Xuiya kampa tlen onka ijtik

Xuiya kampa tlen kipiya

Tleka xtijkajkauaj tiktemakaj miyek tlakilyotl

Tleka xtijkajkauaj tiktemakaj miyek tlakilyotl

“Ijkuak nemejuamej nenkipiaj miyek tlakyotl, noTajtsin kiselia ueyilistli, niman ijki nenkiteititiaj ika nemejuamej melauak nennotemachtijkauan” (JUAN 15:8).

TLAKUIKALTIN: 53, 60

1, 2. a) ¿Itech tlenon okinnojnots Jesús inomachtijkauan ijkuak sa achijtsin poliuiya ika mikis? (Xkita tlaixkopinajli kampa peua tlen tomachtijtokej). b) ¿Tleka tikitaj ika ueyi kijtosneki tikmatiskej tleka titenojnotsaj? c) ¿Tlenon tomachtiskej?

IPAN yeuajli achto ika kimiktiskiaj, Jesús ouejkauj kinnojnotstoya itlatitlankauan. Kuajli okimijli ika melak kintlasojtlaya. Niman, ken otikitakej ipan tlamachtijli tlen yopanok, yejua ononeskayoti ken se itemekayo uvas. Ijkin, okinyolchikauj inomachtijkauan ika nochipa makitemakatokan “miyek tlakyotl” noso tlakilyotl, kijtosneki maka makikajkauakan tenojnotsaskej itech Tekiuajyotl (Juan 15:8). *

2 San ika, Jesús xsan okimijli tlenon kipiaya kichiuaskej, noijki okimijli tleka kipiaya kichiuaskej. Okimijli tleka xkipiaya kikajkauaskej ika tenojnotsaskej. ¿Tleka tikitaj ika ueyi kijtosneki kuajli matikmatstokan tleka titenojnotsaj? Pampa techyolchikauas maka matijkajkauakan titenojnotsaskej ipan “nochimej kalpamej” (Mat. 24:13, 14, TNM). Ika yejon, tikitaskej naui tlen kijtoua Biblia tlen techititia ika noneki titenojnotsaskej. Noijki titlajtoskej itech naui tlemach tlen techmaka Jehová tlen techpaleuis nochipa matiktemakakan tlakilyotl.

 PAMPA TIKUEYICHIUAJ JEHOVÁ

3. a) ¿Tlenon kijtoua Juan 15:8 tlen techititia tleka noneki titenojnotsaskej? b) ¿Tlenon kineskayotiaj uvas ipan neskayotl tlen okiteneuj Jesús, niman tleka melak kinamiki yejon neskayotl?

3 Tlen melak ueyi kijtosneki tlen techititia ika noneki titenojnotsaskej yejua pampa ijkon tikueyichiuaj Jehová niman tikchipauaj itokayo (xpoua Juan 15:1, 8). Matikitakan ika nikan Jesús okijto ika iTaj kineskayotiaya yejon tlakatl akin kintlajpiya uvas. Jesús okijto ika yejua katka itemekayo uvas niman ika inomachtijkauan katkaj imatsitsinuan (Juan 15:5). Kuakon melak kinamiki ika uvas makineskayotikan itlakilyo Tekiuajyotl tlen kitemakaj akin kichiuaj ken Cristo. Jesús okimijli itlatitlankauan: “Ijkuak nemejuamej nenkipiaj miyek tlakyotl, noTajtsin kiselia ueyilistli”. Ijkon ken se tokaketl kiueyichiuaj ijkuak itemekayo uvas tlen yejua iyaxka kitemaka melak kuakualtin tlakilyotl, tejuamej noijki tikueyichiuaj Jehová ijkuak tokojtiliaj hasta kampa tiuelij kuajli titemachiltiskej Tekiuajyotl (Mat. 25:20-23).

4. a) ¿Kenon tikchipauaj itokayo toTajtsin? b) ¿Kenon timomachilia pampa tikpiya se kualtsin tekitl ika tikchipauas itokayo toTajtsin?

4 Ken yotikitakej, ijkuak titenojnotsaj, noijki tikchipauaj itokayo toTajtsin. ¿Kenon tikchiuaj yejon? Yemelak ika xtiueliskej tikchiuaskej ika itokayo toTajtsin melak machipaui pampa itokayo Jehová ikuajli chipauak. San ika, matikitakan tlenon okijto teotlajtoketl Isaías: “Jehová akin kinyekana akin tlaixnamikij... yejua Akin kipiya nenkichipaujkaitaskej” (Is. 8:13). Ijkon tej, se ken uelis tikchipauaskej itokayo toTajtsin yejua tla tikitaj ken itlaj melak ueyixtika xijkon ken oksekimej tokayomej, niman ijkuak tikinpaleuiyaj oksekimej tlaltikpakchanejkej makasikamatikan ika itokayo chipauak (Mat. 6:9). Se neskayotl, ijkuak tikteijliaj kenon kualtsitsintin ikualneskayouan Jehová niman itech nochi tlen yokijto kichiuas ipampa tlaltikpakchanejkej, titlapaleuiyaj ika oksekimej makitakan ika tlen kijtoua Satanás itech Jehová san tlakajkayaualistin (Gén. 3:1-5). Noijki tikchipauaj itokayo ijkuak tikyejyekouaj tikinpaleuiskej akin tikinnojnotsaj kampa tichantij niman ijkon makitakan ika Jehová kimelaua kiselis “ueyilistli, tetlakaitalistli, niman poder” (Apoc. 4:11). Rune, akin ikipiya 16 xiujtin ken precursor, kijtoua: “Sajnoye niktlasojkamati ika toTajtsin akin nochi okichijchiuj nechkauilia niiteixpantijkauj yes. Niman yejuin nechyolmapeua sanken manitenojnotsa”.

PAMPA TIKTLASOJTLAJ JEHOVÁ NIMAN IKONEUJ

5. a) ¿Tlenon kijtoua Juan 15:9, 10 tlen techititia tleka noneki titenojnotsaskej? b) ¿Kenon kuajli okiteititi Jesús ika noneki titlaxikoskej?

5 (Xpoua Juan 15:9, 10, TNM). * Pampa melak tiktlasojtlaj Jehová niman Jesús yejon okse tlen ueyi kijtosneki tlen techititia ika noneki titenojnotsaskej (Mar. 12:30; Juan 14:15). Jesús xokimijli inomachtijkauan san manemikan itech itlasojtlalis, okimijli ompa manentokan. ¿Tleka? Pampa akin kitokaskiaj nonekiskia tlaxikoskej nochi xiujtin niman ijkon nemiskej ken akin yemelak kichiuaj ken Cristo. Jesús kuajli okiteititi ika noneki titlaxikoskej ijkuak miyekpa okitekitilti tlajtojli xnentokan ipan Juan 15:4-10.

6. ¿Kenon tikteititiaj ika tiknekij tinentoskej itech itlasojtlalis Cristo?

6 ¿Kenon tikteititiaj ika tiknekij tinentoskej itech itlasojtlalis Cristo niman tiknekij matechseli? Tla tiktlakamatij itlanauatiluan. Yejuin kijtosneki ika Jesús techtlajtlanilia matiktlakamatikan. San ika, san techtlajtlanilia tlen yejua noijki kichiua, pampa noijki okijto: “Ijkon ken nejua yoniktlakamat itlanauatiluan noTaj niman ninentika itech itlasojtlalis”. Kuajli nestika ika yejua otechititi kenon tikchiuaskej (Juan 13:15, TNM).

7. ¿Kenon titetlakamatis noijki kijtosneki titetlasojtlas?

 7 Jesús kuajli okiteititi ika titetlakamatis noijki kijtosneki titetlasojtlas ijkuak okimijli inomachtijkauan: “Yejuan kimati niman kitlakamati notlanauatiluan, melauak nechtlajsojtla” (Juan 14:21). Niman ijkuak tikchiuaj tlen Jesús otechnauati ika matitenojnotsatij, noijki tikititiaj toTajtsin ika tiktlasojtlaj. ¿Tleka? Pampa tlen Cristo techtlajtlanilia sa noijki tlen kitlajtlani iTaj (Mat. 17:5; Juan 8:28, TNM). Pampa tikintlasojtlaj, Jehová niman Jesús noijki xkikajkauaj ika techtlasojtlaj.

PAMPA TIKNEKIJ IKA OKSEKIMEJ MAKIMATIKAN TLEN UAJLAUJ

8, 9. a) ¿Tlenon okse techititia ika noneki titenojnotsaskej? b) ¿Tleka techyolmapeua maka matijkajkauakan titenojnotsaskej tlen kijtoua Ezequiel 3:18, 19 niman 18:23?

8 Ika yeyi, xtijkajkauaj titenojnotsaj pampa tiknekij ika oksekimej makimatikan tlen uajlauj. Biblia techijlia ika Noé okixmatkej ken akin “okiteijlij ken ijki se uelis kuajli nouikas ken noneki” (xpoua 2 Pedro 2:5). Kuajli tikmatij ika noijki okimijli oksekimej ika iajsitoya ijkuak tlapopoliuiskia. ¿Tleka ijkon tikijtouaj? Matikitakan tlenon okijto Jesús: “Ipan on tonaltin, ijkuak xe apachiuilo, on tlakamej tlakuayaj, atliyaj, nonamiktiayaj niman kitemakayaj inichpochuan para ma nonamiktikan hasta ipan on tonajli ijkuak Noé okalak ipan barco. Niman yejuamej xokichiuilijkej cuenta on tlen nochijtikatka, yej hasta ijkuak opeu kiaui niman on atl nochimej okinmiktij. Ijkon, tej, ken ipan on tonaltin onochiu, no ijki nochiuas ijkuak nejua yejuan oninochiu Tlakatl niuajlas” (Mat. 24:38, 39). Maski tlaltikpakchanejkej xkikakisnekiyaj, Noé okichiuj itekiyo niman okimijli tlen uajlaskia.

9 Ipan yejuin tonajli, titenojnotsaj itech Tekiuajyotl pampa ijkon tlaltikpakchanejkej ueliskej kimatiskej tlenon kineki kichiuas Jehová topampa. Ijkon ken Jehová, ika nochi toyojlo tiknekij makikakikan yejuin tlajtoltin niman nochipa manemikan (Ezeq. 18:23). Niman noijki, titenojnotsaskej techajchan niman kampa tojlan nojuitilo techkauilia tikinmachiltiskej miyekej ika iTekiuajyo toTajtsin uajlas niman ijkon kipopolos nochi tlen xkuajli (Ezeq. 3:18, 19; Dan. 2:44; Apoc. 14:6, 7).

PAMPA TIKINTLASOJTLAJ OKSEKIMEJ

10. a) ¿Tlenon kijtoua Mateo 22:39 tlen techititia tleka noneki titenojnotsaskej? b) Xkijto kenon Pablo niman Silas okipaleuijkej se tlakatl akin kitlajpiaya cárcel ipan Filipos.

10 Matikitakan okse tlen noijki ueyi kijtosneki tlen techititia ika xnoneki tijkajkauaskej titenojnotsaskej: tikintlasojtlaj oksekimej (Mat. 22:39). Tikmatij ika tlaltikpakchanejkej uelis kipatlaskej ken tlanemiliaj ijkuak itlaj nopatla ipan innemilis. Tlasojtlalistli tlen tikmachiliaj inpampa, techyolmapeua maka matijkajkauakan titenojnotsaskej. Matitlanemilikan itech tlen ipan onochiuj apóstol Pablo niman akin iuan yaya, Silas, ipan ueyikalpan Filipos. Akin kimixnamikiyaj okintsajkej ipan cárcel. San ika, ijkuak itlajkoyouan katka, san totoka opeuj tlalolini niman okiolini cárcel niman nochi puertas otlapojkej. Akin kitlajpiaya cárcel kinemiliaya ika nochimej akin tsauktoyaj yocholojkaj, ika yejon, inomiktiskia. San ika, Pablo okonsajtsili niman okijli: “Ma ka itlaj xmochiuili”. Tlajpixketl akin nokuaajmantoya otetlajtolti: “¿Tlinon noneki nikchiuas para nimakisas?”. Yejuamej okinankilijkej: “Xneltoka toTeko Jesucristo niman timakisas” (Hech. 16:25-34).

Tlasojtlalistli tlen tikmachiliaj ipampa Jehová, Jesús niman ipampa oksekimej techyolmapeua matitenojnotsakan. (Xkita párrafos 5 niman 10).

11, 12. a) ¿Tlenon techmachtia itech tenojnotsalistli tlen ipan onochiuj akin kitlajpiaya cárcel? b) ¿Tleka xtiknekij tijkajkauaskej titenojnotsaskej?

 11 ¿Tlenon techmachtia itech tenojnotsalistli tlen ipan onochiuj yejon tlajpixketl? Matikitakan ika yejon tlajpixketl okipatlak ken tlanemiliaya niman okitlajtlan makipaleuikan sakin ika opanok tlalolinalistli. Noijki ijkon, kanaj sekimej tlaltikpakchanejkej akin xkikakiyaj tlen kijtoua Biblia nopatlaskej niman kitlajtlaniskej makinpaleuikan sakin ika itlaj inpan nochiua. Se neskayotl, sekimej xkimatij tlenon kichiuaskej ijkuak san totoka kipolouaj intekiyo, nokauaj iuan imixnamik, kimijliaj ika kipiyaj se kokolistli tlen temojti noso miki se inchanejkauj. Ijkuak panoua itlaj ken yejuin, nemij akin ijkuakon peuaj notlajtoltiaj tleka tinemij. Kanaj hasta noijki notlajtoltiaj tlen yejon tlajpixketl onotlajtolti: “¿Tlinon noneki nikchiuas para nimakisas?”. Ijkuak tikominextiaj kampa titenojnotsaj, kanaj aman kinekiskej kikakiskej tlajtoltin itech tlamachialistli tlen tikimitkiliaj.

12 Ijkon tej, tla xkeman tijkajkauaj ika titenojnotsaj, uelis tikinyolseuiskej tlaltikpakchanejkej ijkuak kinektoskej kiseliskej (Is. 61:1). Charlotte, akin ikipiya 38 xiujtin ken precursora, kijtoua: “Ipan yejuin tonaltin tlaltikpakchanejkej xkimatij tlenon kichiuaskej. Yejuamej noijki noneki makikakikan tlajtoltin tlen tikimitkiliaj”. Niman se tokniuj siuatl itoka Ejvor akin ikipiya 34 xiujtin ken precursora kijtoua: “Xkeman nemiyaj miyekej tlaltikpakchanejkej akin sajnoye manajmantokan. Sajnoye nikneki nikinpaleuis, niman yejon nechyolmapeua manitenojnotsa”. Yemelak, tlasojtlalistli tlen tikmachiliaj inpampa oksekimej melak techyolmapeua maka matijkajkauakan titenojnotsaskej.

ITETLAYOKOLILUAN JEHOVÁ TLEN TECHPALEUIYAJ MATITLAXIKOKAN

13, 14. a) ¿Katlejua tetlayokolijli kiteneua Juan 15:11? b) ¿Kenon uelis tikpiyaskej pakilistli tlen kipiya Jesús? c) ¿Kenon techpaleuiya pakilistli ipan totenojnotsalis?

13 Ipan yejon sa ika nochi yeuajli achto ika mikiskia, Jesús noijki okinteneuili itlatitlankauan seki itetlayokoliluan Jehová tlen kinpaleuiskia nochipa makitemakakan tlakilyotl. ¿Katlejuamej? Niman ¿kenon techpaleuiyaj?

14 Pakilistli. ¿Tikmachiliskej ika ouijtika tiktlakamatiskej itlanauatil Jesús kampa techijlia matitenojnotsakan? Ka, xijkon. Sakin ika otlajto itech itemekayo uvas, Jesús kuajli okijto ika tikpiyaskej pakilistli tlen yejua kipiya tla titenojnotsaj itech Tekiuajyotl (xpoua Juan 15:11). ¿Tleka panoskia yejon? Ken achto yotikitakej, ipan se neskayotl okijto ika yejua katka itemekayo uvas niman ika inomachtijkauan katkaj imatsitsinuan. Atl niman tlen kichikaua temekatl, noijki kiseliaj imatsitsinuan tlen itech tlaktokej. Noijki ijkon, tejuamej tikmachiliskej yejon pakilistli tlen Jesús kimachilia ijkuak kichiua tlen iTaj kineki san tla iuan tinentokej niman tikchiuaj ken yejua okichiuj (Juan 4:34, TNM; Juan 17:13; 1 Ped. 2:21). Hanne, akin ikipiya ipantsin 40 xiujtin ken precursora, kijtoua: “Pakilistli tlen nikmachilia ijkuak nikisa nontenojnotsa nechyolchikaua sanken maniktekichiuilijto Jehová”. Kema ijkon, yejuin ueyi pakilistli techmaka kojtilistli niman ijkon xtijkajkauaskej titenojnotsaskej, maski kampa ouijtika titenojnotsas (Mat. 5:10-12).

15. a) ¿Katlejua tetlayokolijli kiteneua Juan 14:27? b) ¿Kenon techpaleuiya yolseuilistli nochipa matiktemakakan tlakilyotl?

15 Yolseuilistli (xpoua Juan 14:27). Ipan yejon yeuajli, Jesús okimijlika itlatitlankauan: “Nejua nemechmaka noyolseuilis”. ¿Kenon techpaleuiya iyolseuilis matiktemakakan tlakilyotl? Ijkuak titlaxikouaj ipan tenojnotsalistli, tikmatij ika tikyolpaktiaj Jehová niman Jesús. Niman yejon kichiua nochipa matikmachilikan yolseuilistli (Sal. 149:4; Rom. 5:3, 4; Col. 3:15). Se tokniuj akin itoka Ulf niman chikauak yokitekichiuili toTajtsin ipantsin 45 xiujtin kijtoua: “Sajnoye nisiaui ijkuak nitlami nitenojnotsa, san ika, yejuin tekitl kichiua  manipaki niman kuajli maninomachili ipan nonemilis”. Kema, melak tiktlasojkamatij ika tiuelij nochipa tikpiyaj yejuin yolseuilistli.

16. a) ¿Katlejua tetlayokolijli kiteneua Juan 15:15? b) ¿Tlenon nonekiya kichiuaskej itlatitlankauan Jesús tla kinekiyaj nochipa iuan nouikaskej?

16 Iuan touikaj Jesús. Ijkuak yokimijlika itlatitlankauan ika kinekiya melauak mapakikan, Jesús okintomili ika melak nonekiya matetlasojtlakan niman maka makichiakan makinkuepilikan itlaj (Juan 15:11-13). Sakin, okimijli: “Nemechtokayotia notetlajsojkauan”. ¡Se tetlayokolijli melak kualtsin! ¿Niman tlenon nonekiya kichiuaskej itlatitlankauan niman ijkon nochipa nouikaskej iuan Jesús? Nonekiya kitemakatoskej tlakilyotl (xpoua Juan 15:14-16). Yopanoka ome xiuitl ika Jesús okinnauatijka makiteijlikan: “Ye uajlau on tonajli ijkuak Dios tlamandaros” (Mat. 10:7). Ijkon tej, ipan sa ika nochi yeuajli achto ika mikiskia, okinyoleuj matlaxikokan niman makichiujtiakan yejon tekitl (Mat. 24:13; Mar. 3:14). Kitlakamatiskej yejon tlanauatijli ouijtika katka, san ika, ueliskiaj kichiuaskej niman ijkon nochipa iuan nouikaskej Jesús. ¿Kenon? Onkatka okse itetlayokolil Jehová tlen kinpaleuiskia.

17, 18. a) ¿Katlejua tetlayokolijli kiteneua Juan 15:16? b) ¿Kenon kinpaleuiskia inomachtijkauan Jesús yejon tetlayokolijli? c) ¿Katlejua itetlayokoliluan Jehová techmakaj kojtilistli aman?

17 Kinnankilia toteoyouan. Jesús okimijli itlatitlankauan ika, nochipa ijkuak kitlajtlaniskiaj itlaj ika itokayo, Jehová kinmakaskia (Juan 15:16). Yejuin tlen okimijli kanaj melak okinyolchikauj. * Melauak ika Jesús xok uejkauiskia ika mikiskia, niman yejon katka itlaj tlen yejuamej ok xkuajli kasikamatiyaj. San ika, nochipa kipiyaskiaj tlen kinpaleuis. Ijkuak kitlajtlaniliskiaj Jehová makinpaleui matenojnotsakan itech Tekiuajyotl, yejua kinnankiliskia inteoyouan. Niman ijkon opanok, pampa san seki tonaltin sakin, okitakej kenon okinnankili (Hech. 4:29, 31).

Uelis kuajli tikmatstoskej ika Jehová technankilis ijkuak tiktlajtlaniliskej matechpaleui. (Xkita párrafo 18).

18 Noijki ijkon panoua ipan yejuin tonaltin. Tla nochipa tiktemakatokej tlakilyotl, kuakon iuan touikaskej Jesús. Noijki, kuajli tikmatstoskej ika Jehová technankilis ijkuak tiktlajtlaniliskej matechpaleui matikxikokan tlen tikixnamikiskej ijkuak titenojnotsaskej (Filip. 4:13, TNM). Melak tiktlasojkamatij ika Jehová kinnankilia toteoyouan niman ika touikaj iuan Jesús. Nochi yejuin techmaka kojtilistli tlen techkauilia nochipa matikpiyakan tlakilyotl (Sant. 1:17).

19. a) ¿Tleka xtijkajkauaj titenojnotsaj? b) ¿Tlenon techpaleuis matitlamikan tekitl tlen toTajtsin yotechnauatij?

19 Ken yotikitakej ipan yejuin tlamachtijli, xtijkajkauaj titenojnotsaj pampa tiknekij tikueyichiuaskej Jehová niman tikchipauaskej itokayo, tikteititiskej ika tiktlasojtlaj Jehová niman Jesús, tiknekij tikimijliskej tlaltikpakchanejkej tlen uajlauj niman tikteititiskej ika tikintlasojtlaj oksekimej. Noijki, tetlayokoliltin tlen tikseliaj itech Jehová, ken pakilistli, yolseuilistli, ika iuan touikaj Jesús niman ika kinnankilia toteoyouan, techmakaj kojtilistli tlen techpaleuis matitlamikan tekitl tlen otechmakak. Jehová melak kiyolpaktis kitas nochi kech tokojtiliaj niman ijkon tikpiyaskej “miyek tlakyotl”.

^ párr. 1 Tlajtoltin itech Griego “nenkipiaj miyek tlakyotl” teasikamachiltiaj itlaj tlen xnokajkaua ika nochiua.

^ párr. 5 Juan 15:9, 10: “Ijkon ken noTaj yonechtlasojtlak, noijki ijkon yonimechtlasojtlak; xnentokan itech notlasojtlalis. Tla nemejuamej nenkintlakamatij notlanauatiluan, nennentoskej itech notlasojtlalis, ijkon ken nejua yoniktlakamat itlanauatiluan noTaj niman ninentika itech itlasojtlalis”.

^ párr. 17 Ijkuak kinnojnotstoya itlatitlankauan, Jesús miyekpa okimijli ika Jehová kinnankiliskia inteoyouan (Juan 14:13; 15:7, 16; 16:23).