Xuiya kampa tlen onka ijtik

¿Tleka iteixpantijkauan Jehová xyauej ipan guerra?

¿Tleka iteixpantijkauan Jehová xyauej ipan guerra?

Iteixpantijkauan Jehová xtiauej ipan guerra pampa:

  1. Tiktlakamatij toTajtsin. Biblia okijto ika itekipanojkauan toTajtsin xtemiktiskej niman xnomachtiskiaj kenon tlaixnamikiskej ipan guerra (Isaías 2:4).

  2. Tiktlakamatij Jesús. Jesús okinauati Pedro: “Xkejeua moespada kampa otikxikopin, pampa nochimej yejuan temiktiaj ikan espada, no yejua ika mikiskej” (Mateo 26:52). Jesús kuajli okimijli inomachtijkauan ika maka makitekitiltikan itlaj tlen ika temiktiskej.

    Jesús noijki okijto ika inomachtijkauan “xnouikaj ken on tlaltikpaktlakamej”. Ika yejon, xkipiya ika nokalaktiskej nion achijtsin ipan política (Juan 17:16). Noijki xkipiya ika kixnamikiskej tlen soldados kichiuaj nion xkinyoleuaskej oksekimej maka manochiuakan soldados.

  3. Akin kichiuaj ken Cristo noneki tetlasojtlaskej. Jesús okinnauati inomachtijkauan: “Xmotlajsojtlakan semej iuan oksekimej” (Juan 13:34, 35). Akin kichiuaj ken Cristo kuajli nouikaj imiuan imikniuan akin nemij ipan nochiuiyan tlaltikpaktli niman xkeman kimixnamikiskej imikniuan (1 Juan 3:10-12).

  4. Akin kachtopa okichiujkej ken Cristo xoyajkej ipan guerra. Ipan se enciclopedia kijtoua ika “akin kachtopa okichiujkej ken Cristo xtlapaleuiayaj ipan guerras nion xtlapaleuiayaj itech tlen soldados kichiuayaj”, pampa kimatstoyaj ika tla kichiuaskiaj “xkiteititiskiaj tlasojtlalistli tlen Jesús otemachti niman xkitlakamatstoskiaj ika noneki kintlasojtlaskej intlauelikniuan” (Encyclopedia of Religion and War). Edward Gibbon se tlakatl akin ualeua Gran Bretaña, ipan iamox Historia de la decadencia y caída del Imperio romano okijkuilo yejuin: “Xkeman nochiuaskiaj soldados akin okichiujkej ken Cristo [...] pampa kachtopa kitlakamatiyaj intekiyo tlen ualeua itech toTajtsin”.

Titlapaleuiyaj kampa tichantij

Iteixpantijkauan Jehová titlapaleuiyaj kampa tichantij niman xkeman tiktejtemouaj tikchiuaskej tlen xkuajli ipan país kampa tichantij. Noijki, tikintlakaitaj intlanauatiluan tekiuajkej, pampa ijkon tiktlakamatij iTlajtol toTajtsin.

  • “Nochi tlakatl ma tetlakamati intech on tekiuajkej.” (Romanos 13:1.)

  • “Xmakakan César on tlen yejua iyaxka, niman no xmakakan Dios on tlen yejua iyaxka.” (Mateo 22:21.)

Ika yejon, tikintlakamatij intlanauatiluan tekiuajkej, tiktlaxtlauaj tlen tekiuajkej kitlajtlanij niman titlapaleuiyaj itech tlen tekiuajkej yokitlalijkej niman ijkon kuajli titlapaleuiyaj kampa tichantij.