Faigi nösi

Faigi ba gangolifa

Samaduhu’ö Yehowa

Fili li Nias

 FAZA 7

Lala ba Wanuriaigö​—⁠Manga’asogö Lektur ba zi Sagörö Ulidanö

Lala ba Wanuriaigö​—⁠Manga’asogö Lektur ba zi Sagörö Ulidanö

TUHO FAZA DA’A

Oya lala ni’oguna’ö nono mbanua Lowalangi ba wanuriaigö ba niha fefu

1, 2. (a) Hadia lala ni’oguna’ö Yesu wahuhuosa ba niha sato? (b) Hewisa wolo’ö ndra nifaha’ö Keriso si lö faröi duma-duma nibe’enia, ba hadia mbörö?

ATO niha zohurufai Yesu ba zinga nidanö. Hiza’i, möi ia yawa ba dundraha ba i’aröu’ö ia ma’ifu moroi ba zinga nidanö. Hadia mbörö? I’ila wa tete nidanö zi tola mangebua’ö linia, ba larongo niha sato hadia nifa’emania.—Baso Mareko 4:1, 2.

2 Hauga wulu fakhe me tefasindro Mbanua Lowalangi, la’o’ö duma-duma Keriso ira nifaha’önia si lö faröi, la’oguna’ö ngawalö lala si bohou ba wama’ema turia somuso dödö sanandrösa ba Mbanua Lowalangi. Ibe’e wanuturu lala Razo ba nono mbanua Lowalangi ena’ö ladou’ö ba la’oguna’ö teknologi si no so, hewa’ae itugu fabö’ö zalua. Omasi ita manuriaigö ba niha fefu fatua lö atua danö. (Mat. 24:14) Datafaigi hadia manö lala ni’oguna’öda ba wangombakha ba niha fefu, gofu hezo toröi ira. Angeraigö göi hewisa ena’ö tola ö’o’ö wamati niha si lö faröi si möi manuriaigö me götö föna.

Ena’ö Larongo Niha Sato

3. Hadia mbörö wa aukhu dödö nudu si lö omasi ba zindruhu börö me ta’oguna’ö koran?

3 Koran. No lafazökhi Watch Tower ira talifusöda Russell hegöi awö-awönia i’otarai 1879 ba wama’ema turia Mbanua Lowalangi ba niha fefu. Hiza’i, ngafulu fakhe fatua lö 1914, hulö Keriso zamangaösö ena’ö itugu ato zamondrongo turia somuso dödö. Ibörötaigö da’ö me döfi 1903. Me luo da’ö, Dr. E.L. Eaton, zi tobali salahi na fahuhuo zohalöwö Protestan ba Pennsylvania, i’andrö khö Charles Taze Russell ena’ö fabu’a-bu’a ira sanandrösa ba wamaha’ö Zura Ni’amoni’ö ba latohugö ba ngaluo bö’ö. Ifa’ohe’ö zurania Eaton khö Russell, ”Imane tödögu, na fabu’a-bu’a ita föna niha sato sanandrösa ba wa’aboto ba dödöda si fabö’ö-bö’ö . . . tola adöni dödö niha sato.” Fao göi dödö Russell hegöi ira awönia. Andrö, lafa’anö wabu’a-bu’asara ba koran si tehöngö, The Pittsburgh Gazette. Ato  niha somasi artikel-artikel koran da’ö irege lafa’anö huhuo Russell ero migu ba koran, börö me adöni dödö niha ba nifa’ema Russell sanandrösa ba Zura Ni’amoni’ö. Tatu manö aukhu dödö nudu si lö omasi sindruhu!

Me 1914, töra 2.000 koran zama’anö huhuo Russell

4, 5. Hadia gamuata niforoma’ö Russell, ba hewisa ndra talifusöda sangai halöwö wolo’ö duma-dumania?

4 Simanö göi koran-koran tanö bö’ö, omasi ira lafa’anö huhuo nifa’ema Russell. Me 1908, i’ombakha’ö Watch Tower wa fefu huhuonia andrö lö aetu-aetu mufa’anö ba zi ”felezara koran”. Hiza’i, lamane khö Russell ira talifusöda si no anehe ba wamazökhi koran, moguna ifindrakö ba kota si tehöngö gödo Lembaga moroi ba Pittsburgh, ena’ö oya koran zamazökhi artikel si te’odane-dane ba Zura Ni’amoni’ö. Me no i’angeraigö Russell mbua gera-erara andrö hegöi tanö bö’önia, ifindrakö gödo ba Brooklyn, New York, me 1909. Buania? Ha ba zi hauga waŵa me no findra gödo andrö, so mato 400 koran zama’anö huhuo Russell, ba itugu monönö manö nasa. Me tefasindro Mbanua Lowalangi me 1914, töra 2.000 koran zama’anö huhuo hegöi artikel moroi khö Russell ba zi öfa ngawalö li!

5 Hadia wamaha’önia khöda? Moguna la’o’ö wangide-ngide’ö niforoma’ö Russell ira talifusöda sangai halöwö ba organisasi Lowalangi ba ginötö andre. Lalania? Ba ginötö muhalö gangetula soguna, fatimbaisi mbua gera-era niha bö’ö.—Baso Gamaedola 15:22.

6. Hewisa lua-lua ba zi samösa niha me no i’ila zindruhu si no mufazökhi ba artikel koran?

6 Ato niha si no mombulö’ö fa’aurira börö zindruhu sanandrösa ba Mbanua Lowalangi nifa’anö ba koran-koran. (Heb. 4:12) Duma-dumania, Ora Hetzel, nibayagö idanö me 1917. Samösa ia moroi ba gotalua niha sato, zi oföna tefaha’ö ba zindruhu moroi ba artikel andrö. Imane Ora, ”Me no mangowaludo, möido khö mamagu ba Rochester, Minnesota. Me ofetado ba da’ö, u’ila-ila me iguti artikel moroi ba koran. Da’ö huhuo Russell. Itutunö mamagu hadia manö zi no ifaha’ö ia ba artikel koran andrö.” Itema zindruhu Ora ba tobali ia sanuriaigö Banua Lowalangi si lö faröi te ba zi 60 fakhe fa’ara.

7. Hadia mbörö wa la’oguna’ö koran-koran ira talifusöda sondrönia’ö?

7 Me 1916, so dombua zalua si tobali börö wa labato wangoguna’ö koran ba wanuriaigö ira sangai halöwö. Si oföna, börö me alua Wasuwöta Sebua me luo da’ö, abua wanöndra ngawalö fakake ni’oguna’ö ba pencetakan. Me 1916, itutunö departemen koran ba Inggris, ”Iada’a, hatö töra 30 koran si no mama’anö Ngawalö Huhuo. Ba zi lö aratö, tola manö alö wa’oyania börö me tedou mböli garate.” Si dua, börö me mate dalifusöda Russell me 31 mbaŵa si Fulu 1916. I’ombakha’ö The Watch Tower 15 mbaŵa si  Felendrua 1916, ”Me no mate dalifusöda Russell, tebato sa’ae wama’anö huhuo [ba koran-koran].” Hewa’ae tebato lala wanuriaigö da’a, so zui lala tanö bö’ö si no mofozu ya’ia da’ö ”Drama-Foto Penciptaan”.

8. Hadia manö nifalua ba wanga’asogö ”Drama-Foto Penciptaan”?

8 Famaehagö Gambara. Mato tölu fakhe mohalöwö Russell hegöi ira awönia ba wamazökhi ”Drama-Foto Penciptaan”, ni’ombakha’ö me 1914. (Gamd. 21:5) Mufotöi ia ”Drama” börö me orudua gambara nifawu’a-wu’a, rekaman li, hegöi slide kaca sogambara. Ngaotu niha si fao ba drama Zura Ni’amoni’ö andre, larekam ba pita film, ba lafaogö göi gurifö. So sambua laporan me 1913 sanguma’ö, ”Töra matonga la’oguna’ö gurifö moroi ba taman margasatwa sebua ba wamazökhi Gambara Nifawu’a-wu’a ena’ö  terongo hulö simane me götö Noakhi ba wamaehagö siföföna.” Ira seniman ba London, New York, Paris, ba Philadelphia, lafola’a-la’a faoma tangara ngaotu slide kaca.

9. Hana wa oya ginötö hegöi kefe ni’oguna’ö ba wanga’azökhi ”Drama-Foto”?

9 Hana wa oya mu’oguna’ö ginötö hegöi kefe ba wamazökhi ”Drama-Foto”? Sambua gangetula si no mutema ba seri kebaktian 1913 itutunö, ”Mofozu sibai nikhamö koran-koran Amerika ba wama’anö bua gera-era niha sato, la’oguna’ö kartun, duma-duma, faoma gambara nifawu’a-wu’a si no tehöngö ba si tola mu’oguna’ö gofu hezo so. Börö da’ö, faduhu dödöda, ya’ita sanuriaigö ba samaha’ö kelas-kelas Zura Ni’amoni’ö somasi tedou ba halöwö, datatuhini wangoguna’ö gambara nifawu’a-wu’a hegöi slide börö me tefaudu ba sökhi sibai na la’oguna’ö ira sanuriaigö hegöi samaha’ö.”

Yawa: Anjungan proyektor ”Drama-Foto”; tou: Slide kaca-sogambara ”Drama-Foto”

10. Hezo ndrege no tefa’ema ”Drama-Foto”?

10 Me 1914, ero ma’ökhö lafuta ”Drama-Foto” ba zi 80 kota. Arakhagö walu zuta niha samaigi ba Amerika Serikat hegöi ba Kanada. Ba ndröfi da’ö, lafuta göi ”Drama-Foto” ba Australia, Denmark, Finlandia, Inggris, Jerman, Norwegia, Selandia Baru, Swedia, hegöi ba Swiss. Ba mbanua sigide-ide, lafazökhi ”Drama-Foto” sadogo-dogo, si lö gambara nifawu’a-wu’a. Abölö mura wangehaogö ya’ia—”Drama Eureka”—ba aoha göi wolohe misa. Me 1916, lafo’eluaha ”Drama-Foto” hegöi ”Drama Eureka” ba li Armenia, Denmark-Norwegia, Italia, Jerman, Polandia, Prancis, Spanyol, Swedia, hegöi Yunani.

Me 1914, ero mae’ökhö lafuta ”Drama-Foto” ba auditorium-auditorium

11, 12. Hewisa zi samösa si bohou ebua toröi-röi ba dödönia ”Drama-Foto”, ba hadia duma-duma si tola ta’o’ö?

11 Toröi-röi ba dödö nono matua si 18 fakhe sotöi Charles Rohner ”Drama-Foto” ba li Prancis. Imane Charles, ”No ufaigi ba mbanua si tumbu ya’o—Colmar, Alsace, Prancis. I’otarai ba wamobörö me lafuta ia, adöni dödögu me mubotokhi zindruhu sanandrösa ba Zura Ni’amoni’ö.”

12 Tebayagö idanö Charles, ba ihalö halöwö safönu inötö me 1922. Halöwönia si oföna ya’ia da’ö fao ia ba wangoroma’ö ”Drama-Foto” ba Prancis. Imane Charles sanandrösa ba halöwönia andrö, ”Oya ngawalö halöwögu—fabiola, hamba pembukuan, ba hamba lektur. La’andrö göi khögu ba wamahono niha sangondrasi fatua lö mubörögö waö-waö halöwö. Sagötö folombase, mabe’e lektur. Mafataro samösa dalifusöda ira matua mazui ira alawe ero sambu-sambua nahia ba gedung. La’ohe zamösana lektur ba la’ondrasi niha ero sambu-sambua oto-oto. Ba mbawandruhö we’amöi ba gedung, mafa’oli meza safönu lektur.” Me 1925, tekaoni Charles wohalöwö ba Mbetieli Brooklyn, New York. Ba da’ö, lafataro ia tobali samözi  note orkestra ba stasiun radio WBBR sawena mufasindro. Me no ta’ila duma-duma dalifusöda Rohner, tola tasofu khöda samösa, ’Hadia aoha gölögu ba wotema halöwö gofu hadia ia manö ba wanuriaigö turia Mbanua Lowalangi?’—Baso Yesaya 6:8.

13, 14. Hewisa wangoguna’ö radio ba wama’ema turia somuso dödö? (Faigi göi kotak ” Program ba WBBR” ba ” Kebaktian Bersejarah”.)

13 Radio. Me 1920-an ibörögö alö wamuta ”Drama-Foto”, hiza’i la’oguna’ö radio ba wama’ema turia Mbanua Lowalangi. Me 16 mbaŵa si Öfa 1922, ifa’ema huhuonia si oföna talifusöda Rutherford ba radio Metropolitan Opera House ba Philadelphia, Pennsylvania. So mato 50.000 niha zamondrongo huhuo ”Lö Irai Mate Niha si Hauga Zuta Fa’ato si No Auri Iada’a”. Aefa da’ö me 1923, ba zi oföna sibai, lafa’ema ba radio waö-waö halöwö ba kebaktian.Tenga göi ha stasiun-stasiun radio komersial ni’oguna’öra, lahalö gangetula ira sondrönia’ö wa abölö sökhi na so stasiun radioda samösa, nifazökhi ba Staten Island, New York, ba lafasura’ö döinia WBBR. Siaran si oföna, terongo me 24 mbaŵa si Dua 1924.

Me 1922, so mato 50.000 niha zamondrongo huhuo moroi ba siaran radio ”Lö Irai Mate Niha si Hauga Zuta Fa’ato si No Auri Iada’a”

14 Itutunö The Watch Tower 1 mbaŵa si Felendrua 1924 ohitö dödö wa mu’oguna’ö WBBR, ”Faduhu dödöda wa radio andre mura ba tefaudu ba wama’ema sindruhu.” Imane aefa da’ö, ”Na i’ila So’aya wa sinangea mufazökhi stasiun radio tanö bö’ö ba wama’ema sindruhu, ha ba ni’asogönia gefe molo’ö lalania si sökhi.” (Zin. 127:1) Me 1926, so önö ngawua stasiun radio khö nono mbanua Yehowa. Dombua ba Amerika Serikat, ya’ia da’ö WBBR ba New York hegöi WORD sahatö ba Chicago. Si öfa ngawua tanö bö’ö so ba Kanada, ya’ia da’ö ba Alberta, British Columbia, Ontario, hegöi ba Saskatchewan.

15, 16. (a) Hadia nifalua ndra klerus börö siaran radioda? (b) Hewisa wa möi fanolo halöwö fanuriaigö nifalua ba nomo-omo misa ba wama’ema huhuo sebua ba radio?

15 Ira klerus Agama-Agama Niha Keriso, la’osisi’ö siaran radio sanandrösa ba zindruhu moroi ba Zura Ni’amoni’ö si no ofeta ba mbanua misa. I’ila-ila Albert Hoffman halöwö nifalua ba stasiun radio ba Saskatchewan, Kanada, ba imane, ”Itugu ato zangila Ono Zekola Zura Ni’amoni’ö [töi Zamaduhu’ö Yehowa me luo da’ö]. Lafa’ema wamaduhu’ö sahöli-höli dödö irugi 1928. Ba ndröfi da’ö, lafaso zamatörö ira klerus ena’ö lö latehegö so stasiun radio ndra Samaduhu’ö Yehowa ba Kanada.”

16 Hewa’ae no laduhö stasiun radio ba Kanada, lö aetu la’ombakha’ö huhuo moroi ba Zura Ni’amoni’ö ba stasiun-stasiun komersial. (Mat. 10:23) Ena’ö sökhi waö-waö halöwö ba radio andrö, The Watch Tower hegöi The Golden Age (iada’a Awake!, mazui Sadarlah!) lasura döi-töi stasiun radio komersial sama’ema sindruhu moroi ba  Zura Ni’amoni’ö, ena’ö lafarou dödö niha misa ira talifusöda wamondrongo huhuo nifa’ema ba stasiun radio si so ba mbanuara. Hadia mbuania? Imane Bulletin baŵa si Sara 1931, ”No tobali famarou dödö radio andrö khö ndra talifusöda ba wanuriaigö ba nomo-omo misa. Oya duria nirongoma wa ato niha samoli radio, ba la’anemai latema mbuku nibe’e khöra börö me no lafondro-ndrongo huhuo dalifusöda Rutherford.” Ifo’amaedolagö siaran radio Bulletin andrö hegöi fanuriaigö ba nomo-omo misa tobali ”dombua lala si sökhi sibai ba wogamö niha sato moroi ba organisasi Zo’aya.”

17, 18. Hewa’ae no fabö’ö zalua, hewisa wa lö labato wangoguna’ö radio?

17 Me 1930-an, itugu tedou wolohi börö me ta’oguna’ö stasiun-stasiun radio komersial. Börö da’ö, ba gangohorita 1937, lafaudugö zinangea lafalua ono mbanua Yehowa ba zalua andrö. Lö la’oguna’ö stasiun radio komersial ba la’osambua’ö dödöra ba wanuriaigö ba nomo-omo. * Hiza’i, radio zabölö tefaudu ba wama’ema turia somuso dödö ba soi sigide-ide mazui ba mbanua si lö manehegö fanuriaigö. Duma-dumania, i’otarai 1951 irugi 1991, sambua stasiun radio ba Berlin Barat, Jerman, lö aetu-aetu ifa’ema huhuo moroi ba Zura Ni’amoni’ö irege larongo duria sanandrösa ba Mbanua Lowalangi niha si toröi ba Jerman Timur me luo da’ö. Tebörögö 1961 ba töra 30 fakhe aefa da’ö, sambua stasiun radio nasional ba Suriname, Amerika Selatan, lafa’ema waö-waö halöwö ero migu, 15 menit wa’ara ba wangombakha sindruhu moroi ba Zura Ni’amoni’ö. I’otarai 1969 irugi 1977, töra 350 rekaman radio nifazökhi organisasi ba seri ”Oi Moguna Fefu Nösi Mbuku Ni’amoni’ö”. Ba Amerika Serikat, so 291 stasiun radio zama’ema huhuo andrö ba zi 48 negara bagian. Me 1996, sambua stasiun radio ba Apia, ibu kota Samoa ba Pasifik Selatan, ifa’ema waö-waö halöwö ero migu, tuhonia ”Fanema Li ba Zinofumö Sanandrösa ba Zura Ni’amoni’ö”.

18 Ba gangohorita abad si-20, tenga sa’ae radio zi tobali tuho ba wama’ema turia somuso dödö. Hiza’i, so teknologi bö’ö si tola mogamö niha sato.

19, 20. Hana wa lafazökhi jw.org ono mbanua Yehowa, ba hewisa lua-luania? (Faigi göi kotak ” JW.ORG”.)

19 Internet. Me 2013, töra 2,7 miliar niha, arakhagö 40 persen niha ba zi sagörö ulidanö, zangoguna’ö Internet. Molo’ö si no mu’erai, so mato dua miliar niha sangoguna’ö perangkat bergerak, simane smartphone ba tablet ba wamokai Internet. Itugu monönö wa’atedounia ba zi sagörö ulidanö, hiza’i tohude ba Afrika, töra 90 zuta niha sasese mowöli paket Internet. Tefalali lala ba wanema’ö turia börö wa’atedou andrö.

 20 Tebörögö me 1997, la’o’ö ono mbanua Yehowa lala si bohou ba wogamö niha sato. Me 2013, tola labokai situs Web jw.org mato 300 ngawalö li, ba tola la-download informasi si te’odane-dane ba Zura Ni’amoni’ö ba zi töra 520 ngawalö li. Samaigi situs da’a ero ma’ökhö töra 750.000 niha. Ero waŵa, tenga ha lafaigi video, töra 3 zuta mbuku ni-download, 4 zuta majalah, ba 22 zuta fail audio.

21. Hadia wamaha’ö si tola öhalo moroi khö Sina?

21 Sökhi sibai wangoguna’ö situs Web andre ba wama’ema turia Mbanua Lowalangi, hewa’ae ba soi si lö manehegö halöwö fanuriaigö. Duma-dumania, me böröta ndröfi 2013, isöndra situs jw.org samösa ira matua sotöi Sina, aefa da’ö itelefo gödo sebua ba Amerika Serikat, ena’ö i’ila danö bö’ö nasa moroi ba Zura Ni’amoni’ö. Hana wa no sahöli-höli dödöda da’a? Sina andre Dawa, si toröi ba mbanua side-ide si lö manehegö halöwö ndra Samaduhu’ö Yehowa. Buania, lahalö wahasara dödö ba wamaha’ö Sina ba Zura Ni’amoni’ö dua kali samigu, khö zi samösa talifusöda Samaduhu’ö ba Amerika Serikat. Lafalua wamaha’ö da’a ba zi sambua layanan video Internet.

Famaha’ö Niha Ero Samösa

22, 23. (a) Hadia mubato wanuriaigö ba nomo-omo misa me no oya lala ni’oguna’ö ba wanuriaigö? (b) Hewisa wamahowu’ö Razo halowö nifaluada?

22 Lö labato wanuriaigö ba nomo-omo misa hewa’ae oya lala tanö bö’ö ni’oguna’ö ba wogamö niha sato, simane koran, ”Drama-Foto”, radio, hegöi situs Web. Hadia mbörö? Börö me la’o’ö duma-duma nibe’e Yesu ono mbanua Yehowa. Tenga ha asala manuriaigö ia ba niha  sato; hiza’i i’osambua’ö dödönia ba wanolo si samö-samösa niha. (Luk. 19:1-5) Ifaha’ö göi ndra nifaha’önia Yesu ena’ö lafalua zimane da’ö, ba ibe’e khöra duria sinangea lafa’ema. (Baso Luka 10:1, 8-11.) Simane si no tatutunö ba Faza 6, moguna lafarou dödö nono mbanua Yehowa ya’ira sondrönia’ö ena’ö fa’ila bawa ira na fahuhuo ba niha.—Hal. 5:42; 20:20.

23 Otu fakhe me no aefa tefasindro Mbanua Lowalangi, töra 7,9 zuta zowölö-ölö ba wamaha’ö niha bö’ö sanandrösa ba gohitö dödö Lowalangi. Ifahowu’ö Razo ngawalö lala ni’oguna’ö ba wangombakha Banuania. Simane ni’ombakha’ö ba faza aefa da’a, ifahowu’ö göi fefu ngawalö ni’oguna’öda ba wanuriaigö turia somuso dödö ba ngawalö soi, mado, hegöi ba ngawalö li.—Fam. 14:6.

^ par. 17 Lahalö gangetula ira sondrönia’ö me 1957 ba wondruhö WBBR si so ba New York, da’ö stasiun radioda safuria.