FAIGI hawa’omuso dödö niha nifaha’öu ba Zura Ni’amoni’ö me awena aboto ba dödönia ayati sawena ibaso. Imane, ”Eluahania, tola auri ita sagötö fa’ara ba Waradaiso—ba da’a ba gulidanö andre?” Iboho mbawa awömö we’amöi manuriaigö ba imane, ”Hadia zi no öbaso ba Zura Ni’amoni’ö?” Si fao fa’omuso dödö ifalikhö-likhö högönia börö wa’ahöli-höli dödönia, ba imane ”Aha, awena u’ila da’a!” Itörö tödömö wa da’ö göi niwa’önia hauga migu si lalö me awena i’ila wa Yehowa döi Lowalangi.

Hadia no irai alua khöu zimanö? Ato nono mbanua Lowalangi zanörö simane da’ö. Arakhagö lö si fakhili-khili ba mbuala sebua böli tanö bö’ö baero zi no tatema andre—fa’aboto ba dödö sanandrösa ba zindruhu! Angeraigö atö: Hewisa wa tola ofeta mbuala andrö khöu? Ba faosatö da’a, ta’alui wanema linia. Lala nono mbanua Lowalangi ba wanema’ö fa’aboto ba dödö sanandrösa ba wamati tenga ha samuza, ba da’ö no tobali tandra wa to’ele Mbanua Lowalangi. Ba zi otu fakhe, Razo, Yesu Keriso inehegö wa tefaha’ö nono mbanua Lowalangi ba zindruhu.