Faigi nösi

Faigi ba gangolifa

Samaduhu’ö Yehowa

Fili li Nias

FAZA 15

Laforege Ena’ö Lö Taha-tahara ba Wamosumange Lowalangi

Laforege Ena’ö Lö Taha-tahara ba Wamosumange Lowalangi

TUHO FAZA DA’A

Itolo niha solo’ö khönia Keriso ena’ö möna ira molo’ö huku ba lö taha-tahara ba wamosumange Lowalangi

1, 2. (a) Hadia dandra wa ono mbanua Lowalangi ndra’ugö? (b) Hadia mbörö wa laforege ira Samaduhu’ö Yehowa ena’ö lö sanaisi ya’ira ba agama?

HADIA ono mbanua Lowalangi ndra’ugö? Na Samaduhu’ö Yehowa, fanema li, ya’ia! Ba, hadia dandra wa ono mbanuania ndra’ugö? Tenga paspor, mazui sura-sura tanö bö’ö. Oroma ia ba lagu wamosumangemö Lowalangi Yehowa. Nifotöi famosumange satulö, tenga ha nifaduhusimö tödö. Hiza’i, fefu nifaluau—folo’öu ba goroisa Mbanua Lowalangi. Famosumangeda Lowalangi so lua-luania ba lala wa’aurida, simanö göi ba nösi nomoda hegöi ba nifaluada na göna ita fökhö.

2 Hiza’i, niha ba zi fasui ya’ita lö la’osinangegö wa ono mbanua Lowalangi ita hegöi goi-goinia. So zamatörö sanaisi famosumangeda Lowalangi mazui lahori moroi ba gulidanö. Itaria, laforege ono mbanua Keriso ba wanöndra fangefa ena’ö auri ira molo’ö oroisa Razo Mesia. Hadia ahöli-höli dödöda? Lö’ö. Ono mbanua Yehowa ba götö Zura Ni’amoni’ö asese laforege ena’ö lö taha-tahara ba wamosumange Yehowa.

3. Hadia niforege nono mbanua Lowalangi ba götö Razo Gesitera?

3 Duma-dumania, ba götö Razo Gesitera, laforege ono mbanua Lowalangi ena’ö lö mate ira. Hadia mbörö? Lö sökhi Perdana Menteri Hamano, iwa’ö khö Ahasiwero, razo ndrawa Weresia, ena’ö labunu fefu niha Yehuda si toröi ba da’ö börö ”huku khöra, ba no faehu ba huku niha bö’ö fefu”. (Gesi. 3:8, 9, 13) Hadia iröi nono mbanuania Yehowa? Lö’ö, ifahowu’ö nifalua Gesitera hegöi Morodokhai me naik banding ira khö razo ndrawa Weresia ba wolumö’ö ono mbanua Lowalangi.—Gesi. 9:20-22.

4. Hadia nifatunöda ba faza da’a?

4 Hewisa ba ginötö andre? Simane ni’ilada ba faza si no tatalu’i, itaria so ndra samatörö solawa ira Samaduhu’ö Yehowa. Ba faza da’a, ta’ila hewisa wanaisira famosumangeda Lowalangi. So tölu ngawalö nifatunöda: (1) hak we’asoda ba zi sambua organisasi hegöi ba wamosumange Lowalangi molo’ö nifilida, (2) falö’aiwöda ba wamili dalu-dalu si tefaudu ba goi-goi Zura Ni’amoni’ö, ba (3) hak zatua ba  wangebua’ö iraono molo’ö goi-goi Yehowa. Ero sambua faosatö, ta’ila hewisa nono Mbanua Mesia si lö faröi, lö ata’u ira wangodödögö ena’ö telumö’ö wa ono mbanua Lowalangi sebua böli ira ba hewisa wa tefahowu’ö nifaluara andrö.

Laforege Ena’ö Tefaduhu’ö Molo’ö Huku ba Kebebasan Asasi

5. Hadia guna ba niha Keriso sindruhu me tefaduhu’ö ira molo’ö huku?

5 Hadia moguna lafaduhu’ö ita molo’ö huku ndra samatörö ba gulidanö ba wamosumange Yehowa? Lö’ö, hiza’i na lafaduhu ita molo’ö huku—duma-dumania, lö tabini-bini’ö ita we’amöi ba Balai Mbanua Lowalangi hegöi ba Balai Kebaktian, tola tafazökhi ba tafa’ohe’ö lektur Zura Ni’amoni’ö, ba tola tafa’ema duria somuso dödö ba niha fefu. Ba zi hawa’oya soi, no tefasura’ö döi ndra Samaduhu’ö Yehowa ba lö taha-tahara ba wamosumange Lowalangi simane agama bö’ö. Hiza’i, hadia zalua na lö ifaduhu’ö ita famareta molo’ö huku mazui isaisi kebebasan asasida?

6. Hadia wangabu dödö salua khö ndra Samaduhu’ö Yehowa ba Australia me böröta 1940-an?

6 Australia. Me böröta 1940-an, molo’ö gubernur jenderal Australia, nifaduhusida tödö möi ”famawukaisi wasuwöta”. Lasaisi halöwöda. Tebai möi ita ba gangowuloa, manuriaigö ba ni’ila-ila niha, laduhö Mbetieli, ba lasita Balai-Balai Mbanua Lowalangi. Lö latehe so lektur Zura Ni’amoni’ö. Me no hauga fakhe tabini’ö wamalua halöwöda, ba gafuriata omuso dödö ndra Samaduhu’ö ba Australia. Me 14 mbaŵa si Önö 1943, itehegö Mahkamah Agung Australia tafalua halöwöda.

7, 8. Ba zi hauga fakhe, hadia niforege ndra talifusöda ba Rusia ena’ö lö taha-tahara ba wamosumange Lowalangi?

7 Rusia. Ba zi hauga wulu fakhe, lö latehegö ira Komunis ndra Samaduhu’ö Yehowa, hiza’i ba gafuriatania tefasura’ö döira me 1991. Me no aboto Uni Soviet si oföna, tefaduhu’ö ita molo’ö huku ba Federasi Rusia me 1992. Hiza’i, lö ara aefa da’ö, so niha solohi ya’ita—töra-töra zi fao ba Gereja Ortodoks Rusia börö me tedou wa’atoda. So lima ngawalö niböbögöra khö ndra Samaduhu’ö Yehowa i’otarai 1995 ba 1998. Lö isöndra zalada jaksa. Niha solohi ya’ita sagabe’e tandro andrö lafa’ema gugatan perdata me 1998. Ba wamobörö, möna ndra Samaduhu’ö, hiza’i lö fatema ba dödö niha solohi ya’ita gangetula si no muhalö. Lua-luania, kala ndra Samaduhu’ö me naik banding ira me baŵa si Lima 2001. Ba mbaŵa si Fulunia, lafuli möi ba gödo zanguhuku irege so gangetula me 2004 ba wangeheta badan hukum ni’oguna’ö ndra Samaduhu’ö ba Moskwa ba lasaisi halöwöda.

8 Izumaigö so wolohi. (Baso II Timoteo 3:12.) La’ailasi ba lasuwö ndra Samaduhu’ö Yehowa. Lasita lektur agama;  lö latehe-tehe manö wosewa hegöi ba wamazökhi omo wamosumange Lowalangi. Khalaigö ndra talifusöda ba ngawalö gabula dödö salua andrö! Naik banding ira ba Mahkamah Eropa untuk Hak Asasi Manusia (ECHR) me 2001, ba lanönö wame’e angombakhata khö Mahkamah andrö me 2004. Me 2010, ihalö gangetulania ECHR. Aboto ba dödö Mahkamah hana wa lasaisi halöwö ndra Samaduhu’ö ba Rusia, ya’ia da’ö lö fangosinangegö agama. Angetulania, lö dane-dane ba wotuhini angetula nihalö pengadilan-pengadilan rendah börö lö hadöi tandra wa fasala ndra Samaduhu’ö. Imane nasa Mahkamah andrö wa te’asogö wanaisi börö me no muheta hak ndra Samaduhu’ö molo’ö huku. Angetula Mahkamah andrö i’alawa’ö hak ndra Samaduhu’ö ba wofili agamara. Hewa’ae so ösa ndra samatörö si lö mamalua angetula ECHR, lö fa’ata’u ba nono mbanua Lowalangi ba soi da’ö börö me no möna ira.

Titos Manoussakis (Faigi ngenoli si-9)

9-11. Hewisa wasöndrata nono mbanua Yehowa ba Yunani ena’ö lö taha-tahara ba wamosumange Lowalangi, ba hadia mbuania?

9 Yunani. Me 1983, isewa sambua nahia Titos Manoussakis ba Heraklion, Kreta, ena’ö tola owulo ndra Samaduhu’ö ba da’ö ba wamosumange Yehowa. (Heb. 10:24, 25) Hiza’i, fatimba khö pastor Ortodoks ba ifa’ema khö ndra samatörö wa lö fao dödönia na la’oguna’ö nahia da’ö ira Samaduhu’ö Yehowa ba wamosumange Lowalangi. Hadia mbörö? Ha börö me fabö’ö zi faduhu dödö Zamaduhu’ö moroi ba Gereja Ortodoks! Lasidang Titos Manoussakis ba datölu ndra Samaduhu’ö tanö bö’ö. Ladandro ba la’etu’ö hukumara dua waŵa ba gurunga. Börö me ono Mbanua Lowalangi si lö faröi ndra Samaduhu’ö, lamane tödöra wa angetula gödo zanguhuku andrö ifawukaisi wamosumangera Lowalangi; börö da’ö la’ohe farakaro da’a ba gödo zanguhuku ba soi da’ö irege ba gafuriatania la’ohe ba ECHR.

10 Afuriata me 1996, i’ailasi niha solawa famosumange satulö ECHR. Imane Mahkamah wa ”farahu ndra Samaduhu’ö Yehowa ba ’agama nifaduhu’ö’ simane nifakhoi ba undang-undang Yunani” ba fefu gangetula pengadilan-pengadilan rendah ”i’anemai so lua-luania ba kebebasan beragama niha nida’awaini”. Ihalö gangetula Mahkamah wa tenga sinangea ndra samatörö ba Yunani ”zangetu’ö hadia sah ma lö’ö nifaduhusi tödö niha zamösana mazui nahia ni’oguna’öra ba wamalua agamara”. Lafuli laheta hukuma ndra Samaduhu’ö, ba latehegö ba niha wofili agamara zamösana!

11 Hadia te’asiwai gabula dödö ba Yunani me no möna ira? Lö’ö. Me 2012, ba Kassandreia, Yunani, so farakaro simane da’ö, ba awena awai arakhagö 12 fakhe fasuwö ba huku. Ba farakaro da’a, uskup Ortodoks zondrönia’ö  folohi. Dewan Negara, lembaga pengadilan tertinggi ba Yunani, ifemöna nono mbanua Lowalangi. Ba gangetula da’ö, so huku Yunani samaduhu’ö wa tola lafili samösa agamara niha, ba itimba wanandrawa si lö aetu-aetu sanguma’ö wa lö nifaduhu’ö agama ndra Samaduhu’ö Yehowa. Imane gödo zanguhuku, ”Lö si tobini wamaha’ö ndra Samaduhu’ö Yehowa, börö da’ö, no tefaduhu’ö agamara.” Omuso dödö mbanua niha Keriso si lö atoto ba Kassandreia börö me tola lafosumange Yehowa ba Balai Mbanua Lowalangi ni’okhögöra.

12, 13. Ba Prancis, hewisa nudu ba wangalui busi-busi dödö hegöi ba wamuyu’ö huku, ba hadia mbuania?

12 Prancis. So ösa niha solohi ono mbanua Lowalangi sangoguna’ö tandrawa sangalui busi-busi dödö, samuyu’ö huku. (Baso Zinunö 94:20.) Duma-dumania, me talu ndröfi 1990-an, ira sohalöwö ba pajak Prancis, labörögö lafareso gefe Association Les Témoins de Jéhovah (ATJ), da’a sambua badan hukum ni’oguna’ö ndra Samaduhu’ö ba Prancis. I’ombakha’ö menteri anggaran hadia gohitö dödöra wamalua da’a: ”Famareso da’a tola idudugö molo’ö huku mazui ifalua proses pidana . . . , ifawukaisi wamöfö’ö angowuloa mazui ifaso ena’ö mubato halöwö ba mbanuada.” Hewa’ae lö lasöndra zala, iwa’ö sohalöwö ba pajak ena’ö mubu’a pajak si tola mamakiko halöwö ATJ. Na a’ozu dandrawa da’a, lö hadöi sa’ae si tola lafalua ira talifusöda, laduhö gödo ndraha ba lafamawa fefu gödonia ba wamu’a pajak sebua sibai. Afökhö sibai nifaluara, hiza’i lö awuwu nono mbanua Lowalangi. Lö fao dödö ndra Samaduhu’ö ba niböbögö khöra, irege ba gafuriatania la’ohe farakaro da’a föna ECHR me 2005.

13 I’ombakha’ö gangetulania Mahkamah me 30 mbaŵa si Önö 2011. Imane Mahkamah, me no mutehe ba niha lafili samösa agamara, tebai itatugöi Negara hadia sah ma lö’ö nifaduhusi tödö niha ba agamania zamösana mazui lala ba wamalua ya’ia, awena tola na mo’amakhaita ba zi lö sökhi. Imane nasa Mahkamah andrö, ”Pajak . . . ahori gölö soguna ba zi sambua angowuloa irege fefu zi faböbö ba da’ö, lö la’ila lafalua ngawalö zo’amakhaita ba agamara.” Ifaduhu’ö Mahkamah andrö wa möna ndra Samaduhu’ö Yehowa! Omuso sibai dödö nono mbanua Yehowa me lafangawuli pajak si no lahalö ba ATJ hegöi ono gefenia ira samatörö ba Prancis, ba ifaretakö ira Mahkamah ena’ö lö lafo’ömö gödo ndraha sa’ae.

Tola ö’ohe ba wangandrö ndra talifusöda nihuku ba zi lö atulö

14. Hadia zi tola öfalua ena’ö lö sanaisi ba wamosumange Lowalangi?

14 Simane Esitera ba Morodokhai me föna, laforege ono mbanua Yehowa ba ginötö andre ena’ö lö lataha ira ba wamosumange Yehowa molo’ö lala si no ifakhoi. (Gesi. 4:13-16) Hadia tola fao ndra’ugö? Tatu manö. Tola ö’ohe ba  wangandrö ndra talifusöda nihuku ba zi lö atulö. Fangandrö da’ö ebua kuasonia ba wanolo ira talifusöda si göna abula dödö hegöi famakao. (Baso Yakobo 5:16.) Hadia ifondro-ndrongo Yehowa wangandrö da’ö? Fa’amönada ba gödo zanguhuku zangoroma’ö wa ifondro-ndrongo wangandröda!—Heb. 13:18, 19.

Dalu-Dalu Nifili si Tefaudu ba zi Faduhu Dödöda

15. Hadia zinangea latörö tödöra ono mbanua Lowalangi sanandrösa ba wangoguna’ö do?

15 Simane ni’ilada ba Faza 11, latema wanuturu lala ono Mbanua Lowalangi ba Zura Ni’amoni’ö ena’ö lö fasala ira wangoguna’ö do me no to’ölö lafalua niha ba ginötö andre. (I Moz. 9:5, 6; III Moz. 17:11; baso Halöwö Zinenge 15:28, 29.) Hewa’ae lö tatema transfusi darah, hiza’i omasi ita tatema dalu-dalu si tefaudu, simanö göi ba niha ni’omasi’öda, sagötö lö fatimba ba goroisa Lowalangi. Gödo zanguhuku sabölö alawa ba ngawalö soi, no lafaduhu’ö wa fefu niha tola la’etu’ö samösa ba wofili mazui ba wanimbagö dalu-dalu molo’ö tödöra side-ide hegöi agamara. Hiza’i, ba zi hauga soi, so gabula dödö nono mbanua Lowalangi sanandrösa ba da’a. Datafaigi duma-dumania.

16, 17. Hadia zalua si tokea talifusöda ira alawe ba Jepang, ba hewisa wangandrönia no tefondro-ndrongo?

16 Jepang. Samösa wo’omo ira alawe sotöi Misae Takeda ba Jepang, döfinia 63 fakhe. Börö me ono Mbanua Lowalangi si lö faröi ia, i’ombakha’ö khö doto wa lö omasi ia labe’e ndro ba dalu-dalunia. Hiza’i, hauga waŵa aefa da’ö tokea sibai ia me i’ila wa no mube’e transfusi darah khönia sagötö operasi. Börö me no lasawö zi no itatugöi talifusöda Takeda ba lalimo ia, i’angadugö ba gödo huku ndra doto hegöi ruma saki me baŵa si Önö 1993. Ira alawe si sökhi amuata andre no ihaogö-haogö na muhede börö me aro wamatinia. Lö ata’u ia wamaduhu’ö föna niha sato ba gödo zanguhuku, muzizio ia sambua za wa’ara hewa’ae tebai ia. Afuriata möi ia ba gödo zanguhuku ha sara waŵa fatua lö mate ia. Ahöli-höli dödöda wa’abarani ba famatinia andrö! Imane talifusöda Takeda wa lö ibato wangandrö khö Yehowa ena’ö ifahowu’ö nifaluania. Faduhu dödönia wa tefondro-ndrongo wangandrönia. Hadia atulö da’ö?

17 Tölu fakhe me no mate dalifusöda Takeda, i’ombakha’ö gangetulania Mahkamah Agung Jepang, möna ia—ifaduhu’ö wa fasala wame’e transfusi darah andrö börö me lö tefaudu ba zomasi dödönia. Angetula me 29 mbaŵa si Dua 2000 imane ”na ihalö gangetula niha” sanandrösa ba da’a ”moguna mu’osinangegö börö me angetulania samösa”. Börö me lö atage dalifusöda Takeda wamorege ena’ö tola tafili dalu-dalu si tefaudu ba dödöda side-ide si no ifaha’ö Sura Ni’amoni’ö, tola lasöndra dalu-dalu ira  Samaduhu’ö ba Jepang iada’a, ba lö lafaso ira wanema’ö transfusi darah.

Pablo Albarracini (Faigi ngenoli si-18 irugi 20)

18-20. (a) Hewisa pengadilan banding ba Argentina wotuhini hak zi samösa niha ena’ö lö labe’e khönia transfusi darah simane si no tesura ba kartu keterangan medis? (b) Sanandrösa ba wangoguna’ö do si fasala, hewisa wangoroma’öda wa ta’o’ö wamatörö Keriso?

18 Argentina. Hewisa wama’anö ono Mbanua Lowalangi na lahalö gangetula ira doto ba zi lö la’ila? Tola ta’ohe-ohe dokumen hukum si tola fahuhuo salahida, simane nifalua Pablo Albarracini. Me baŵa si Lima 2012, no irai larabu ba lafana ia mato hauga kali. La’ohe ia ba ruma saki ba zi lö i’ila-ila irege tebai itutunö gangetulania sanandrösa ba transfusi darah. Hiza’i, no i’ohe kartu keterangan medis si no muteka töra öfa fakhe ba zi lalö. Hewa’ae arakhagö mate ia ba so ösa doto sanguma’ö wa moguna latransfusi ia ena’ö anau nosonia, la’osinangegö zomasi ia. Hiza’i, ama Pablo si tenga Samaduhu’ö Yehowa, i’andrö ba gödo zanguhuku ena’ö lö la’o’ö zomasi nononia.

19 I’anemai naik banding pengacara salahi wo’omo Pablo. Barö zi hauga za, pengadilan banding lö i’o’ozui fareta pengadilan rendah ba ihalö gangetula wa moguna mu’osinangegö hadia zomasi zofökhö simane nisura ba kartu medis da’ö. Naik banding nama Pablo ba Mahkamah Agung Argentina. Hiza’i, lö isöndra Mahkamah Agung dani ”ba wo’aombösi tödö wa [angetula falömanema’ö transfusi darah ba kartu medis Pablo] mufazökhi börö me so wa’aboto ba dödö, ohitö dödönia samösa, ba lö samaso ya’ia”. Imane Mahkamah, ”Fefu niha si lö mofökhö ba satua fangera-ngera, tola ihenaigö wame’e fangombakha hadia itema dalu-dalu da’ö mazui lö’ö . . . Angombakhata da’a moguna i’o’ö doto samareso ya’ia.”

Hadia no öfo’ösi kartu keterangan medis khöu?

20 No döhö sa’ae dalifusöda Albarracini. Omuso dödönia hegöi fo’omonia ira alawe börö me no lahenaigö khöra kartu medis. Hewa’ae no ide-ide nifaluara andrö, hiza’i moguna iforoma’ö wa so khönia wolo’ö barö wamatörö Keriso ba Mbanua Lowalangi. Hadia no öfalua da’ö hegöi ösi nomou?

April Cadoreth (Faigi ngenoli si-21 irugi 24)

21-24. (a) Hewisa Mahkamah Agung Kanada ba gafuriatania ibe’e gangetula sahöli-höli dödö sanandrösa ba ndraono si lö ibönö döfi hegöi fangoguna’ö do? (b) Hewisa zalua andre möi fangabe’e wamati nono mbanua Yehowa si bohou ebua?

21 Kanada. Si to’ölönia, ifaduhu’ö gödo zanguhuku wa sinangea lafili ira satua dalu-dalu si sökhi ba ndraonora. Itaria, ihalö gangetula gödo zanguhuku wa iraono si lö ibönö döfi si no atua fangera-ngera, moguna mu’osinangegö gangetula nihalöra. Simane da’ö zalua khö April Cadoreth. Me 14 fakhe ndröfinia, la’ohe ia ba ruma saki börö perdarahan sabölö-bölö. Hauga waŵa fatua lö mofökhö ia, no ihenaigö ifo’ösi Kartu Keterangan Medis, sangombakha wa tebai labe’e khönia transfusi darah hewa’ae arakhagö mate ia. Doto samareso ya’ia lö i’osinangegö gangetula April ba iforege wame’e fareta ba gödo zanguhuku ena’ö labe’e ndro. Lafaso wame’e khönia tölu  katonga sel darah merah. Ba gafuriata, ifaomagö da’a April famaso ba wamalua fohorö.

22 Möi April hegöi satuania ba gödo zanguhuku. Me no numalö zi dua fakhe, la’ohe farakaro da’a föna Mahkamah Agung Kanada. Hewa’ae kala April ba woda’awaini huku, ibu’a gefe farakaronia Mahkamah ba ihalö gangetula wa möna ia hegöi iraono tanö bö’ö si lö ibönö döfi, somasi mangai angetula ba wofili dalu-dalu mbotora samösa. Imane Mahkamah, ”Sanandrösa ba dalu-dalu, iraono si bohou ebua si lö ikhamö 16 fakhe, moguna latehegö khöra ba wanutunö hadia zomasi ira börö da’a zangoroma’ö wa mosatua ira ba wangera-ngerara.”

23 Moguna sibai farakaro da’a börö me ifaduhu’ö Mahkamah Agung hak konstitusional ndraono si lö ikhamö döfi, si no mufotöi atua wangera-ngera. Me mböröta, tola itatugöi gödo zanguhuku ba Kanada hadia dalu-dalu nibe’e ba ndraono si lö ikhamö 16 fakhe, asala ba zi sökhi. Hiza’i, börö gangetula da’ö, tebai itatugöi gödo zanguhuku  sa’ae gofu hadia dalu-dalu si fatimba ba zomasi dödö ndraono si lö ikhamö 16 fakhe. Siföföna, moguna labe’e ginötö ba ndraono andrö ena’ö tola laforoma’ö wa no atua wangera-ngerara ba wangai angetula.

”Omuso dödögu me u’ila wa so ma’ifu zi no ufalua ba wamolakhömi töi Lowalangi hegöi ba wangoroma’ö wa sofaya Zatana”

24 Hadia zaya-zaya gölö zi no laforege andrö ba zi tölu fakhe? Molo’ö April, ”Lö’ö!” Iada’a, imane perintis biasa si lö mofökhö andrö sa’ae, ”Omuso dödögu me u’ila wa so ma’ifu zi no ufalua ba wamolakhömi töi Lowalangi hegöi ba wangoroma’ö wa sofaya Zatana.” Si no alua khö April andre zangoroma’ö wa lö fa’ata’u ba ndraono si bohou ebua ba wotatugöi angetulara, laforoma’ö wa ono Mbanua Lowalangi si lö faröi ira.—Mat. 21:16.

Fangebua’ö Iraono Molo’ö Goi-Goi Yehowa

25, 26. Hadia manö zi tola alua na fabali zi no mangowalu?

25 Ibe’e Yehowa noro dödö zatua ba wangebua’ö iraonora molo’ö goi-goinia. (V Moz. 6:6-8; Ef. 6:4) Abua halöwö da’ö, ba tola manö abölö abua nasa na no fabali zatua. Tola manö fabö’ö lala wangebua’öra iraono. Duma-dumania, satua si no tobali Samaduhu’ö omasi ira wangebua’ö iraono molo’ö goi-goi niha Keriso, hiza’i tola manö lö fao dödö zatua si tenga Samaduhu’ö. Tatu manö, moguna aboto ba dödö zatua si no tobali Samaduhu’ö wa lö tebulö gamakhaita zatua ba ndraono, hewa’ae no fabali zatuara.

26 Te i’andrö satua si tenga Samaduhu’ö ba gödo zanguhuku ba wangebua’ö ononia samösa mazui fefu, ena’ö ifili ama mazui ina hewisa wangebua’ö ya’ira molo’ö agamania. So zanguma’ö wa mosikho na mu’ebua’ö ndraono tobali Samaduhu’ö Yehowa. Tola manö lamane wa lö la’owasaini iraono mbaŵa wa’atumbura, ngaluo sebua ba, na so zi göna ira ba zi lö mudöna-döna, tebai mube’e transfusi darah si tola ”mangorifi ya’ira”. Ta’andrö saohagölö me oya gödo zanguhuku so’angeraigö hadia zabölö sökhi ba ndraono moroi na ilau rörönia ba wamadöni hadia atulö agama zatua andrö mazui lö’ö. Datafaigi duma-dumania.

27, 28. Hewisa Pengadilan Tinggi Ohio me so wangadu, möi fama’ala ndraono na Samaduhu’ö Yehowa zangebua’ö ya’ira?

27 Amerika Serikat. Me 1992, so farakaro nifareso Pengadilan Tinggi Ohio. So samösa nama si tenga Samaduhu’ö sanguma’ö wa mosikho na la’ebua’ö nononia ono matua si bohou ebua tobali Samaduhu’ö Yehowa. Fao dödö pengadilan rendah ba itehegö khönia ba wangebua’ö ononia. Inania, Jennifer Pater, latehegö khönia wamaigi ononia, hiza’i tebai ”ifaha’ö mazui ifatunö hadia nifaduhusi tödö Zamaduhu’ö Yehowa gofu hewisa ia”. Ebua geluaha fareta pengadilan rendah andre, tola manö tawa’ö tebai fahuhuo dalifusöda Pater khö nononia, Bobby, sanandrösa ba Zura Ni’amoni’ö mazui goi-goinia! Hadia tola ökhalaigö dödö  Jennifer? Afatö sibai dödönia, hiza’i ihöna khönia wa’ebolo dödö ba ibaloi hawara ginötö nitehegö Yehowa. Itörö tödönia, ”Lö irai faröi khögu Yehowa.” Naik banding pengacarania ba Pengadilan Tinggi Ohio, ba itolo ira organisasi Yehowa.

28 Lö fao dödö gödo zanguhuku ba gangetula nihalö pengadilan rendah, imane wa ”sinangea zatua na ifaha’ö ndraononia ba i’ombakha’ö khöra gamuata si sökhi hegöi agamara”. Imane pengadilan, awena tebai na famaha’ö moroi khö Zamaduhu’ö Yehowa andrö möi famakiko mboto hegöi fangera-ngera ndraono. Tebai itaha hak zatua gödo zanguhuku ha börö agama. Lö hadöi tandra nisöndra gödo zanguhuku wa famaha’ö agama Zamaduhu’ö Yehowa möi famakiko mboto hegöi fangera-ngera ndraono.

Oya gödo zanguhuku sanehegö ba zatua si no tobali niha Keriso ba wangebua’ö iraonora

29-31. Taya hak dalifusöda ira alawe ba Denmark ba wangebua’ö ononia alawe. Hadia mbörö ba hadia gangetula Mahkamah Agung Denmark ba zalua andre?

29 Denmark. Simanö göi zalua khö Anita Hansen. Ira matua si no irai tobali fo’omonia, i’andrö ba gödo zanguhuku ena’ö ya’ia zangebua’ö ononia Amanda si fitu fakhe. Hewa’ae no itehegö me döfi 2000 pengadilan distrik khö dalifusöda Hansen ba wangebua’ö ononia, naik banding nama Amanda ba pengadilan tinggi, si lö mamaduhu’ö angetula pengadilan distrik ba itehegö khönia wangebua’ö ononia. Imane pengadilan tinggi, börö me fabö’ö wangera-ngera  zatua Amanda ba goi-goi sanandrösa ba wa’auri molo’ö nifaduhusira tödö ba agama, amania zinangea mangebua’ö ya’ia. Börö da’ö, taya hak dalifusöda Hansen ba wangebua’ö ononia börö me Samaduhu’ö Yehowa ia!

30 Abu sibai dödö dalifusöda Hansen ba zalua andre irege lö i’ila hadia ni’angandröinia. Imane, ”Hiza’i, terara dödögu ba niwa’ö Roma 8:26 ba 27. Urasoi wa aboto ba dödö Yehowa nösi dödögu. Ifaigi-faigi ndra’o ba lö iröido.”—Baso Zinunö 32:8; Yesaya 41:10.

31 Naik banding dalifusöda Hansen ba Mahkamah Agung Denmark. Imane Mahkamah me i’ombakha’ö gangetulania, ”Fanofu sanandrösa haniha zinangea mangebua’ö iraono, mu’etu’ö molo’ö famareso satulö ba sabölö sökhi ba ndraono.” Aefa da’ö, imane Mahkamah andrö wa angetula haniha zinangea mangebua’ö iraono te’odane-dane khö zatua ba wangasiwai abula dödö, tenga molo’ö ”famaha’ö ba fa’aro dödö” Zamaduhu’ö Yehowa. Omuso sibai dödö dalifusöda Hansen me ifaduhu’ö Mahkamah wa sinangea na ya’ia zangebua’ö Amanda, ba mangawuli khönia hak ba wangebua’ö ononia.

32. Hewisa Mahkamah Eropa untuk Hak Asasi Manusia wolumö’ö satua Samaduhu’ö moroi ba diskriminasi?

32 Ngawalö soi ba Eropa. Ba zi hauga farakaro, amadöniwa huku sanandrösa ba wangebua’ö iraono mu’ohe ba pengadilan-pengadilan tertinggi nasional. Ihaogö ifatimbaisi da’a Mahkamah Eropa untuk Hak Asasi Manusia (ECHR). Ba zi dombua farakaro, ifaduhu’ö ECHR wa fabö’ö dödö pengadilan-pengadilan rendah tingkat nasional khö zatua si no tobali Samaduhu’ö hegöi si lö’ö, ha börö me fabö’ö agamara. Ifotöi da’ö ECHR diskriminasi, ba ihalö gangetula wa ”tebai so wamaehusi ha börö agama”. Omuso dödö zi samösa ina si no tobali Samaduhu’ö ba gangetula ECHR andrö ba imane, ”Afökhö sibai na lafobahulu ndra’o wama’ala iraono, hewa’ae no ube’e khöra zabölö sökhi, u’ebua’ö ira molo’ö lala niha Keriso.”

33. Hewisa zatua Samaduhu’ö wamalua goi-goi ba Filifi 4:5?

33 Tatu manö, ebolo dödö ndra satua Samaduhu’ö hewa’ae so wanaisi moroi ba huku ba hak wananögö goi-goi Zura Ni’amoni’ö ba dödö ndraonora. (Baso Filipi 4:5.) Börö me la’andrö saohagölö hak si no tebe’e khöra ba wamaha’ö iraono molo’ö lala Lowalangi, lafaduhu’ö göi wa mo’ömö nama mazui ina ba wondrorogö iraono hewa’ae tenga Samaduhu’ö ia, na omasi ia. Hawa’ebua noro dödö zatua Samaduhu’ö ba wamaha’ö iraono?

34. Hewisa zatua ba mbanua niha Keriso iada’a, tola lahalö khöra wamaha’ö moroi ba duma-duma niha Yehuda ba götö Nehemia?

34 So duma-duma si sökhi ba götö Nehemia. La’odödögö niha Yehuda ba wangehaogö hegöi ba wanga’azökhi mangawuli göli Yeruzalema. Aboto ba dödöra, na lafalua da’ö, tola telumö’ö ira hegöi ösi nomora ba nudu ba zi fasui ya’ira.  Börö da’ö, i’o’ou ira Nehemia, ”Milau fasöndra, ba wangorifi talifusömi ba iraonomi, matua ba alawe, ba fo’omomi; ba omomi.” (Neh. 4:14) Ba niha Yehuda, tenga zaya-zaya gölö wasöndratara andrö. Simane da’ö göi ba ginötö andre, la’odödögö ira satua Samaduhu’ö ba wangebua’ö iraonora ba zindruhu. Aboto ba dödöra wa lö aetu so wondrönisi si lö baga ba ndraonora moroi ba zekola hegöi ba zi fahatö khöra. Tola manö tedönisi dödö ndraono ba media si so ba nomo. Ya’ami satua, böi olifu ami wa tenga zaya-zaya gölö zi no miforege ba wasöndrata, ba wanga’asogö nahia si lö famakiko ba ndraonomi ena’ö tedou ira ba wamati.

Yafaduhu Dödöu Wanolo Nibe’e Yehowa ba Wamosumange Satulö

35, 36. Hadia manö mbuania ba gafuriata khö ndra Samaduhu’ö Yehowa me no la’odödögö wolohi hak hukum, ba hadia gohitö dödöu?

35 Ifahowu’ö halöwö ni’odödögö organisasinia Yehowa ba ginötö andre ena’ö lö lasaisi ira ba wamosumange ya’ia. Me lafalua da’ö ono mbanua Lowalangi, asese labe’e wamaduhu’ö si sökhi ba gödo zanguhuku hegöi föna niha sato. (Rom. 1:8) Bua tanö bö’ö ba wa’amönara ba huku ya’ia da’ö no la’a’aro’ö hak-hak sipil niha si tenga Samaduhu’ö. Hiza’i, ya’ita ono mbanua Lowalangi tenga reformis sosial; lö göi ta’osatulö ita. Siföföna, ira Samaduhu’ö Yehowa laforege ena’ö so khöra hak ba gödo zanghuku ena’ö tefaduhu’ö ba tedou wamosumange satulö.—Baso Filifi 1:7.

36 Böi ta’aohasi ba dödö wamaha’ö sanandrösa ba wamati nihalöda ba niha si no mamorege ena’ö lö taha-tahada ba wamosumange Yehowa! Böi faröi ita göi, yafaduhu dödöda wa lö aetu ituhini halöwöda Yehowa ba ibe’e wa’abölö ba wamalua ohitö dödönia.—Yes. 54:17.