Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Mamatörö Mbanua Lowalangi!

 FAZA 4

I’alawa’ö Döinia Yehowa

I’alawa’ö Döinia Yehowa

TUHO FAZA DA’A

Ono mbanua Lowalangi la’alawa’ö döi Lowalangi

1, 2. Hewisa wo’alawa’ö töi Yehowa ba Wamo’eluaha Gulidanö si Bohou?

ME SIHULÖ wongi hari Salasa, 2 mbaŵa si Felendrua 1947, so ngawawa si lö atoto si no tebayoini moroi ba Mbetieli Brooklyn, New York, lafalua halöwö sebua. Hewa’ae abua halöwö andre, lö faröi ira ba wohalöwögöigö ba zi 12 fakhe fa’ara. Ba gafuriata, me luo Migu 13 mbaŵa si Tölu 1960, awai teks safuria moroi ba wamo’eluaha Sura Ni’amoni’ö si bohou. Tölu waŵa aefa da’ö, me 18 mbaŵa si Önö 1960, ifatunö talifusöda Nathan Knorr Zura Ni’amoni’ö Famo’eluaha Gulidanö si Bohou (ba li Inggris) si no tefa’anö ba kebaktian Manchester, Inggris, si möi fangomuso dödö niha sangondrasi. I’ila hewisa dödö zangondrasi ba ebua linia imane, ’Da’a ngaluo fa’omuso dödö sebua khö ndra Samaduhu’ö Yehowa ba zi sagörö ulidanö!’ Sambua zi tohude ba wamo’eluaha si bohou andre ya’ia da’ö oya tesura döi Lowalangi ba ayati.

La’ombakha’ö Buku Ni’amoni’ö Yunani Niha Keriso Famo’eluaha Gulidanö si Bohou ba Kebaktian Pertambahan Teokratis me döfi 1950 (Kabera: Yankee Stadium, New York City; kambölö: Ghana)

2 Oya wamo’eluaha Sura Ni’amoni’ö si no manayaigö töi Lowalangi. Hiza’i, lahalö gangetula ono mbanua Yehowa si no tebayoini ba wolawa tandrawa Zatana sanayaigö töi Lowalangi ba wangera-ngera niha. Imane ba wehede famasao ba Wamo’eluaha Gulidanö si Bohou ni’ombakha’ö me luo da’ö, ”Si tohude ba wamo’eluaha andre, tefangawuli döi Lowalangi ba nahia satulö.” Töra 7.000 kali no la’oguna’ö döi Lowalangi Yehowa ba Wamo’eluaha Gulidanö si Bohou. Ahöli-höli dödöda wamo’eluaha da’a, börö me i’alawa’ö döi Namada ba zorugo—Yehowa!

3. (a) Hadia ni’ila ndra talifusöda sanandrösa ba geluaha döi Lowalangi? (b) Hadia geluaha ngawua wehede ba II Moze 3:13, 14? (Faigi kotak ” Eluaha Döi Lowalangi”.)

3 Me böröta ndröfi, la’ila Ono Zekola Zura Ni’amoni’ö wa eluaha döi Lowalangi ya’ia da’ö ”ya’o-ya’odo manö ndra’odo andre”. (II Moz. 3:14) Imane ba The Watch Tower 1 mbaŵa si Sara 1926, ”Töi Yehowa zangoroma’ö wa so so manö ia, . . . si lö böröta ba amozua.” Hiza’i, me labörögö halöwöra ira samo’eluaha Famo’eluaha Gulidanö si Bohou,  itolo nono mbanuania Yehowa wangi’ila wa eluaha döinia andrö tenga wa so so manö ia. Hiza’i si oföna sibai, ya’ia andrö Lowalangi si so ohitö dödö ba hasambalö ifalua. Aboto ba dödöra wa eluaha döi Yehowa molo’ö ngawua wehede ya’ia da’ö ”Ya’ia Mbörö Wa Alua”. Ya’ia zanga’asogö banua si yawa hegöi omböila dangania samosumange ya’ia, ba ya’ia mbörö wa alua ni’era-erania hegöi ohitö dödönia. Hana wa moguna ta’alawa döi Lowalangi, ba hewisa ita ba wo’alawa’ö töinia?

Fangamoni’ö Töi Lowalangi

4, 5. (a) Hadia gangandröwada na mangandrö ita, ”Yate’amoni’ö döiu”? (b) Hewisa ba hawa’ara i’amoni’ö döinia Lowalangi?

4 Omasi Yehowa na te’alawa’ö döinia. Ohitö dödönia si oföna ya’ia da’ö ba wangamoni’ö töinia, simane ni’ilada ba gangandröwa Yesu siföföna ba duma-duma wangandrönia, ”Yate’amoni’ö döiu.” (Mat. 6:9) Ba ginötö ta’angandröi ia, hadia ni’andröda?

5 Simane si no tafaha’ö ita ba Faza 1, angandröwa ”Yate’amoni’ö döiu” no sambua duma-duma moroi ba zi tölu gangandröwa Yesu so’amakhaita ba gohitö dödö Yehowa. Si dombua tanö bö’ö ya’ia da’ö, ’Yatohare Mbanuamö. Ya’itörö zomasi ndra’ugö, hulö ba zorugö, yasimanö göi ba gulidanö.’ (Mat. 6:10) Börö da’ö, ta’andrö khö Yehowa ena’ö tohare Mbanuania, ba ena’ö i’amoni’ö döinia. Mazui fehede tanö bö’ö, ta’andrö khö Yehowa ena’ö ihaogö döinia me no muböbögö khönia zi lö duhu i’otarai ba Gedena. Hewisa wame’e Yehowa fanema li ba wangandrö andrö? Imane, ”Ba u’amoni’ö döigu andrö, sebua, si no mu’o’aya ba niha baero.” (Hez. 36:23; 38:23) Ba Hamagedo, na ihori Yehowa zi lö sökhi, i’amoni’ö döinia föna gomböila dangania.

6. Hewisa ena’ö fao ita ba wangamoni’ö töi Lowalangi?

6 Sagötö sejarah, itehegö Yehowa ba nono mbanuania ba wangamoni’ö töinia. Tatu manö, lö ta’ila tanönö wangamoni’ö töi Lowalangi. No te’amoni’ö döinia, tenga dali ya’ita zangamoni’ö. Tobali, hewisa wa tola ta’amoni’ö ia? Imane Yesaya, ”Yehowa ngahönö andrö mi’amoni’ö.” Ba imane Yehowa sanandrösa ba nono mbanuania, ”Ba la’amoni’ö sa’ae döigu andrö; . . . ba la’ata’ufi Lowalangi ndraono Gizara’eli andrö.” (Yes. 8:13; 29:23) Lala wangamoni’ö töi Lowalangi ya’ia da’ö tafaduhu’ö wa fabö’ö döinia moroi ba danö bö’ö. Tafosumange zokhö töi andrö ba tatolo niha bö’ö ena’ö lafaduhu’ö wa te’amoni’ö döinia. Tatu manö adöni dödöda ba tafosumange döi Lowalangi na tafaduhu’ö wa Yehowa andrö Zamatörö ya’ita ba ta’o’ö ia soroi ba dödö.—Gamd. 3:1; Fam. 4:11.

 Lafa’anö Ira ba Wangotöigö hegöi ba Wo’alawa’ö Töi Lowalangi

7, 8. (a) Hadia mbörö wa moguna ginötö ba nono mbanua Lowalangi wangotöigö töi Lowalangi? (b) Hadia zinangea tafatunö?

7 Ono mbanua Lowalangi ba ginötö da’a, la’oguna’ö döi Lowalangi ba publikasira i’otarai me 1870-an. Duma-dumania, no tesura döi Yehowa ba Zion’s Watch Tower baŵa si Walu 1879 hegöi ba Songs of the Bride, buku zinunö si fendronga lafazökhi ba ndröfi da’ö. Hiza’i, fatua lö itehe Yehowa ba nono mbanuania ba wangotöigö töinia ni’amoni’ö föna niha sato, omasi ia na la’o’ö goi-goinia ba wanema töi sebua andre. Hewisa Yehowa wama’anö Ono Zekola Zura Ni’amoni’ö ba wangotöigö töinia?

8 Me 1800-an hegöi böröta ndröfi 1900-an, ibe’e Yehowa wa’aboto ba dödö ba nono mbanuania sanandrösa ba zindruhu so’amakhaita ba döinia. Datatutunö tölu ngawalö zindruhu andre.

9, 10. (a) Hadia mbörö wa Yesu zi tobali tuho ba artikel-artikel Watch Tower me mböröta? (b) Hadia zalua me 1919, aefa da’ö, hadia mbuania? (Faigi kotak ” Hewisa The Watchtower Wo’alawa’ö Töi Lowalangi”.)

9 Si oföna, aboto ba dödö nono mbanua Yehowa wa moguna mu’alawa’ö döi Lowalangi. Molo’ö Ono Zekola Zura Ni’amoni’ö si lö faröi me döfi siföföna, fanga’asogö höli no tuho wamaha’ö siföföna ba Zura Ni’amoni’ö. Da’ö mbörö wa Yesu zi tobali tuho ba Watch Tower. Duma-dumania, me döfi si oföna tefazökhi majalah andrö, fulu kali abölö oya latötöi döi Yesu moroi ba döi Yehowa. Sanandrösa ba Nono Zekola Zura Ni’amoni’ö me döfi siföföna, imane The Watchtower 15 mbaŵa si Tölu 1976, ”abölö la’alawa’ö” Yesu. Ba gafuriata, itolo ira Yehowa ena’ö la’ila wa tohude döi Lowalangi ba Zura Ni’amoni’ö. Hewisa wa so lua-luania ba Nono Zekola Zura Ni’amoni’ö? Töra-töra i’otarai me 1919, imane artikel Watchtower da’ö, ”Ibörögö la’ame’egö tödö Nama Mesia, Yehowa.” Fulu fakhe me no aefa 1919, töra 6.500 kali tetötöi döi Lowalangi ba The Watch Tower!

10 Börö me la’onorogö tödö döi Yehowa, andrö wa la’oroma’ö wa’omasi ira talifusöda ba döi Lowalangi. Simane Moze me föna, tefa’anö ira ’ba wamarongogö töi Yehowa’. (V Moz. 32:3; Zin. 34:4) Aefa da’ö, simane si no ifabu’u Sura Ni’amoni’ö, i’ame’egö tödö Yehowa niha sangomasi’ö töinia ba omuso dödönia khöra.—Zin. 119:132; Heb. 6:10.

11, 12. (a) Hadia zi fabö’ö ba publikasida lö ara me aefa ndröfi 1919? (b) Hezo idönisi dödö nono mbanuania Yehowa, ba hadia mbörö?

11 Si dua, niha Keriso sindruhu lasöndra wa’aboto ba dödö sindruhu ba wamalua halöwö nibe’e Lowalangi. Lö ara me aefa 1919, terou dödö ndra talifusöda si no tebayoini ba wangalui eluaha wama’ele’ö Yesaya. I’otarai da’ö, fabö’ö sa’ae gohitö dödö publikasida. Hadia mbörö wa famohouni andre ’ö na inötö wemanga’?—Mat. 24:45.

12 Fatua lö 1919, lö irai itutunö The Watch Tower wehede Yesaya, ”’Ya’ami zi so ba mbörö khögu [samaduhu’ö ya’o, Terjemahan Dunia Baru],’ iwa’ö Yehowa, ’ba enonigu andrö  nituyugu.’” (Baso Yesaya 43:10-12.) Hiza’i, lö ara me no aefa ndröfi 1919, ibörögö i’onorogö tödö publikasida wehede Zura Ni’amoni’ö andrö, ba ifarou fefu niha si no mubayoini ena’ö fao ira ba halöwö si no ibe’e Yehowa—ya’ia da’ö ba wame’e famaduhu’ö sanandrösa khönia. I’otarai 1925 irugi 1931, mututunö Yesaya faza 43 ba zi 57 ngawua The Watch Tower, ba ero sambua terbitan mufaudugö wehede Yesaya andrö ba niha Keriso sindruhu. Ba zi hauga fakhe andrö, idönisi dödö nono mbanuania Yehowa ba halöwö sinangea lafalua. Hadia mbörö? Tola muwa’ö ena’ö ’tetandraigö ira ua’. (I Tim. 3:10) Fatua lö la’otöigö döi Lowalangi, moguna laforoma’ö Ono Zekola Zura Ni’amoni’ö ba halöwö nifaluara khö Yehowa wa ya’ira andrö samaduhu’ö ya’ia.—Luk. 24:47, 48.

13. Hewisa Daromali Lowalangi wangoroma’ö wa so zinangea mu’asiwai?

13 Si tölu, aboto ba dödö nono mbanua Yehowa ba gafuriatania wa moguna mu’amoni’ö döi Lowalangi. Me 1920-an, aboto ba dödöra wa fo’amoni’ö töi Lowalangi no sambua amadöniwa sebua sinangea mu’asiwai. Hewisa Daromali Lowalangi wangombakhania sindruhu? Datafaigi dombua duma-duma. Hadia mbörö wa i’efa’ö ndraono Gizara’eli Lowalangi moroi ba ndrawa Miserai? Imane Yehowa, ”Ena’ö tesuno döigu ba gulidanö ma’asagörö.” (II Moz. 9:16) Ba, hadia mbörö wa iforoma’ö wa’omasinia Yehowa ba ndraono Gizara’eli hewa’ae mamadaö ira khönia? Sakali tö, imane Yehowa, ”Ba lö olifudo döigu andrö, faböi te’o’aya da’ö ba zanehe niha baero.” (Hez. 20:8-10) Hadia wamaha’ö nihalö Nono Zekola Zura Ni’amoni’ö ba waö-waö andrö hegöi waö-waö tanö bö’ö ba Zura Ni’amoni’ö?

14. (a) Fatua lö angohorita ndröfi 1920-an, hadia zaboto ba dödö nono mbanua Lowalangi? (b) Hewisa lua-luania wa’aboto ba dödö andrö ba Nono Zekola Zura Ni’amoni’ö sanandrösa ba wanuriaigö? (Faigi kotak ” Tani We’amöi ba Wanuriaigö”.)

14 Fatua lö angohorita 1920-an, la’ila ono mbanua Lowalangi geluaha wehede Yesaya mato 2.700 fakhe si lalö. Imane Yesaya sanandrösa khö Yehowa, ”Simanö woloheu banuau, ba wangai töi si teturia [mazui, ”töi sebua”] khöu.” (Yes. 63:14) La’ila Ono Zekola Zura Ni’amoni’ö wa amadöniwa si oföna, tenga ena’ö te’orifi zi samösa niha, hiza’i ba wangamoni’ö töi Lowalangi. (Yes. 37:20; Hez. 38:23) Me 1929, i’adogoi’ö wanutunö sindruhu andrö buku Prophecy imane, ”Töi Yehowa no sambua turia nidunö-dunö föna niwöwöinia.” Fa’aboto ba dödö si bohou andre zamarou tödö nono mbanua Lowalangi ba wame’e famaduhu’ö sanandrösa khö Yehowa hegöi ba wangamoni’ö töinia ba zi lö duhu.

15. (a) Me 1930-an, hadia nisöndra ndra talifusöda? (b) Hadia zi no inötönia?

15 Böröta 1930-an, aboto ba dödö ndra talifusöda döi Lowalangi, la’ila halöwö nibe’enia, ba abakha wa’aboto ba dödöra ba gamadöniwa sinangea mu’asiwai. Iada’a, no irugi inötö khö Yehowa wame’e töi sebua ba nono mbanuania, ba wangotöigö töinia föna niha sato. Ena’ö ta’ila hewisa wa’aluania, datafaigi hadia manö zalua ba zi lalö.

 Ituyu Yehowa ”Niha Baero ba Döinia Andrö”

16. (a) Hadia lala sahöli-höli dödö nifalua Yehowa ba wo’alawa’ö töinia? (b) Me föna, haniha zi tobali salahi nono mbanua Lowalangi?

16 Lala sahöli-höli dödö nifalua Yehowa ba wo’alawa’ö töinia ya’ia da’ö so nono mbanuania ba gulidanö sangotöigö töinia. I’otarai 1513 SM iraono Gizara’eli zi tobali salahi nono mbanua Yehowa. (Yes. 43:12) Hiza’i, lö aetu-aetu lasawö goroisa Lowalangi irege me döfi 33 M, taya wahuwusara khönia. Lö ara aefa da’ö, ifili Yehowa ”wamaigi soi andre, si ha sambua, nituyu ba niha baero, ba döinia andrö”. (Hal. 15:14) Ono mbanua sawena mufili andrö lafotöi ia ’iraono Gizara’eli khö Lowalangi’. Ya’ira andrö niha solo’ö khö Keriso si no tebayoini moroi ba ngawalö soi.—Gal. 6:16.

17. Hadia dandrawa Zatana si no a’ozu?

 17 Mato 44 M, ira nifaha’ö Keriso ’labe’e döira niha Keriso’. (Hal. 11:26) Ba mböröta, fabö’ö döi da’a moroi ba danö bö’ö, tebe’e ha ba niha Keriso sindruhu. (I Fet. 4:16) Hiza’i, simane niforoma’ö ba gamaedola Yesu sanandrösa ba gandru hegöi o’o, no a’ozu gohitö dödö Zatana ba wangoguna’ö tandrawa ba wame’e töi niha Keriso si fabö’ö andre ba niha Keriso faya. Barö zi hauga abad, lö oroma niha Keriso sindruhu moroi ba gotalua niha Keriso faya. Hiza’i, tebörögö tefabö’öni ira me ”baŵa wamasi”, me ibörögö 1914. Hadia mbörö? Börö me laföfö’ö niha Keriso faya ira mala’ika moroi ba zindruhu.—Mat. 13:30, 39-41.

18. Hadia zi möi fanolo khö ndra talifusöda ena’ö la’ila wa moguna so döi si bohou si tefaudu?

18 Me no tefataro zawuyu si lö faröi me döfi 1919, itolo nono mbanuania Yehowa ena’ö aboto ba dödöra halöwö si no ibe’e khöra. La’ila wa halöwö fanuriaigö ba nomo-omo misa zamaehuni ya’ira moroi ba niha Keriso faya. Me no la’ila da’a, lö ara aefa da’ö aboto ba dödöra wa töi ”Ono Zekola Zura Ni’amoni’ö” lö tohude sa’ae moroi ba danö bö’ö. Ohitö dödöra ba wa’auri andre tenga ha lafaha’ö ira ba Zura Ni’amoni’ö, hiza’i ba wame’e famaduhu’ö sanandrösa khö Lowalangi hegöi ba wo’alawa’ö töinia. Tobali, hadia döi si tefaudu ba halöwö nifaluara? Fanofu andre so wanema linia me döfi 1931.

Waö-waö lala halöwö ba kebaktian, 1931

19, 20. (a) Hadia gangetula nifa’ema me 1931? (b) Hewisa dödö ndra talifusöda?

19 Me baŵa si Fitu 1931, so mato 15.000 Nono Zekola Zura Ni’amoni’ö zi möi ba kebaktian ba Columbus, Ohio, AS. Me la’ila waö-waö halöwö, adöni dödöra ba hurufo J hegöi W ba nga’örö tanö föna. Manofu-nofu ira, ’Hadia geluahania?’ Lawalinga eluahania, ’Just Watch’ (Faigi Manö); tanö bö’ö lawa’ö, ’Just Wait’ (Baloi Manö). Ba Migu 26 mbaŵa si Fitu, itandrösaigö talifusöda Joseph Rutherford wama’ema angetula imane, ”Omasiga na la’ila döima ba lakaoni ndra’aga, samaduhu’ö Yehowa.” Awena aboto ba dödö zangondrasi geluaha hurufo si dombua nisofu-sofura andrö—da’ö ngawua wehede moroi ba Jehovah’s Witnesses (Samaduhu’ö Yehowa), nihalö ba Yesaya 43:10.

20 Latema gangetula andrö ya’ira sangondrasi, la’arakö wamözi tawo-tawo. Terongo göi ba radio wa’omuso dödö ba Columbus irugi zi föfö danö! Itörö tödö Ernest hegöi Naomi Barber moroi ba Australia lamane, ”Me larongo ira talifusöda ba Melbourne me labözi tawo-tawo ba Amerika, muzizio ira ba labözi göi tawo-tawo. Lö ma’olifugö zalua andre!” *

Lö Aetu La’alawa’ö Döi Lowalangi ba Zi Sagörö Ulidanö

21. Hewisa döi si bohou andre möi fondrönia’ö halöwö fanuriaigö?

21 Me no la’okhögö döi Samaduhu’ö Yehowa ono mbanua Lowalangi nihalö moroi ba Zura Ni’amoni’ö, da’a  zamarou tödöra wefao ba wanuriaigö. Edward hegöi Jessie Grimes, perintis si no mongambatö moroi ba Amerika Serikat si no mangondrasi kebaktian me 1931 ba Columbus lamane, ”Töima Ono Zekola Zura Ni’amoni’ö moroi ba nomo, me mangawuliga töima Samaduhu’ö Yehowa. Omuso dödöma börö me töi da’a zanolo ya’aga ba wamolakhömi töi Lowalangida.” Me no aefa kebaktian andrö, la’oguna’ö lala si bohou ira Samaduhu’ö molo’ö töi da’ö. Laforoma’ö kartu nama khö zokhö omo ba wangombakha haniha ira, ba so ngawua wehede, ”Samösa moroi ba gotalua zamaduhu’ö YEHOWA sanuriaigö Banua YEHOWA Lowalangima.” Omasi ndra Samaduhu’ö Yehowa la’otöigö döi da’ö, ba laturiaigö gofu hezo manö.—Yes. 12:4.

”Töima Ono Zekola Zura Ni’amoni’ö moroi ba nomo, me mangawuliga töima Samaduhu’ö Yehowa”

22. Hadia dandra wa so jati diri nono mbanua Yehowa si faehu moroi ba danö bö’ö?

22 No hauga fakhe si lalö me ifarou Yehowa dödö ndra talifusöda nibayoini ba wangoguna’ö töi samaehusi ya’ira moroi ba danö bö’ö. I’otarai da’ö, hadia tola itayaigö Satana jati diri nono mbanua Lowalangi? Hadia tola idönisi dödöda ba agama-agama faya ba gulidanö andre? Lö’ö! Itugu oroma haniha ita zindruhunia me no tobali ita samaduhu’ö Lowalangi. (Baso Mikha 4:5; Maleakhi 3:18.) Itugu te’osambua’ö ita ba döi Lowalangi irege gofu haniha zanötöi töi da’ö iada’a, mo’amakhaita ia khö ndra Samaduhu’ö Yehowa. Lö tobini wamosumange satulö khö Yehowa ba gotalua agama-agama sofaya, hiza’i ”aro hili andrö . . . fondrege zalawa hili, yawa hili-hili andrö fefu”. (Yes. 2:2) Iada’a, famosumange satulö khö Yehowa ba töinia ni’amoni’ö sindruhu-ndruhu te’alawa’ö.

23. Molo’ö Zinunö 121:5, hadia zindruhu sanandrösa khö Yehowa si tola manga’aro’ö famatida?

23 Itugu aro wamatida börö me ta’ila ilumö’ö ita Yehowa moroi ba Zatana iada’a hegöi ba zi so föna! (Zin. 121:5) Da’a mbörö wa fao dödöda ba wehede zanunö me imane, ”Ya’ahowu niha si no mangai Lowalangira Yehowa andrö, niha nitutuyunia tana khönia.”—Zin. 33:12.

^ par. 20 Faigi Faza 7, nga’örö 72-74, sanandrösa ba wangoguna’ö radio.