Xuiya kampa tlen onka ijtik

Xuiya kampa tlen kipiya

Ueliskia kichiuas ika toTajtsin makiseli

Ueliskia kichiuas ika toTajtsin makiseli

TINOCHIMEJ akin tiktekichiuiliaj Jehová tiknekij matechseli, ¿xmelak? San ika ¿akinon kinselia Jehová niman kinteochiua? Sekimej tlaltikpakchanejkej akin Biblia kinteneua, maski okichiujkaj uejueyimej tlajtlakoltin, toTajtsin okinseli. Niman oksekimej akin kipiayaj kualtsitsintin kualneskayomej, xokinseli toTajtsin. Kuakon, noneki matotlajtoltikan: “¿Tlenon kineki toTajtsin matikchiuakan?”. Ineskayo Rehoboam, tekiuaj itech Judá, uelis techpaleuis matiknankilikan yejuin.

XKUAJLI OPEUJ

Itaj Rehoboam katka Salomón, akin otekiuajtik ipan Israel 40 xiuitl (1 Rey. 11:42). Salomón omik ipan xiuitl 997 ijkuak xpeuaya xiuitl 1. Ijkuak opanok yejon, Rehoboam oyaj Siquem, tlen nokaua ika norte itech Jerusalén, niman ijkon kitlaliskej ken tekiuaj (2 Crón. 10:1). ¿Kimachiliskia ika melak ueyi tekitl kipiyaskia pampa aman kichiuaskia tlen itaj kichiuaya, akin okixmatkej ken akin melak tlamachilise katka? Uelis tikijtoskej ika Rehoboam nion xkinemiliaya ika nimantsin kiteititiskia tla ueliya kinyektlaliaya ouijtika tlaueltin.

Ijkuak Rehoboam opeuj tekiuajti, kanaj okitak ika ipan Israel panotoya tlen miyekej xkuelitayaj. Sakin, tlakamej akin tlajtouayaj ipampa kalpan okitatoj niman okijlikej tlenon kinajmanaya: “Motaj otechtlalili se yetik yugo; san ika, tla tejua tikchiua ika yejon chikauak tekitl tlen motaj otechtlalili maka melak mayetik niman tikyemanilia yugo tlen otechtlalili, tejuamej timitstekichiuiliskej” (2 Crón. 10:3, 4).

Rehoboam kanaj xkimatiya tlenon kichiuas. Tla kichiuaya tlen kitlajtlaniliayaj, yejua, ichanejkauan, niman akin tekichiuayaj ipan itekiuajyo xok nopaktiskiaj ika miyek tlemach. San ika, tla xkichiuaya tlen kitlajtlaniliayaj, tlaltikpakchanejkej ueliskiaj kixnamikiskej. ¿Tlenon kichiuaskia? Tekiuaj kachtopa okintlajtolti akin iuejueyimej katkaj akin kipaleuiayaj Salomón ipan itekiuajyo. Sakin, okintlajtolti akin san telpokamej katkaj ken yejua, niman okichiuj ijkon ken okijlikej, okitlapejpeni chikauak kintlajyouiltis tlaltikpakchanejkej. Ipampa yejon, Rehoboam okijto: “Nejua nikchiuas ika yejon yugo mayetiya, kema, melak nikyetilis. Notaj, yejua, omechtlajyouilti ika látigos, san ika, nejua nemechtlajyouiltis ika látigos kuayekapitstikej” (2 Crón. 10:6-14).

¿Tlenon tiuelij? Kuajli nestika ika miyekpa melak kuajli tla tikinkakij akin iuejueyimej, akin kipiyaj chikauak intlaneltokil. Yejuamej miyek inpan yonochiuj, kuakon uelij kitaj kenon onkisas tlen tiknekij tikchiuaskej niman uelis kuajli technonotsaskej (Job 12:12).

 “YEJUAMEJ OKITLAKAMATKEJ ITLAJTOL JEHOVÁ”

Rehoboam kinekiya kiteltis tlen kalpan kichiujtoya, kuakon, okinsentlali akin ontlaixnamikij ipan guerra. San ika, Jehová onokalakti niman itechkopa teotlajtoketl Semaya okinauati: “Xkipiya ika nenyaskej nenkominuisokiskej nemokniuan israelitas. Nemochimej xmokuepakan nemochan, pampa nejua yonikchiuj mapano yejuin” (1 Rey. 12:21-24). *

¿Xtlaj kichiuaskia Rehoboam? Uelis tiknemiliskej kenon melak okikualani yejon. ¿Tlenon kinemiliskia kalpan itech itekiuaj akin okimijlika kintlajtlakolmakas “ika látigos kuayekapitstikej”, niman akin aman kikauiliskia ika yenkuik kalpan makixnamiki? (Uelis tikitas 2 Crónicas 13:7). Maski ijkon, tekiuaj niman akin ipampa tlaixnamikiyaj “okitlakamatkej itlajtol Jehová niman onokuepkej inchan, ijkon ken Jehová okinnauatijka”.

¿Tlenon tiuelij? Ika melak kuajli tla tiktlakamatij toTajtsin maski oksekimej techpijpinaujtiskej. Tla tiktlakamatij Jehová, yejua techselis niman techteochiuas (Deut. 28:2).

Ijkon ipan onochiuj Rehoboam. Yejua otetlakamat niman xokixnamik yejon yenkuik kalpan. Okitlapejpeni kinyektlalis seki uejueyimej kalpamej, ijkon ijkuak kimixnamikiskiaj tlaxikoskiaj. Noijki okinchijchiuj uejueyimej kalpamej kampa ok tlanauatiaya ipan itlal ifamilia Judá niman Benjamín (2 Crón. 11:5-12). Niman tlen melak ueyi kijtosneki, maski xouejkauj, okitlakamat itlanauatiluan Jehová. Maski tekiuajyotl itech Israel tlen onkatka ika tlakpak opeuj kinueyichiua tajtsitsintin, miyekej akin ompa chantiyaj uajlayaj Jerusalén niman kuajpaleuiayaj Rehoboam, noijki kuajueyichiuayaj toTajtsin ken yejua kitlajtlani (2 Crón. 11:16, 17). Kuakon, tikitaj ika pampa Rehoboam otetlakamat, itekiuajyo kojtitoya.

OTLAJTLAKO NIMAN ACHIJTSIN ONOYOLKUEP

Maski ijkon, ijkuak itekiuajyo kuajli ionkatka, Rehoboam okichiuj itlaj tlen xakaj kichiaya. Yejua xok okitlakamat iTlanauatil toTajtsin niman opeuj kinueyichiua okseki tajtsitsintin. San ika ¿tleka ijkon okichiuj? ¿Okinokauili ika makichikonakasti inan, akin ammonita katka? (1 Rey. 14:21). Yejon xtikmatij, san ika, nochi kalpan okichiuj tlen xkuajli, ijkon ken tekiuaj. Yejua ika, Jehová okikauili ika Sisaq, tekiuaj itech Egipto, makinotlatkiti miyek uejueyimej kalpamej itech Judá, maski Rehoboam melak yokinyektlalijka (1 Rey. 14:22-24; 2 Crón. 12:1-4).

Ijkuak Sisaq oajsik Jerusalén, kampa tlanauatiaya Rehoboam, nochi melak xkuajli nesiya. Ijkuakon, teotlajtoketl Semaya okijli Rehoboam niman noijki ikoneuan tekiuaj tlen Jehová kinekiya kimijlis: “Nemejuamej yonennechkaujkej, kuakon, nejua noijki yonemechkauj ipan ima Sisaq”. ¿Tlenon okichiuj Rehoboam ijkuak ijkon okichikajkanotskej? Kuajli tlen okichiuj. Biblia kijtoua: “Ikoneuan tekiuaj itech Israel niman tekiuaj onoyolyemanilijkej niman okijtokej: ‘Jehová yejua melajki’”. Ika yejon, Jehová okimakixti Rehoboam niman xokitekauili makipopolokan Jerusalén (2 Crón. 12:5-7, 12).

Sakin ika opanok yejuin, Rehoboam xokikajkauj tlanauatia intech ome familias akin nemiyaj ika tlatsintlan. Achto ika mikis, okintlajtlayokoli inkoneuan miyek tlemach, kanaj pampa xkinekiya makixnamikikan imikniuj, Abías, akin sakin tekiuajtiskia (2 Crón. 11:21-23). Ijkuak okichiuj yejuin, okiteititi ika kuajli ken otlanemili xijkon ken yeuejkaui.

¿KATKA SE KUAJLI TEKIUAJ?

Rehoboam okichiuj seki tlemach tlen kuajli, san ika, toTajtsin xokiseli. Biblia kijtoua: “Yejua okichiuj tlen xkuajli katka”. ¿Tleka? Pampa “xokitlali ipan iyojlo kitejtemos Jehová” (2 Crón. 12:14).

Rehoboam xokichiuj ken David pampa xkeman kuajli onouikak iuan Jehová

Xnemili tlen opanok: Rehoboam kemantika okitlakamat toTajtsin. Yejua okichiuj seki tlemach tlen kuajli ipampa ikalpan Jehová. San ika, xkeman kuajli iuan onouikak Jehová nion xkeman okinek kiyolpaktis. Yejua ika, okichiuj tlen xkuajli niman okinueyichiuj tajtsitsintin tlen xmelajkej. Kanaj timotlajtoltia: “Ijkuak Rehoboam  okichikajkanotskej, ¿otlakak pampa yemelak yonoyolkuepka noso pampa oksekimej okijlikej?” (2 Crón. 11:3, 4; 12:6). Sakin, Rehoboam oksejpa okichiuj tlen xkuajli katka. ¡Yejua xijkon okichiuj ken iabuelo, tekiuaj David! Kema, David onopopolo, san ika, yejua nochipa okitlasojtlak Jehová, melak okinek kiueyichiuas toTajtsin ken yejua kitlajtlani niman yemelak onoyolkuep ijkuak onopopolo (1 Rey. 14:8; Sal. 51:1, 17; 63:1).

Tlen ipan onochiuj Rehoboam techmachtia itlaj tlen melak ueyi kijtosneki. Tla tiknekij matechseli toTajtsin, xsan noneki tikinmakaskej tochanejkauan tlen kinpoloua noso tokojtiliskej tikchiuaskej tlen kuajli, noneki nochipa kachtopa tiktejtemoskej tikueyichiuaskej toTajtsin ken yejua kitlajtlani.

Uelis tikchiuaskej yejuin tla nochipa tokojtiliaj tiktlasojtlaskej Jehová ika nochi toyojlo. Ijkon ken noneki matiktlatokilijtokan tlitl niman ijkon maka maseui, noijki noneki tikchiuaskej ika totlasojtlalis itech Jehová machikaujto, niman tikchikauaj ijkuak mojmostla tomachtiaj iTlajtol, titlanemiliaj itech tlen tikpouaj niman ijkuak nochipa tikchiuaj teoyotl (Sal. 1:2; Rom. 12:12). Kuakon, totlasojtlalis itech Jehová techyolmapeuas matikchiuakan tlen yejua kuelita. Niman, tla kemantika titlajtlakouaj, yejuin tlasojtlalistli techpaleuis matoyolkuepakan ika nochi toyojlo. Xtikchiuaskej ken Rehoboam, tejuamej nochipa tiktlakamatiskej Jehová (Jud. 20, 21).

^ párr. 9 Pampa Salomón xoyolmelaujkanen, toTajtsin yokijtoka ika tekiuajyotl notlajkoxeloskia (1 Rey. 11:31).