Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Mamatörö Mbanua Lowalangi!

 FAZA 13

La’ohe Farakarora Ira Sanuriaigö Föna Zanguhuku

La’ohe Farakarora Ira Sanuriaigö Föna Zanguhuku

TUHO FAZA DA’A

Simane nifa’ele’ö Yesu, so wolohi si göna ono mbanuania börö halöwö fanuriaigö nifaluara

1, 2. (a) Hadia zi no a’ozu lafalua ira sondrönia’ö ba agama sanandrösa ba halöwö fanuriaigö, ba hewisa dödö ndra sinenge? (b) Hana wa lö la’o’ö ira sinenge me lö latehegö khöra wanuriaigö?

ALUA da’a lö ara me no awai Wendrakose 33 M, hauga migu me no tefasindro mbanua niha Keriso ba Yeruzalema. Tatu manö, ba wamaigi Zatana, da’a ginötö si sökhi ba wamakiko banua niha Keriso fatua lö aro wamatira. I’alui lala ba wa’alio Satana ena’ö lö latehegö halöwö fanuriaigö Mbanua Lowalangi ira sondrönia’ö ba agama. Hiza’i, lö ata’u ndra sinenge ba wanuriaigö, ba ato ndra matua hegöi ira alawe si tobali ”samati khö Zo’aya”.​—Hal. 4:18, 33; 5:14.

Omuso dödö ndra sinenge ”me no tetehe khöra, la’o’aya ira, börö döi andrö”

2 Mofönu sibai nudu, lafuli lasuwö fefu zinenge—labe’e ira ba gurunga. Hiza’i, ibokai mbawandruhö gurunga mala’ika Yehowa ba zi bongi, ba mahemolu sihulö wonginia ifuli manuriaigö ira! Lafuli lataha ira zui ba la’ohe föna ndra samatörö, lafobahulu ira wa no lasawö gangetula ena’ö lö möi manuriaigö. Lö fa’ata’u khö ndra sinenge ba wanguma’ö, ”Ni’o’ö khö Lowalangi, moroi ba wolo’öda ba niha.” Aukhu dödö ndra samatörö ba mamagölö ira ba ”wamunu” ira sinenge. Hiza’i, ba ginötö sata’u ita andrö, mohede Gamalieli, samaha’ö ba Goroisa, nifosumange niha. Imane, ”Mi’angelama . . . Miböhöli niha andrö, ba böi mitegu ira.” Lö mudöna-döna, lafondro-ndrongo wehedenia ira samatörö ba la’efasi ndra sinenge. Hadia nifalua ndra matua si lö faröi andre? Lö khöra fa’ata’u ba ”lö labato wamahaö ba fangombakha Yesu Keriso”.​—Hal. 5:17-21, 27-42; Gamd. 21:1, 30.

3, 4. (a) Hadia dandrawa ni’oguna’ö Zatana ba wanuwö ono mbanua Lowalangi? (b) Hadia nifatunöda ba faza da’a hegöi si dombua faza ganetenia?

3 Me te’ohe ira föna zanguhuku 33 M, da’ö wolohi si oföna alua ba mbanua niha Keriso moroi khö ndra samatörö, ba lö tebato ndrege da’ö. (Hal. 4:5-8; 16:20; 17:6, 7) Ba ginötö andre, lö iböhöli Satana wamarou tödö niha si fatuwu ba wamosumange satulö wangaukhuni tödö ndra samatörö, ena’ö lö latehegö halöwö fanuriaigö. Laböbögö zi lö duhu ba nono mbanua Lowalangi, lamane wa no tafawukaisi mbanua—tuka kaliru. Lafotöi ita göi samawe’e;  sogale—samawa gama-gama. Ba ginötö si tefaudu, möi ndra talifusöda khö ndra sanguhuku ba wamaduhu’ö wa fasala niböbögö khöra. Hadia mbuania? Hewisa lua-luania khöu iada’a gangetula ndra sanguhuku ba zi hauga wulu fakhe si lalö? Datafaigi ösa zi no irai alua ni’ohe föna ndra sanguhuku, ena’ö ta’ila hewisa ’wamaduhu’ö turia somuso dödö, ba ba wanga’aro’ö ya’ia molo’ö huku’.​—Fil. 1:7.

4 Ba faza da’a, tafaigi hewisa wamaduhu’öda wa sinangea tetehegö khöda manuriaigö. Ba zi dombua faza aefa da’a, tafareso hewisa wasuwötada ba huku ena’ö oroma wa tenga moroi ba gulidanö ita ba ta’o’ö goi-goi Mbanua Lowalangi ba wa’aurida.

Tuka Kaliru mazui Sango’awögö Banua Lowalangi si Lö Faröi?

5. Ba gangohorita ndröfi 1930-an, hana wa lataha ndra sanuriaigö Banua Lowalangi, ba hadia nifatimbaisi ndra talifusöda sondrönia’ö?

5 Ba gangohorita ndröfi 1930-an, kota hegöi negara bagian ba Amerika Serikat lafaso ndra Samaduhu’ö Yehowa ena’ö lafazökhi khöra sura izi wanuriaigö. Hiza’i, lö la’o’ö da’ö ira talifusöda. Tola manö labulö’ö izi da’ö, ba faduhu dödöra lö hadöi kuaso khö ndra samatörö ba wanaisi fareta Yesu ba niha Keriso ba wanuriaigö Banua Lowalangi. (Mrk. 13:10) Lua-luania, ngaotu zanuriaigö nitaha. Börö da’ö, la’ohe farakaro da’a föna zanguhuku ira sondrönia’ö ba organisasi. Laforoma’ö wa lö tefaudu gangetula nihalö Soi da’ö khö ndra Samaduhu’ö, ba wamosumangera Lowalangi. Ba, me 1938, so zalua si tebai la’aohasi ba dödö. Hadia da’ö?

6, 7. Hadia zalua ba nösi nomo Cantwell?

6 Me sihulö wongi Salasa, 26 mbaŵa si Öfa 1938, möi manuriaigö Newton Cantwell, döfinia 60 fakhe; fo’omonia, Esther; ba onora ono matua Henry, Russell, hegöi Jesse, ya’ira si dalima andre no tobali perintis istimewa ba ma’ö-ma’ökhö manuriaigö ira ba kota New Haven, Connecticut. Sindruhunia, no lafa’anö ena’ö tenga ha sahari manuriaigö ira. Hadia mbörö? No hauga kali lataha ira, ba la’ila wa tola ifuli zui lataha ira. Hiza’i, lö awuwu nösi nomo Cantwell ba wanuriaigö. Dua rozi la’ohe moto, ofeta ba New Haven. I’ohe Newton moto si no mufo’ösi lektur Zura Ni’amoni’ö hegöi fonograf jinjing. Henry si 22 fakhe, i’ohe moto si so fangebua li. Simane si no latahö, ha ba zi hauga za itaha ira folisi.

7 Si oföna lataha Russell, 18 fakhe ndröfinia, awena Newton ba Esther. Jesse, 16 fakhe ndröfinia, i’ila ba zaröu me lataha ira folisi zatuania ba ga’ania. Hatö Jesse, börö me fabö’ö nahia wanuriaigö Henry ba kota da’ö. Hewa’ae simanö, ihalö fonografnia ba lö ibato wanuriaigö. So darua  ndra matua Katolik sanehegö khö Jesse wamuta rekaman huhuo dalifusöda Rutherford, tuhonia Enemies. Hiza’i, mofönu ira me no larongo huhuo da’ö ba edöna labözi Jesse. Ihaogö-haogö wofanö Jesse ba da’ö, hiza’i lö ara, lataha ia ira folisi. Fo’omo Cantwell lö lahuku, ha Cantwell faoma iraononia. Hewa’ae simanö, la’efasi ira ma’ökhö da’ö börö me labe’e gefe si tobali fangaro dödö ndra folisi.

8. Hadia mbörö wa lawa’ö ira sanguhuku sala Jesse Cantwell ba tuka kaliru?

8 Hauga waŵa aefa da’ö, me baŵa si Siwa 1938, möi nösi nomo Cantwell ba gödo zanguhuku ba New Haven. La’etu’ö wa sala Newton, Russell, hegöi Jesse börö me la’andrö-andrö gefe si lö nitehegö khöra. Hewa’ae naik banding ira ba Pengadilan Tinggi Connecticut, lasalaikö Jesse börö me ifawukaisi mbanua—tobali ia tuka kaliru. Hadia mbörö? Möi darua ndra matua Katolik ba gödo zanguhuku ba wame’e famaduhu’ö, latutunö wa te’ailasi agamara ba rekaman huhuo nirongora irege aukhu dödöra. Ira talifusöda sangai halöwö ba organisasi, naik banding ba Mahkamah Agung AS—gödo zanguhuku samatörö sebua ba soi da’ö.

9, 10. (a) Hadia gangetula nihalö Mahkamah Agung AS ba nösi nomo Cantwell? (b) Hadia gunania khöda?

9 I’otarai 29 mbaŵa si Tölu 1940, Hakim Ketua Charles E. Hughes ba dawalu hakim anggota, lafondro-ndrongo wehede nifa’ema dalifusöda Hayden Covington,  samösa pengacara Zamaduhu’ö Yehowa. * Me ifa’ema wehedenia jaksa negara bagian Connecticut ba wangoroma’ö wa tuka kaliru Zamaduhu’ö Yehowa, samösa hakim sanofu, ”Hadia tenga simane da’ö göi Yesu, ifa’ema duria si lö omasi niha me luo da’ö?” Itema linia jaksa, ”Atulö, ba na lö salado, no isura göi Sura Ni’amoni’ö hadia lua-lua nitaögö Yesu me i’ombakha’ö duria simane da’ö.” Da’a no sambua fehede si tokea ita! Ba zi lö mudöna-döna, jaksa andrö ifaomagö Zamaduhu’ö Yehowa simane Yesu, ba soi andrö simane niha sanandrawaisi Yesu. Me 20 mbaŵa si Lima 1940, ihalö gangetula Mahkamah wa möna ndra Samaduhu’ö.

Hayden Covington (tanö föna, ba dalu), Glen How (kabera), ba tanö bö’önia, kalua ira moroi ba gödo zanguhuku me no möna ira ba huku

10 Hana wa moguna gangetula Mahkamah andrö? Ebua geluahania na lö taha-tahada ba wamosumange Yehowa. Negara federal, negara bagian, mazui samatörö ba mbanuada lö si tola manaha ya’ita ba wofili agama. I’ila göi Mahkamah da’ö wa nifalua Jesse ”lö . . . tobali ameta’uö ba wa’atulö hegöi fa’ahono dödö niha sato”. Börö da’ö, ifaduhu’ö wa tenga tuka kaliru ndra Samaduhu’ö Yehowa. Sindruhu-ndruhu wa no möna genoni Lowalangi! Hadia gunania khöda? Imane samösa Samaduhu’ö si no tobali pengacara, ”Me no latehegö khöda wamosumange Yehowa, lö fa’ata’uda, ya’ita si tobali Samaduhu’ö ba ginötö andre tola tafa’ema duria si sökhi ba niha bö’ö ba mbanua si toroi ya’ita.”

Samawe’e mazui Sanuriaigö Sindruhu?

Fa’afatuwu Quebec khö Lowalangi hegöi Keriso ba Falömanaisi No Fangaila ba zi Sagörö Kanada

11. Hadia kampanye nifalua ndra talifusöda ba Kanada, ba hadia mbörö?

11 Me 1940-an, göna folohi Zamaduhu’ö Yehowa ba Kanada. Andrö, me 1946, lafalua kampanye ira talifusöda 16 hari ba wame’e risalah ”Quebec’s Burning Hate for God and Christ and Freedom Is the Shame of All Canada” (Fa’afatuwu Quebec khö Lowalangi hegöi Keriso ba Falömanaisi No Fangaila ba zi Sagörö Kanada) ena’ö la’ila wa no isaisi niha Soi andrö ba wamosumange Lowalangi. Risalah si öfa nga’örö zanutunö fa’akaliru nidönia’ö klerus, folisi si lö fa’ahakhö dödö, ba fasosota niha sato ba provinsi Quebec. Imane risalah da’ö, ”Lö aetu lataha Zamaduhu’ö Yehowa ba zomasi-masi dödöra. So mato 800 zi lö duhu niböbögö khöra ba Greater Montreal.”

12. (a) Hewisa dödö nudu ba kampanye risalah andrö? (b) Hadia niböbögö khö ndra talifusöda? (Faigi nisura ba gahe zura.)

12 Perdana Menteri Quebec Maurice Duplessis, si falulu fohalöwö khö Kardinal Katolik Roma Villeneuve, aukhu dödönia ba risalah da’ö irege ”lö khönia fa’ahakhö dödö ba wanuwö” ira Samaduhu’ö. Izumaigö tedou wamobahulu niböbögöra, 800 tobali 1.600. Imane talifusöda ira alawe perintis, ”Asese latahaga ira folisi irege lö ma’ila ma’erai no hauga kali sa’ae.” Na la’ila so ndra Samaduhu’ö zame’e risalah, lafobahulu ira wa no lafalua zi lö sökhi, mama’ema ”fehede si tesura ba wamawe’e niha”. *

13. Haniha zi oföna lafobahulu wa no lafawe’e niha, ba hadia gangetula nihalö zanguhuku?

 13 Me 1947, talifusöda Aimé Boucher hegöi ononia alawe Gisèle, si 18 fakhe, ba Lucille, 11 fakhe, ya’ira zi oföna lafobahulu tobali samawe’e. Labe’e risalah ”Fa’afatuwu Quebec” ahatö ba kabura ba hili tanö raya Quebec City. Abua khöda wokhalaigö wa ya’ira andrö tuka kaliru sanawö huku. Talifusöda Boucher tenga niha sofönu-fönu, so khönia wangide-ngide’ö. Mohalöwö ia ba kabura side-ide ba fasasakali möi ia ba kota, itörö gureta kudo. Hiza’i, lö sökhi nifalua ba nösi nomonia simane nitutunö risalah andrö. Hakim ba gödo zanguhuku si fatuwu khö ndra Samaduhu’ö, lö faduhu dödönia wa lö fasala nösi nomo Boucher. Fao dödönia ba niwa’ö jaksa wa ato zi fatuwu ba risalah da’ö, andrö wa la’etu’ö fasala nösi nomo Boucher. Molo’ö hakim: No sambua amuata si lö sökhi na mufa’ema zindruhu! Aimé ba Gisèle fasala ba wamaigira börö me lafa’ema wehede si tesura ba wamawe’e niha, ba lakuru göi Lucille hewa’ae no ide-ide ndröfinia. Naik banding ndra talifusöda ba Mahkamah Agung Kanada sebua ba soi da’ö, ba fao dödönia wamareso farakaro da’a.

14. Hewisa ndra talifusöda ba Quebec wanaögö famakao?

14 Gasa-gasa da’ö, laturiaigö Mbanua Lowalangi ira talifusöda si lö fa’ata’u ba Quebec hewa’ae göna ira folohi—asese ahöli-höli dödöda ba mbuania. Barö zi öfa fakhe me no mufalua kampanye risalah andrö me 1946, tedou wa’ato ndra Samaduhu’ö ba Quebec, i’otarai 300 tobali 1.000! *

15, 16. (a) Hadia gangetula nihalö Mahkamah Agung Kanada ba nösi nomo Boucher? (b) Hadia lua-luania khö ndra talifusöda hegöi ba danö bö’ö me no möna ira?

15 Me baŵa si Önö 1950, dasiwa hakim si farahu ba Mahkamah Agung Kanada zamareso farakaro Aimé Boucher. Önö waŵa aefa da’ö, me 18 mbaŵa si Felendrua 1950, ihalö gangetula Mahkamah wa möna ita. Hadia mbörö? Itutunö talifusöda Glen How, samösa pengacara Samaduhu’ö, fao dödö Mahkamah ba mbua gera-era sango’awögö wa ”famawe’e” eluahania manga’asogö fa’udusa mazui molawa samatörö. Risalah andrö ”lö ifawe’e niha ba tola mufotöi ia lö aiwö ba wahuhuosa si lö manawö huku”. Imane nasa How, ”U’ila samösa wa Yehowa zame’e fa’amöna andre.” *

16 Sindruhu wa angetula Mahkamah Agung da’ö no sambua fa’amöna ba Mbanua Lowalangi. Aheta sa’ae farakaro tanö bö’ö si 122 samobahulu ira Samaduhu’ö wa lafawe’e niha ba Quebec. Baero da’ö, mutehegö ba nono mbanua Kanada hegöi Persemakmuran ba wama’ema abula dödöra ba lagu ndra samatörö. Lö hadöi göi sa’ae lua-lua wolohi nidönia’ö Gereja hegöi Soi ba Quebec börö me no möna ndra Samaduhu’ö Yehowa. *

 Saniaga mazui Sanuriaigö Banua Lowalangi Sowölö-ölö?

17. Hewisa ösa ndra samatörö wangalui lala ena’ö latatugöi halöwö fanuriaigö?

17 Simane niha Keriso me föna, ono mbanua Yehowa ba ginötö andre tenga ’saniaga taromali Lowalangi’. (Baso II Korindro 2:17.) Hiza’i, so ösa zamatörö sangehaogö undang-undang waniaga sanandrösa ba halöwö fanuriaigö nifaluada. Datafaigi farakaro nifadöni hadia saniaga ndra Samaduhu’ö Yehowa ma enoni.

18, 19. Hewisa ndra samatörö ba Denmark wangalui lala ena’ö lö latehegö halöwö fanuriaigö?

18 Denmark. Me 1 mbaŵa si Fulu 1932, lafazökhi undang-undang si lö manehegö fogale buku na lö sura izi. Hiza’i, lö lafazökhi zura da’ö ira talifusöda. Mahemolunia, dalima zanuriaigö ba ma’ö-ma’ökhö manuriaigö ira ba Roskilde mato 30 kilometer tanö ba gaekhula kota Kopenhagen. Ba zi tanö owinia, lö tohare-hare samösa zanuriaigö sotöi August Lehmann. No lataha ia börö me lö khönia sura izi wamawa.

19 Me 19 mbaŵa si Felendrua 1932, lasidang August Lehmann. Ifaduhu’ö wa möi ia mamalukhaisi niha ba wame’e lektur Zura Ni’amoni’ö, tenga ba waniaga. Fao dödö zanguhuku khönia ba imane, ”Nifobahulu . . . tola ibalazoi samösa ia, lö mangai hare [ia] ba lö göi tödönia wamalua da’ö, sindruhunia ahori gefenia wamalua halöwönia andrö.” Fa’awö gödo zanguhuku khö Zamaduhu’ö ba imane wa halöwö nifalua Lehmann tebai ”lafaomagö ba wogale”. Hiza’i, lahalö gangetula udu nono mbanua Lowalangi ba wanaisi halöwö fanuriaigö ba zi sagörö ulidanö. (Zin. 94:20) I’anemai naik banding jaksa penuntut umum ba Mahkamah Agung ba soi da’ö. Hewisa dödö ndra talifusöda?

20. Hadia gangetula nihalö Mahkamah Agung Denmark, ba hewisa dödö ndra talifusöda?

20 Samigu fatua lö ifareso farakaro da’ö Mahkamah Agung, ladou’ö halöwö fanuriaigö ira Samaduhu’ö ba zi sagörö Denmark. Me Salasa 3 mbaŵa si Fulu 1933, i’ombakha’ö gangetulania Mahkamah Agung. Fao dödö Mahkamah ba pengadilan tingkat rendah wa lö nisawö August Lehmann undang-undang. Angetula andre eluahania lö taha-taha ndra Samaduhu’ö sa’ae ba wanuriaigö. Si tobali tandra wangandrö saohagölö khö Yehowa ba wa’amöna andre, ladou’ö wanuriaigö ira talifusöda. I’otarai me ihalö gangetula da’ö Mahkamah, tola manuriaigö ndra talifusöda ba Denmark ba lö moguna itolo ira famareta.

Ira Samaduhu’ö si lö fa’ata’u ba Denmark me 1930-an

21, 22. Hadia gangetula nihalö Mahkamah Agung AS sanandrösa khö dalifusöda Murdock?

21 Amerika Serikat. Me Migu 25 mbaŵa si Dua 1940, lataha perintis sotöi Robert Murdock, Jr., ba dafitu Zamaduhu’ö tanö bö’ö me manuriaigö ira ba Jeannette, kota sahatö ba Pittsburgh, negara bagian Pennsylvania. Lahuku ira börö me lö la’öli zura izi wame’e lektur. Me naik  banding ira, fao dödö Mahkamah Agung AS wamareso farakaro da’a.

22 Me 3 mbaŵa si Lima 1943, i’ombakha’ö gangetulania Mahkamah Agung, sango’awögö ira Samaduhu’ö. Lö fao dödö Mahkamah na lafaso niha ba wangokhögö sura izi, hulö na ”latandrawaisi hak nibe’e Undang-Undang Federal”. Lö itehe Mahkamah andrö na so goi-goi simane da’ö börö me tobali ”taha-taha kemerdekaan pers ba fanaisi ba agama”. Me ifa’ema Hakim William O. Douglas wehede Mahkamah sabölö ato, imane wa halöwö ndra Samaduhu’ö Yehowa ”tenga ha fanuriaigö manö; tenga ha fame’e lektur agama. Faoma lafalua zi dombua ngawalö andre”. Imane nasa, ”Halöwö agama simane da’ö no i’iagö wetaro solakhömi . . . fagölö simane na möi ba gosali ba mama’ema huhuo moroi ba mimbar.”

23. Hana wa moguna khöda ba ginötö andre wa’amönada ba huku me 1943?

23 Angetula Mahkamah Agung da’a no fa’amöna nono mbanua Lowalangi ba huku. Ifaduhu’ö haniha ita zindruhunia—niha Keriso si tobali enoni, tenga sogale. Ba ngaluo si tebai mu’olifugö andrö me 1943, so 12 farakaro nifemöna ndra Samaduhu’ö Yehowa moroi ba zi 13 farakaro ba  Mahkamah Agung, simanö göi farakaro Murdock. Angetula da’a dane-dane saro ba warakaro tanö bö’ö, ba wanaisi nifalua nudu ba halöwö fanuriaigöda ba wama’ema turia Mbanua Lowalangi ba nahia sato niha hegöi ba nomo-omo misa.

”Ni’o’ö khö Lowalangi, moroi ba Wolo’öda ba Niha”

24. Hadia nifaluada na lö latehe ira samatörö tafalua halöwö fanuriaigö?

24 Ya’ita enoni Yehowa, ta’andrö sibai saohagölö me no latehegö khöda ira samatörö wanuriaigö Banua Lowalangi, molo’ö huku. Hiza’i, na lö latehe manuriaigö ita, ta’alui lala tanö bö’ö, ba lö tabato wamalua ya’ia, gofu hewisa lalania. Simane ira sinenge, ”ni’o’ö khö Lowalangi, moroi ba wolo’öda ba niha”. (Hal. 5:29; Mat. 28:19, 20) Möi ita göi ba gödo zanguhuku ena’ö lö lasaisi halöwöda. Datafaigi dombua duma-dumania.

25, 26. Hewisa wa tola mufa’ema gangandröwa khö Mahkamah Agung Nikaragua, ba hadia mbuania?

25 Nikaragua. Me 19 mbaŵa si Felezara 1952, möi utusan injil hegöi enoni ndraha Donovan Munsterman ba Kantor Imigrasi ba ibu kota Managua. La’o’ou ia wamalukhaisi Kafite Arnoldo García, kafalo ba gödo andrö. Ifatunö khönia kafite andrö wa fefu Zamaduhu’ö Yehowa ”tebai laturiaigö wamaha’öra hegöi famalua halöwö ba agamara”. Me isofu Donovon hadia mbörö, itutunö Kafite García wa lö nitehe menteri negara halöwö fanuriaigöra ba lafobahulu ira tobali komunis. Haniha zamobahulu ya’ita? Ira klerus Katolik Roma.

Ira talifusöda ba Nikaragua me göto wolohi

26 I’anemai naik banding Munsterman ba Kementerian Negara dan Agama hegöi khö Presiden Anastasio Somoza  García, hiza’i lö mofozu. Andrö, la’alui lala bö’ö ira talifusöda. Lö la’oguna’ö Balai Mbanua Lowalangi, lö ato ira na owulo, ba lö labe’e wamaduhu’ö ba lala, hiza’i lö labato wanuriaigö. Lafa’ohe’ö zura khö Mahkamah Agung Nikaragua, la’andrö ena’ö iheta wanaisi andrö. Fanaisi halöwöda andrö hegöi ösi zura da’ö tefa’anö ba koran-koran, ba fao dödö Mahkamah Agung wamareso farakaro da’a. Hadia mbuania? Me 19 mbaŵa si Önö 1953, i’ombakha’ö Mahkamah Agung wa möna ndra Samaduhu’ö. I’ila Mahkamah andrö, na musaisi halöwö ndra Samaduhu’ö, eluahania no musawö undang-undang sanehegö ba wama’ema bua gera-era, ba wangokhögö tödö side-ide, hegöi ba wamalua si faduhu dödö niha zamösana. Iwa’ö Mahkamah ena’ö ifuli sökhi gotalua zamatörö Nikaragua khö ndra Samaduhu’ö simane me mböröta.

27. Hana wa tokea nono mbanua Nikaragua me larongo gangetula Mahkamah, ba hewisa dödö ndra talifusöda ba wa’amöna andrö?

27 Tokea nono mbanua Nikaragua me fa’awö Mahkamah Agung khö ndra Samaduhu’ö. Si to’ölönia, ebua lakhömi zondrönia’ö ba agama irege lö omasi fatötöi Mahkamah khöra. Baero da’ö, ebua kuaso ndra samatörö irege asese fao dödö Mahkamah ba gangetula nihalöra. Faduhu dödö ndra talifusöda, wa tola möna ira börö wolumö’ö moroi khö Razora ba börö me lö labato wanuriaigö.​—Hal. 1:8.

28, 29. Ba dalu ndröfi 1980-an, hadia zalua si fabö’ö ba Zaire?

28 Zaire. Me talu ndröfi 1980-an, so mato 35.000 ndra Samaduhu’ö ba Zaire, iada’a töinia Republik Demokratik Kongo. Ena’ö tola mu’o’ö wa’atedou halöwö Mbanua Lowalangi, ifazökhi nahia si bohou gödo ndraha. Me baŵa si Felendrua 1985, mufalua kebaktian internasional ba ibu kota Kinshasa, ba so 32.000 zalahi si möi moroi ba soi bö’ö, afönu stadion kota. Hiza’i, lö ara aefa da’ö tebulö zalua ba nono mbanua Yehowa. Hadia zalua?

29 Ba Zaire me luo da’ö mangai halöwö dalifusöda Marcel Filteau, utusan injil moroi ba Quebec, Kanada, si no irai tefakao me götö wamatörö Duplessis. Itutunö hadia zalua, ”Me 12 mbaŵa si Tölu 1986, latema zura ira talifusöda sangai halöwö wa molo’ö huku, lö nitehe tefasindro gangowuloa ndra Samaduhu’ö Yehowa ba Zaire.” Iteka zura da’a presiden ba soi da’ö, Mobutu Sese Seko.

30. Hadia gangetula sabua nihalö Panitia Ndraha, ba hadia gangetula nihalöra?

30 Mahemolunia, ibe’e gangombakhata radio nasional, ”Lö sa’ae tarongo ndra Samaduhu’ö Yehowa ba [Zaire].” Lö ara, so wamakao. Lafakiko Balai-Balai Mbanua Lowalangi, larabu ndra talifusöda, lara’u, labe’e ba gurunga, ba laböbözi ira. Labe’e göi ba gurunga nono ndra Samaduhu’ö. Me 12 mbaŵa si Fulu 1988, lahalö gokhöta  organisasida, ba so Garda Sipil, la’okhögö ira saradadu properti gödo ndraha. Naik banding ndra talifusöda khö Presiden Mobutu, hiza’i lö fanema li. Me luo da’ö, ihalö gangetula sabua Panitia Ndraha, ”Naik banding khö Mahkamah Agung, mazui tabaloi?” Itörö tödö Timothy Holmes, utusan injil ba koordinator Panitia Ndraha me luo da’ö, ”Ma’andrö wa’atua-tua ba fanuturu lala khö Yehowa.” Me no mangandröga, imane panitia wa tenga inötönia wangalui femöna ba huku. Sabölö sökhi, larorogö ndra talifusöda ba la’alui lala ena’ö böi faröi ba wanuriaigö.

”Sagötö lasidang ndra’aga, ma’ila hewisa Yehowa wamulö’ö fefu hadia ia”

31, 32. Hadia gangetula sahölö-höli dödöda nihalö Mahkamah Agung Zaire, ba hadia lua-luania khö ndra talifusöda?

31 Me no hauga fakhe, alö wolohi ndra Samaduhu’ö, ba itugu la’osinangegö hak asasi manusia ba soi da’ö. Ihalö gangetula Panitia Ndraha wa inötönia naik banding ba Mahkamah Agung Zaire. Ahöli-höli dödöda, fao dödö Mahkamah Agung wamareso farakaro da’a. Me 8 mbaŵa si Sara 1993, arakhagö fitu fakhe me isaisi halöwöda presiden, ihalö gangetula Mahkamah wa sala nifalua ndra samatörö khö ndra Samaduhu’ö molo’ö huku. Börö da’ö, iheta sa’ae wanaisi. Khalaigö lua-luania! Hewa’ae tola te’ala wa’auri ndra hakim, labulö’ö gangetula presiden! Imane talifusöda Holmes, ”Sagötö lasidang ndra’aga, ma’ila hewisa Yehowa wamulö’ö fefu hadia ia.” (Dan. 2:21) Fa’amöna andre möi fangaro wamati ndra talifusöda. Larasoi wa ibe’e wanuturu lala Razoda, Yesu, ba nono mbanuania ba la’ila hawa’ara ba hewisa na lafalua hadia ia.

Omuso dödö ndra Samaduhu’ö ba Republik Demokratik Kongo me lö lasaisi ira ba wamosumange Yehowa

 32 Me lö sa’ae lasaisi halöwöda, latehegö ba gödo ndraha wogaoni ira utusan injil, lafazökhi gödo si bohou, ba la’impor lektur Zura Ni’amoni’ö. * Omuso sibai dödö nono mbanua Yehowa ba zi sagörö ulidanö me la’ila ilumö’ö wamatira Yehowa!​—Yes. 52:10.

’Yehowa Zanolo Ya’o’

33. Hadia wamaha’ö nihalöda ba waö-waö sadogo-dogo sanandrösa ba farakaro ni’ohe föna gödo zanguhuku?

33 Si hauga ngawalö wasuwötada ba huku, da’ö zangoroma’ö wa alua nifabu’u Yesu, ”Ya’o sa zame’e dania khömi fehede ba fa’atua-tua, si tebai lalaŵa ba si tebai lafadaö dozi si fa’udu khömi.” (Baso Luka 21:12-15.) Itaria, i’oguna’ö niha simane Gamalieli Yehowa ba wolumö’ö ono mbanuania mazui ba wamarou tödö hakim hegöi pengacara ena’ö lahalö gangetula satulö. I’afuru’ö wöda niha solawa ya’ita Yehowa. (Baso Yesaya 54:17.) Fanandraigö tebai isaisi halöwö Lowalangi.

34. Hana wa ahöli-höli dödöda wa’amöna ba huku, ba hadia zoroma ba wa’amöna andrö? (Faigi kotak ” Fa’amöna ba Gödo Zanguhuku Sonönö Fanuriaigö Banua Lowalangi”.)

34 Hadia mbörö wa no sahöli-höli dödö wa’amönada ba huku? Angeraigö da’a: Ha niha si to’ölö manö ndra Samaduhu’ö Yehowa. Lö fao ita ba pemilu, kampanye politik, ba lö tahalö dödö ndra politikus. Ba wamaigi niha, ira talifusöda si möi ba gödo zanguhuku, ”niha si lö mufahaö ira, ono mbanua”. (Hal. 4:13) Na ba wa’aniha, lö omasi gödo zanguhuku wolawa niha sanaisi halöwöda, sebua kuaso ba agama hegöi ba politik, irege lafemöna ita. Hiza’i, no hauga kali ifemöna ita gödo zanguhuku! Fa’amönada ba huku zangoroma’ö wa tatörö lala ”föna Lowalangi, ba khö Keriso”. (II Kor. 2:17) Börö da’ö, fao dödöda ba niwa’ö Waulo, ’Yehowa zanolo ya’o, lö ata’u ndra’o.’​—Heb. 13:6.

^ par. 9 Farakaro da’a, Cantwell v. State of Connecticut, zi oföna moroi ba zi 43 farakaro ba Mahkamah Agung AS ni’o’awögö dalifusöda Hayden Covington. Mate ia me 1978. Lö faröi wo’omonia, Dorothy, ofeta mate ia me 2015, me 92 fakhe ndröfinia.

^ par. 12 Famobahulu andrö te’odane-dane ba undang-undang 1606. Tola iwa’ö juri wa fasala zi samösa niha na molo’ö ya’ira no i’asogö wa’udusa hewa’ae atulö niwa’ö niha da’ö.

^ par. 14 Me 1950, möi ba Quebec 164 zohalöwö safönu inötö—simanö göi 63 zi no mangawuli ba Gilead, omasi ira wanema’ö halöwö nibe’e khöra hewa’ae no idaro-darogö ira folohi.

^ par. 15 Talifusöda W. Glen How samösa penasihat hukum si lö fa’ata’u. I’otarai 1943 irugi 2003, onekhe sibai ia wolohi ena’ö möna ngaotu wasuwöta ndra Samaduhu’ö Yehowa ba huku, he ba Kanada hegöi ba soi bö’ö.

^ par. 16 Ena’ö ö’ila danö bö’ö sanandrösa ba warakaro da’a, faigi artikel ”Ini Bukan Pertempuran Kamu, tetapi Pertempuran Allah” ba Sedarlah! 22 mbaŵa si Öfa 2000, nga’örö 18-24.

^ par. 32 Hewa’ae no iröi properti ndraha Garda Sipil, lafazökhi fasilitas gödo si bohou ba nahia tanö bö’ö.