TUHO FAZA DA’A

Ifatumbu’ö Yehowa danömö zindruhu Mbanua Lowalangi

1, 2. (a) Hana wa lö aboto ba dödö ndra nifaha’ö? (b) Hadia geluaha wamasi niwa’ö Yesu?

AMBÖ aboto ba dödö ndra nifaha’ö Yesu. Iwa’ö khöra, ”Mifaöga hörömi, ba mifaigi nowi, noa sa’ae a’usö, tandra wa basitö.” Lafaigi nowi nituturu Yesu, hiza’i ni’ilara andrö tenga afusi, owuge’e—la’a-la’a liwiö se’iri (barli). Te manofu-nofu ira, ’Hadia nibasi? Awena tola mubasi mato hauga waŵatö.’—Yoh. 4:35.

2 Hiza’i, tenga sindruhu wamasi niwa’ö Yesu. I’oguna’ö da’a ba wame’e khö ndra nifaha’önia dombua wamaha’ö sanandrösa ba wamasi so’amakhaita ba wamati—mamasi niha. Hadia manö? Ena’ö ta’ila, datafaigi waö-waönia.

Fogaoni ba Wamalua ba Bu’usa Li Fa’owua-wua Dödö

3. (a) Hadia mbörö wa iwa’ö Yesu, ”Nowi, noa sa’ae a’usö, tandra wa basitö”? (Faigi nisura ba gahe zura.) (b) Hadia niwa’ö Yesu ena’ö la’ila geluaha wehedenia?

3 Ahatö ba Zikhara fahuhuo Yesu khö ndra nifaha’önia ba gafuriata 30 M, banua niha Zamaria. Me ahatö larugi mbanua da’ö ira nifaha’önia, ibaloi ira Yesu ba zinga gumbu nidanö. Ba da’ö i’ombakha’ö zindruhu sanandrösa ba wamati khö ndra alawe, ba alio i’ila wa moguna wamaha’ö Yesu. Me mangawuli ndra nifaha’ö, alio-lio wofanö ndra alawe da’ö ba Zikhara ba wangombakha khö zi falazi omo khönia sahöli-höli dödö nirongonia khö Yesu. Börö da’ö, ato niha somasi falukha khö Yesu. Tola manö me luo da’ö—me ifakhölö ia moroi ba zaröu wamaigi nowi, ato niha Zamaria sangondrasi ya’ia—imane Yesu, ”Mifaigi nowi, noa sa’ae a’usö, tandra wa basitö.” * Aefa da’ö, ba wangombakha wa tenga famasi sindruhu geluaha niwa’önia, hiza’i famasi ba wamati, inönö wanguma’ö, ”Samasi, ba i’ozaragö mbua ba wa’auri si lö aetu.”—Yoh. 4:5-30, 36.

4. (a) Hadia zi dombua famaha’ö nibe’e Yesu sanandrösa ba wamasi? (b) Hadia manö wanofu nifatunöda?

4 Hadia zi dombua famaha’ö nibe’e Yesu sanandrösa ba wamasi so’amakhaita ba wamati? Si oföna, mangaösö halöwö. Fehedenia wa ”nowi, noa sa’ae a’usö tandra wa basitö” ya’ia da’ö fogaoni ira nifaha’önia ba wamalua halöwö andrö. Ba wotandrösaigö khö ndra nifaha’önia wa  mangaösö halöwö andrö imane Yesu, ”Itema sa’ae luo samasi.” Sindruhu, no tebörögö wamasi—tebai mutaha-taha! Si dua, owua-wua dödö ndra sohalöwö. Imane Yesu, sananö ba samasi ena’ö ”faoma omuso dödöra”. (Yoh. 4:35b, 36) Simane fa’ohahau dödö nirasoi Yesu me i’ila ”ato zamati khönia banua Zamaria”, simanö göi wa’ohahau dödö nirasoi ndra nifaha’önia ba halöwö wamasi soroi ba dödö. (Yoh. 4:39-42) Waö-waö salua me döfi siföföna andrö so gunania khöda börö me i’ombakha’ö hadia zalua iada’a ba ginötö wamasi so’amakhaita ba wamati götö wa’ara. Hamega tebörögö wamasi ba ginötö da’a? Haniha manö zi fao? Hadia mbuania?

Razoda Zondrönia’ö Famasi Sabölö Ebua Sagötö Fa’ara

5. Haniha zondrönia’ö famasi ba zi sagörö ulidanö, ba hewisa gangilata Yohane ba wangoroma’önia wa aösö halöwö da’a?

5 Ba gangilata Yohane, iforoma’ö Yehowa wa no ifataro Yesu ba wondrönia’ö halöwö wamasi niha ba zi sagörö ulidanö. (Baso Fama’ele’ö 14:14-16.) Ba gangilata andrö, so dakula khö Yesu hegöi sabi. ’Takula ana’a si so ba högö Yesu’ zamaduhu’ö dadaomania tobali Razo. ’Sabi satarö si so ba dangania’ zamaduhu’ö wa ya’ia zamasi. Me ifa’ema khö zi samösa mala’ika wa ”no oköli-köli mbasitö andrö-ba danö”, ifaduhu’ö Yehowa wa mangaösö halöwö andrö. Sindruhu, ”noa sa irugi inötö wamasi”, tebai mutaha-taha! Si tobali fanema li moroi ba niwa’ö Lowalangi ”fatörö zabimö andrö”, ifatörö zabinia Yesu, ba tebasi gulidanö—tebasi niha si so ba gulidanö. Ba gangilata andrö tefasugi ba dödöda wa ”nowi, noa sa’ae a’usö, tandra wa basitö”. Hadia itolo ita angilata andre ba wangi’ila hamega tebörögö wamasi ba zi sagörö ulidanö? Tatu manö!

6. (a) Hamega tebörögö ’mbaŵa wamasi’? (b) Hamega zindruhunia tebörögö ”mbasitö andrö ba danö”? Tutunö.

6 Börö me khö Yesu manandrösa gangilata Yohane nisura ba Wama’ele’ö faza 14, ya’ia Zamasi, samake takula (ayati 14), ba no alua wametaro ya’ia tobali Razo me 1914. (Dan. 7:13, 14) Lö ara aefa da’ö, itema fareta Yesu ena’ö ibörögö wamasi (ayati 15). Waö-waö si fagölö oroma ba gamaedola Yesu sanandrösa ba wamasi gandru; iwa’ö, ”Ba famasi, ba amozua götö danö andre.” Börö da’ö, baŵa wamasi ba amozua götö danö andrö tebörögö me 1914. Aefa da’ö, ”na baŵa wamasi”, tebörögö wamasi sindruhu. (Mat. 13:30, 39) Na tafuli tafaigi sejarahnia, tola ta’ila wa famasi andrö tebörögö barö zi hauga fakhe me no tobali Razo Yesu. Si oföna, i’otarai 1914 irugi böröta 1919, Yesu zangehao niha solo’ö khönia si no tebayoini. (Mal. 3:1-3; I Fet. 4:17) Aefa da’ö, me 1919, tebörögö ”mbasitö andrö  ba danö”. Lö itaha-taha, i’oguna’ö Yesu zawuyu si lö faröi si bohou ifataro ba wanolo ira talifusöda ena’ö la’ila wa mangaösö halöwö fanuriaigö andre. Faigi hadia zalua.

7. (a) Hadia zanolo ira talifusöda ena’ö aboto ba dödöra wa mangaösö halöwö fanuriaigö andrö? (b) Hadia lua-luania khö ndra talifusöda?

7 Me baŵa si Fitu 1920, imane The Watch Tower, ”Me no lafareso Zura Ni’amoni’ö, oroma wa tebe’e halöwö si sökhi sinangea ifalua osali ba wama’ema turia mbanua Lowalangi.” Duma-dumania fehede nifa’ele’ö Yesaya, itolo ndra talifusöda ba wangi’ila wa moguna mu’ombakha’ö duria Mbanua Lowalangi ba zi sagörö ulidanö. (Yes. 49:6; 52:7; 61:1-3) Lö la’ila hewisa wangasiwai halöwö da’a, hiza’i faduhu dödöra wa hasambalö ituturu khöra lala Yehowa. (Baso Yesaya 59:1.) Me so khöra wa’aboto ba dödö sanandrösa ba halöwö fanuriaigö andre, terou dödö ndra talifusöda ba wondrou’ö halöwöra. Hadia nifaluara?

8. Me 1921, hadia zi dombua ngawalö zaboto ba dödö ndra talifusöda sanandrösa ba halöwö fanuriaigö?

8 Me baŵa si Felendrua 1921, i’ombakha’ö The Watch Tower, ”Döfi si sökhi ndröfi da’a; ba ato niha zamondrongo sindruhu me 1921 moroi ba ndröfi si lalö.” Imane nasa majalah da’ö, ”Hiza’i oya nasa zinangea mufalua. . . . Datafalua ia si fao fa’owua-wua dödö.” Faigi dombua zindruhu si faoma moguna, ni’ila ndra talifusöda sanandrösa ba halöwö fanuriaigö nitandrösaigö Yesu khö ndra sinengenia: Mangaösö halöwönia, ba owua-wua dödö zohalöwö.

9. (a) Me 1954, hadia gangetula nihalö The Watchtower sanandrösa ba halöwö wamasi, ba hadia mbörö? (b) Hadia zalua barö zi 50 fakhe andre sanandrösa ba wa’atedou ndra sanuriaigö ba zi sagörö ulidanö? (Faigi grafik ” Fa’atedou ba zi Sagörö Ulidanö”.)

9 Me 1930-an, me no aboto ba dödö ndra talifusöda wa angowuloa sebua mbiri-biri bö’ö latema’ö duria Mbanua Lowalangi, ladou’ö nasa halöwö fanuriaigö. (Yes. 55:5; Yoh 10:16; Fam. 7:9) Buania? Tedou wa’ato zanuriaigö moroi ba zi 41.000 me 1934 tobali 500.000 me 1953! Ihalö gangetula The Watchtower 1 mbaŵa si Felendrua 1954, ”Eheha Yehowa ba fa’abölö Daromalinia zamalua famasi sebua ba zi sagörö ulidanö.” *Zakh. 4:6.

 

FA’ATEDOU BA ZI SAGÖRÖ ULIDANÖ

Soi

1962

1987

2013

Australia

15.927

46.170

66.023

Brasil

26.390

216.216

756.455

Prancis

18.452

96.954

124.029

Italia

6.929

149.870

247.251

Jepang

2.491

120.722

217.154

Meksiko

27.054

222.168

772.628

Nigeria

33.956

133.899

344.342

Filipina

36.829

101.735

181.236

Amerika Serikat

289.135

780.676

1.203.642

Zambia

30.129

67.144

162.370

 

ITUGU MONÖNÖ WA’ATO NIFAHA’Ö BA ZURA NI’AMONI’Ö

1950

234.952

1960

646.108

1970

1.146.378

1980

1.371.584

1990

3.624.091

2000

4.766.631

2010

8.058.359

 Ifa’ele’ö Mbua Wamasi —Fao Fehede si Sökhi Nifo’amaedola

10, 11. Hadia manö nitutunö ba gamaedola sanandrösa ba hunö moster?

10 Ba gamaedola Yesu sanandrösa ba Mbanua Lowalangi, ifa’ele’ö mbua wamasi faoma fehede si sökhi nifo’amaedola. Datafaigi duma-duma sanandrösa ba hunö moster (lada) hegöi ragi (laru). Datafaigi hewisa wa’aluania ba ngaluo safuria.

11 Amaedola sanandrösa ba hunö moster. Samösa ndra matua itanö sambua hunö moster. Hunö da’a tumbu tobali eu si tobali nahia wanuge wofo. (Baso Matai’o 13:31, 32.) Hadia manö nitutunö ba gamaedola da’a? (1) Ahöli-höli dödöda wa’amanöinia. ”Si no fondrege zide-ide mbua zinanö” tobali ”modaha sebua ia”. (Mrk. 4:31, 32) (2) No tatu wa’amanöinia. ”Ba na no mufazaewe [danömö andrö], ba manöi.” Lö iwa’ö Yesu, ”Tola manö manöi ia.” Lö’ö. Imane Yesu, ’Manöi ia.’ Tebai mubatogö wa’amanöinia. (3) Adöni dödö zangondrasi ba wa’amanöi geu sebua andrö ba tobali nahia wolombase. ’Tohare wofo ba dalu mbanua’ ba ”mangazuni ba ndrahania”. Hewisa zi tölu ngawalö andre manandrösa ia ba wamasi so’amakhaita ba wamati ba ginötö da’a?

12. Hewisa wa tefaudu gamaedola sanandrösa ba hunö moster ba halöwö wamasi ba ginötö andre? (Faigi bagan ” Itugu Monönö Wa’ato Nifaha’ö ba Zura Ni’amoni’ö”.)

12 (1) Fa’amanöinia: Amaedola andre manandrösa ba wa’atedou duria Mbanua Lowalangi hegöi banua niha Keriso. I’otarai me 1919, mu’owuloi zamasi sowölö-ölö ba mbanua niha Keriso si no lahaogö. Me luo da’ö, lö ato zohalöwö, hiza’i alio wa’atedounia. Ahöli-höli dödöda wa’atedounia i’otarai me 1900-an irugi iada’a. (Yes. 60:22) (2) Fa’atatu: Fa’atedou mbanua niha Keriso tebai musaisi. Hewa’ae fanandraigö moroi ba nudu Lowalangi andrö hulö gara solangögö tanömö side-ide, hiza’i tedou manö ia—itimbagö fefu wanandraigö. (Yes. 54:17) (3) Nahia wanuge: ’Fofo ba dalu mbanua’ sanöndra nahia wanuge ba geu da’ö amaedola niha satulö tödö si hauga zuta fa’ato ba zi 240 soi sanema’ö turia Mbanua Lowalangi si tobali banua niha Keriso. (Hez. 17:23) Ba da’ö latema gö ba wamati, fa’owua-wua dödö, hegöi folumö’ö.—Yes. 32:1, 2; 54:13.

Amaedola sanandrösa ba hunö moster eluahania nahia wolombase ba folumö’ö nirasoi niha si so ba mbanua niha Keriso (Faigi ngenoli si-11, 12)

13. Hadia manö nitutunö ba gamaedola sanandrösa ba ragi?

13 Amaedola sanandrösa ba ragi. Me no aefa inönö ragi si samösa ira alawe ba hamo darigu, i’aisöni ma’afefu. (Baso Matai’o 13:33.) Hadia manö nitutunö ba gamaedola da’a? Faigi zi dombua ngawalö andre. (1) Fa’atedou zamobörö fa’atebulö. I’anöröi ragi andrö fefu zi no mufaruka ”irege aisö ma’afefu”. (2) Fatutu wa’atedou. I’anöröi ragi andrö fefu ”ba zi tölu yöu hamo”. Hewisa zi dua ngawalö  andre manandrösa ia ba wamasi so’amakhaita ba wamati ba ginötö da’a?

14. Hewisa wa tefaudu gamaedola sanandrösa ba ragi ba halöwö wamasi ba ginötö andre?

14 (1) Fa’atebulö: Ragi eluahania turia Mbanua Lowalangi, ba hamo darigu no amaedola niha gulidanö. Simane ragi nifaruka ba hamo darigu so wa’atebulö, simanö göi duria Mbanua Lowalangi tola ibulö’ö dödö niha sanema’ö ya’ia. (Rom. 12:2) (2) Fatutu: Fo’anöröi ragi ba hamo darigu eluahania famazaewe turia Mbanua Lowalangi. Faruka ragi ba hamo darigu andrö irege i’aisöni ma’afefu. Simanö göi duria Mbanua Lowalangi andrö i’anöröi ”irugi wondrege danö”. (Hal. 1:8) Ba gamedola andre oroma göi wa tefazaewe duria Mbanua Lowalangi ba soi si lö manehegö halöwöda, hewa’ae lö la’ame’egö tödö.

15. Hewisa wa alua wehede Yesaya 60:5, 22? (Faigi kotak ” Börö Yehowa Wa Tola Alua”, nga’örö 93, ba ” ’Fondrege Zide-ide’ Tobali ’Soi Sabölö’”, nga’örö 96-97.)

15 Mato 800 fakhe fatua lö itutunö Yesu gamaedola si dombua andrö, ifa’ema Yehowa khö Yesaya wama’ele’ö nikhamö wamasi so’amakhaita ba wamati iada’a hegöi  fa’omuso dödö ba li sauli itörö tödö. * Iwa’ö Yehowa wa niha moroi ba ”zaröu” la’ondrasi organisasinia. Imane Yehowa khö ndra ’alawe’, ni’amaedolagö niha nibayoini si toröi ba gulidanö, ”Na ö’ila dania, ba humaga mbawau [ba wa’omuso dödö], humufa dödöu ba ebolo; isawa sa’ae ndra’ugö ana’a si otarai nasi, möi khöu girö-girö niha baero.” (Yes. 60:1, 4, 5, 9) Itörö sibai wehede da’ö! Iada’a, ono mbanua Yehowa si no ara ba wamati omuso dödöra me la’ila itugu monönö zanuriaigö Banua Lowalangi ba soira, si lö atoto tobali ngahönö.

Hadia Mbörö Wa Owua-Wua Dödö Nono Mbanua Yehowa

16, 17. Hana wa ’faoma omuso dödö, he sanaru, he samasi’? (Faigi kotak ” Dombua Risalah Fagöna ba Dödö zi Darua Niha ba Amazon”.)

16 Te itörö tödöu hadia niwa’ö Yesu khö ndra sinengenia, ”Samasi . . . i’ozaragö mbua ba wa’auri si lö aetu, ena’ö faoma omuso dödöra, he sanaru, ba he samasi.” (Yoh. 4:36) Hadia manö zi ’faoma omuso dödöda’ ba wamasi ba zi sagörö ulidanö? Datafaigi zi tölu ngawalö andre.

17 Si oföna, omuso dödöda me fao Yehowa ba halöwö da’a. Ba ginötö taturiaigö Mbanua Lowalangi, no tafazaewe danömö zinanö. (Mat. 13:18, 19) Na tatolo niha nifaha’öda ba Zura Ni’amoni’ö tobali nifaha’ö Keriso, no tabasi mbuania. Tarasoi wa’omuso dödö sebua ba ahöli-höli dödöda na tanehegö hewisa Yehowa ba ’wamotalinga hegöi ba wamanöi tanömö Mbanua Lowalangi’. (Mrk. 4:27, 28) So göi danömö zinanö si no ara tafazawili awena motalinga, ba niha bö’ö zamasi. Te no irai örasoi zi no alua khö Joan, talifusöda ira alawe ba Inggris si no tebayagö idanö 60 fakhe si lalö. Imane, ”Falukha ndra’o ba niha sanguma’ö wa ya’o zananö tanömö andrö ba dödöra me manuriaigö ndra’o ba zi hauga fakhe si lalö. Ba zi lö u’ila, so ndra Samaduhu’ö tanö bö’ö zamaha’ö ba sanolo ya’ira tobali ono mbanua Yehowa. Omuso dödögu börö me tedou danömö zinanö si no ufazaewe ba mubasi.”—Baso I Korindro 3:6, 7.

18. Hadia mbörö wa omuso dödöda molo’ö I Korindro 3:8?

18 Si dua, tobali ita sohalöwö sowua-wua tödö na lö olifu ita wehede Waulo, ”Itema sa luonia zamösana, balazi halöwönia.” (I Kor. 3:8) Tebe’e luo börö halöwö nifaluania, tenga buania. Börö zi no ifabu’u andre, hawa’ebua wa’omuso dödö zi möi manuriaigö ba mbanua sambö manema’ö turia si sökhi! Ba wamaigi Lowalangi, fefu Zamaduhu’ö sangodödögö famazaewe ’oya latema mbua’, ba da’a zame’e khöra fa’omuso dödö.—Yoh. 15:8; Mat. 13:23.

19. (a) Molo’ö si no ifa’ele’ö Yesu ba Matai’o 24:14, hadia mbörö wa lö aetu wa’omuso dödöda? (b) Hadia zinangea tatörö tödöda na lö mofozu niha nifaha’öda?

19 Si tölu, owua-wua dödöda börö me fao ita ba wamalua halöwö si no tefa’ele’ö. Faigi wanema li nibe’e Yesu me manofu ndra sinengenia, ”Hadia dandra wa’asomö ba  tandra wa’atua danö?” Ifatunö khöra sambua dandrania ya’ia da’ö halöwö fanuriaigö ba zi sagörö ulidanö. Hadia halöwö fombali’ö nifaha’ö geluaha niwa’önia? Tenga. Imane, ”Ba teturiaigö mbanua Lowalangi andrö, turia somuso dödö, ba gulidanö misa, ma’asagörö, ba wamaduhu’ö.” (Mat. 24:3, 14) Börö da’ö, fanuriaigö Banua Lowalangi—famazaewe tanömö—da’ö sambua dandrania. Tobali, ba ginötö taturiaigö duria Mbanua Lowalangi, böi olifu ita hewa’ae na lö a’ozu tobali nifaha’ö ira, hiza’i no a’ozu wame’eda sambua ’famaduhu’ö’. * Gofu hewisa wanema’öra, no fao ita wamalua halöwö nifa’ele’ö Yesu ba ta’okhögö döi sebua tobali ’sanolo ba halöwö khö Lowalangi’. (I Kor. 3:9) Da’a mbörö wa owua-wua dödöda!

”I’otarai Sa ba Gatumbukha Luo, Numalö ba Gaekhula”

20, 21. (a) Hewisa wa alua wehede Maleakhi 1:11? (b) Hadia gangetula sinangea öhalö ba halöwö wamasi, ba hadia mbörö?

20 Me döfi siföföna, itolo ndra sinengenia Yesu ena’ö la’ila wa mangaösö halöwö wamasi andrö. I’otarai 1919 irugi iada’a, lö aetu-aetu ibe’e wanolo Yesu khö ndra nifaha’önia. Andrö, owölö-ölö nono mbanua Lowalangi ba wamalua halöwöra. Sindruhu wa tebai musaisi halöwö wamasi. Simane nifa’ele’ö Maleakhi, mufalua halöwö fanuriaigö iada’a ”i’otarai sa ba gatumbukha luo, numalö ba gaekhula”. (Mal. 1:11) Atulö, i’otarai gatumbukha numalö ba gaekhula, gofu hezo so manö ba zi sagörö ulidanö—samazaewe ba samasi faoma mohalöwö ba owua-wua dödöra. I’otarai gatumbukha numalö ba gaekhula—i’otarai sihulö wongi irugi tanö owi, sara ngaluo—mangaösö dödöda wamalua halöwö.

21 Na ifuli tafaigi ginötö barö zi 100 fakhe si lalö ba ta’ila hewisa wa’atedou ngawawa side-ide tobali ”soi sabölö”, ba ”humufa” dödöda safönu fa’owua-wua dödö. (Yes. 60:5, 22) Fa’owua-wua dödö ba fa’omasida khö Yehowa, ’Sokhö basitö’, da’ö zamarou ya’ita lö taböhöli wamalua halöwö wamasi sabölö ebua sagötö fa’ara!—Luk. 10:2.

^ par. 3 Fehede Yesu sanandrösa ba ’nowi si no a’usö’ tola manö mo’amakhaita ba mbaru sebua safusi ni’oguna’ö niha Zamaria, ni’ila Yesu sangondrasi ya’ia.

^ par. 9 Ena’ö ö’ila danö bö’ö nasa sanandrösa ba ndröfi ma dekade-dekade aefa da’a, baso mbuku Saksi-Saksi Yehuwa—Pemberita Kerajaan Allah, nga’örö 425-520, sanutunö bua wamasi i’otarai me 1919 irugi 1992.

^ par. 15 Tanö bö’ö nasa sanandrösa ba nifa’ele’ö andre, faigi Nubuat Yesaya—Terang bagi Seluruh Umat Manusia II, nga’örö 303-320.

^ par. 19 No aboto ba dödö Nono Zekola Zura Ni’amoni’ö me föna sanandrösa ba zindruhu andrö. Imane Zion’s Watch Tower 15 mbaŵa si Felezara 1895, ”Na ha ma’ifu gandru ni’owuloi, si lö’ö-lö’önia oya wamaduhu’ö sanandrösa ba zindruhu tola mufalua. . . . Fefu tola taturiaigö injil.”