Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Mamatörö Mbanua Lowalangi!

 FAZA 17

Lafomaha Genoni Mbanua Lowalangi

Lafomaha Genoni Mbanua Lowalangi

TUHO FAZA DA’A

Sekolah-sekolah teokratis mufa’anö ba wamomaha enoni Mbanua Lowalangi ba wamalua halöwöra

1-3. Hewisa Yesu ba wamöfögö halöwö fanuriaigö ena’ö tefa’ema ba zi sagörö ulidanö, ba hadia zi tobali fanofu?

DUA fakhe manuriaigö Yesu ba Galilea. (Baso Matai’o 9:35-38.) Oya i’anöröi mbanua sebua hegöi side-ide, mamaha’ö ia ba sinagoga ba manuriaigö turia si sökhi sanandrösa ba Mbanua Lowalangi. Gofu hezo manuriaigö ia, ato zohurufai ya’ia. Imane Yesu, ”Ebolo sa mbasitö”, ba moguna ato zohalöwö.

2 Iföfögö halöwö fanuriaigö Yesu ena’ö tefa’ema misa. Lalania? Ifatenge 12 zinengenia ”ba wanuriaigö banua Lowalangi”. (Luk. 9:1, 2) Te manofu-nofu ndra nifaha’önia ba halöwö andre. Fatua lö ifatenge ira, ibe’e khöra wamomaha Yesu si fao fa’omasi simane si no itema moroi khö Namania ba zorugo.

3 Oya wanofu si tumbu ba gera-erada: Hadia wamomaha nitema Yesu khö Namania? Hadia wamomaha nibe’e Yesu khö ndra sinengenia? Ba, hewisa iada’a—hadia ifomaha niha solo’ö khönia Razo Mesia ba wanuriaigö? Na ya’ia, hewisa wamaluania?

”U’o’ö Wamaha’ö Namagu Ya’o, Da’ö Huhuogu”

4. Hamega ba hezo so itema Yesu wamaha’ö moroi khö Namania?

4 Ifaduhu’ö Yesu wa Amania zamomaha ya’ia. Me ifalua halöwö fanuriaigö imane Yesu, ”U’o’ö wamaha’ö Namagu ya’o, da’ö huhuogu.” (Yoh. 8:28) Hamega ba hezo mamomaha Yesu? Famomahania tebörögö me iwöwöi ia Lowalangi tobali Ono sia’a khönia. (Kol. 1:15) Ba zinga Namania ba zorugo, ihaogö ifondro-ndrongo Ononia ba tebai mu’erai hauga ngaotu fakhe fao ia khö ’Zamahaö ya’ia’. (Yes. 30:20) Buania, itema Ononia wamomaha si tebai takhalaigö simane amuata, halöwö, ba ohitö dödö Namania.

5. Hadia wanuturu lala nibe’e Nama khö Nononia sanandrösa ba halöwö sedöna ifalua ba gulidanö?

5 Ba ginötönia, ifomaha Yehowa Nononia sanandrösa ba halöwö fanuriaigö nifaluania ba gulidanö. Datafaigi zi no tefa’ele’ö sanandrösa ba gamakhaita Zamaha’ö khö Nononia sia’a. (Baso Yesaya 50:4, 5.) Imane ba wama’ele’ö  andrö wa isusugi Yehowa Nononia ”ero mahemolu”. Duma-duma da’ö zangombakha khöda hewisa zi samösa guru ba wanusugi iraono nifaha’önia ero sihulö wongi ba wamomaha ya’ira. Imane sambua karya referensi Zura Ni’amoni’ö, ”Yehowa . . . i’ohe nononia ba zekola hulö simane samösa ono zekola aefa da’ö ifomaha ba wanuriaigö.” Ifaha’ö ba ”zekola” Nononia Yehowa ba zorugo, ”hadia niwa’ögu, hadia wehedegu”. (Yoh. 12:49) Ibe’e Ama wanuturu lala khö Nononia sanandrösa ba wamaha’ö. * Me so Yesu ba gulidanö, tenga ha i’oguna’ö wamaha’ö nibe’e khönia ba wanuriaigö, tobali ifaha’ö göi ndra nifaha’önia ba wamalua halöwö fanuriaigöra.

6, 7. (a) Hadia wamomaha nibe’e Yesu khö ndra sinengenia, ba tefa’anö ira ba wamalua hadia? (b) Hadia wamomaha nihonogöigö Yesu ena’ö latema ira solo’ö khönia iada’a?

6 Hadia wamomaha nibe’e Yesu khö ndra sinengenia simane nitutunöda ba wamobörö? Molo’ö Matai’o faza 10, ihaogö ibe’e khöra wanuturu lala sanandrösa ba wanuriaigö, si tefarahu: manuriaigö hezo (ayati 5, 6), hadia duriania (ayati 7), moguna mu’odaligö Yehowa (ayati 9, 10), lala ba wangondrasi sokhö omo (ayati 11-13), lala na lö latema ita sokhö omo (ayati 14, 15), ba na göna ita fanandraigö (ayati 16-23). * Famomaha si no ibe’e Yesu andre khö ndra sinengenia ba wama’anö ya’ira börö me ya’ira zangagö föna ba wanuriaigö turia si sökhi me döfi siföföna M.

7 Hewisa göi ba ginötöda andre? Yesu, Razo Mbanua Lowalangi, no ibe’e halöwö sabölö moguna khö ndra nifaha’önia ya’ia da’ö ba wanuriaigö ’banua Lowalangi andrö . . . ba gulidanö misa ma’asagörö’. (Mat. 24:14) Hadia no ifaha’ö ita Razo ba wamalua halöwö sabölö moguna andre? Noa! No ihonogöi Razo moroi ba zorugö ena’ö latema ira nifaha’önia wamomaha sanandrösa ba wanuriaigö ba fao ia khö ndra talifusöda ba wamalua halöwö.

Lafomaha Ndra Enoni Tobali Sanuriaigö

8, 9. (a) Hadia gohitö dödö wa mufalua Sekolah Pelayanan Teokratis? (b) Hewisa gangowuloa barö migu möi fanolomö ena’ö onekhe ba wanuriaigö?

8 No ara i’oguna’ö organisasinia Yehowa simane kebaktian hegöi angowuloa, duma-dumania Angowuloa ba Wanuriaigö ba wamomaha ono mbanua Lowalangi ba wanuriaigö. Hewa’ae simanö, i’otarai 1940-an ira talifusöda sondrönia’ö ba gödo sebua no labörögö wamomaha andre ba ngawalö sekola.

9 Sekolah Pelayanan Teokratis. Simane ni’ilada ba faza si no tatalu’i, no tebörögö sekola da’a me 1943. Hadia ha da’ö gohitö dödö ba zekola andre me mböröta ena’ö onekhe ba wama’ema huhuo ba mbanua niha Keriso? Tenga. Ohitö dödönia ya’ia da’ö ba wamomaha ono mbanua Lowalangi ba wangoguna’ö fehedera ba wanuno Yehowa ba  wanuriaigö. (Zin. 150:6) Sekola da’a zama’anö ira talifusöda si no mamasura’ö töira tobali sanuriaigö Banua Lowalangi sowölö-ölö. Iada’a, famomaha da’ö so ba gangowuloa barö migu.

10, 11. Haniha zi tola fao ba Sekolah Gilead iada’a, ba hadia gohitö dödö kurikulumnia?

10 Sekolah Alkitab Gilead Menara Pengawal. Tebörögö me hari Sinaya, 1 mbaŵa si Dua 1943 nifotöi Sekolah Alkitab Gilead Menara Pengawal. Lafa’anö sekola andre ba wamomaha ira perintis ba enoni safönu inötö tanö bö’ö ba wamalua halöwö utusan injil ba zi sagörö ulidanö. Hiza’i, i’otarai baŵa si Fulu 2011, la’olaini haniha zi tola tesura töi ya’ia da’ö ira talifusöda perintis istimewa, satua samasui hegöi fo’omora, ösi nomo Mbetieli, ba utusan injil si lö irai fao ba sekola da’a.

11 Hadia gohitö dödö kurikulum Sekolah Gilead? Imane samösa samaha’ö si no ara, ”Ena’ö aro wamati ndraono sekola ba wamaha’ö ba Daromali Lowalangi ba sanolo ya’ira ba wangokhögö mbua-bua si sökhi ba wamati ena’ö tola lataögö wanandraigö ba halöwö nifaluara. Ohitö dödö tanö bö’ö ya’ia da’ö ena’ö tetanögö ba dödöra wa’omasi ba wamalua halöwö fanuriaigö.”​—Ef. 4:11.

12, 13. Hadia lua-luania Sekolah Gilead ba halöwö fanuriaigö ba zi sagörö ulidanö? Be’e duma-duma.

12 Hadia lua-luania Sekolah Gilead ba halöwö fanuriaigö ba zi sagörö ulidanö? Töra 8.500 niha zi no lafomaha ba zekola andre i’otarai 1943, * ba no möi utusan injil Gilead wangai halöwö ba zi töra 170 soi ba zi sagörö ulidanö. La’o’ö wamomaha si no latema ira utusan injil andre, tobali ira duma-duma sowölö-ölö ba wanuriaigö ba lafomaha göi niha bö’ö wamalua. Ya’ira zangagö föna ba wanuriaigö ba mbanua si lö ato sanuriaigö.

13 Datafaigi zalua ba Jepang. Me alua Wasuwöta Gulidanö II, tebato halöwö fanuriaigö si no lafa’anö. Me baŵa si Walu 1949, lö ikhamö dafulu zanuriaigö ba Jepang. Hiza’i, ba gangohorita ndröfi andrö, so 13 utusan injil Gilead sowölö-ölö manuriaigö ba Jepang. Itugu monönö utusan injil si möi. Ba wamobörö, la’osambua’ö halöwöra ira utusan injil andre manuriaigö ba mbanua segebua; ba gafuriata, findra ira ba mbanua bö’ö. Lafarou dödö niha nifaha’öra hegöi ira talifusöda tanö bö’ö ena’ö tobali ira perintis. Fangodödögöra andre so mbuania. Iada’a, töra 216.000 zanuriaigö Banua Lowalangi ba Jepang, ba arakhagö 40 persen ba gotaluara zi tobali perintis! *

14. Sekolah-sekolah teokratis andrö tandra hadia? (Faigi kotak ” Sekola-Sekola Famomaha Ndra Sanuriaigö Banua Lowalangi”, nga’örö 188.)

14 Sekolah teokratis tanö bö’ö. Ato ndra talifusöda si no tetolo ba Sekolah Dinas Perintis, Sekolah Alkitab bagi Pasangan Kristen, ba Sekolah Alkitab bagi Saudara Lajang ba wondrou’ö famatira ba tobali duma-duma sowölö-ölö  ba halöwö fanuriaigö. * Fefu sekolah teokratis da’a tobali tandra wa no ifa’anö ita Razoda ba wamalua halöwö fanuriaigö.​—II Tim. 4:5.

Mamomaha Ira Talifusöda ba Wamalua Halöwö

15. Hezo moguna la’o’ö Yesu ira matua sangai halöwö?

15 Törö tödöu wama’ele’ö Yesaya sanandrösa khö Yesu, nifaha’ö Yehowa. Ba ”sekola” zorugo andrö, ifaha’ö ia Ononia ’ena’ö i’ila i’okafui zerege tödö huhuonia andrö’. (Yes. 50:4) Ifalua Yesu zi no ifaha’ö ia; me so ia ba gulidanö, i’okafui dödö ”serege tödö, awö zonoro”. (Mat. 11:28-30) Ba wolo’ö khö Yesu, omasi ndra talifusöda ira matua sangai halöwö na tobali ira umbu wa’omuso dödö khö ndra talifusöda. Börö da’ö, oya ngawalö zekola si no lahenaigö khö ndra talifusöda sonekhe ena’ö tefaudu wanolora ira talifusöda.

16, 17. Hadia gohitö dödö wa mufalua Sekolah Pelayanan Kerajaan? (Faigi nisura ba gahe zura.)

16 Sekolah Pelayanan Kerajaan. Kelas si oföna ba zekola da’a tebörögö me 9 mbaŵa si Tölu 1959, ba South Lansing, New York. Lakaoni zatua samasui ba enoni ba kursus  da’a, sara waŵa wa’ara. Ba gafuriata, lafo’eluaha kursus da’a ba li bö’ö moroi ba li Inggris, ba tezara-zara wamomaha ira talifusöda ba zekola da’a ba zi sagörö ulidanö. *

Mamaha’ö dalifusöda Lloyd Barry ba Sekolah Pelayanan Kerajaan ba Jepang, 1970

17 Sanandrösa ba gohitö dödö Sekolah Pelayanan Kerajaan, imane Buku Tahunan Saksi-Saksi Yehuwa 1962 (ba li Inggris), ”Ba gulidanö safönu fa’arörö andre, samösa sondrönia’ö ba mbanua niha Keriso samaduhu’ö Yehowa ena’ö ira matua si tola mombagi inötö, si tola mangonorogö tödö ira talifusöda, ba si tobali howu-howu ba mbanua niha Keriso. Ba ginötö si fagölö, tebai i’osiwawöi nösi nomonia ha börö mbanua niha Keriso, tobali moguna so khönia wa’atua-tua. Sindruhu-ndruhu inötö si sökhi nibe’e khö ndra enoni mbanua niha Keriso ba zi sagörö ulidanö si möi ba Sekolah Pelayanan Kerajaan ena’ö lasöndra wamomaha si möi fanolora tobali sondrönia’ö si sökhi molo’ö goi-goi Zura Ni’amoni’ö!”​—I Tim. 3:1-7; Tit. 1:5-9.

18. Hadia gunania ba nono mbanua Lowalangi Sekolah Pelayanan Kerajaan?

 18 Moguna ba nono mbanua Lowalangi Sekolah Pelayanan Kerajaan. Hewisa? Na lafalua ira satua sokubaloi hegöi enoni zi no lafaha’ö ba zekola andrö, simane Yesu, tobali ira umbu wa’omuso dödö khö ndra talifusö ba wamati. Hadia ö’andrö saohagölö wehede si sökhi, me lahaogö lafondro-ndrongo, mazui me möi lafalukhaisi ndra’ugö ba wanga’aro’ö famatiu? (I Tes. 5:11) Ira talifusöda satua-tua andre tobali howu-howu ba mbanua niha Keriso!

19. Hadia manö nasa sekola nifalua Panitia Pengajaran, ba hadia gohitö dödönia?

19 Sekolah teokratis tanö bö’ö. Panitia Pengajaran moroi ba Mboto Solohe lafaigi-faigi sekola tanö bö’ö ba la’asogö wamomaha khö ndra talifusöda sangai halöwö ba organisasi. Lafa’anö sekola da’a ba wanolo ira talifusöda sangai halöwö—satua sokubaloi, satua samasui, ba anggota Panitia Ndraha—ena’ö mowua halöwö nifaluara. Kursus si te’odane-dane ba Zura Ni’amoni’ö andre zamarou tödö ndra talifusöda ena’ö larorogö wamatira ba lafalua goi-goi Zura Ni’amoni’ö ba ginötö labe’e wanolo ba nono mbiri-biri Yehowa sebua böli si no tebe’e khöra.​—I Fet. 5:1-3.

Kelas si oföna ba Sekolah Pelatihan Pelayanan nifalua ba Malawi, 2007

20. Hana wa iwa’ö Yesu fefu ita ”nifahaö Yehowa”, ba hadia gohitö dödöu?

20 Sindruhu-ndruhu wa no ihonogöigö Razo Mesia ena’ö tefaudu wamomaha ira nifaha’önia. Fefu wamomaha andre i’otarai moroi yawa numalö mitou: Yehowa zamaha’ö Ononia, ba Ono zamaha’ö niha solo’ö khönia. Andrö wa iwa’ö Yesu ya’ita fefu ”nifahaö Yehowa”. (Yoh. 6:45; Yes. 54:13) Yalötebulö tahalö wamaha’ö moroi ba wamomaha nihenaigö Razoda. Ba, moguna tatörö tödöda wa ohitö dödö si oföna ba sekola andre ya’ia da’ö fanoloda ena’ö aro wamatida ba tola tafalua halöwöda ba wanuriaigö.

^ par. 5 Hewisa wa ta’ila ifaha’ö Nononia Ama lala ba wamaha’ö? Fatimbaisi: Moroi ba gamaedola soya ni’oguna’ö Yesu ba ginötö mamaha’ö ia, itörö wama’ele’ö nisura ba zi hauga abad fatua lö tumbu ia. (Zin. 78:2; Mat. 13:34, 35) Lö zi lö ifaigi Yehowa, Sama’anö fama’ele’ö andrö, ena’ö mamaha’ö Nononia si fao duma-duma, mazui amaedola.​—II Tim. 3:16, 17.

^ par. 6 Hauga waŵa aefa da’ö, ’i’oniagö na danö bö’ö Yesu fitu ngafulu, ba ifatenge ira, daru-darua’ ba wanuriaigö. Ifomaha göi ira.​—Luk. 10:1-16.

^ par. 12 So zi no fao ba Sekolah Gilead tenga ha sakali.

^ par. 13 Ena’ö ö’ila danö bö’ö nasa hadia lua-lua me no tefataro utusan injil Gilead manuriaigö ba zi sagörö ulidanö, faigi mbuku Saksi-Saksi Yehuwa—Pemberita Kerajaan Allah, faza 23.

^ par. 14 Dombua sekola si no mutötöi safuria no lagati döinia tobali Sekolah bagi Penginjil Kerajaan.

^ par. 16 Iada’a fefu zatua sokubaloi lasöndra wamaha’ö ba Sekolah Pelayanan Kerajaan, fabö’ö-bö’ö wa’ara wamalua ya’ia ero hauga fakhe. I’otarai 1984, latema göi ira enoni wamaha’ö ba zekola da’a.