Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Mamatörö Mbanua Lowalangi!

Sura Nifa’ema Mboto Solohe

Sura Nifa’ema Mboto Solohe

Talifusö Ni’omasi’ö Sanuriaigö Banua Lowalangi,

KHALAIGÖ na ya’ugö ösi nomo Mbetieli Brooklyn me hari Zumaha sihulö wongi 2 mbaŵa si Fulu 1914. Simane si to’ölö, mudadao’ö ba gurusi si no latatugöi na manga ero sihulö wongi ba wombalo-baloi talifusöda C.T. Russell. Ba zi lö ödöna-döna, teboka mbawandruhö naha wemanga ba tohare dalifusöda Russell. Si to’ölönia tebato ia sabata ba muhede ia ba nösi nomo Mbetieli, ”Ya’ahowu fefu.” Aefa da’ö, moroi na mudadao ia, ibözi tawo-tawo ba wama’ema angombakhata sahöli-höli dödö, ”No awai Götö Niha Baero; awai ginötö khö ndra razora ba wamatörö!” Omuso dödöu si fao fa’ahöli-höli dödö börö me no ara ödöna-döna da’a! Fao ndra’ugö ba wa’omuso dödö nösi nomo Mbetieli ba gangombakhata andrö ba ara öbözi tawo-tawo.

 No hauga wulu fakhe numalö ginötö me ifa’ema talifusöda Russell gangombakhata andrö. Hadia nikhamö Mbanua Lowalangi i’otarai da’ö? Oya sibai! I’oguna’ö Mbanua Lowalangi, izara-zara ba wamohouni hegöi ba wamaha’ö ono mbanuania Yehowa—me 1914 ha mato hauga ribu, iada’a no töra fitu zuta amatonga wa’ato. Hadia manö nisöndramö gunania moroi ba wamaha’ö andrö?

Ba ginötö andre, asese tarongo wehede ndra talifusöda, ”Mofanö gureta zorugo Yehowa!” ba sindruhu da’ö. Hiza’i, i’otarai 1914, kureta zorugo Yehowa la’amaedolagö ia organisasi Yehowa si lö oroma, salio sibai, simane ni’ilada na tabaso publikasi da’a. Oya lala ni’oguna’ö zanuriaigö Banua Lowalangi simane koran, plakat, famaehagö gambara, kartu kesaksian, fonograf, radio, hegöi Internet ena’ö teturiaigö duria somuso dödö ba zi sagörö ulidanö.

Börö me ifahowu’ö Yehowa halöwö andre, tola tefazökhi iada’a lektur Zura Ni’amoni’ö ba zi töra 670 ngawalö li ba tabe’e ba niha gofu hezo so ba lö ta’andrö gefe. So ndra talifusöda somasi manolo ba wamazökhi Balai Mbanua Lowalangi, Balai Kebaktian, fasilitas gödo ndraha, ba soi si kayo mazui ba soi bö’ö so’amböta. Ira talifusöda si so fa’omasi andre latolo niha si göna bencana, ba la’oroma’ö na ”ba wamakao, tumbu ia” si fatalifusö.—Gamd. 17:17.

Itaria so ndra sondrönia’ö ba agama hegöi niha safökhö tödö, la’alui danömö gabula dödöda. Hiza’i, itugu aro wamatida na ta’ila hewa’ae laforege wanaisi halöwöda, itugu ”abölö terongo duria somuso dödö”.—Zin. 94:20; Fil. 1:12.

No sambua töi sebua na falulu fohalöwö ita khö ndra talifusöda ”barö mbawa si so yomo khönia”. Yafaduhu dödömi wa ma’omasi’ö ami. Ena’ö publikasi da’a zangabakha’ö ba dödömi wangandrö saohagölö ba gondröita wamati si no mitema.—Mat. 24:45.

Mafa’ema wangowaima si fao fa’omasi,

Ira talifusömi,

Boto Solohe Samaduhu’ö Yehowa