Xuiya kampa tlen onka ijtik

Xuiya kampa tlen kipiya

Yolkuajlilistli: ¿Kenon tikpiyas?

Yolkuajlilistli: ¿Kenon tikpiyas?

TINOCHIMEJ tiknekij ika oksekimej makinemilikan ika tiyolkuajkualtin niman timelajkej. San ika, yejon ouijtika ipan yejuin tonajli. Biblia okijto ika miyekej “xitlaj kuelitaskej tlen kuajli” (2 Tim. 3:3). Kanaj noyekanaj ika tlen yejuamej kinemiliaj kuajli niman tlen xkuajli, kinemiliaj ika “kuajli, on tlen xkuajli, niman on tlen xkuajli [kijtouaj] kuajli” (Is. 5:20). Tinochimej titlajyouiyaj ika tlen yeuejkaui otikchiujkej niman ika titlajtlakolejkej. Ika yejon, kanaj tomachiliaj ken Anne * akin yokitekichiuili miyek xiuitl Jehová, kijtoua: “Nikmachilia ouijtika nikneltokas ika uelis niyolkuajli yes”.

Techyolpaktia tikmatiskej ika tinochimej uelis tikiskaltiskej yejuin kualneskayotl. Tiyolkuajli yes ualeua itech iespíritu santo toTajtsin, tlen melak kipiya kojtilistli xken itlaj okse tlen tikixnamikij. Kuajli matikitakan tlenon kijtosneki tiyolkuajli yes niman matikitakan kenon uelis tikteititiskej ipan tonemilis.

TLEN KIJTOSNEKI TIYOLKUAJLI YES

Ika tlajtoltin tlen xouijtika, tiyolkuajli yes kijtosneki ijkuak yakaj kiteititia ika xkuelita tlen xkuajli, kichiua tlen melajki niman chipauak inemilis. Akin yolkuajli nochipa kitejtemoua kenon kinpaleuis oksekimej.

Tikimixmatstokej miyekej akin kinektokej kichiuaskej tlen kuajli inpampa inchanejkauan niman inpampa akin imiuan nouikaj. San ika, se akin yolkuajli ixpan toTajtsin, xsan yejon kichiua. Maski, tikmatstokej ika xakaj kuajli kiteititia yejuin kualneskayotl, pampa Biblia kijtoua ika “xakaj nemi ipan in tlaltikpaktli yejuan kichiua nochi tlen kuajli niman xkaman tlajtlakoua” (Ecl. 7:20). Niman Apóstol Pablo okijto: “Nikmati ika ipan notlalnakayo xitlaj onkaj tlen kuajli” (Rom. 7:18). Ika yejon, tla tiknekij tikpiyaskej yejuin kualneskayotl, kinamiki matikitakan kenon Jehová kiteititia ika yolkuajli.

JEHOVÁ YOLKUAJLI

Jehová yejua akin kijtoua tlenon kuajli. Akin okijkuilo se salmo okijto: “Tejua tikuajli, niman tikchiua nochi tlen kuajli. ¡Xnechmachti motlanauatiluan!” (Sal. 119:68). Matikitakan ome itech kenon Jehová kiteititia ika yolkuajli tlen noteneua ipan yejuin tlaxelojli.

Jehová yejua akin kuajli. Yolkuajlilistli, se ikualneskayo Jehová. Matikitakan tlen opanok ijkuak Jehová okijli Moisés: “Nejua nikchiuas ma pano mixpan nochi on tlen kuajli de nejua”. Ijkuak panouaya iueyilis toTajtsin noijki panouaya iyolkuajlilis, Moisés okikak yejuin tlajtoltin: “¡NiJehová! ¡NiJehová! ¡NimoDios yejuan nitetlasojtla niman niteiknelia! Xnimantsin nikualani. Sanoyej nitetlasojtla, niman nochipa nikchiua on tlen nikijtoua. Miles teuejkakoneuan yejuan tlakatitiuij nikimiknelia [...]. Pero yejuan kipiya tlajtlakojli, nicastigaroua ipampa itlajtlakol” (Éx. 33:19; 34:6, 7). Ika yejuin, tikasikamatij ika ipan ikualneskayouan Jehová noteititia ika yejua yolkuajli. Ijkuak Jesús ouajla ipan tlaltikpaktli, melak kuajli okiteititi ika yolkuajli katka. Maski ijkon, okijto: “Dios san yejua iselti kuajli” (Luc. 18:19).

Itech tlen Jehová okichijchiuj, tikitaj ika yolkuajli.

 Jehová kichiua tlen kuajli. Itech nochi tlen kichiua toTajtsin nesi ika yolkuajli. Biblia kijtoua: “kuajli iyojlo iminuan nochimej, niman ika iueyiteiknelilis sanoyej kuajli cuidaroua nochi on tlen okichijchiu” (Sal. 145:9). Ijkuak toTajtsin xtechikoita, kinmaka nemilistli tlaltikpakchanejkej niman nochi tlen kinpaleuis ika manemikan ijkon kiteititia ika yolkuajli (Hech. 14:17). Se akin okijkuilo Salmo okijto itech Jehová: “Kuajli moyojlo niman titetlapojpoluiya” (Sal. 86:5). Uelis tikmatstoskej ika Jehová “kintlajsojtla niman kintlakaita on yejuan chantij ikan yolchipaualistli niman kinmaka nochi tlen kuajli” (Sal. 84:11).

XMOMACHTI TIKCHIUAS TLEN KUAJLI

Pampa Jehová otexchijchiuj ijkon ken yejua, uelis tiyolkuajkualtin yeskej niman tikchiuaskej tlen kuajli (Gén. 1:27). San ika, Biblia techijlia akin tiktekichiuiliaj toTajtsin: “Xkejekokan nenkichiuaskej on tlen kuajli” (Is. 1:17). Matikitakan yeyi tlemach tlen techpaleuis matiyolkuajkualtin.

Kachtopa, matikchiuakan teoyotl niman ijkon tiktlajtlaniliskej espíritu santo, tlen techpaleuis matiyolkuajkualtin ixpan toTajtsin (Gál. 5:22). Kema, iespíritu toTajtsin techpaleuiya matiktlasojtlakan tlen kuajli niman matikmapeuakan tlen xkuajli (Rom. 12:9). Niman, Biblia techijlia ika Jehová uelis kichiuas matikchiuakan niman matikijtokan tlen kuajli (2 Tes. 2:16, 17).

Ika ome, noneki tikpouaskej iTlajtol toTajtsin. Ijkuak tikchiuaj, Jehová techititia ojtli kampa nochiua “nochi tlen kuajli” (Prov. 2:9; 2 Tim. 3:17). Ijkuak tikpouaj iTlajtol niman itech titlanemiliaj, tiktemiltiaj toyojlo ika tlen toTajtsin kineki. Yejuin melak ueyi kijtosneki pampa techpaleuis ijkuak nonekis (Luc. 6:45; Efes. 5:9).

Ika yeyi, tochikauaskej tikimixkopinaskej akin okichiujkej tlen kuajli (3 Juan 11). Ipan Biblia, tiuelij intech sekimej akin ijkon okichiujkej, akin uelis tikimixkopinaskej. Tikmatstokej ika Jehová niman Jesús yejuamej akin melak noneki tikimixkopinaskej. San ika, noijki nemij oksekimej akin okichiujkej tlen kuajli. Kanaj tikilnamikij Tabita niman Bernabé (Hech. 9:36; 11:22-24). ¿Tleka xtomachtiaj tlen kijtoua Biblia itech kenon yejuamej okinpaleuijkej oksekimej? Matiknemilikan kenon uelis tikinpaleuiskej tochanejkauan noso tokniuan. Matikitakan kenon Tabita niman Bernabé okinteochiujkej pampa okichiujkej tlen kuajli. Tejuamej noijki ijkon uelis topan nochiuas.

 Noijki uelis tiknemiliskej intech akin ipan yejuin tonajli kinchiuiliaj tlen kuajli oksekimej. Ken tlayekankej ipan tlanechikojli, akin chikauak tekitij niman kitlasojtlaj kichiuaskej tlen kuajli. Niman maka matikimilkauakan tokniuan siuamej, akin temachtiaj tlen kuajli ika tlen kijtouaj niman ika tlen kichiuaj (Tito 1:8; 2:3). Se tokniuj itoka Roslyn kijtoua: “Se noamiga melak kuelita kinpaleuis niman kinyolchikauas tokniuan. Kinemilia tlenon kixnamiktokej niman yonomat itlaj kintlayokolis noso kinpaleuis. Nejua niknemilia ika melak yolkuajli”.

Jehová kimijlia itekipanojkauan: “Xtejtemokan tlen kuajli” (Amós 5:14). Tla ijkon tikchiuaj, xsan tiktlasojtlaskej itlanauatiluan, noijki tiknekiskej tikchiuaskej tlen kuajli.

Tochikauaj tiyolkuajkualtin yeskej niman tikchiuaj tlen kuajli

Aman, maka matiknemilikan ika tla tiknekij tiyolkuajkualtin yeskej noneki tikchiuaskej tlen melak temojkatlachialti. Xnemili yejuin: se planta xnoskaltia tla san sejpa tikontekilia miyek atl, maski achijtsin tiktekilis atl, noneki miyekpa tikatekis. Noijki ijkon, tiyolkuajkualtin yeskej tla miyekpa tikchiuaj tlen kuajli inpampa oksekimej.

Biblia kijtoua ika tinochimej noneki tiknektoskej tikchiuaskej tlen kuajli (2 Tim. 2:21; Tito 3:1). Tla tikitstokej tlenon inpan nochiua oksekimej, tiknextiskej kenon uelis tikinpaleuiskej “niman ijkon noskaltis intlaneltok” (Rom. 15:2). Kanaj yejuin kijtosnekis itlaj tikiminmakaskej (Prov. 3:27). Uelis tikijliskej yakaj matechtlajpaloti noso iuan titlakuaskej. ¿Tikmatstokej ika yakaj kualo? Uelis tikontitlaniliskej se tarjeta noso mensaje, tikontlajpaloskej noso tikonnotsaskej. Nochipa uelis tikchiuaskej tlen kijtoua Biblia: “Xkijtokan tlen kuajli yejuan kimpaleuis oksekimej noskaltis intlaneltok” (Efes. 4:29).

Ken Jehová, tikyejyekouaj tikinchiuiliskej tlen kuajli oksekimej. Ika yejon, xtikinchikoitaj. Niman tikchiuaj yejuin ijkuak tikiminojnotsaj itech iTekiuajyo toTajtsin. Ken Jesús otechnauati, matikinchiuilikan tlen kuajli hasta akin techtlauelitaj (Luc. 6:27). Xkeman topopoloskej tla tikchiuaj tlen kuajli, pampa “on ley nion se xueli kitlajtlakolmaka” (Gál. 5:22, 23). Tla tikchiuaj tlen kuajli maski ouijtika tlen tikixnamikij, uelis tikchiuaskej ika oksekimej manomachtikan niman makiueyichiuakan toTajtsin (1 Ped. 3:16, 17).

TIYOLKUAJLI YES TEPALEUI

Biblia kijtoua ika akin “kichiuaj [tlen] kuajli kiseliskej intlayokolil” (Prov. 14:14). ¿Katlejua yejon tetlayokoliltin? Tla tiyolkuajkualtin noijki texchiuiliskej tlen kuajli (Prov. 14:22). Niman, maski tla xkichiuaj, tla tejuamej tikinchiuiliaj tlen kuajli uelis kinyolseuis niman kinyolyemanilis (Rom. 12:20).

Miyekej kijtouaj kenon yokinpaleui kikauaskej tlen xkuajli niman kichiuaskej tlen kuajli. Matikitakan tlen ipan onochiuj Nancy. Yejua kijtoua: “Xnikchiuaya tlen nonekiya nikchiuas, niauilnemiya niman xnitetlakaitaya. San ika, ijkuak onikixmat itlanauatiluan toTajtsin itech tlen kuajli niman opeuj niktlakamati, opeuj niyolpaki. Aman ninotlasojkaita niman ninotlasojtla”.

Pampa tikyolpaktiaj Jehová, yejon tlen techyolmapeua tiyolkuajkualtin yeskej. Yejua kita tlen tikchiuaj, maski miyekej xkitaj. Yejua kitstika tlen kuajli tiknemiliaj niman tlen kuajli tikchiuaj (Efes. 6:7, 8). ¿Kenon techpaleuiya yejuin? “Yejuan kuajli tlakatl” kuajli nemi ixpan Jehová (Prov. 12:2). Kuakon, matikyejyekokan matikpiyakan yolkuajlilistli. Jehová kijtoua ika “on yejuan kichiuaj on tlen kuajli kipiyaskej ueyilistli, tetlakaitalistli niman yolseuilistli” (Rom. 2:10).

^ párr. 2 Seki tokayomej yonopatlakej.