Xuiya kampa tlen onka ijtik

Xuiya kampa tlen kipiya

Matiteasikamatikan ijkon ken Jehová

Matiteasikamatikan ijkon ken Jehová

“Paki akin kiteititia ika kasikamati akin xmiyek kipiya” (SAL. 41:1).

TLAKUIKALTIN: 130, 107

1. ¿Kenon kiteititiaj akin kitekichiuiliaj toTajtsin ika notlasojtlaj semej iuan oksekimej?

AKIN tiktekichiuiliaj Jehová totlasojtlaj semej iuan oksekimej. Tikimitaj tokniuan kentla tochanejkauan (1 Juan 4:16, 21). Kemantika ueyi tlen tikchiuaj inpampa. San ika, melak kuajli nesi ika tikintlasojtlaj pampa miyekpa tikimijliaj tlen kinyolchikaua, miyekpa tikinpaleuiyaj noso itlaj okse tlemach tikchiuaj inpampa. Ijkuak titeasikamatij niman tikchiuaj tlen kuajli, tikixkopintokej toTajtsin iluikakchane, “ken itlasojkakoneuan” (Efes. 5:1).

2. ¿Kenon okiteititi Jesús ika tetlasojtlaya ken iTaj?

2 Jesús melak kuajli okixkopin iTaj. Yejua nochipa okinpaleui tlaltikpakchanejkej ika tlasojtlalistli. Okijto: “Xuajlakan notech nemochimej yejuan yonensiaukej pampa hasta aman xnenkinextiaj temakixtilistli niman pampa on tlajtlamach tepajsoloualistin sanoyej mechyetiliaj, niman nejua nemechmakas neseuijli”. Noijki okijto: “Pampa nejua niyolsejki niman niyolyemanki” (Mat. 11:28, 29). Ijkuak tikchiuaj ken Jesús niman tikteititiaj ika titeasikamatij, tikyolpaktiaj Jehová niman tejuamej noijki tiyolpakij (Sal. 41:1). Matikitakan  kenon uelis tikteititiskej ika tikimasikamatij tochanejkauan, tokniuan akin nemij ipan totlanechikol niman akin tikinnojnotsaj itech toTajtsin.

MATIKIMASIKAMATIKAN TOCHANEJKAUAN

3. ¿Kenon se teueuentsin uelis kititis isiuatsin ika kasikamati? (Xkita tlaixkopinaltin kampa peua tlen tomachtijtokej).

3 Teueuentsitsinuan yejuamej akin kachtopa noneki kiteititiskej ika teasikamatij (Efes. 5:25; 6:4). Matiknemilikan yejuin, Biblia kijtoua ika se teueuentsin noneki kasikamatis isiuauj niman kitenkakis (1 Ped. 3:7). Se teueuentsin akin teasikamati kimatstika ika yejua iuan isiuauj tlamantikej, san ika, xkeman kinemilia tla xmaluijli (Gén. 2:18). Yejua kitlakaita isiuauj niman kasikamati ijkuak itlaj kimachilia. Se tokniuj siuatl akin chanti Canadá kijtoua: “Noueuentsin xkeman kijtoua ika san tlenon yonikmachili, xkeman nechijlia: ‛Xkipiya ika ijkon timomachilis’. Niman yejua melak kuajli nechkaki. Ijkuak nechpaleuiya kuajli manitlanemili, nechpaleuiya ika tlasojtlalistli”.

4. ¿Kenon se teueuentsin kititia isiuatsin ika kasikamati ijkuak tlajtoua imiuan oksekimej siuamej?

4 Teueuentsin akin teasikamati noijki kita tlen kimachilia isiuatsin. Kema, ijkuak nemi imiuan oksekimej siuamej xkichiua itlaj niman ijkon makinemilikan ika kinuelita, niman xnajmana inpampa ijkon ken xok kinamiki. Yejua xijkon kichiua nion ipan redes sociales, niman xkalaki ipan páginas itech Internet kampa uajnesi tlen xkuajli (Job 31:1). Xkikajkayaua isiuauj pampa kitlasojtla niman noijki kitlasojtla Jehová niman pampa kitlauelita tlen xkuajli (xpoua Salmo 19:14; * 97:10). *

5. ¿Kenon se tesiuauj uelis kititis iueuentsin ika kasikamati?

5 Ijkuak se teueuentsin tetlasojtla ken Jesucristo, akin kinyekana teueuentsitsinuan, kuakon, isiuauj xkitekiyomakas “kitlakaitas iueuentsin” (Efes. 5:22-25, 33). Isiuauj kasikamatis ijkuak kipiyas miyek tekitl ipan tlanechikojli noso ijkuak kixnamiktos tlauejli. Se teueuentsin akin chanti Gran Bretaña kijtoua: “Kemantika, nosiuauj kita ika itlaj nechajmantika. Kuakon, yejua kichiua ken kijtoua Proverbios 20:5. Yejua kita kemanon uelis nouan tlajtos. Niman tla uelis kimatis, nikijlia tlen nechajmantika”.

6. ¿Kenon uelis tikinmachtiskej kokonej mateasikamatikan, niman kenon kinpaleuis yejuin?

6 Tla kokonej kitaj ika intajuan nasikamatij, kuakon, yejuamej noijki ijkon kichiuaskej. Tajtin noneki kinmachtiskej inkoneuan mateasikamatikan. Matiknemilikan yejuin, tajtin uelis kinmachtiskej maka manotlatlalojtinemikan ipan Kajli kampa Tosentlaliaj. Noso ijkuak nosentlaliskej imiuan oksekimej, uelis kimijliskej inkoneuan makinkauilikan akin youeuentsintiakej kachtopa manotlakualtekilikan. Melauak, tinochimej uelis tikinpaleuiskej tajtin niman ijkon ikoneuan mateasikamatikan. Tla se konetl techpaleuiya noso itlaj okse tlemach kichiua topampa, kanaj techtlapouilia puerta, kuakon, matikijlikan ika kuajli tlen kichiua. Niman tla ijkon tikimijliaj, yejon konetl kuajli nomachilis niman kuajli kasikamatis ika “más paki on yejuan kitemaka xken on yejuan kiselia” (Hech. 20:35).

MATIKIMASIKAMATIKAN TOKNIUAN AKIN NEMIJ IPAN TOTLANECHIKOL

7. ¿Kenon okasikamat Jesús se tlakatl akin “nakastsatsa katka”, niman tlenon techmachtia yejon?

7 Sejpa, ijkuak Jesús nemiya ne kampa kitokayotiaj Decápolis, “sekimej tlakamej okuajuikakej se tlakatl yejuan nakastsatsa katka niman tenenepochtikatka” (Mar. 7:31-35). Jesús ueliskia kipajtis teixpan, san ika, yejua “okuikak neka kampa xakaj nemi”. ¿Tleka ijkon okichiuj? Pampa yejon tlakatl “nakastsatsa katka”, niman kanaj xkuajli nomachiliaya kampa tojlan. Niman Jesús kanaj okasikamat yejon. Yemelak, tejuamej xtiuelij tikchiuaj  milagros. San ika, kipiya ika tikitaskej tla tokniuan itlaj kinpoloua niman tikitaskej kenon nomachiliaj. Apóstol Pablo okijkuilo: “Ma tiknemilikan ken ijki uelis tikinyoleuaskej oksekimej para ma notlajsojtlakan se iuan okse niman para ma kichiuakan on tlen kuajli” (Heb. 10:24). ¿Kenon uelis noijki titeasikamatiskej ken okichiuj Jesús?

8, 9. ¿Kenon uelis tikimasikamatiskej akin youeuentsintiakej niman akin kualoj? (Xkijto tlen sekimej kichiuaj).

8 Matikimasikamatikan akin youeuentsintiakej niman akin kualoj. Miyekej xkitaj ika iteixpantijkauan Jehová melak kuajli titekitij, san ika, kema kitaj ika melak totlasojtlaj (Juan 13:34, 35). Niman yejuin tlasojtlalistli techyolmapeua matikchiuakan nochi tlen tiueliskej niman ijkon tikinpaleuiskej tokniuan akin youeuentsintiakej niman akin kualoj. Tikinpaleuiyaj mauiyan ipan tlanechikoltin noso matenojnotsatij. Ijkon tikchiuaj maski tokniuan xmiyek kichiuaj ken kinekiskiaj (Mat. 13:23). Michael, akin nemi ipan silla de ruedas, melak kitlasojkamati ika ichanejkauan niman tokniuan akin nemij ipan itlanechikol kipaleuiyaj. Kijtoua: “Pampa nechpaleuiyaj, miyekpa niauj ipan tlanechikoltin niman miyekpa nontenojnotsa. Melak nikuelita nitenojnotsas kampa tojlan nojuitilo”.

9 Nemij miyekej tokniuan akin nemij Betel akin youeuentsintiakej niman kualoj. ¿Kenon tokniuan akin tlayekanaj kimititiaj ika kimasikamatij? Yejuamej kinpaleuiyaj tokniuan matenojnotsakan ika carta niman ipan teléfono. Bill, se tokniuj akin kipiya 86 xiuitl niman akin kintlajkuilouilia akin uejka chantij, kijtoua: “Tiyolpakij ika tiuelij tikimijkuilouaj cartas”. Nancy, akin ikipiyas 90 xiuitl, kijtoua: “Ijkuak nikneki nikijkuilos cartas, xniknemilia ika san nikinkalakis amamej ijtik sobres. Nejua ijkon nitenojnotsa. Tlaltikpakchanejkej noneki kimatiskej tlen melauak”. Ethel, akin otlakat ipan xiuitl 1921, kijtoua: “Miyekpa san ninokokojtika. Kemantika san niktlalis notlaken nechtekiyomaka”. Maski ijkon, yejua melak kuelita tenojnotsas ipan teléfono niman sekimej kinektokej oksejpa makominotsa. Niman Barbara, akin kipiya 85 xiuitl, kijtoua: “Pampa nikualo, nechtekiyomaka nontenojnotsas. San ika, ueli nitenojnotsa ipan teléfono. ¡Tlaxtlaui, Jehová!”. Nion xiajsiya se xiuitl, sekimej tokniuan akin youeuentsintiakej otenojnotskej 1,228 horas, okijkuilojkej 6,265 cartas, okitemakakej 6,315 amatlajkuiloltin niman melak otenojnotskej ipan teléfono, okichiujkej ipantsin 2,000 llamadas. Kuajli tikmatstokej ika Jehová melak okiyolpakti tlen okichiujkej yejuin tokniuan akin melak tikintlasojtlaj (Prov. 27:11).

10. ¿Tlenon uelis tikchiuaskej inpampa tokniuan niman ijkon makinpaleui tlanechikojli?

10 Matikimasikamatikan tokniuan ipan tlanechikojli. Tla tikimasikamatij tokniuan, tikchiuaskej nochi tlen tiueliskej niman ijkon makinpaleui tlanechikojli. ¿Kenon? Uelis san niman tajsiskej niman ijkon xtikinpasoloskej. Kemantika, xsaniman tajsij pampa itlaj panoua. San ika, tla nochipa xsaniman tajsitokej, kuakon, noneki tikitaskej tlenon uelis tikchiuaskej niman ijkon tikimititiskej tokniuan ika tikimasikamatij. Noijki matikilnamikikan ika Jehová niman iKoneuj yejuamej akin technotsaj (Mat. 18:20). Melauak ika kinamiki matikintlakaitakan.

11. ¿Tleka tokniuan akin kipanoltiaj se tlamachtijli ipan tlanechikojli kipiya ika kitlakamatiskej tlen kijtoua 1 Corintios 14:40?

11 Tla tikimasikamatij tokniuan, noijki tiktlakamatiskej yejuin tlanauatijli: “Nochi xchiuakan ken kitocaroua, niman ma ka sa ken ijki xchiuakan” (1 Cor. 14:40). Tokniuan akin kipanoltiaj se tlamachtijli ipan tlanechikojli noneki kuajli kitaskej maka melak uejkauiskej. Tla xuejkauij, kiteititiaj ika tlanemiliaj ipampa tokniuj akin noijki panos niman inpampa tokniuan akin nemij ipan tlanechikojli. ¿Tleka ijkon tikijtouaj? Pampa sekimej tokniuan uejka chantij. Oksekimej kipiya ika konajsiskej carro. Niman sekimej tokniuan noneki nimantsin ajsiskej inchan pampa imixnamik xnomachtia niman yokimijlikej tlen hora noneki ajsiskej.

12. ¿Tleka kinamiki matikintlakaitakan tokniuan tlayekankej niman matikintlasojtlakan? (Xkita recuadro “ Matikintlakaitakan tokniuan akin tlayekanaj ipan ikalpan toTajtsin”).

 12 Tlayekankej melak chikauak tekitij ipan tlanechikojli niman melak kuelitaj tenojnotsaskej, ika yejon, noneki matikintlakaitakan niman matikintlasojtlakan (xpoua 1 Tesalonicenses 5:12, 13). Melauak, tiktlasojkamatij nochi tlen kichiuaj topampa. Kuakon, matikintlakamatikan niman matikinpaleuikan. Yejuamej techtlajpiyaj niman ijkon “kitemakaskej cuenta itech Dios” (Heb. 13:7, 17).

MATIKIMASIKAMATIKAN AKIN TIKINNOJNOTSAJ ITECH TOTAJTSIN

13. ¿Tlenon tiuelij itech Jesús ijkuak tikitaj kenon okintlasojtlak tlaltikpakchanejkej?

13 Isaías okijto yejuin itech Jesús: “Yejua xkipostekis nion se akatl tlen yokuelpachiuj, yejua xkiseuis ikuayekatsin ikpatl tlen iseujtika” (Is. 42:3). Jesús kintlasojtlaya tlaltikpakchanejkej niman kimasikamatiya. Kimatstoya kenon nomachiliayaj akin najmanayaj. Kema, yejuamej nomachiliayaj kentla yeskiaj se akatl tlen yokuelpachiuj noso kentla ikuayekatsin ikpatl tlen kitlaliaj ipan se lámpara niman tlen iseujtika. Ika yejon, yejua okimasikamat, kualtsin okiminnots niman okiteititi ijyouilistli. Hasta kokonej kinekiyaj nemiskej iuan Jesús (Mar. 10:14). Yemelak, tejuamej xtiuelij titeasikamatij niman titemachtiaj ijkon ken Jesús. San ika, kema uelis tikimasikamatiskej akin tikinnojnotsaj itech toTajtsin. Matikitakan kenon uelis tikinnojnotsaskej, kemanon uelis tikomintlajpaloskej niman kech noneki tiuejkauiskej.

14. ¿Tleka noneki kuajli matikitakan kenon tikinnojnotsaj tlaltikpakchanejkej?

14 ¿Kenon noneki tikinnojnotsaskej tlaltikpakchanejkej? Ipan yejuin tonaltin, akin kipiyaj tomin, akin tekitij ipan política niman akin tlayekanaj ipan tlaneltokiltin melak tekajkayauaj niman tetlajyouiltiaj. Ika yejon, miyekej  tlaltikpakchanejkej najmanaj niman kimachiliaj ika san yokinkaujkej (Mat. 9:36). Miyekej tlaltikpakchanejkej xok yakaj itech tlaneltokaj niman kimachiliaj ika xkeman itlaj kualtsin inpan panos. Ika yejon, noneki matikitakan kenon tikinnojnotsaskej niman tlenon tikimijliskej. Noneki tikteititiskej ika titetlasojtlaj niman ika titeikneliaj. Miyekej xsan techkakij pampa kuajli tikixmatstokej Biblia, noijki techkakij pampa kitaj ika tikintlakaitaj niman ika yemelak tiknekij tikinpaleuiskej.

15. ¿Kenon uelis tikteititiskej ika tikimasikamatij akin tikinnojnotsaj itech toTajtsin?

15 Melak miyek tlen uelis tikchiuaskej niman ijkon tikteititiskej ika tikimasikamatij akin tikinnojnotsaj itech toTajtsin. Ijkuak tiknekiskej itlaj tikintlajtoltiskej, noneki kuajli matikitakan tla ijkon tikintlakaitstoskiaj niman tla kuajli nomachiliskiaj. Se precursor tlapaleuiaya kampa miyekej tlaltikpakchanejkej san pijpinauij. Kuakon, yejua okasikamat ika xnonekiya kintlajtoltis itlaj tlen kichiuaskia mapijpinauikan. Xkeman kintlajtoltiaya tla kimatstoyaj kenon itoka toTajtsin noso tla kimatstoyaj tlenon iTekiuajyo toTajtsin. Yejua kimijliaya: “Yoniuel ipan Biblia ika toTajtsin kipiya itoka. ¿Uelis nimitsititis kenon itoka?”. Kanaj yejuin uelis techpaleuis kampa tichantij, noso kanaj xtechpaleuis. Ijkon tikijtouaj pampa tlaltikpakchanejkej tlamantikej niman tlamantik ken tlanemiliaj. San ika, noneki nochipa matikimasikamatikan niman matikintlakaitakan. Ika yejon, noneki kuajli matikimixmatikan.

16, 17. a) Tla tiknekij tikimititiskej tlaltikpakchanejkej ika tikimasikamatij, ¿kemanon tikomintlajpaloskej inchan? b) Tla tiknekij tikimititiskej tlaltikpakchanejkej ika tikimasikamatij, ¿kech tiuejkauiskej imiuan tonojnotstoskej?

16 ¿Kemanon noneki tikomintlajpaloskej tlaltikpakchanejkej? Ijkuak titenojnotsaj techajchan, tlaltikpakchanejkej xtexchiatokej pampa xotechnotskej matikintlajpalotij. Kuakon, melak noneki matikintlajpalotij ijkuak ueliskej touan nonojnotsaskej (Mat. 7:12). Matiknemilikan yejuin, ¿san kualkantsin nokuiteuaj itlamiyan semana noso ijkuakon noseuiyaj niman kochij? Tla ijkon, uelis kachtopa tiaskej kampa tojlan nojuitilo noso titenojnotsaskej iuan carritos, noso uelis tikomintlajpaloskej akin itikmatstokej ika yonokuiteujkej.

17 ¿Kech noneki tiuejkauiskej imiuan tonojnotstoskej? Tlaltikpakchanejkej melak tekimikij, kuakon, kuajli yes tla xtiuejkauij. Uelis tikchiuaskej yejuin ijkuak kemach tipeuaj tikontlajpalouaj. Matokojtilikan nimantsin titlamiskej, maka melak matiuejkauikan (1 Cor. 9:20-23). Ijkuak tlaltikpakchanejkej kitaj ika tikasikamatij ika melak miyek tekitl kipiyaj, kinektoskej techkakiskej ijkuak oksejpa tiaskej. Tla tikpiyaj kualneskayomej tlen ualeua itech iespíritu santo toTajtsin, kuakon, yemelak titekititoskej iuan toTajtsin. Jehová hasta uelis techtekitiltis niman ijkon yakaj matikpaleuikan makixmati tlen melauak (1 Cor. 3:6, 7, 9).

18. ¿Katlejua tlateochiualistin tikseliskej tla titeasikamatij?

18 Kuakon, matokojtilikan tikimasikamatiskej tochanejkauan, tokniuan akin nemij ipan totlanechikol niman akin tikinnojnotsaj itech toTajtsin. Tla ijkon tikchiuaj, tikseliskej miyek tlateochiualistin ipan yejuin tonaltin niman ika tlayekapan. Salmo 41:1, 2 kijtoua: “Paki akin kiteititia ika kasikamati akin xmiyek kipiya; Jehová kimakixtis ipan yejon tonajli ijkuak panos tekokojkayotl. [...] Yejua kiteneuaskej ika nemi ika pakilistli ipan tlaltikpaktli”.

^ párr. 4 Salmo 19:14: “Mamitsyolpaktikan notlajtoluan tlen kisaj itech nokamak niman notlanemililuan itech noyojlo, oh Jehová, noueyiTepetlauj niman noTemakixtijkauj”.

^ párr. 4 Salmo 97:10: “Nemejuamej akin nenkitlasojtlaj Jehová, xtlauelitakan tlen xkuajli. Yejua kinmejyeujtika innemilis akin itech yolmelaujkanemij; intech akin xkuakualtin kinmakixtia”.