Xuiya kampa tlen onka ijtik

Xuiya kampa tlen kipiya

 YEJUAMEJ OUEL ONOPATLAKEJ

Tlen okichiujkej Ricardo niman Andrés

Tlen okichiujkej Ricardo niman Andrés

Tlen Biblia temachtia ueli kichiua ika oksekimej manopatlakan. Matikitakan kenon okinpaleui Ricardo niman Andrés.

RICARDO: Ijkuak nikpiaya 15 xiuitl, opeuj nikistinemi iuan se pandilla. Akin imiuan ninouikaya melak onechijtlakojkej. Niknekiya ninemis 10 xiuitl ipan cárcel. Kanaj kakisti ika xnitlamachilise, san ika, yejon niknekiya pampa kampa nichantiya melak kintlakaitayaj akin yonenkaj ipan cárcel. Niman nejua noijki niknekiya manechtlakaitakan.

Ijkuak ninemiya iuan yejon pandilla, niauilnemiya, nikintekitiltiaya drogas niman melak niteixnamikiya. Se yeuajli otomojmotlakej iuan okse pandilla. Oniknemili ika nechmiktiskiaj, san ika, ouel onicholo. Sakin ika opanok yejon, opeuj kuajli niknemilia tlenon nikchiujtoya ika nonemilis niman tlenon niknekiya nikchiuas ika tlayekapan. Onikijto ninopatlas, san ika ¿kenon nikchiuaskia? ¿Akinon ueliskia nechpaleuis?

Nochanejkauan xnemiyaj ika inyojlo niman nochipa kipiayaj tlauejli. San ika, ichanejkauan se notío xijkon nemiyaj. Yejuamej kipiayaj kuajli inyojlo niman kichiuayaj tlen kijtoua Biblia. Yejuamej onechmachtijkej ika toTajtsin itoka Jehová. Yejua ika, sakin ika onicholo ijkuak otomojmotlakaj, oniknots toTajtsin ika itoka niman oniktlajtlanili manechpaleui. Onechmojkatlachialti ika uajmostla se iteixpantijkauj Jehová onechtlajpaloto. Yejua opeuj nechmachtia Biblia.

Xouejkauj, onikpix se ueyi tlauejli. Akin yeuejkaui imiuan ninouikaya nechuajnotsayaj ipan teléfono niman kinekiyaj oksejpa imiuan maninosentlali. Maski melak onechtekiyomakak, onikimijli ika xok imiuan ninosentlaliskia. Yoniktlapejpenijka ninomachtis Biblia, niman nipaki ika ijkon onikchiuj pampa yejuin okipatlak nonemilis niman aman melak niyolpaki.

Nikilnamiki ika oniktlajtlanilijka toTajtsin manechkauili maninemi 10 xiuitl ipan cárcel. San ika, aman oniktlajtlanili manechkauili maski san 10 xiuitl manikinpaleui oksekimej ijkon ken nejua onechpaleuijkej. ToTajtsin onechkak pampa aman inikpiya 17 xiuitl ika niktekichiuilijtok. Niman xkeman oninen ipan cárcel.

Miyekej akin imiuan ninouikaya nemij ipan cárcel niman oksekimej yomijkej. Ijkuak niknemilia nochi tlen yopanok, niktlasojkamati ika nochanejkauan akin iteixpantijkauan Jehová onokojtilijkej kichiuaskej ijkon ken kijtoua Biblia. Niman nikintlakaita xijkon ken yakaj okse akin iuan oninen ipan pandilla. San ika, más niktlasojkamachilia toTajtsin pampa onechmachti kenon kuajli ninemis.

 ANDRÉS: Onitlakat niman oninoskalti ipan se barrio kampa xtikpiayaj miyek tomin, nokuiyaj drogas, nomiktiayaj, tetlachtekiliayaj niman auilnemiyaj. Notaj san tlauantinemiya niman kikuiya cocaína. Yejua iuan nonan nochipa nouijuikaltiayaj niman nouisokiyaj.

Opeuj nitlauani niman nijkui drogas ijkuak san kemach nitelpochtli katka. San nikistinemiya ipan ojtli, nitlachtekiya niman niknemakaya tlen nikichtekiya. Sakin, notaj okinek iuan maninouika niman onechmachti manikpanolti niman maniknemaka drogas niman okseki tlemach tlen ipan país xnotekauiliaya. Xouejkauj oniktlan miyek tomin. Se tonajli ijkuak ninemiya nochan, policías onechajsikej. Onechtsajkej makuijli xiuitl pampa yakaj nikmiktisnekiya.

Se kualkan otechijlikej nochimej akin titsauktoyaj tla tiknekiyaj tijkakiskej tlen konteijliskiaj iteixpantijkauan Jehová ipan cárcel, niman onitlakakito. Onikuelitak tlen okijtokej, ika yejon, oniknek manechmachtikan. Yejuamej xokiyankej tlen kijtoua Biblia, onechmelajkaijlikej kenon kineki toTajtsin matinemikan.

Nimantsin onikasikamat ika san noselti xueliskia ninopatlas, pampa onikitak ika akin nouan tsauktoyaj opeuj nechtlauelitaj pampa ninomachtiaya Biblia. Oniktlajtlanili Jehová manechyolchikaua niman manechmaka tlamachilistli. Yejon, onechpaleui manikixnamiki tlen panotoya niman onechyolchikauj manikteijli tlen kijtoua Biblia.

Ijkuak onikis itech cárcel, melak ninomojtiaya niman niknekiya ompa ninokauas. Ijkuak inikistiaya, sekimej san uejka onechonmatekechilijkej. Niman oksekimej hasta onechijlikej ika tlasojtlalistli: “Xmokuepa mochan teopixkatsintli”.

Xnikneki niknemilis kenon yeskia nonemilis tla xnijkauiliskia toTajtsin manechmachti. Niktlasojkamachilia toTajtsin pampa nechtlasojtla niman pampa xkeman onechkauj. *

^ párr. 15 Ipan jw.org uelis tikitas kenon Biblia yokinpaleui oksekimej noijki makipatlakan innemilis. Xkalaki ipan TLAMACHTILTIN ITECH BIBLIA > YOLSEUILISTLI NIMAN PAKILISTLI.