Xuiya kampa tlen onka ijtik

Xuiya kampa tlen kipiya

 ITECH TLEN TLAJTOUA IXPAN | ¿TLENON KINEMILIA TOTAJTSIN ITECH GUERRAS?

Ken toTajtsin kimita guerras ipan yejuin tonajli

Ken toTajtsin kimita guerras ipan yejuin tonajli

Aman, miyekej tlaltikpakchanejkej kintlajyouiltiaj. Kitlajtlaniliaj toTajtsin makinpaleui, san ika, kemantika notlajtoltiaj tla toTajtsin kinkakis tlen kitlajtlaniliaj. ¿Tlenon inpan nochiuas yejon akin kichiuaj se guerra niman ijkon kipopoloskej tlajyouilistli? ¿Kita toTajtsin kuajli yejon niman kinpaleuiya?

Armagedón se guerra tlen kipopolos nochi guerras

Xneltoka ika toTajtsin kita tlajyouilistli tlen onka ipan tlaltikpaktli niman yejua tlayektlalis (Salmo 72:13, 14). Ipan Biblia, toTajtsin kijtoua ika “mechmakas neseuijli nemejuamej yejuan nentlajyouijtokej”. ¿Kemanon kichiuas? “Ijkuak ajsis on tonajli ika toTeko Jesús uajnonextis ne iluikak [...] iuan ipoderosos iluikaktekitkej. Uajlas para kinuajcastigaros on yejuan xkixmatij Dios niman on yejuan xkitlakamatij on temachtijli itech ika toTeko Jesucristo yejuan kitemaka temakixtilistli.” (2 Tesalonicenses 1:7, 8.) Yejon tonajli nochiuas ika tlayekapan, ijkuak “nouijsokiskej iuan Dios ipan on iueyitonal Dios yejuan nochi ueli”, noijki itoka Armagedón (Apocalipsis [Revelación] 16:14, 16).

Ijkuak yejkos yejon tonajli, toTajtsin xkimijlis tlaltikpakchanejkej matlaixnamikikan, pampa kijlis iKoneuj Jesucristo niman iluikaktekitkej yejuamej makixnamikikan tlaltikpakchanejkej akin xkuakualtin. Kuakon yejuamej akin kipopoloskej nochi tlajyouilistli (Isaías 11:4; Apocalipsis 19:11-16).

Kuakon toTajtsin xkipatla ken kita guerras. Yejua ok kita guerra tlen ika uelis kipopolos tlajyouilistli niman tlen xkuajli. Niman ijkon ken yeuejkaui, san yejua kijtos kemanon peuas se guerra niman akinon tlaixnamikis. Ken yotikitakej, toTajtsin yokinemili ken kipopolos tlen xkuajli niman kinpaleuis  akin kintlajyouiltiaj ika tlayekapan. Niman iKoneuj, Jesucristo, tlayekanas ipan yejon guerra. Yejuin kijtosneki ika toTajtsin xkuajli kita guerras tlen nochiuaj ipan yejuin tonajli, maski manesi ika nochiua pampa kinemiliaj ika kinamiki kichiuaskej.

Xnemili itech yejuin: omemej ikniujtin peuaj nokualaniaj ijkuak intaj xnemi imiuan. Nokajkauaj san achijtsin niman konnotsa ipan teléfono. Se kijlia ika ikniuj yejua akin opeuj kiuisoki, niman okse kijlia ika ikniuj yokiuisok, omemej kinekij ika intaj makinneltoka. San ika, ijkuak intaj yokinkak omemej, kimijlia ika manokajkauakan ika nokualaniaj niman makichiakan ijkuak yejua ajsis. Ikniujtin tetlakamati san achijtsin, san ika, sakin okse peuaj nouisokij. Ijkuak intaj ajsi, kualani imiuan, niman kintlajtlakolmaka pampa xokitlakamatkej.

Ipan yejuin tonajli, países akin noixnamikij kitlajtlaniliaj toTajtsin makinpaleui. San ika, yejua xtlapaleuiya ipan yejuin guerras. Biblia kijtoua: “Tla yakaj mechchiuilia itlaj xkuajli, ma ka no ijki xkuepilikan”, niman noijki kijtoua: “Ma ka sa no nemejuamej itlaj xtekuepiltikan” (Romanos 12:17, 19). Niman, kimijlia tlaltikpakchanejkej ika noneki matlamachiakan ijkuak yejua tlapopolos, niman yejuin panos ipan Armagedón (Salmo 37:7). Yejua xkuelita ika países manouisokikan, kita kentla noueyimatij niman kichiuaj tlen xkinamiki. Ika yejon, ipan Armagedón toTajtsin kiteititis ika xkuajli kita guerras niman kipopolos nochi tlen xkuajli nochiua ipan tlaltikpaktli (Salmo 46:9; Isaías 34:2). Kema, ipan Armagedón yes se guerra tlen kipopolos nochi guerras.

ITekiuajyo toTajtsin kipopolos guerras niman yejon san se tlateochiualistli tlen panos. Jesús otlajto itech yejon ijkuak okijto: “Mauajla motekiuajyo. Manochiua nikan ipan tlaltikpaktli tlen tejua tikneki, ijkon ken nochiua ne iluikak” (Mateo 6:10, TNM). Xsa kipopolos guerras, noijki tlen kichiua maonia: tlen xkuajli (Salmo 37:9, 10, 14, 15). * Ika yejon, melak tiknekij ika iTekiuajyo toTajtsin makuajkui tlateochiualistin (2 Pedro 3:13).

¿Uejkauis ijkuak iTekiuajyo toTajtsin kipopolos nochi tlajyouilistli niman tlen xkuajli? Tlen Biblia yokijtoka panos inochiujtika, yejon techititia ika tinemij ipan itlamiyan tonaltin itech yejuin tlaltikpaktli (2 Timoteo 3:1-5). * San achijtsin poliui ijkuak iTekiuajyo toTajtsin peuas tlanauatis ipan tlaltikpaktli sakin tla yopanok Armagedón.

Yotikitakej ika akin mikiskej ipan yejuin guerra yeskej akin xkitlakamati “temachtijli itech ika toTeko Jesucristo yejuan kitemaka temakixtilistli” (2 Tesalonicenses 1:8). San ika, xkilnamiki ika toTajtsin xkineki ika maka yakaj mamiki, nion akin kichiuaj tlen melak xkuajli (Ezequiel 33:11). “Nion se tlakatl xkineki ma poliui” ipan yejuin guerra, yejua kineki ika yejuin kualtsin tlajtojli manoteijli “nochiuiyan ipan in tlaltikpaktli para nochimej países” ijkuak xitlapopoloua (2 Pedro 3:8, 9; Mateo 24:14; 1 Timoteo 2:3, 4). Pampa iteixpantijkauan Jehová tenojnotstokej ipan nochiuiyan tlaltikpaktli, tlaltikpakchanejkej uelis kixmatiskej toTajtsin, kitlakamatiskej itlamachtil Jesús niman nemiskej ijkuak xok onias guerras.

^ párr. 9 ITekiuajyo toTajtsin noijki kipopolos intlauelikniuj nochimej tlaltikpakchanejkej: mikilistli. Ken nesi ipan tlamachtijli “Tlajtoltilistin itech Biblia” itech yejuin revista, toTajtsin kinyolitis melak miyekej tlaltikpakchanejkej, niman kinyolitis akin yomijkej ipampa guerras.

^ párr. 10 Tla tikneki tikmatis itech itlamiyan tonaltin, xkita ipan capítulo 9 itech amoxtli ¿Tlenon melauak temachtia Biblia?, tlen okichijchiujkej iteixpantijkauan Jehová.