Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Mamatörö Mbanua Lowalangi!

 FAZA 20

Mame’e Fanolo ba Wa’aniha

Mame’e Fanolo ba Wa’aniha

TUHO FAZA DA’A

Oroma wa’omasi niha Keriso na göna bencana

1, 2. (a) Hadia gabula dödö salua ba niha Keriso Yudaia? (b) Hadia wa’omasi nirasoi niha Keriso Yudaia?

ME LUO da’ö kira-kira 46 M, alua mbaŵa lofo ba Yudaia. Ba da’ö, so ndra nifaha’ö Yesu ya’ia da’ö niha Yehuda si lö sagu wowöli gandru börö me arakhagö ahori, andrö wa ebua mböli. Olofo ira ba oi fagambö-gambö. Hiza’i, i’anemai larasoi wolumö’ö Yehowa si lö irai larasoi nifaha’ö Keriso tanö bö’ö. Hewisa waö-waönia?

2 Börö wa’ahakhö dödöra niha Keriso Yehuda ba Yeruzalema hegöi ba Yudaia, la’owuloi gefe ira niha Yehuda ba si tenga Yehuda si so ba Gandriokhia, Siria. Ba, lafili darua dalifusöda si tola monorogö tödö wolohe fanolo khö ndra satua si so ba Yeruzalema, sotöi Baranaba ba Saulo. (Baso Halöwö Zinenge 11:27-30; 12:25.) Tola takhalaigö dödö ndra talifusöda so’amböta si so ba Yudaia börö wa’omasi niforoma’ö ndra talifusöda moroi ba Gandriokhia!

3. (a) Hewisa nono mbanua Lowalangi iada’a la’o’ö duma-duma niha Keriso siföföna ba Gandriokhia? Be’e sambua duma-duma. (Faigi kotak ” Fame’e Tolo-Tolo Sebua si Oföna ba Ginötö Andre”.) (b) Hadia manö wanofu nifatunöda ba faza da’a?

3 Da’a wanolo si oföna tesura nibe’e niha Keriso khö ndra talifusöra ba soi bö’ö. Ba ginötö andre, ta’o’ö duma-duma ndra talifusöda ba Gandriokhia. Tola tabe’e wanolo na ta’ila ndra talifusöda ba mbanua bö’ö si göna bencana mazui fanandraigö. * Ena’ö ta’ila gamakhaitania wangodödögö fame’e fanolo ba halöwö fa’alowalangi tanö bö’ö, datatutunö tölu ngawalö wanofu sanandrösa ba halöwö fame’e fanolo: Hana wa ta’amaedolagö ia halöwö fa’alowalangi? Hadia gohitö dödönia? Ba hewisa ena’ö so gunania khöda halöwö da’a?

Hana Wame’e Fanolo ba Wa’aniha No Halöwö ”Ni’amoni’ö”

4. Hadia niwa’ö Waulo ba niha Korindro sanandrösa ba halöwö fa’alowalangi?

4 Ba zura Waulo si mendrua ba niha Korindro, itutunö wa so dombua ngawalö halöwö fa’alowalangi. Hewa’ae itandrösaigö ba niha Keriso si no mubayoini, moguna wehedenia andre ba ”mbiri-biri bö’ö” khö Keriso iada’a. (Yoh. 10:16) Si oföna ”halöwö fangatulö”, ya’ia da’ö halöwö fanuriaigö ba famaha’ö. (II Kor. 5:18-20; I Tim. 2:3-6) Tanö  bö’önia mo’amakhaita ba halöwö nifaluada khö ndra talifusöda si sara lala wamati. Ifotöi Faulo ’fanolo niha ni’amoni’ö’. (II Kor. 8:4) Ngawua wehede ”halöwö fangatulö” ba ’fanolo niha ni’amoni’ö’, tehalö ia moroi ba li Yunani di·a·ko·niʹa. Hadia ni’oroma’önia ba da’a?

5. Hana wa iwa’ö Faulo, fanolo ba wa’aniha andrö sambua halöwö fa’alowalangi?

5 Börö me i’oguna’ö ngawua wehede Yunani ba zi dombua halöwö andrö, ifagölösi Faulo halöwö fanolo ba wa’aniha ba halöwö fa’alowalangi ba mbanua niha Keriso. Fatua lö iwa’ö da’ö, imane, ’Ba no faehu halöwö, ba fagölö Zo’aya, ba oya ngawalö halöwö, . . . Ba fefu hadia ia zimanö, ba oi eheha si fagölö.’ (I Kor. 12:4-6, 11) I’amaedolagö Faulo ngawalö halöwö ba mbanua niha Keriso si no amaedola halöwö ”ni’amoni’ö”. * (Rom. 12:1, 6-8) Aboto ba dödönia wa moguna ibe’e ginötö tobali ”enoni ni’amoni’ö”!​—Rom. 15:25, 26.

6. (a) Simane nifatunö Waulo, hana wa tobali famosumange Lowalangi wame’e fanolo ba wa’aniha? (b) Tutunö hewisa wamalua fanolo ba wa’aniha ba zi sagörö ulidanö iada’a. (Faigi kotak ” Na Alua Bencana!” nga’örö 214.)

6 Itolo niha Korindro Faulo ena’ö la’ila hana wa fame’e fanolo ba wa’aniha mo’amakhaita ba halöwö fa’alowalangi hegöi famosumange Yehowa. Data’angeraigö atö: Labe’e wanolo niha Keriso börö me ’lö la’osilö’ögö duria somuso dödö andrö khö Keriso’. (II Kor. 9:13) Terou dödö niha Keriso wanolo ira talifusöra ba wamati börö me la’o’ö wamaha’ö Keriso. Imane Faulo wa amuata nifaluara khö ndra talifusöra no tobali tandra ’wa’ebua dödö Lowalangi andrö si no fahöna’. (II Kor. 9:14; I Fet. 4:10) Imane The Watchtower 1 mbaŵa si Felendrua 1975 sanandrösa ba wame’e fanolo khö ndra talifusöda so’amböta, ”Lö aombö dödöda me itandrösaigö khöda Lowalangi Yehowa hegöi Ononia Yesu Keriso wa moguna sibai halöwö simane da’a.” Atulö, fame’e fanolo ba wa’aniha no sambua halöwö ni’amoni’ö sebua böli.​—Rom. 12:1, 7; II Kor. 8:7; Heb. 13:16.

Ohitö Dödö Wame’e Fanolo ba Wa’aniha

7, 8. Hadia gohitö dödö si oföna wame’e fanolo ba wa’aniha? Tutunö.

7 Hadia gohitö dödö wame’e fanolo ba wa’aniha? Ibe’e Faulo wanema li ba zura si mendrua nibe’enia ba niha Korindro. (Baso II Korindro 9:11-15.) Ba ayati-ayati da’a, ifatunö Faulo wa so tölu ngawalö gohitö dödöda si tola takhamö ba ’dolo-tolo andrö ba zato’, eluahania ba wame’e fanolo ba wa’aniha. Datafaigi ero sambu-sambua.

8 Si oföna, halöwö fanolo nibe’eda tefolakhömi Yehowa. Ba zi lima ngawua ayati moroi yawa, asese idönisi dödö ndra talifusöda Faulo khö Lowalangi Yehowa. Ifasugi ba dödöra sinenge andrö ”wangandrö saohagölö khö Lowalangi” ba ’oya wangandrö saohagölö khö Lowalangi’. (Ayati 11, 12) Ifatunö wame’e fanolo ba wa’aniha andrö tobali famarou dödö niha Keriso ba ’wanuno Lowalangi’ ba  ’börö wa’ebua dödö Lowalangi andrö, si no fahöna’. (Ayati 13, 14) Ihalö rahu-rahu Faulo ba zi no mufatunö andre sanandrösa ba wame’e fanolo ba wa’aniha, imane, ”Nisuno Lowalangi.”​—Ayati 15; I Fet. 4:11.

9. Hewisa wa tola fabö’ö wangera-ngera niha börö wanolo nifaluada? Be’e sambua duma-duma.

9 Simane Faulo, la’ila ono mbanua Yehowa ba ginötö andre wa fame’e fanolo ba wa’aniha, inötö ba wamolakhömi Yehowa ba moturia wamaha’önia. (I Kor. 10:31; Tit. 2:10) Fangodödögöda wame’e fanolo zamabö’öni fangera-ngera niha sanandrösa khö Yehowa hegöi khö ndra Samaduhu’ö. Duma-dumania: Samösa ndra alawe si toröi ba mbanua si göna bade sabölö-bölö, isura ba mbawandruhö nomonia ”Lö Matema Zamaduhu’ö Yehowa”. Samuza inötö, i’ila zohalöwö same’e fanolo ba wa’aniha, lafazökhi nomo ba zi tambai lala föna nomonia. Ihaogö inehesi zohalöwö andrö ba zi hauga hari, aefa da’ö möi ia ifalukhaisi. Me i’ila wa ya’ira andrö Samaduhu’ö Yehowa, ahöli-höli dödönia ba imane, ”Sindruhu fasala wangera-ngeragu khömi.” Buania? Iheta zi no isura andrö ba mbawandruhö.

10, 11. (a) Hadia manö duma-duma sangoroma’ö wa no tafalua gohitö dödö si dua ba wame’e fanolo ba wa’aniha? (b) Hadia publikasi sanolo ira sohalöwö ba wame’e fanolo ba wa’aniha? (Faigi kotak ” Fakake Onönöta ba Wame’e Fanolo ba Wa’aniha”.)

10 Si dua, ’tabönökhi zambö’ khö ndra talifusöda si sara lala wamati. (II Kor. 9:12a) Omasi ita tabönökhi zoguna sabölö aösö ena’ö aoha gabula dödö ndra talifusöda. Hadia mbörö? Ya’ita banua niha Keriso no amaedola zi ”sambua boto” ba ”na so zofökhö ba zi sambua ndroto-ndroto, ba oi afökhö ba ndroto-ndroto fefu”. (I Kor. 12:20, 26) Börö wa’omasi ba fa’ahakhö dödö, ato ndra talifusöda same’e inötö, lahalö fakake, ba möi ira ba mbanua si göna bencana wanolo ira talifusö si sara lala wamati. (Yak. 2:15, 16) Duma-dumania, me aefa tsunami ba Jepang me 2011, ifa’ohe’ö zura gödo ndraha Amerika Serikat khö Panitia Pembangunan Regional ba Amerika Serikat, lasofu hadia so ”ndra talifusöda sonekhe” somasi manolo ba wamazökhi Balai Mbanua Lowalangi ba da’ö. Hadia nifaluara? Ba zi hauga migu, arakhagö 600 ndra talifusöda samasura’ö töira ba fao dödöra we’amöi ba Jepang, labe’e gefera samösa! Imane gödo ndraha Amerika Serikat, ”Lö ma’ila hadia nifaluama sa’ae, ato sibai ndra talifusöda zamasura’ö töira.” Me manofu samösa dalifusöda ba Jepang khö dalifusöda sanolo moroi ba soi bö’ö hana wa omasi möi ia, itema li, ”Ira talifusöma ba Jepang andre no amaedola ’mbotoma’. Marasoi wa’afökhö hegöi famakao nitaögöra.” Börö wa’omasi soroi ba dödö, andrö wa latehegö wa’aurira ba wanolo ira talifusöda si sara lala wamati. *I Yoh. 3:16.

11 Si tenga Samaduhu’ö manö la’andrö saohagölö me so wanolo moroi khöda. Duma-dumania, me 2013 alua mbade sabölö-bölö ba negara bagian Arkansas, AS. So koran  zangombakha hewisa wa’alio ndra Samaduhu’ö Yehowa ba wame’e fanolo imane, ”No lafaudugö halöwöra ira Samaduhu’ö Yehowa ba wanolo niha si göna abula dödö börö me no to’ölö ba tefaudu wamaluara.” Simane niwa’ö Waulo, no ’tabönökhi’ zoguna khö ndra talifusöda.

12-14. (a) Hana wa moguna tafalua gohitö dödö si tölu ba halöwö fame’e fanolo ba wa’aniha? (b) Hadia manö niwa’ö ndra talifusöda sangoroma’ö wa tebai taböhöli wamalua halöwö wamati?

12 Si tölu, tatolo niha si göna abula dödö ena’ö lafuli lafalua halöwö wamati. Hana wa moguna da’a? Imane Faulo wa niha sanema’ö fanolo tola terou dödöra ”wangandrö saohagölö khö Lowalangi”. (II Kor. 9:12b) Hadia tenga lala si sökhi da’a ba niha si göna abula dödö, mangawuli ira ba wamalua halöwö wamati, tandra wa la’andrö saohagölö khö Yehowa? (Fil. 1:10) Me 1945, imane The Watchtower, ”Fao dödö Waulo . . . ba wangowuloi tolo-tolo börö me da’ö zi möi fanolo . . . khö ndra talifusöda niha Keriso so’amböta ena’ö omuso dödöra ba zoguna khöra ba lö si tobali taha-tahara wamalua halöwö khö Yehowa si fao fa’omuso dödö.” Fagölö gohitö dödöda iada’a. Na lafalua mangawuli halöwö fanuriaigö, tenga ha aro ndra talifusöda si göna abula dödö, tobali aro göi wamati ndra talifusöda sanolo ya’ira.​—Baso II Korindro 1:3, 4.

13 Faigi hadia niwa’ö niha sanema fanolo, lafuli manuriaigö, ba te’a’aro’ö ira wamalua da’ö. Imane talifusöda ira matua, ”No sambua howu-howu ba nösi nomoma na möiga manuriaigö. Lö aombö dödöma zalua khöma börö me mabe’e wondrara dödö ba niha.” Imane göi talifusöda ira alawe, ”Lö uböhöli wangosambua’ö tödögu ba wamalua halöwö famati ba lö mangoloi dödögu börö zalua ba zi fasui ya’o. Da’a zame’e khögu fa’ahono dödö.” Imane talifusöda ira alawe bö’ö, ”Oya zi tebai tafalua ba wa’auri andre, tobali halöwö fanuriaigö zame’e fanuturu lala ba nösi nomogu. Na ufatunö ba niha gulidanö si bohou, da’ö zame’e khögu fa’afaduhu dödö wa fefu hadia ia oi tebohouni.”

14 Halöwö wamati tanö bö’ö sinangea larasoi ira talifusöda si göna abula dödö ya’ia da’ö fe’amöi ba gangowuloa. Faigi zalua khö Kiyoko, talifusöda ira alawe sarakhagö 50-an ndröfinia me luo da’ö. Me alua tsunami, taya fefu gokhötania, ha baru ba sandrala nifakenia zi toröi ba lö i’ila hadia zalua ba wa’aurinia. Aefa da’ö, samösa zatua sokubaloi sangombakha khönia wa lafalua gangowuloa ba moto zatua sokubaloi. Imane Kiyoko, ”Satua sokubaloi da’ö, fo’omonia, ya’o, ba samösa dalifusöda tanö bö’ö sodadao ba moto. Öna-öna sibai gangowuloa nifaluama hulö dandra sahöli-höli dödö, taya ba wangera-ngerama tsunami. Ahono dödögu. Angowuloa da’a zangoroma’ö wa mofa’abölö wahasara dödö niha Keriso.” Imane talifusöda  bö’ö si no mangondrasi angowuloa me no aefa bencana, ”Angowuloa-angowuloa da’ö böbö fangorifi khögu!”​—Rom. 1:11, 12; 12:12.

Fame’e Fanolo Mowua Sagötö Fa’ara

15, 16. (a) Hadia mbua nitema niha Keriso ba Gorindro hegöi ba nahia bö’ö me no latuhini wame’e fanolo ba wa’aniha? (b) Hewisa wa moguna khöda wame’e fanolo ba wa’aniha iada’a?

15 Sanandrösa ba wame’e fanolo andrö, itutunö Faulo ba niha Korindro hadia gunania khöra hegöi ba niha Keriso tanö bö’ö na fao ira ba halöwö andre. Imane, ”Ba ba wangandröra, salahimi, [niha Keriso Yehuda ba Yeruzalema si no manema fanolo] me no humulu dödöra khömi, börö wa’ebua dödö Lowalangi andrö khömi, si no fahöna.” (II Kor. 9:14) Fa’oböwö niha Korindro da’ö zamarou tödö niha Keriso Yehuda ba wangandrö salahi ndra talifusöda si so ba Gorindro hegöi niha si tenga Yehuda ena’ö itugu monönö wa’omasi ba gotaluara.

16 I’ombakha’ö The Watchtower 1 mbaŵa si Felendrua 1945 gunania wame’e fanolo ba ginötöda andre, imane, ”Na so ösa nono mbanua Lowalangi zame’e fanolo khö ndra talifusöra so’amböta, angeraigö lua-luania ba wahasara dödö!” Da’ö nirasoi zame’e fanolo ba wa’aniha ba ginötö andre. Imane talifusöda satua sokubaloi sanolo niha si göna molö, ”Itugu fahuwu ndra’o khö ndra talifusöda börö me utolo ira.” Imane göi talifusöda ira alawe sangandrö saohagölö me no itema wanolo, ”Fakhili-khili sibai wa’afatalifusötada ba gulidanö Faradaiso.”​—Baso Gamaedola 17:17.

17. (a) Hewisa ngawua wehede ba Yesaya 41:13 moguna ba halöwö fanolo ba wa’aniha? (b) Tötöi duma-duma halöwö wame’e fanolo ba wa’aniha tobali famolakhömi Yehowa ba möi fanga’aro wa’afatalifusötada. (Faigi kotak ” Sohalöwö ba zi Sagörö Ulidanö La’asogö Wa’ohahau Dödö”.)

 17 Me tohare zame’e fanolo ba mbanua si göna bencana, larasoi ira talifusöda si göna abula dödö wa sindruhu nifabu’u Lowalangi, ”Ya’odo sa’ae, Yehowa, Lowalangimö andrö zololohe kambölöu, ya’odo andre, sanguma’ö khöu: Böi busi dödöu, utolo’ö!” (Yes. 41:13) Imane talifusöda ira alawe si no te’efa’ö ba bencana andrö, ”Atata dölagu wamaigi si tekiko, hiza’i i’oro’ö dangania Yehowa. Fanolo nibe’e ndra talifusöda khögu lö u’ila ututunö faoma fehede.” Me alua bencana sabölö-bölö ba da’ö, darua zatua sokubaloi zanura sura sanandrösa ba mbanua niha Keriso nikubaloira, ”Duru danö andre sindruhu möi fangabu dödö, hiza’i marasoi wanolo Yehowa moroi khö ndra talifusöda. No irai mabaso hewisa wame’e fanolo, na iada’a no ma’ila samösa.”

Hadia Tola Fao Ndra’ugö?

18. Hadia zinangea öfalua na omasi ndra’ugö fao ba halöwö wame’e fanolo ba wa’aniha? (Faigi kotak ” Da’ö Zotatugöi Lala Wa’aurinia”.)

18 Hadia omasi’ö örasoi wa’omuso dödö ba wame’e fanolo? Törö tödöu, ha ira talifusöda sohalöwö ba wamazökhi Balai Mbanua Lowalangi awai zi to’ölönia nifili. Ombakha’ö khö zatua sokubaloi wa omasi’ö öfo’ösi formulir permohonan. Samösa zatua sokubaloi si no to’ölö ba halöwö andrö ibe’e wamasugi ba dödö, ”Ae’e ba nahia si göna bencana na no ötema zura resmi moroi khö Panitia Penanggulangan Bencana.” Na simanö, fangodödögö ba wame’eda fanolo lö fawuka.

19. Hewisa halöwö wame’e fanolo ba wa’aniha möi fangombakha wa sindruhu nifaha’ö Keriso ita?

19 Fame’e fanolo no sambua lala sahöli-höli dödöda ba wolo’ö fareta Yesu ena’ö ’faoma ta’omasi’ö nawöda’. Na tafalua wa’omasi, da’ö zangoroma’ö wa sindruhu nifaha’ö Keriso ita. (Yoh. 13:34, 35) Sindruhu wa ebua howu-howu nitemada iada’a börö me ato zame’e inötöra wangai halöwö samolakhömi Yehowa, ba latolo göi niha si lö faröi ba wotuhini Banua Lowalangi!

^ par. 3 Ba faza da’a itutunö khöda hewisa wanolo ira talifusöda si sara lala wamati. Itaria göi fanolo nibe’eda moguna ba zi tenga Samaduhu’ö.​—Gal. 6:10.

^ par. 5 I’oguna’ö Faulo ngawua wehede di·aʹko·nos (sohalöwö) ba wo’amaedolagö ira ”enoni”.​—I Tim. 3:12.

^ par. 10 Faigi duho ”Membantu Keluarga Seiman Kita di Bosnia” ba Menara Pengawal 1 mbaŵa si Felezara 1994, nga’örö 23-27.