Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Mamatörö Mbanua Lowalangi!

 FAZA 10

Ibohouni ba Wamati Nono Mbanuania Razo

Ibohouni ba Wamati Nono Mbanuania Razo

TUHO FAZA DA’A

Hadia mbörö ba hewisa wamohouni hegöi fangehao Yesu niha solo’ö khönia ba wamati?

1-3. Hadia nifalua Yesu me i’ila no ta’unö gosali?

I’OSINANGEGÖ Yesu gosali ba Yeruzalema börö me i’ila hadia geluaha wa tefasindro gosali da’ö. No ara tobali nahia wamosumange Lowalangi gosali andrö ba gulidanö. Hiza’i, moguna mu’ehao ba mubohouni wamosumange andrö—famosumange khö Lowalangi si lö ra’iö, sotöi Yehowa. Khalaigö atö hewisa dödö Yesu me i’ila wa no ta’unö gosali andrö, me möi ia me 10 Nisana 33 M. Hadia zalua?​—Baso Matai’o 21:12, 13.

2 Ba Golayama Niha Baero, lahalö hare si lö atulö ira samawa hegöi sanuka ana’a solu’a-lu’a andrö ba nono mbanua Yehowa si möi mame’e sumange khönia. * ”Ifofanö baero fefu zamawa hadia ia [Yesu], awö zowöli-wöli ba gosali, ba iso’agö meza zanuka ana’a.” (Fatimbaisi Nehemia 13:7-9.) I’ailasi ndra matua si so fakhögusa andrö börö me labali’ö ”tögi narö hili naha zorabu” nomo Namania. I’osinangegö gosali Lowalangi andrö Yesu hegöi eluahania. Lö tola lö’ö, böi ta’unö wamosumange khö Namania!

3 Hauga abad aefa da’ö, me no mufataro Yesu tobali Razo, ifuli i’ehao sambua gosali—farahu ba da’ö fefu niha somasi mamosumange Yehowa molo’ö lala somasi ia ba ginötö andre. Hadia gosali nihaogönia me luo da’ö?

Mangehao ’Ono Lewi’

4, 5. (a) Hewisa wamohouni ba fangehao ira nifaha’ö Yesu i’otarai 1914 irugi ba wamobörö ndröfi 1919? (b) Na simanö, hadia no awai wamohouni ba fangehao nono mbanua Lowalangi? Tutunö.

4 Simane ni’ilada ba Faza 2, me no mufataro Yesu me 1914, fao ia khö Namania ba wamareso osali ba wamati—fama’anö famosumange sohau-hau. * Buania, i’ila Razo wa moguna mubohouni ba mu’ehao niha Keriso nibayoini, ’ono Lewi’. (Mal. 3:1-3) I’otarai me 1914 irugi ba wamobörö 1919, Samohouni sotöi Yehowa, itehegö latörö wanandraigö ba abula dödö ono mbanuania, ena’ö tebohouni ba te’ehao ira. Ta’andrö saohagölö me no te’ehao niha nibayoini moroi ba galitö fanandraigö, ba itugu terou dödöra ba wotuhini Razo Mesia!

 5 Na simanö, hadia no awai wamohouni ba fangehao ono mbanua Lowalangi? Lö’ö. Sagötö ngaluo safuria, i’oguna’ö Razo Mesia Yehowa ba wanolo niha solo’ö khönia ena’ö lö ra’iö ba lö tebulö nahiara ba gosali wamati. Ba zi dua faza aefa da’a, ta’ila hewisa wamohouninia ya’ira ba gamuata hegöi ba organisasi. Si oföna, datafaigi wangehao ba wamati. Tatu aro wamatida wamaigi si no ifalua Yesu—he ni’ila hörö hegöi si lö’ö—ba wanolo niha solo’ö khönia ba wamati.

”Mihaogö Ami”

6. Hadia zi farahu ba wangehao famati na tafaigi goroisa Yehowa ba niha Yehuda si no tetibo’ö?

6 Hadia wangehao ba wamati andrö? Ena’ö ta’ila wanema linia, datafaigi wehede Yehowa ba niha Yehuda nitibo’ö, me edöna laröi Mbabilona me abad si önö SM. (Baso Yesaya 52:11.) Tani wa mangawuli ira ya’ia da’ö ba wamazökhi osali hegöi ba wamohouni mangawuli famosumange satulö. (Gese. 1:2-4) Omasi Yehowa na laheta fefu lahe agama Mbabilona ono mbanuania. Faigi me ibe’e khöra goroisa: ”Böi mibabaya hadia ia zi ta’unö”, ”miheta ami khöra”, ba ”mihaogö ami”. Famosumange faya, tebai ita’unöisi wamosumange satulö ni’okhögö Yehowa. Hadia rahu-rahu si tola tahalö? Böi ra’iö ba wamati eluahania tarorogö ena’ö böi teta’unöisi ita moroi ba wamaha’ö hegöi si to’ölö mufalua ba agama sofaya.

7. Hadia ni’oguna’ö Yesu ba wanolo ira nifaha’önia ena’ö la’ehao ira ba wamati?

7 Lö ara me no tefataro Yesu tobali Razo, i’asogö sambua lala ba wanolo niha solo’ö khönia ena’ö lö ra’iö ba wamati. Ifataro Keriso zawuyu si lö faröi ba satua-tua me 1919. (Mat. 24:45) Me luo da’ö, Ono Zekola Zura Ni’amoni’ö no la’ehao ira moroi ba ngawalö wamaha’ö faya. Hiza’i, moguna mu’ehao ira nasa. I’oguna’ö zawuyu si lö faröi Keriso wozara-zara famohouni fa’aboto ba dödö sanandrösa ba upacara hegöi si to’ölö lafalua ena’ö laröi. (Gamd. 4:18) Datafaigi duma-dumania.

Hadia La’owasaini Wanunu Fandru Niha Keriso?

8. Hadia zi no ara lafaduhu’ö Ono Zekola Zura Ni’amoni’ö sanandrösa ba Wanunu Fandru, tobali hadia zi lö aboto ba dödöra?

8 Ono Zekola Zura Ni’amoni’ö, no ara lafaduhu’ö wa moroi ba wamaha’ö niha baero gowasa Fanunu Fandru, ba tenga 25 mbaŵa si Felendrua tumbu Yesu. Imane Zion’s Watch Tower baŵa si Felendrua 1881, ”Zuta wamaha’ö niha baero si no mu’ohe ba gereja. Hiza’i soyania, ha töi zi fabö’ö börö me ere niha baero tobali ere niha Keriso, ba mube’e töi niha keriso gowasa niha baero simane Fanunu Fandru.” Me 1883, so duho ba Watch Tower, ”When Was Jesus Born?” (Hamega Tumbu Yesu?) ihalö gangetula wa kira-kira me böröta mbaŵa si Fulu tumbu Yesu. * Ambö aboto ba dödö Nono  Zekola Zura Ni’amoni’ö me luo da’ö wa moguna mubato wangowasaini Fanunu Fandru. Lö labato wangowasaini ösi nomo Mbetieli ba Brooklyn. Hiza’i, me aefa 1926, ibörötaigö so zi fabö’ö. Hadia mbörö?

9. Hadia ni’ila Nono Zekola Zura Ni’amoni’ö ba gafuriata sanandrösa ba Wanunu Fandru?

9 Me no lahaogö la’osisi’ö duho da’ö Ono Zekola Zura Ni’amoni’ö, awena la’ila wa böröta wamaha’ö Fanunu Fandru hegöi si to’ölö mufalua tanö bö’ö so’amakhaita ba da’ö, lö möi famosumange döi Lowalangi. Artikel ”The Origin of Christmas” (Böröta Wanunu Fandru), nifa’anö ba The Golden Age 14 mbaŵa si Felendrua 1927, imane wa Fanunu Fandru no owasa niha baero, somasi famai-mai, ba so göi wamosumange adu. Itutunö artikel da’ö wa lö ni’oroisi Yesu ena’ö mu’owasaini Wanunu Fandru, ihalö rahu-rahu si fao fehede sabe’e: ”Ulidanö andre, fa’omasi nösi, hegöi Afökha, omasi ira na lö mubato wangowasaini ya’ia . . . da’ö dane-dane wa aro sibai dödöda ena’ö lö ta’owasaini ia, motöi niha samosumange Yehowa.” Börö da’ö, lö la’owasaini Wanunu Fandru osi nomo Mbetieli i’otarai me baŵa si Felendrua da’ö—irugi gofu hawa’ara!

10. (a) Me baŵa si Felendrua 1928, hadia ni’ombakha’ö sanandrösa ba Wanunu Fandru? (Faigi kotak ” Fanunu Fandru, Böröta hegöi Ohitönia”.) (b) Hewisa wamangelama ono mbanua Lowalangi sanandrösa ba ngaluo sebua hegöi owasa tanö bö’önia si tebai lafalua? (Faigi kotak ” Fanutunö Luo Sebua ba Owasa Tanö Bö’ö”.)

10 Me döfi aefa da’ö, so gangombakhata nitema Nono Zekola Zura Ni’amoni’ö sanandrösa ba Wanunu Fandru. Me 12 mbaŵa si Felendrua 1928, ifa’ema huhuo ba radio talifusöda Richard H. Barber, anggota staf gödo sebua. Itutunö hewisa wamobörö zogoro ita sanandrösa ba  ngaluo sebua andrö. Hewisa nono mbanua Lowalangi ba wotema’ö fanuturu lala moroi ba gödo sebua? Itörö tödö dalifusöda Charles Brandlein me lö la’owasaini sa’ae Wanunu Fandru ösi nomonia, ”Hadia fatimba khöma wangeheta famaha’ö niha baero andrö? Tatu lö’ö! . . . Fagölö ira na taheta ba tatibo’ö mbaru si ta’unö.” Simanö göi wa’aterou dödö dalifusöda Henry A. Cantwell, si tobali satua samasui ba gafuriata. Itörö tödönia, ”Omuso dödöma börö me so zi tola maheta ba wangoroma’ö fa’omasima khö Yehowa.” Niha si lö faröi solo’ö khö Keriso, lö abua gölöra ba wombulö’ö si to’ölö lafalua ba lö fao ira ba ngawalö gowasa si otarai wamosumange si ta’unö. *Yoh. 15:19; 17:14.

11. Hewisa wangoroma’öda wa tatuhini Razo Mesia?

11 Tobali duma-duma khöda wa’alöfaröi Nono Zekola Zura Ni’amoni’ö! Na ta’angerönusi duma-dumara, moguna tasofu khöda samösa, ’Hewisa wamaigigu fanuturu lala nitemada moroi ba gödo sebua? Hadia utema ba ufalua ia si fao fangandrö saohagölö?’ Na aoha gölöda ba wolo’ö, da’ö dandra wa tatuhini Razo Mesia, sangoguna’ö ira sawuyu si lö faröi ba wame’e gö wamati ba ginötönia.​—Hal. 16:4, 5.

Hadia Moguna La’oguna’ö Röfa Niha Keriso?

Lencana salib-mahkota (Faigi ngenoli si-12 ba 13)

12. Ba zi hauga fakhe, hewisa dödö Nono Zekola Zura Ni’amoni’ö sanandrösa ba röfa?

12 Barö zi hauga fakhe, fao dödö Nono Zekola Zura Ni’amoni’ö wa röfa andrö tandra wa’aniha Keriso. Tatu  manö lö lafosumange röfa börö me la’ila wa fasala na mufosumange nadu. (I Kor. 10:14; I Yoh. 5:21) I’otarai 1883, no iwa’ö Watch Tower wa ”ogoro Lowalangi ngawalö wamosumange adu”. Hiza’i, molo’ö Ono Zekola Zura Ni’amoni’ö ba wamobörö, lö fasala na mu’oguna’ö röfa ba zi tefaudu. Duma-dumania, omuso dödöra wangoguna’ö pin salib-mahkota ena’ö la’ila haniha ira. Da’ö dandra wa latema mahkota wa’auri na lö faröi ira irugi wa’amate. Ibörötaigö me 1891, so gambara pin salib-mahkota ba nga’örö tanö föna Watch Tower.

13. Hadia wamaha’ö si bohou latema ira solo’ö khö Keriso sanandrösa ba wangoguna’ö röfa? (Faigi kotak ” Fa’aboto ba Dödö si Bohou Sanandrösa ba Röfa”.)

13 La’osinangegö lencana salib-mahkota Ono Zekola Zura Ni’amoni’ö. Hiza’i, ba gangohorita 1920-an, arara manö mubohouni wa’aboto ba dödö niha solo’ö khö Keriso sanandrösa ba röfa. Itörö tödö dalifusöda Grant Suiter kebaktian nifalua me 1928 ba Detroit, Michigan, AS. Ba gafuriatania tobali ia Boto Solohe. Imane, ”Ba kebaktian da’a mufatunö wa lencana salib-mahkota tenga ha lö moguna, hiza’i ogoro ita.” Hauga fakhe aefa da’ö, itugu oya zi bohou ta’ila. Ba da’ö oroma wa lö naha röfa ba wamosumange sohau-hau ba sehao ba wamati.

14. Hewisa nono mbanua Lowalangi ba wanema’öra fa’aboto ba dödö nizara-zara sanandrösa ba röfa?

14 Hewisa nono mbanua Lowalangi me so wamohouni fa’aboto ba dödö sanandrösa ba röfa? Hadia la’oguna’ö lencana salib-mahkota somasi ira? Itörö tödö Lela Roberts, si no ara tobali ono mbanua Yehowa, ”Maheta lencana da’ö me ma’ila geluahania.” Isalahini ndra talifusöda sato talifusöda ira alawe si lö faröi sotöi Ursula Serenco, imane, ”Awena ta’ila wa tandra niha baero ni’oguna’öda si tobali salahi wa’amate Zo’aya hegöi folulu fa’auri niha Keriso, ni’amoni’öda i’otarai me föna. Tefaudu ba Gamaedola 4:18, ta’andrö saohagölö me itugu mohaga lalada.” Lö omasi niha solo’ö khö Keriso si lö faröi fao ba zi to’ölö lafalua agama faya sogoro ita!

15, 16. Hewisa wangoroma’öda wa tahalö gangetula tarorogö golayama gosali wamati khö Yehowa si so ba gulidanö ena’ö lö ta’unö?

15 Da’ö gangetulada iada’a. Ta’ila wa so ni’oguna’ö Keriso ba wanolo banuania ena’ö te’ehao ba wamati, ya’ia da’ö sawuyu si lö faröi ba satua-tua. Börö da’ö, ta’o’ö na so wamangelama moroi ba gö wamati sanandrösa ba upacara, amuata, hegöi si to’ölö mufalua ba agama faya. Tahalö gangetula ena’ö lö tata’unöisi golayama gosali wamati khö Yehowa ba gulidanö, simane nifalua ndra talifusöda me böröta wa’atohare Keriso.

16 Sagötö ngaluo safuria andre, mohalöwö Keriso ba zi lö ta’ila-ila, ena’ö telumö’ö nono mbanua Yehowa moroi ba niha sota’unöisi ya’ira ba wamati. Hewisa wamaluania da’ö? Datafaigi.

 Famabali ’si Lö Sökhi moroi ba Zatulö’

17, 18. Ba gamaedola Yesu sanandrösa ba giri, hadia geluahania (a) mulau giri ba nasi, (b) ”fama’u’u fefu hadia ia ngawalö gi’a”, (c) mu’owuloi gi’a si sökhi ba lalau ba nahia (d) ba mutibo’ö zi lö sökhi?

17 Razo Yesu Keriso andrö, ifaigi-faigi nono mbanua Lowalangi ba zi sagörö ulidanö. Hewa’ae ambö aboto ba dödöda, ifalua Keriso hegöi ira mala’ikania halöwö famabali. Ifo’amaedola halöwö da’a Keriso simane giri. (Baso Matai’o 13:47-50.) Hadia geluaha gamaedola da’a?

Giri andrö amaedola fanuriaigö Mbanua Lowalangi ba zi sagörö asi niha gulidanö (Faigi ngenoli si-18)

18 Mulau ”giri . . . ba nasi”. Hulö amaedola halöwö fanuriaigö Banua Lowalangi ba zi sagörö asi niha gulidanö. ”Fama’u’u fefu hadia ia ngawalö gi’a.” Turia somuso dödö andrö idönisi ngawalö niha—ya’ira samalua hadia nifakhoi ba niha somasi tobali niha Keriso sindruhu, ba ato niha tanö bö’ö sadöni tödö ba wamobörö, hiza’i lö ni’osambua’öra tödöra ba wamosumange sohau-hau. * Mu’owuloi ”zi sökhi, lalau ba nahia”. Mu’owuloi niha satulö tödö ba mbanu-banua niha Keriso si hulö nahia ba wame’e sumange si lö ta’unö khö Yehowa. Mutibo’ö gi’a ”si lö sökhi”. Sagötö ngaluo safuria, Keriso hegöi ira mala’ika andrö, lafabali ”zi lö sökhi andrö ba zatulö”. * Lua-luania, niha si lö atulö tödö—si lö omasi mondröi fa’afaduhu dödö si fasala mazui si to’ölö mufalua—tebai lata’unöisi mbanua niha Keriso. *

19. Hewisa dödöu ba zi no ifalua Keriso ba wondrorogönia ono mbanua Lowalangi ena’ö lö ta’unö ba ohahau wamosumange sindruhu?

19 Hadia lö ahono dödöda börö me ta’ila Razoda, Yesu Keriso ilumö’ö niha ni’omasi’önia? Ba, hadia lö terara dödöda börö me ta’ila wa fagölö wa’aterou dödönia ba wamosumange satulö hegöi ba nono mbanuania sindruhu, simane me döfi siföföna M me i’ehao gosali? Hawa’omuso dödöda börö me lö ibato wohalöwö Keriso irege lö tebulö te’ehao nono mbanua Lowalangi ba wamati hegöi famosumange satulö! Taforoma’ö wa tatuhini Razo andrö hegöi Banuania, ta’aröu’ö ita moroi ba agama faya.

^ par. 2 So gefe ni’oguna’ö niha Yehuda ba wamu’a pajak sero röfi ba gosali, ba no latatugöi ira sanuka ana’a hawa’ebua gefe na latukari. Te moguna la’öli göi gurifö nibali’ö sumange. Ifotöi ’sorabu’ niha sanuka ana’a Yesu, te börö me talafo ebua gazi mazui böli gurifö ni’amawara.

^ par. 4 Ono mbanua Yehowa, lafosumange ia ba golayama gosali sebua ba wamati ba gulidanö.

^ par. 8 Itutunö artikel da’a wa fa’atumbu Yesu me baŵa wa’okafu ”lö tefaudu ba waö-waö ndra kubalo si mörö ba danö ba wanaro biri-birira”.​—Luk. 2:8.

^ par. 10 Me isura zurania talifusöda Frederick W. Franz me 14 mbaŵa si Felezara 1927, imane, ”Lö ma’owasaini Wanunu Fandru ba ndröfi da’a. No hasara dödö nösi nomo Mbetieli ena’ö lö mu’owasaini sa’ae Wanunu Fandru.” Hauga waŵa aefa da’ö, isura zurania talifusöda Franz me 6 mbaŵa si Dua 1928. Imane, ”Arara manö i’ehao ita So’aya moroi ba ngawalö zala nifalua organisasi Gafökha, so’amakhaita ba Mbabilona.”

^ par. 18 Duma-dumania, me 2013, fa’ato zanuriaigö 7.965.954. Tobali, fa’ato zangondrasi me inötö Wanörö Tödö fa’amate Keriso 19.241.252.

^ par. 18 Famabali gi’a si sökhi moroi ba zi lö sökhi lö fagölö ira wamabali mbiri-biri moroi ba nambi. (Mat. 25:31-46) Famabali, mazui fanguhuku safuria mbiri-biri ba nambi, alua ba wamakao sabölö-bölö si lö aratö tohare. Fatua lö alua da’ö, tola manö mangawuli khö Yehowa motöi niha si no amaedola gi’a si lö sökhi, ba te’osambua’ö ba mbanua niha Keriso si no amaedola nahia.​—Mal. 3:7.

^ par. 18 Ba gafuriatania, mufazaumba niha si lö sökhi ba mbaho alitö, eluahania fa’atekiko ba zi so föna.