Maleakhi wa lö aoha wamohouni andrö. Imane wanura, ”Haniha zanaha baŵa wa’asonia andrö, ba haniha zi tola, na to’ele ia? Me hulö simane alitö ba zolaugö ana’a ia, ba me hulö simane idanö nawu ba zamabago nukha.” (Mal. 3:2) Atulö sibai ngawua wehede da’ö! I’otarai 1914, oya wanandraigö hegöi abula dödö sebua nitaögö nono mbanua Lowalangi ba gulidanö. Me alua Wasuwöta Gulidanö I, ato Nono Zekola Zura Ni’amoni’ö si göna folohi ba labe’e ira ba gurunga. *

32. Hadia gabula dödö salua ba gotalua nono mbanua Lowalangi me no aefa ndröfi 1916?

32 So göi gabula dödö moroi bakha ba organisasi. Me 1916, mate dalifusöda Russell me 64 fakhe ndröfinia. Ato  nono mbanua Lowalangi zi tokea. Me no aefa mate ia, oroma wa so ösa niha si talafo mamosumange ira matua si tobali tulada. Hewa’ae lö omasi dalifusöda Russell na lasuno-suno ia, ato zui zamalua da’ö. Lawalinga ba wa’amatenia tebato wama’ele’ö sindruhu sa’ae, so zi lö fao tödö ba la’alui lala ena’ö lö tedou ba wamati. Lua-luania ato zondröi sindruhu irege aboto organisasi.

33. Hewisa wa tetandraigö nono mbanua Lowalangi börö me lö alua zi no ladöna-döna?

33 Abula dödö tanö bö’ö ya’ia da’ö me lö alua zi no ladöna-döna. Hewa’ae no iwa’ö Watch Tower wa tebato Götö Niha Baero ba ndröfi 1914, so ndra talifusöda si lö mangila hadia zalua ba ndröfi da’ö. (Luk. 21:24) Lawalinga me 1914, i’ohe Keriso ba zorugo ngawawa ni’owalu niha nibayoini ba fao ira mamatörö ba da’ö. Lö a’ozu sa nitötönara andrö. Ba gangohorita 1914, i’ombakha’ö The Watch Tower wa tebato zi 40 fakhe mbaŵa wamasi ba musim semi 1918 (te me baŵa si Öfa, Lima, ba Önö). Hiza’i, lö tebato halöwö fanuriaigö. Itugu tedou halöwö andrö me no aefa ndröfi da’ö. Itutunö majalah andrö te lö sawai mubasi zi toröi mbasitö hewa’ae sindruhunia no awai mbaŵa wamasi. Hiza’i, ato zafatö tödö irege labato wamosumange Yehowa.

34. Hadia gabula dödö sebua me 1918, ba hadia mbörö wa lawalinga no ”mate” nono mbanua Lowalangi ira Agama-Agama Niha Keriso?

34 Alua wanandraigö sabölö-bölö me döfi 1918. Lataha J.F. Rutherford, fogati C.T. Russell ba wondrönia’ö ono mbanua Lowalangi, hegöi si dafitu talifusöda tanö bö’ö sangai halöwö. Huku si lö atulö nibe’e khöra. Labe’e ira ba gurunga federal ba Atlanta, Georgia, AS ba ara la’efasi ira. Ba zi sambua inötö, hulö no tebato halöwö nono mbanua Lowalangi. Ato klerus Agama-Agama Niha Keriso zomuso tödö. Lawalinga teduhö gödo sebua ba Brooklyn börö me no mukuru ”ndra sondrönia’ö”. Ba börö me no musaisi halöwö fanuriaigö ba Amerika hegöi ba Eropa, tatu ”mate” sa’ae Nono Zekola Zura Ni’amoni’ö solohe fökhö waba andre ba lö tobali ira sa’ae ameta’uö. (Fam. 11:3, 7-10) Fasala sibai ira!

Inötö Wanga’azökhi!

35. Hana wa itehegö Yesu alua gabula dödö ba niha solo’ö ya’ia, ba hadia nifaluania ba wanolo ya’ira?

35 Lö la’ila udu zindruhu, wa itehegö alua gabula dödö andre Yesu ba nono mbanua Lowalangi börö me dumadao Yehowa ”wolaugö firö andrö ba fangehao ya’ia”. (Mal. 3:3) Faduhu dödö Yehowa hegöi Ononia wa hasambalö so niha si lö faröi saefa moroi ba galitö fanandraigö, mubohouni ira, ba itugu sökhi ira ba wangai halöwö Razo. I’otarai ndröfi 1919, so nifalua geheha Lowalangi si tebai alua molo’ö niwa’ö nudu. Tebohouni fefu niha si lö faröi! (Fam. 11:11) Me luo da’ö, sindruhu ifalua dandra si oföna Keriso moroi ba ngaluo safuria. Ifataro ”zawuyu si lö faröi  ba satua-tua”, ngawawa ndra matua nibayoini si lö atoto ba wondrönia’ö ono mbanuania, lafa’ema gö wamati ba ginötö si tefaudu.—Mat. 24:45-47.

36. Hadia manö zangoroma’ö wa no tebohouni ba wamati nono mbanua Lowalangi?

36 La’efasi ba gurunga dalifusöda Rutherford hegöi ira awönia me 26 mbaŵa si Tölu 1919. Lö aratö mufalua kebaktian ba mbaŵa si Siwa. La’era-era ba wamazökhi jurnal si dua nifotöi The Golden Age. Awö majalah The Watch Tower andre mufazökhi ia ena’ö tola mu’oguna’ö ba wanuriaigö. * Ba ndröfi da’ö göi tefazökhi Bulletin si oföna, iada’a mufotöi ia Faʼauri Niha Keriso ba Fanuriaigö. I’otarai ba wamobörö, da’a zi tobali famarou dödö ba wanuriaigö misa. I’otarai 1919 irugi iada’a, mu’ofönai’ö halöwö fanuriaigö ero samö-samösa hegöi ba nomo-omo misa.

37. Hewisa wa so ösa niha si faröi me no aefa ndröfi 1919?

37 Itugu tebohouni nono mbanua Keriso ba halöwö fanuriaigö börö me lö lafalua halöwö side-ide andre niha sangosebua ba sasiliyawa. Niha si lö molo’ö lala halöwö da’a, lafabali ira moroi ba niha si lö faröi. Me no aefa ndröfi 1919, so ösa niha si faröi safökhö tödö, la’o’aya ba laböbögö zi lö  duhu, fa’awö ira ba niha solohi ono mbanua Yehowa si lö faröi.

38. Hadia zi faduhu dödöda börö me mofozu halöwö niha solo’ö khö Keriso ba gulidanö andre ba so khöra wemöna?

38 Hewa’ae so wolohi simane da’ö, itugu tedou zolo’ö khö Keriso ba gulidanö andre ba ohahau dödöra ba wamati. Fa’amofozu halöwöra, ba ero möna ira me luo da’ö, no tobali tandra khöda wa no mamatörö Mbanua Lowalangi! Ha börö wanolo Lowalangi hegöi howu-howu ni’asogönia ba döi Nononia hegöi Banua Mesia, andrö wa tola möna ngawawa niha gulidanö si lö atoto, si to’ölö manö, si lö mo’ahonoa, ba wokalaisi Satana hegöi ulidanö si lö sökhi tana khönia!—Baso Yesaya 54:17.

Me no hauga waŵa aefa dalifusöda Rutherford ba gurunga ifa’ema huhuo sebua samarou tödö ba kebaktian

39, 40. (a) Hadia manö wamaha’ö si tola tahalö ba publikasi andre? (b) Hewisa ena’ö tola öhalö wamaha’ö moroi ba mbuku andre?

39 Ba faza aefa da’a, tafareso hadia zi no ikhamö Banua Lowalangi ba gulidanö ba zi otu fakhe i’otarai me tefasindro ia ba zorugo. Ero sambua faosatö ba mbuku da’a itutunö hadia halöwö Mbanua Lowalangi ba gulidanö. Ero-ero sambua faza, so kotak famuli furi sanolo ya’ita ena’ö ta’ila tatatugöi hawa’ato’ele Mbanua Lowalangi khöda. Ba faza-faza safuria, tatutunö hadia dania zalua na tohare Mbanua Lowalangi ba zi lö aratö ba wangohori niha si lö sökhi hegöi ba wanga’asogö faradaiso ba gulidanö. Hewisa ena’ö tola öhalö khöu wamaha’ö moroi ba publikasi andre?

40 Omasi Zatana na awuwu wamatimö ba Mbanua Lowalangi. Hiza’i, omasi Yehowa wanga’aro’ö famatimö ena’ö telumö’ö ba lö awuwu. (Ef. 6:16) Börö da’ö, mafarou ndra’ugö ena’ö öfaha’ögö ba mbuku da’a soroi ba dödö. Böi bato wamareso tödöu, ’Hadia to’ele khögu Mbanua Lowalangi?’ Na itugu to’ele ia iada’a, itugu tefa’anö ndra’ugö ba wotuhini ya’ia. Böi faröi ndra’ugö ba böi bato wotuhini ya’ia irege la’ila fefu niha sauri wa to’ele Mbanua Lowalangi ba no mamatörö!

^ par. 7 Ena’ö ö’ila danö bö’ö nasa sanandrösa khö Grew, Stetson, hegöi Storrs, faigi mbuku Saksi-Saksi YehuwaPemberita Kerajaan Allah, nga’örö 45-46.

^ par. 15 Hewa’ae la’ila Ono Zekola Zura Ni’amoni’ö wa moguna laheta ira moroi ba ngawalö organisasi agama si fahuwu ba gulidanö, lö aetu labali’ö talifusöra si sara lala wamati niha si faduhu tödö ba höli ba solulu fa’aurinia ba wamosumange Lowalangi hewa’ae tenga Ono Zekola Zura Ni’amoni’ö ira.

^ par. 17 Sambua mbörö wa ambö abe’e wamangelama andrö me luo da’ö börö me ha ba niha Keriso si lö atoto si 144.000 moguna ia. Ta’ila ba Faza 5, fatua lö 1935, ”zato sibai” nifo’amaedolagö ba Wama’ele’ö 7:9, 10 tefarahu nösi gosali Agama-Agama Niha Keriso si tebai mu’erai wa’ato, tobali ira ngawawa si dua sauri si möi ba zorugo sotema luora börö me fa’awö ira khö Keriso irugi wa’atoharenia.

^ par. 31 Me baŵa si Siwa 1920, tefazökhi edisi khusus The Golden Age (iada’a Awake! mazui Sadarlah!) da’ö zanutunö ngawalö wolohi salua me götö wasuwöta. So ösa ba gotaluania zabölö-bölö sibai—ba Amerika Serikat, Inggris, Jerman, hegöi Kanada. Fabö’ö sibai zalua me ha’uga wulu fakhe fatua lö alua wasuwöta gulidanö siföföna, lö oya wolohi salua.

^ par. 36 Ba zi ha’uga fakhe fa’ara, mutandrösaigö The Watch Tower khö ngawawa si lö atoto ena’ö te’a’aro’ö wamatira.