Tla omemej kuajli nonotsaj yejon kichiua melak kuajli manouikakan. ToTajtsin noijki techijlia matiknotsakan niman ijkon kuajli iuan touikaskej. Yejua techijlia: “Niman nemejuamej ninnechnotsaskej niman nenuajlaskej niman ninnexchiuiliskej teoyotl, niman nejua nimechkakis” (Jeremías 29:12). Tla titlajtouaj iuan toTajtsin, Biblia techijlia ika “yejua [t]echnisiuis” (Santiago 4:8). Niman Biblia noijki techijlia: “Jehová nisiuj nemi itech nochimej akin kinotsaj” (Salmo 145:18). Kuakon, tla nochipa tiknotsaj, melak kuajli iuan touikaskej.

Jesús okijto: “¿Tlen nemotsajlan nemi se yejuan noyolchikauas para kimakas ikoneu se tetl ijkuak kitlajtlanilis se tlaxkajli? ¿Noso kimakas se kouatl ijkuak kitlajtlanilis se michin? Aman, tej, tla nemejuamej [...] nenkimatij ken kuajli nenkinmakaskej nemokoneuan tlajtlamach on tlen kuajli, sanoyej pantlannestiakaj ika nemoTajtsin iluikak chanej mechmakas on tlen kuajli yejuan nenkitlajtlaniliskej” (Mateo 7:9-11). Keman ijkon, toTajtsin kineki matiknotsakan pampa “yejua kineki [t]echpaleuis” (1 Pedro 5:7). Niman, yejua techijlia matiakan itech ijkuak tikpiyaskej tlauejli. Biblia techijlia: “Ma ka itlaj xkomatstiakan, yej nochipa xchiuakan oración, niman xtlajtlanilikan Dios ikan tlaxtlauijli nochi tlen mechpoloua” (Filipenses 4:6).

Tlaixmatkej yokitakej ika tlaltikpakchanejkej kimachiliaj ika kinekij kinotsaskej toTajtsin. Hasta ateos niman agnósticos noijki kichiuaj. * Ijkon nesi ika tinochimej tikmachilia ika tiknekij tiknisiuiskej toTajtsin akin otexchijchiuj. Niman Jesús noijki okijto: “Yolpakij akin kimatstokej ika kipiyaj ika kitejtemoskej tlen ualeua itech toTajtsin” (Mateo 5:3, TNM). Niman tikteititiaj ika tiktejtemouaj tlen ualeua itech toTajtsin tla tiknotsaj mojmostla.

¿Kenon techpaleuis tla tiknotsa toTajtsin?