Xuiya kampa tlen onka ijtik

Xuiya kampa tlen kipiya

Itech ken tiktekitiltia motomin

Itech ken tiktekitiltia motomin

Melak miyekej yokitakej ika tlen kijtoua Biblia kinpaleuiya kuajli makitekitiltikan intomin.

KUAJLI XNEMILI TLEN TIKCHIUAS

TLEN BIBLIA TECHMACHTIA: “Ijkuak itlaj kuajli kinemiliaj ken kinchiuaskej, kuajli kisa. Pero yejuan san kisijkachiuaj itlaj, xkuajli kisa” (Proverbios 21:5).

TLEN KIJTOSNEKI. Tla tikneki ika kuajli makisati nochi tlen tikchiuas, kachtopa noneki kuajli xnemili kenon tikchiuas. Xkilnamiki ika xnochipa uelis tijkouas nochi tlen tikneki. Ika yejon, kuajli xnemili kenon tijkuis motomin.

TLEN UELIS TIKCHIUAS

  • Xtekitilti san tlen yotikxelo. Xkijkuilo nochi kech nonekis tiktlaxtlauas niman xkita kech tikpopolos ipan tlakuajli, tlakentin, mochan niman okseki. Tla tikita ika sekan más tijkuis tomin, kuakon xtekitilti tlen oksekan tijkuiskia. Matikonnemilikan ika miyek tomin otikpopolo ipan gasolina, tejua uelis oksejpa tikaxiltis ika tlen tijkuiskia kampa xmás noneki, ken tlen ika timoyolpaktiskia.

  • Maka xtlaneui tomin tla xmelak noneki. Maka san nenka xtlaneui tomin. Kachtopa xsentlali tomin tlen ika titlakouas. Tla tiknemilijtika tiktlaneuis tomin, xyejyeko nimantsin tiktlaxtlauas niman tla itikteuikilia, xkijkuilo kenon uelis tiktlaxtlauas niman ijkon xchiua.

    Kuajli xtlanemili achto ika tiktlaneuis tomin, pampa akin nochipa kitlaneujtokej peuaj más kuelitaj kipopoloskej.

XMOKOJTILI XCHIUA TLEN KUAJLI

TLEN BIBLIA TECHMACHTIA: “Ijkuak tôkalo, on yejuan tlatsijki xtôka. Pero ijkuak pixkalos, yejua no kinekis pixkas, pero xkipiyas tlinon kipixkas” (Proverbios 20:4).

 TLEN KIJTOSNEKI. Yakaj akin tlatsijki xkeman kipiya tomin. Kuakon, xmokojtili titekitki yes niman noijki kuajli xkui motomin, ijkon xtlaj mitspolos.

TLEN UELIS TIKCHIUAS

  • Xmokojtili titekitki yes. Tla tejua tikuelita titekitis niman tikchiua tlen mitsnauatiaj, xnimantsin tikpolos motekiyo. Akin tetlakeuaj kuelitaj ika intlakeualuan kuajli makichiuakan intekiyo.

  • Xkijto tlen melauak. Tla tejua xtikijtoua tlen melauak, uelis kichiuas maka kuajli mamitsitakan niman xtiknextis tekitl.

  • Maka xmotomintisneki. Tla tejua sajnoye tikneki tikpiyas tomin, uelis mitskualotlas niman kichiuas maka kuajli xmouika imiuan oksekimej. Xkilnamiki ika tomin xyejon tlen más noneki ipan tonemilis.

OKSEKI TLEN BIBLIA TECHMACHTIA

Uelis tikpouas Biblia ipan jw.org. Tlen onka ika miyek tlajtoltin.

MAKA XPOLO MOTIEMPO NIMAN MOTOMIN IPAN VICIOS

“On yejuan tlauankej niman yejuan tlakuatemej nochiuaskej mayankej” (PROVERBIOS 23:21).

MAKA SAJNOYE XMAJMANA

“Maka xkomatstiakan on tlen nenkikuaskej niman on tlen nenkoniskej, nion nemotlaken yejuan noneki para nemotlalnakayo” (MATEO 6:25).

MAKA XTENEXIKOLITA

“Yejuan xitlaj kipajsoloua itlamachilis, itlalnakayo kipiya chikaualistli, pero on yejuan kipiya nexikojli hasta on iomiyouan palanij” (PROVERBIOS 14:30).