Xuiya kampa tlen onka ijtik

Xuiya kampa tlen kipiya

Matikilnamiktokan ika noneki noteititis ika Jehová kinamiki tlayekanas

Matikilnamiktokan ika noneki noteititis ika Jehová kinamiki tlayekanas

“Makimatikan tlaltikpakchanejkej ika tejua, akin motoka Jehová, san tejua tiUeyixtika ipan nochi tlaltikpaktli” (SAL. 83:18).

TLAKUIKALTIN: 46, 136

1, 2. a) ¿Tlenon melak noneki makilnamiktokan nochimej tlaltikpakchanejkej? b) ¿Tleka yejuin melak ueyi kijtosneki ipan tonemilis?

IPAN yejuin tonajli, miyekej tlaltikpakchanejkej kitaj melak ueyi kijtosneki tomin. Yejuamej san tlanemiliaj niman najmanaj itech yejuin. Ika yejon, uejkauij kiyejyekouaj kipiyaskej miyek tomin noso kejyeuaskej tlen ikipiyaj. Oksekimej kitaj ika melak ueyi kijtosneki inchanejkauan, kipiyaskej kuajli innemilis noso itlaj tlen yejuamej kineki kichiuaskej.

2 San ika, onka tlen melak ueyi kijtosneki xijkon ken itlaj okse. Titlajtouaj itech yejuin: manoteititi ika san Jehová melauak kinamiki tlayekanas. Melak noneki ika maka keman tijkauaskej titlanemiliskej itech yejuin. Tla xtotlajpiyaj, uelis melak miyek tikchiujtoskej mojmostla ipan tonemilis noso san tajmantoskej itech tlaueltin tlen tikixnamikij niman tikilkauaskej ika melak ueyi kijtosneki yejuin. Tla tikpaleuiyaj iueyitlayekanalis Jehová, melak kuajli tikixnamikiskej tlaueltin niman tonisiuiskej itech.

¿TLEKA MELAK UEYI KIJTOSNEKI?

3. ¿Tlenon okijto Satanás itech ken tlayekana toTajtsin?

3 Satanás okichiuj manonemili ika Jehová xkinamiki matlayekana. Satanás kineki ika tlaltikpakchanejkej makinemilikan ika Jehová xkuajli tlayekana niman ika teteltilia tlen kuajli. Noijki  okichiuj manasikamati ika tlaltikpakchanejkej melak yolpakiskiaj tla san yejuamej noyekanaskiaj (Gén. 3:1-5). Yejua otetlanemililti ika nion se tlaltikpakchane xuelis yolmelaujkanemis itech toTajtsin niman ika tla kixnamikij tlajyouilistli nochimej kikauaskej itlayekanalis (Job 2:4, 5). Ika yejon, Jehová yokikauili mapanokan tonaltin niman ijkon nochimej makitakan ika tla xkinyekana toTajtsin tlaltikpakchanejkej melak xkuajli onkisaj.

4. ¿Tleka tlen noijtoua itech iueyitlayekanalis toTajtsin noneki kuajli manonankili?

4 Kema, Jehová kimati ika tlen Satanás okijto xmelauak. Kuakon, ¿tleka yokikauili miyek tonaltin ika Satanás makiteititi tla yemelak tlen okijto? Pampa nochimej, ipan iluikak niman ipan tlaltikpaktli, noneki makitakan kenon nonankilis (xpoua Salmo 83:18). * Adán niman Eva okimapeujkej itlayekanalis Jehová, niman miyekej oksekimej noijki ijkon yokichiujkej. Yejuin ueliskia kichiuas manonemili ika Satanás yemelak tlen okijto. Tla tlaltikpakchanejkej noso iluikaktekitkej ok xkuajli kinankilia yejuin, xuelis onias yolseuilistli nion xuelis nemilos san sekan. San ika, ijkuak noteititis ika san Jehová melauak kinamiki tlayekanas, nochimej nemiskej kualtsin niman ika nochipa itech itlayekanalis. Ipan tlaltikpaktli niman ipan iluikak onias yolseuilistli (Efes. 1:9, 10).

5. ¿Kenon tikpaleuiya iueyitlayekanalis toTajtsin?

5 Noteititis ika san Jehová melauak kinamiki tlayekanas, niman ika melak xkuajli ken tlayekanaj Satanás niman tlaltikpakchanejkej, ika yejon kinpopoloskej. Itlayekanalis toTajtsin melak kuajli onkisas ika itekiuajyo kampa Jesucristo tekiuajtis. Ijkuak ajsis yejon tonajli, noteititis ika tlaltikpakchanejkej yolmelaujkej ouelkej nochipa oyolmelaujkanenkej niman otlapaleuijkej ipan itlayekanalis toTajtsin (Is. 45:23, 24). ¿Tikuelitaskiaj matechpouakan iuan akin yolmelaujkanemiskej? ¡Kema! Niman uelis tikchiuaskej yejon tla tikasikamatij ika melak ueyi kijtosneki manoteititi ika Jehová melauak kinamiki tlayekanas.

MELAK UEYI KIJTOSNEKI MANOTEITITI IKA JEHOVÁ MELAUAK KINAMIKI TLAYEKANAS XIJKON KEN TOMAKIXTILIS

6. ¿Yemelak ueyi kijtosneki manoteititi ika toTajtsin melauak kinamiki tlayekanas?

6 Manoteititi ika toTajtsin melauak kinamiki tlayekanas melak ueyi kijtosneki xijkon ken topakilis. San ika, yejuin xkijtosneki tla tomakixtilis xkajmana Jehová noso ika yejua xnajmana topampa. ¿Kenon tikmatij yejuin?

7, 8. ¿Kenon techpaleuiya manoteititi ika toTajtsin melauak kinamiki tlayekanas?

7 Jehová melak kintlasojtla tlaltikpakchanejkej. Niman pampa melak techtlasojkaita hasta okitemakak ikoneuj niman ijkon uelis tinemiskej nochipa (Juan 3:16; 1 Juan 4:9). Tla Jehová xkichiuaskia tlen yokijto kichiuas ika tlayekapan, Satanás niman oksekimej itlauelikniuan toTajtsin kiteititiskiaj ika melauak tlen kijtouaj. Satanás kijtoua ika Jehová tekajkayaua, xkineki tlen kuajli ipampa tlaltikpakchanejkej niman xtlayekana ken kinamiki. Itlauelikniuan ueliskiaj kipijpinaujtiskej Jehová itech tlen yokijto kichiuas niman kijtoskej: “¿Tlika hasta aman xuajlau Cristo [xnochiua, TNM] ijkon ken okijtoj? Desde omikej on toachtojtajuan, ok sa no ijki tikitaj tlaojonkaj ken ijkuak nochi otsimpeu” (2 Ped. 3:3, 4). San ika, Jehová kichiuas tlen yokijto. Yejua xsan kichiuas manoteititi ika melauak kinamiki tlayekanas noijki kinmakixtis tlaltikpakchanejkej akin kitlakamatij (xpoua Isaías 55:10, 11). * Iueyitlayekanalis Jehová kisa itech itlasojtlalis. Ika yejon, uelis  kuajli tikmatstoskej ika nochipa kintlasojtlas niman kintlasojkaitas itekipanojkauan akin xkikauaj (Éx. 34:6).

8 Maski tikijtouaj ika iueyitlayekanalis Jehová melak ueyi kijtosneki, xkijtosneki tla tomakixtilis xueyi kijtosneki. Jehová melak najmana topampa. Noneki nochipa matikilnamiktokan tlenon melak ueyi kijtosneki niman matikpaleuikan itlayekanalis Jehová.

JOB KIPATLA KEN TLANEMILIA

9. ¿Tlenon okijto Satanás itech Job? (Xkita tlaixkopinajli kampa peua tlen tomachtijtokej).

9 Melak noneki matikitakan ken kinamiki iueyitlayekanalis Jehová. Yejuin tlen techmachtia amoxtli Job, se itech amoxtin tlen ika opeuj noijkuiloua Biblia. Ompa tikpouaj ika Satanás okijto ika tla Job melak tlajyouiskia kimapeuaskia toTajtsin. Niman Satanás hasta okijli toTajtsin makitlajyouilti Job. Jehová xokinek kichiuas yejon, san ika, yejua okikauili Satanás makitlatlata Job ijkuak okijli: “Nochi tlen kipiya ipan moma onka” (xpoua Job 1:9-12). * Nimantsin, Job okipolo tlen kipiaya niman itekitkauan. Sakin omijkej majtlaktli ikoneuan. Satanás okichiuj manesi ika toTajtsin kichiuilijtoya Job tlen xkuajli (Job 1:13-19). Niman sakin, Satanás okichiuj ika Job makipiya se kokolistli tlen melak xkuajli niman tekoko (Job 2:7). Niman okichiuj itlaj tlen noijki melak xkuajli, isiuauj niman yeyimej tlakamej akin kijtouayaj iuan nouikaj okiyolkokojkej ika intlajtol niman okichiujkej maka kuajli manomachili (Job 2:9; 3:11; 16:2).

10. a) ¿Kenon okiteititi Job ika oyolmelaujkanen itech toTajtsin? b) ¿Tleka nonekiya makiyektlalikan Job?

10 ¿Melauak katka tlen okijto Satanás? Ka. Maski Job melak otlajyoui ika tlen xkuajli, xkeman okimapeuj Jehová (Job 27:5). San ika, ipan seki tonaltin, Job okilkauj tlen melauak ueyi kijtosnekiya niman san tlanemiliaya itech yejua. Yejua kijtotoya ika xtlaj okichiuj tlen xkuajli. Job noijki kimachiliaya ika kimelauaya kimatis tleka tlajyouijtoya (Job 7:20; 13:24). Kanaj tiuelij tikasikamatij ken nomachiliaya Job. San ika, Jehová kimatiya ika Job xtlanemiliaya ken kinamiki niman okiyektlali. ¿Kenon okichiuj?

11, 12. ¿Itech tlenon okipaleuijkej makasikamati Job, niman kenon otlanankili?

11 Tikitaj tlenon Jehová okijli Job ipan capítulo 38 ontlami ipan 41 itech amoxtli Job. Jehová xokijli Job tleka tlajyouijtoya. Pampa Jehová  kinekiya kipaleuis makasikamati ika yejua melak pitentsin xijkon ken yejua. Okimachti Job ika onka tlen melak ueyi kijtosneki xijkon ken tlaueltin tlen kixnamiktoya (xpoua Job 38:18-20). * Itlajtoluan Jehová okipaleuijkej Job makipatla ken tlanemiliaya.

12 Ijkuak melak yotlajyouika Job, ¿kanaj chikauak ken okinots Jehová? Ka. Niman nion Job xijkon okimachili. Job okasikamat niman okitlasojkaitak itlajtolpaleuilis Jehová. Niman hasta okijto: “Ika yejon ninotlajtolkuepa itech tlen onikijto, niman ninoyolkuepa ipan tlalpoktli niman tlikonextli” (Job 42:1-6). Se telpochtli itoka Elihú noijki yokipaleuijka Job makipatla itlanemililuan (Job 32:5-10). Sakin ika Job okikak itlajtolpaleuilis Jehová niman okipatlak ken tlanemiliaya, Jehová okichiuj ika makimatikan oksekimej ika Job okiyolpakti pampa itech oyolmelaujkanen (Job 42:7, 8).

13. ¿Kenon tlen okijli Jehová ok kipaleuijtoya Job ijkuak yotlankaj itlajyouilisuan?

13 Tlen Jehová okijli Job ok kipaleuijtoya maski ijkuak tlajyouilistin tlen okixnamik yotlankaj: “Kuakon Jehová melak okiteochiuj Job ken otlamito ipan inemilis xijkon ken ijkuak opeuj”. Sakin “yejua noijki okinpix chikome ikoneuan tlakamej niman yeyi siuamej” (Job 42:12-14). Maski Job kintlasojtlaya yejuin ikoneuan, kuajli tikmatstokej ika kintejtemouaya ikoneuan akin omijkej. Niman kanaj xkeman okilkauj nochi tlajyouilistli tlen ipan onochiuj yejua niman ichanejkauan. Niman tla Job sakin ika yolik okasikamatstia tleka okixnamik tlatlatalistin, kanaj kemantika onotlajtolti tleka toTajtsin okikauili melak matlajyoui. Tla Job ijkon otlanemili, yejua ouel okilnamik tlen Jehová yokijlika. Yejuin ueliskia kiyolseuis niman kipaleuis matlanemili ken kinamiki (Sal. 94:19, nota).

¿Uelis titlanemiliskej itech iueyitlayekanalis Jehová niman xsan itech tlajyouilistli tlen tikixnamiki? (Xkita párrafo 14)

14. ¿Tlenon uelis tomachtiskej itech tlen ipan onochiuj Job?

14 Tla titlanemilia itech tlen ipan onochiuj Job, uelis techpaleuis matikpatlakan ken titlanemiliaj niman uelis techyolseuis. Amoxtli Job nopoua iuan tlen Jehová okinek manoijkuilo niman ijkon “nochi tlen ye uejkaui onijkuiloj ipan on Yektlajkuilojli, onijkuiloj para techmachtia. Onijkuiloj para ma tikpiakan totlamachalis itechkopa on ijyouilistli niman teyoltlalilistli yejuan techmaka on Yektlajkuilojli” (Rom. 15:4). Yejuin techmachtia ika tla melak titlanemiliaj itech totlaueluan, tikilkauaskej titlanemiliskej itech yejuin: manoteititi ika san Jehová melauak kinamiki tlayekanas. Ijkon ken Job, tikteititiaj ika tikpaleuiyaj  iueyitlayekanalis Jehová ijkuak tiyolmelaujkanemij itech maski tikixnamikij tlen melak ouijtika ipan tonemilis.

15. ¿Tleka kuajli tla tiyolmelaujkanemi ijkuak tikxikouaj tlaueltin?

15 Tlen ipan onochiuj Job uelis techyolseuis pampa teititia ika tlatlatalistin xkijtosnekij ika Jehová kualani touan. Ijkuak tikixnamikij tlatlatalistin, tiueliskej tikpaleuiskej iueyitlayekanalis Jehová (Prov. 27:11). Ijkuak titlaxikouaj, tikyolpaktiaj Jehová niman totlamachialis itech tlen tikchiaj chikaui (xpoua Romanos 5:3-5). Tlen ipan onochiuj Job techititia ika Jehová melak tetlasojtla niman teiknelia (Sant. 5:11, TNM). Tla tikpaleuiya iueyitlayekanalis Jehová, yejua techteochiuas. Tikmatiskej yejuin techpaleuis titlaxikoskej ika “ijyouilistli niman pakilistli” (Col. 1:11).

MATIKILNAMIKTOKAN TLEN MELAK UEYI KIJTOSNEKI

16. ¿Tleka noneki matoilnamiktikan ika melak ueyi kijtosneki manoteititi ika san Jehová melauak kinamiki tlayekanas?

16 Tikmatstokej ika uelis ouijtika yes titlanemiliskej itech manoteititi ika san Jehová melauak kinamiki tlayekanas ijkuak tikpiyaj tlaueltin. Hasta se pitentsin tlauejli uelis tikitaskej melak ueyi tla melak san itech titlanemiliaj. Ika yejon, nochipa noneki matoilnamiktikan ika melak ueyi kijtosneki tikpaleuiskej iueyitlayekanalis toTajtsin maski san tlenon matikixnamikikan.

17. ¿Kenon ijkuak chikauak tikchiuaj itekiyo Jehová techpaleuiya matikilnamiktokan tlen melak ueyi kijtosneki?

17 Tikchiuaskej chikauak itekiyo Jehová uelis techpaleuis matikilnamikikan tlen yemelak ueyi kijtosneki. Se neskayotl, se tokniuj itoka Renee okipix se derrame cerebral, nochipa kikokouaya itlaj, niman noijki kipiaya cáncer. Ijkuak nemiya ipan hospital kinnojnotsaya akin ompa tekitiyaj, oksekimej akin kualouayaj niman akin ontetlajpalouayaj. Sejpa ijkuak Renee onen hospital ipan ome semana uan tlajko, otenojnots 80 horas. Maski Renee kimatiya ika imikiskia, xkeman okilkauj tlen yemelak ueyi kijtosneki. Kipaleuis iueyitlayekanalis Jehová okichiuj makipiya yolseuilistli.

18. ¿Tlenon techmachtia tlen ipan onochiuj Jennifer itech tikpaleuiskej iueyitlayekanalis Jehová?

18 Noijki uelis tikpaleuiskej iueyitlayekanalis Jehová ijkuak tikixnamikij tlen xueyi, ken tlaueltin tlen tikpiyaj mojmostla. Se tokniuj itoka Jennifer onen yeyi tonajli ipan se aeropuerto kampa kichixtoya se avión tlen kuikaskia ichan. Pampa nion se xkisaya, Jennifer nomachiliaya iselti niman melak yosiaujka. Yejua ueliskia melak noikneliskia ipampa tlen ipan nochiujtoya. San ika, xokichiuj yejon, Jennifer okichiuili teoyotl Jehová makipaleui ika kinnojnotsas itech kuajli tlajtoltin oksekimej akin noijki tlamachixtoyaj ipan aeropuerto. Yejua melak miyekej okinnojnots niman miyek amatlajkuiloltin okintemakak. Jennifer okijto: “Nikmachilia ika Jehová onechteochiuj maski ouijtika tlen nikixnamiktoya niman onechyolchikauj manikteititi itokayo ken kinamiki”.

19. ¿Tleka ueli kimixmatij akin melauak kiueyichiuaj toTajtsin?

19 San itekipanojkauan toTajtsin melauak kasikamatij ika iueyitlayekanalis Jehová melak ueyi kijtosneki. Pampa kasikamatij yejuin kichiua ika makimixmatikan ken akin melauak kiueyichiuaj toTajtsin. Tinochimej noneki tikitaskej ika matikpaleuijtokan iueyitlayekanalis Jehová.

20. ¿Kenon nomachilia Jehová itech nochi tlen tikchiuaj niman ijkon tikpaleuiskej iueyitlayekanalis?

20 Jehová kita niman kitlasojkaita nochi tlen tikchiuaj ika tikpaleuiskej iueyitlayekanalis ijkuak nochipa tiktekichiuiliaj niman titlaxikouaj (Sal. 18:25). Ipan okse tlamachtijli tikasikamatiskej okseki tleka iueyitlayekanalis Jehová kinamiki matikpaleuikan niman kenon uelis tikchiuaskej.

^ párr. 4 Salmo 83:18: “Niman ijkon makimatikan tlaltikpakchanejkej ika tejua, akin motoka Jehová, san tejua tiUeyixtika ipan nochi tlaltikpaktli”.

^ párr. 7 Isaías 55:10, 11: “Pampa ijkon ken kiyaujtli niman seuktli ualeua itech iluikak, niman xnokuepa ompa hasta ijkuak yokitemiltijkej tlajli, niman kichiua matlatlakilti niman matlakisa, ijkon kimakas xinachtli tokaketl niman pan akin tlakua, ijkon notlajtol tlen kisa itech nokamak. Xnokuepas notech tla xtlaj nochiua, melauak kichiuas nochi tlen nejua nechyolpaktia, niman yemelak kuajli onkisas itech tlen nejua yoniktitlan manochiua”.

^ párr. 9 Job 1:9-12: “Aman tej, Satanás okinankili Jehová niman okijli: ‘¿Xkimojkaita Job toTajtsin san pampa nochi kimaka? ¿Xsan pampa tiktlajpiya iyeualiyan niman ichanejkauan niman nochi tlen kipiya? Nochi itekiyo yotikteochiuj, niman melak yomiyekiyakej iyolkauan ipan nochi tlaltikpaktli. Aman xkita, xkixtili nochi tlen kipiya niman tikitas tla xmitsuijuikaltis mixko’. Kuakon, Jehová okijli Satanás: ‘¡Xkita! Nochi tlen kipiya ipan moma onka. ¡San ika, yejua maka itlaj tikchiuilis!’. Kuakon Satanás ouajkisteuj ixpan Jehová”.

^ párr. 11 Job 38:18-20: “¿Tikasikamati kech ika ueyi tlaltikpaktli? Xnechijli, tla tejua tikmati nochi yejuin. ¿Kanon ualeua tlauijli? ¿Niman kanon onka tlayoualyotl, niman tikajsis tikonkauas kampa onka niman tikixmati ojtin tlen yauej ichan?”.