Xuiya kampa tlen onka ijtik

Xuiya kampa tlen kipiya

¿Kanon tikomintlachialtiaj toixtololojuan?

¿Kanon tikomintlachialtiaj toixtololojuan?

“Motech nikomintlachialtia noixtololojuan, tejua akin tinemi iluikak ipan motrono” (SAL. 123:1).

TLAKUIKALTIN: 143, 124

1, 2. ¿Tlenon kijtosneki tikonitstoskej Jehová?

TINEMIJ ipan “sanoyej xkuajli tonaltin”, kampa melak ouijtika tinemis, niman ok melak ouijtika yes hasta ijkuak Jehová kipopolos tlen xkuajli niman kichiuas maonia melauak yolseuilistli (2 Tim. 3:1). Ika yejon, kuajli tla totlajtoltiaj: “¿Kanon nontlachia ijkuak nikneki manechpaleuikan niman manechyekanakan?”. Kanaj nimantsin tikijtouaj ika tikonitaj Jehová. Niman melak kuajli tla ijkon titlanankiliaj.

2 ¿Tlenon kijtosneki tikonitstoskej Jehová? Niman ¿kenon uelis kuajli tikmatstoskej ika yejua tikonitstokej ijkuak tikixnamikij ouijtika tlaueltin? Yeuejkaui, se akin okijkuilo se salmo okijto ika melak noneki matikonitstokan Jehová ijkuak tiknekiskej matechpaleuikan (xpoua Salmo 123:1-4). * Okineskayoti yejuin ika tlen kichiua se tlapaleuijketl. Ijkuak okijto  ika se tlapaleuijketl san konitstika ima iteko, xsan kijtosnekiya ika kimatstoya ika iteko kimakaskia tlakuajli niman kitlajpiyas. Noijki okijtosnek ika noneki nochipa kuajli kitstos niman ijkon kimatis tlenon kineki iteko niman yejon kichiuas. Tejuamej noijki ijkon, noneki mojmostla tomachtiskej iTlajtol toTajtsin, pampa ijkon uelis tikitaskej noso tikasikamatiskej tlenon kineki Jehová niman yejon tikchiuaskej. Tla ijkon tikchiuaj, kuajli tikmatstoskej ika yejua techpaleuis (Efes. 5:17).

3. ¿Tlenon uelis kichiuas maka sa matikonitstokan Jehová?

3 Maski tikmatij ika noneki nochipa tikonitstoskej Jehová, kemantika uelis tikilkauaskej. Yejuin tlen ipan onochiuj Marta, akin Jesús iuan nouikaya. Yejua xok okonitak Jehová pampa “sanoyej tekimikiya” (Luc. 10:40-42). Tla ijkon ipan onochiuj se siuatl akin yolmelaujki katka ijkuak Jesús iuan nemiya, xkipiya ika techmojkatlachialtis tla tejuamej noijki ijkon topan nochiua. Kuakon, ¿tlenon ueliskia kichiuas maka sa matikonitstokan Jehová? Tlen kichiuaj oksekimej. Niman ipan yejuin tlamachtijli tikitaskej kenon uelis techijtlakos. Noijki tikitaskej tlenon uelis tikchiuaskej niman ijkon nochipa tikonitstoskej Jehová.

SE TLAKATL YOLMELAUJKI KIPOLOUA SE UEYI TLATEOCHIUALISTLI

4. ¿Tleka ueliskia techmojkatlachialtis ika Moisés xokalak ipan Tlajli tlen yokimijlikaj kinmakaskej?

4 Kuajli tikmatstokej ika Moisés kitejtemouaya itlayekanalis Jehová. Xsan yejon, yejua “kitstikatka Dios yejuan xakaj ueli kita” (xpoua Hebreos 11:24-27). Biblia techijlia ika “xkeman onen okse teotlajtoketl ipan Israel ijkon ken Moisés, akin Jehová melak kuajli okixmat” (Deut. 34:10). San ika, maski kuajli nouikaya iuan Jehová, okipolo se ueyi tlateochiualistli, yejua xouel okalak ipan Tlajli tlen yokimijlikaj kinmakaskej (Núm. 20:12). ¿Tlenon opanok?

5-7. a) ¿Tlen tlauejli okipixkej israelitas ijkuak san kemach okiskaj itech Egipto? b) ¿Tlenon okichiuj Moisés?

5 Onochiuj se ueyi tlauejli ijkuak nion xpanouaya ome metstli ika israelitas okiskej itech Egipto, niman xiajsiyaj ipan tepetl Sinaí. Israelitas opeuj kualanij pampa xtlaj onkatka atl niman okitsajtsilitoj Moisés. Melak oueyiyak tlauejli, kuakon, Moisés okitlajtlanili Jehová: “¿Tlenon nikchiuas iuan yejuin kalpan? ¡Sa achijtsin poliui niman nechtemojmotlaskej!” (Éx. 17:4). Jehová okinankili, niman okijli tlenon nonekiya kichiuas: ika itlakouj kipiaya ika kiuitekis se tetl tlen onkatka Horeb, niman kuakon, ompa uajkisaskia ueyi atl. Biblia kijtoua: “Moisés ijkon okichiuj imixpan tlayekankej itech Israel”. Israelitas oatlikej, oaixuikej niman ijkon onoyektlali tlauejli (Éx. 17:5, 6).

6 Biblia kijtoua ika Moisés okitokayoti Masah kampa nemiyaj, tlen kijtosneki “Tetlatlatalistli”, niman Meribá, tlen kijtosneki “Tlauejli”. ¿Tleka okinamik ijkon makitokayotikan? “Pampa israelitas okipixkej tlauejli niman pampa okitlatlatakej Jehová ijkuak okijtokej: ‛¿Touan nemi Jehová noso ka?ʼ” (Éx. 17:7).

7 ¿Kenon okitak Jehová tlen opanok ipan Meribá? Okitak ika israelitas yejua kixnamiktoyaj niman noijki itlayekanalis, niman xsan Moisés kixnamiktoyaj (xpoua Salmo 95:8, 9). * Kuajli nestika  ika israelitas okichiujkej tlen xkuajli. San ika, Moisés kuajli tlen okichiuj, pampa onopaleui itech Jehová niman okichiuj tlen okinauati.

8. ¿Tlen tlauejli okipixkej israelitas ijkuak itlamiskia ika kistinemiskiaj ipan tlaluaktli?

8 Kanaj 40 xiujtin sakin, ijkuak itlamiskia ika kistinemiskiaj ipan tlaluaktli, oksejpa ijkon opanok. Israelitas nemiyaj kampa noijki kitokayotiskiaj Meribá. San ika, yejuin onkatka nisiuj Qadés, niman xuejka onkatka kampa peuaya Tlajli tlen yokimijlikaj kinmakaskej. * Oksejpa, israelitas okualankej pampa xkipiayaj atl (Núm. 20:1-5). San ika, aman Moisés melak onopopolo.

9. ¿Tlenon okinauati Jehová makichiua Moisés, san ika, tlenon okichiuj yejua? (Xkita tlaixkopinajli kampa peua tlen tomachtijtokej).

9 ¿Tlenon okichiuj Moisés ijkuak israelitas oksejpa oteixnamijkej? Oksejpa okitlajtolti Jehová tlenon nonekiya kichiuas. Aman, toTajtsin xokijli makiuiteki tetl. Okinauati makajsi itlakouj, makinsentlali nochimej iyeualiujyan se ueyi tetl niman makinotsa yejon tetl (Núm. 20:6-8). San ika, Moisés xokinots yejon tetl. Yejua melak kualantoya niman tlauelmiktoya, kuakon, okintsajtsili akin ompa nemiyaj: “¡Aman xtlakakikan, nemejuamej akin nenteixnamikij! ¿Nenkinekij matimechkixtilikan atl itech yejuin ueyi tetl?”. Sakin, xsan sejpa okiuitek tetl, okpa okichiuj (Núm. 20:10, 11).

10. ¿Kenon okitak Jehová tlen okichiuj Moisés?

10 Jehová melak okualan iuan Moisés (Deut. 1:37; 3:26). ¿Tleka? Kanaj miyek onkatka tlen ika okualan. Kanaj xokuelitak ika aman xokichiuj tlen okinauatijka.

11. Ijkuak Moisés okiuitek tetl, ¿tleka israelitas ueliskiaj kinemiliskej ika Jehová xokichiujka se milagro?

11 Matikitakan okse tlemach tlen okichiuj ika Jehová makualani. Temej tlen onkatkaj ipan kachtopa Meribá kitokayotiaj granito, yejuin tetl chikauak noso tepitstik. Maski melak chikauak tikuitekis yejon tetl, xakaj kichia ika itech mauajkisa atl. San ika, kampa okse Meribá onkatkaj temej tlen kintokayotiaj calizas, niman yejuin temej xijkon ken granito. Atl ueli nomana ijtik tlajli kampa onokej yejuin temej, pampa yejuin tetl kichichina atl, niman tlaltikpakchanejkej uelij ompa konkuij. Kuakon, ijkuak Moisés okiuitek tetl niman xsan okinots, israelitas kanaj okinemilijkej ika atl kisaya pampa ompa yonomanka atl niman xpampa Jehová okichiujka se milagro. *

KENON OTEIXNAMIK MOISÉS

12. ¿Tlenon noijki kanaj okichiuj ika Jehová makualani iuan Moisés niman Aarón?

12 Onka okse tlen kanaj okichiuj ika Jehová makualani iuan Moisés niman Aarón. Matikitakan tlen Moisés okijli nochi kalpan: “¿Nenkinekij matimechkixtilikan atl itech yejuin ueyi tetl?”. Ijkuak okijto “matimechkixtilikan”, kanaj yejua noteneujtoya niman kiteneujtoya Aarón. Tlen okijto kuajli okiteititi ika xkitlakaitstoya Jehová, akin okichiuj yejon milagro. Nesi ika kema ijkin opanok ipampa tlen kijtoua Salmo 106:32, 33: “Yejuamej okikualanijkej ijkuak nemiyaj  Meribá kampa onkatka atl, niman inpampa, Moisés okixnamik tlen xkuajli. Yejuamej okikualanijkej, niman yejua xokinemili tlen okijto ika ikamak * (Núm. 27:14). Moisés xokitlakaitak Jehová ken kinamikiya. Yejua okijli Moisés niman Aarón: “Nemejuamej onenkixnamijkej tlen onemechnauatij” (Núm. 20:24). Kuajli tikitaj ika okichiujkej se ueyi tlajtlakojli.

13. ¿Tleka okinamik tlen Jehová xokikauili makichiua Moisés?

13 Jehová kichiaya ika Moisés niman Aarón nochipa makitlakamatikan, pampa yejuamej kiyekanayaj ikalpan (Luc. 12:48). Yeuejkaui, Jehová yokimijlika miyekej israelitas ika xkalakiskiaj Canaán pampa xokitlakamatkaj (Núm. 14:26-30, 34). Kuakon, kinamikiya ika Jehová noijki ijkon makichiuili Moisés: xkikauiliskia makalaki ipan Tlajli tlen yokimijlikaj kinmakaskej.

TLEN OKICHIUJ MAONIA TLAUEJLI

14, 15. ¿Tlenon okichiuj ika Moisés mateixnamiki?

14 ¿Tlenon okichiuj ika Moisés mateixnamiki? Matikitakan oksejpa tlen kijtoua Salmo 106:32, 33: “Yejuamej okikualanijkej ijkuak nemiyaj Meribá kampa onkatka atl, niman inpampa, Moisés okixnamik tlen xkuajli. Yejuamej okikualanijkej, niman yejua xokinemili tlen okijto ika ikamak”. Maski israelitas okixnamijkaj Jehová, Moisés yejua akin melak okualan. Pampa xonotelti, otlajtotikis niman xokinemili tlenon ueliskia panos.

15 Ipampa tlen oksekimej kichiuayaj, Moisés okilkauj ika nonekiya konitstos Jehová. Ijkuak kachtopa okualankej israelitas pampa xonkatka atl, Moisés okichiuj tlen kuajli (Éx. 7:6). San ika, kanaj aman yosiaujka niman yoajmankamijka pampa yopanoka miyek xiujtin ika kiyekanaya yejon kalpan tlen xkinekiya tetlakamatis. Kanaj melak otlanemili ipan tlen kimachiliaya niman xokinemili kenon kitlakaitas Jehová.

16. ¿Tleka noneki kuajli matikitakan tlen okichiuj Moisés?

16 Tla se teotlajtoketl ken Moisés okilkauj ika nonekiya konitstos Jehová niman otlajtlako, tejuamej noijki uelis topan nochiuas yejon. Ijkon ken yejua, tejuamej sa achijtsin poliui ika tikalakiskej ipan yenkuik tlaltikpaktli tlen toTajtsin yotechijli techmakas (2 Ped. 3:13). Xtiknekij tikpoloskej yejuin ueyi tlateochiualistli. San ika, tla tiknekij tikseliskej, noneki nochipa tikonitstoskej Jehová niman nochipa tikyejyekoskej tikchiuaskej tlen yejua kineki (1 Juan 2:17). ¿Tlenon tiuelij itech ken onopopolo Moisés?

MAKA OKSEKAN MATECHONTLACHIALTI TLEN KICHIUAJ OKSEKIMEJ

17. ¿Tlenon techpaleuis maka matajmankamikikan?

17 Maka matajmankamikikan. Kemantika, sa no yejua tlauejli miyekpa tikixnamikij. San ika, Biblia techijlia yejuin: “Ma ka tisiauikan para tikchiuaskej on tlen kuajli, pampa ijkuak ajsis on tonajli para tipixkaskej, tikpixkaskej on kuajli xinachtli tla xtiksiaukauaskej” (Gál. 6:9; 2 Tes. 3:13). Ijkuak tikixnamikij tlen techajmankamiktia noso ijkuak xtiuelij touikaj iuan yakaj, ¿tikteltiaj tlen tikchiuaj niman noijki tlen tikijtouaj? (Prov. 10:19; 17:27; Mat. 5:22). Tla oksekimej techkualaniaj, matijkauilikan ika Jehová makimititi ikualankayo (xpoua Romanos 12:17-21). Yejuin tiuelij tikchiuaj ijkuak tikonitstokej toTajtsin  niman ijkuak tikchiaj ika yejua makichiua tlen nonekis ijkuak yejua kitas ika noneki. Tla xtikchiuaskiaj yejuin niman san tejuamej totlakuepiltiskej, kuakon, kentla xtiktlakaitaskiaj Jehová.

18. ¿Tlenon noneki tikilnamikiskej ijkuak techmakaskej tlanauatiltin tlen ika toyekanaskej?

18 Kuajli matiktlakamatikan tlen yenkuik technauatiaj. Ijkuak Jehová techmaka yenkuik tlanauatiltin itechkopa ikalpan, noneki nimantsin tikchiuaskej tlen technauatiaj. Xtiktejtemoskej tikchiuaskej ken yeuejkaui tikchiuayaj (Heb. 13:17). Noijki, noneki totlajpiyaskej maka tikchiuaskej okseki tlen xijkuiliujtika (1 Cor. 4:6). Tla ijkon tikchiuaj, tikteititiskej ika kuajli tikonitstokej Jehová.

¿Tlenon tiuelij itech tlen okichiuj Moisés ijkuak oksekimej onopopolojkej? (Xkita párrafo 19).

19. ¿Tlenon uelis tikchiuaskej niman ijkon xijtlakauis ken touikaj iuan Jehová ijkuak tikitaskej ika oksekimej nopopolouaj?

19 Maka matijkauilikan ika maijtlakaui ken touikaj iuan Jehová ijkuak tikitaskej ika oksekimej nopopolouaj. Tla nochipa tikonitstokej Jehová, xtijkauiliskej ika tlen kichiuaj oksekimej matechajmankamikti noso makijtlako ken touikaj iuan Jehová. Yejuin melak noneki kuajli makimatstokan akin tlayekanaj ipan ikalpan toTajtsin, ijkon ken Moisés. Melauak ika tinochimej noneki tokojtiliskej tiktlakamatiskej Jehová niman ijkon timakisaskej (Filip. 2:12). Tla tikpiyaj se tekitl ipan ikalpan toTajtsin, noijki miyek notlajtlanis totech (Luc. 12:48). Tla yemelak tiktlasojtlaj Jehová, xitlaj uelis techxelos itech “itetlajsojtlalis Dios” (Sal. 119:165; Rom. 8:37-39).

20. ¿Tlenon tiknekij tikchiuaskej?

20 Ipan yejuin ouijtika tonaltin, kuajli matikonitstokan akin yeuatika ipan itrono ne iluikak niman ijkon uelis tikmatiskej tlenon kineki matikchiuakan. Maka keman tijkauiliskej ika tlen kichiuaj oksekimej makijtlako ken touikaj iuan toTajtsin. Tlen ipan onochiuj Moisés techmachtia itlaj tlen melak ueyi kijtosneki. Maka matikchiuakan tlen xkuajli ijkuak tikitaskej ika oksekimej nopopolouaj, noneki nochipa matikonitstokan “toTajtsin Jehová hasta ijkuak matechteochiua” (Sal. 123:1, 2).

^ párr. 2 Salmo 123:1-4: “Motech nikomintlachialtia noixtololojuan, tejua akin tinemi iluikak ipan motrono. Ijkon ken tlakeualtin konitstokej ima inteko, niman ken ixtololojuan se siuatlakeuajli konitstika ima iteko akin siuatl, ijkon tejuamej tikonitstokej toTajtsin Jehová hasta ijkuak matechteochiua. Xtechteochiua, oh Jehová, xtechteochiua, pampa tejuamej melak xtechtlakaitaj. Melak yotechpijpinaujtijkej akin sa no yejuamej intech tlaneltokaj niman melak xtechtlakaitaj akin noueyimatij”.

^ párr. 7 Salmo 95:8, 9: “Maka xmoyoltechikauakan ken ipan Meribá, ken ijkuak ninnemiyaj Masah, ipan tlaluaktli, ijkuak nemouejkachanejkauan onechtlatlatakej; yejuamej onechixnamijkej, maski yokitakaj tlen onikchiuj”.

^ párr. 8 Maski kampa aman nemiyaj noijki itoka katka Meribá, xsa no yejua tlen otikteneujkej ipan párrafo 6, yejon nokauaya nisiuj itech Refidim niman noijki okitokayotijkej Masah. Nochi ojkan okintokayotijkej Meribá pampa ompa okipixkaj tlauejli (xkita mapa ipan sección 7 itech amatlajkuilojli Tlen tepaleuiya timomachtis iTlajtol toTajtsin).

^ párr. 11 Itech yejuin tlen opanok, temachtijketl John A. Beck, kijtoua: “Se tlaneltokijli judío kijtoua ika yejon tlakamej akin oteixnamijkej okijtokej: ‘Moisés kixmatstika yejuin tetl. Tla kineki techititis ika ueli kichiua milagros, kuakon, matechkixtili atl itech okse tetl’”. San ika, yejuin itlaj tlen san noneltoka.

^ párr. 12 Xkita “Preguntas de los lectores” ipan La Atalaya itech 15 octubre 1987.