Xuiya kampa tlen onka ijtik

Xuiya kampa tlen kipiya

 TLAJTOUA ITECH INEMILIS

Tlen okipaleui manoskalti notlaneltokil

Tlen okipaleui manoskalti notlaneltokil

YEJON yeuajli melak ouijtika katka, tixpan onkatka ueyi atentli itoka Níger, kanaj se kilómetro uan tlajko ika patlauak. Ipan país Nigeria onkatka guerra, kuakon, tla tikpanauiskiaj yejon atentli uelis timikiskiaj. San ika, nonekiya tikchiuaskej. Niman miyekpa otikchiujkej. Kachtopa manimechnojnotsa itech notajuan niman sakin nimechijlis kenon onejkok nikan.

Notaj, John Mills, onoapolakti Nueva York ipan 1913, ijkuak kipiaya 25 xiuitl. Tokniuj Russell okinmakak tlamachtijli akin onoapolaktijkej. Sakin, notaj oyaj ipan isla de Trinidad, kampa ononamikti iuan se akin melak kuelitaya nomachtis Biblia itoka Constance Farmer. Ompa okipaleui William Brown okiteititijkej “Foto-Drama de la Creación” hasta 1923, ijkuak tokniuj Brown niman isiuauj okintitlankej África Occidental. Notajuan akin tlapejpeniltin katkaj onokaujkej Trinidad.

NOTAJUAN MELAK TETLASOJTLAYAJ

Notajuan okipixkej chiknaui ikoneuan. Akin yenkuiyotl okitokayotijkej Rutherford, pampa ijkon itoka katka akin kiyekanaya Sociedad Watch Tower. Sakin, onitlakatiko nejua ipan 30 de diciembre de 1922. Onechtokayotijkej Woodworth (maski san nechijliayaj Worth) pampa akin kiyekanaya The Golden Age (¡Despertad!) itoka katka Clayton Woodworth. Xmiyek xiuitl otomachtijkej ipan escuela pampa nochipa otechijlikej matiknemilikan kenon tiktekichiuiliskej toTajtsin. Nonan melak ueltoya techtlanemililtis ika Biblia. Niman notaj kuelitaya techpouilis historias itech Biblia niman kitekitiltiaya ixayak, ikamak niman imauan niman ijkon matiknemilikan tlen techpouilijtoya.

Tlen okichiuj kuajli okisato. Itech makuiltin akin titlakamej, yeyimej otiajkej Escuela de Galaad niman yeyimej nokniuan siuamej otekitkej ken precursoras miyek xiuitl ijkuak onenkej Trinidad y Tobago. Pampa kuajli otechmachtijkej niman kuajli tlen kichiuayaj, totajuan okichiujkej ika nochipa matiknekikan tinemiskej “ipan itiopan toTEKO” ken kijtoua Salmo 92:13. Pampa melak techyolchikauayaj, okichiuj nochipa matinemikan niman matoskaltikan “ipan itiopan toTEKO”.

Nosentlaliayaj tochan ijkuak precursores ontenojnotsayaj, tlajtouayaj itech tokniuj  George Young, se misionero chanej Canadá akin oyajka Trinidad. Niman, notajuan pakiyaj ijkuak tlajtouayaj itech akin imiuan tenojnotsayaj, tokniuj Brown iuan isiuauj, akin nemiyaj África Occidental. Nochi yejuin onechyolchikauj manipeua manitenojnotsa ijkuak nikpiaya majtlaktli xiuitl.

TLEN KACHTOPA ONIKCHIUJ

Ipan yejon tonajli, revistas tlen tiktemakayaj kijtouayaj tlen xkuajli kichiuayaj tlaneltokiltin tlen xmelajkej niman ken xkuajli tlayekanayaj tekiuajkej. Pampa okualankej, teopixkej okichiualtijkej akin tekiuajtitoya Trinidad makijto ika xok uelis notekitiltiskiaj amatlajkuiloltin itech Watch Tower, yejuin opanok ipan 1936. Otikimiyankej, san ika, ok otikintemakakej hasta ijkuak otlankej. Tikchiuayaj marchas, ijkon tontenojnotsayaj niman tiayaj ipan bicicletas tikimitkiyaj amamej pitentsitsintin niman uejueyimej. Otajsikej hasta kampa melak uejka itech yejon isla, imiuan akin tenojnotsayaj ipan se carro tlen kipiaya altavoz. Melak temojkatlachialti tlen nochiuaya, yejon okichiuj maninoapolakti ijkuak nikpiaya 16 xiuitl.

Grupo tlen nemiya Tunapuna niman icarro tlen kipiaya altavoz.

Tlen yokichiujkaj notajuan niman tlen nopan yonochiujka onechyolchikauj maninochiua misionero. Ijkuak ipan 1944 oniaj Aruba onitenojnotsato iuan tokniuj Edmund Cummings ok niknekiya ninochiuas misionero. Melak otechyolpakti ika majtlaktli okilnamijkej imikilis Cristo ipan 1945. Opanok san se xiuitl ijkuak onochiuj kachtopa tlanechikojli ipan yejon isla.

Tlen kualtsin topan onochiuj Oris niman nejua.

Xouejkauj, oniknojnots Oris Williams, akin iuan nitekitiya. Yejua melak tlaneltokaya itech tlen yokimachtijkaj. San ika, ijkuak onomachti ika Biblia, ouel tlen yemelak kijtoua iTlajtol toTajtsin niman onoapolakti ipan 5 de enero de 1947. Sakin, otouelitakej niman otonamiktijkej. Ipan noviembre de 1950 onochiuj precursora. Topan onochiuj tlen melak kualtsin.

TLEN OTIKCHIUJKEJ NIGERIA

Ipan 1955, otechnotskej ipan Escuela de Galaad, kuakon, otijkaujkej totekiyo, tokal niman okseki tlemach, niman otijkaujteujkej Aruba. Ipan 29 de julio de 1956, otlan tomachtiaj ipan Escuela de Galaad número 27 niman otechtitlankej Nigeria.

Imiuan Betelitas akin chantij Lagos (Nigeria), ipan 1957.

Oris okijto ijkuak otlanemili itech yejon tonaltin: “Iespíritu Jehová mitspaleuis xkixnamiki tlen ouijtika ijkuak timisionero yes. Noueuentsin kinekiya misionero yes, niman nejua xkeman onitlanemili itech yejon. Nejua nikuelitaya ninemis nochan niman nikinpiyas nokoneuan. San ika, onikpatlak tlen niknemiliaya ijkuak onikasikamat ika nonekiya manotenojnotsa itech iTlajtol toTajtsin. Kuakon, ijkuak otikiskej itech Galaad, kuajli yoniknemilijka ika nontenojnotsas ken misionera. Ijkuak otitlejkokej ipan Barco Queen Mary, tokniuj Worth Thornton, akin tekitiya ipan ioficina tokniuj Knorr, otechijli kuajli matiakan niman noijki okijto ika titlapaleuiskiaj Betel. Melak oninajman. San ika, nimantsin oninomat niman onikuelitak tlen nikchiuaya. Miyek tekitl onikchiuj Betel. Melak onikuelitak ijkuak nikinseliaya tokniuan. Nikuelitaya nitenotsas, niman yejon tekitl kichiuaya manitlajtlajto imiuan tokniuan akin chantij Nigeria. Miyekej yejkoyaj ika miyek tlalpoktli, yosiaujkaj, amikiyaj niman apismikiyaj. Melak nikuelitaya nikinpaleuis niman ijkon kuajli manomachilikan. Nochi yejon kiueyichiuaya Jehová, ika yejon melak nechyolpaktiaya”. Kema, nochi ken tiktekichiuiliayaj Jehová techpaleuiaya manoskalti totlaneltokil.

Ipan 1961, ijkuak otosentlalijkaj Trinidad iuan tochanejkauan, tokniuj Brown otechijli ken yotekichiujka África. Kuakon, nejua onikimijli ika miyek tekitl nochiujtoya Nigeria. Tokniuj Brown onechnapalo niman okijli notaj: “Johnny, tejua xkeman otiaj África san ika Woodworth, kema”. Niman notaj okijto: “Ijkon xtekitito Worth, maka xkajkaua”. Tlen onechijlikej yejon akin youejkaujkaj kitekichiuiliayaj Jehová okichiuj melak manikneki kuajli manikchiua notekiyo.

William Brown (kixmatiyaj ken Brown el de la Biblia) niman isiuauj, Antonia, melak otechyolchikaujkej.

Se ueyi tlateochiualistli ika ipan 1962 oniaj ipan Escuela de Galaad número 37, kampa  onechmachtijkej 10 metstli. Tokniuj Wilfred Gooch, akin kiyekanaya sucursal tlen onka Nigeria, oyaj ipan Escuela de Galaad número 38 niman okititlankej Inglaterra, niman onechpanoltilijkej itekiyo. Onikchiuj ken tokniuj Brown, miyekan oniaj, yejon okichiuj manikimixmati niman manikintlasojtla tokniuan akin chantiyaj ipan yejon país. Maski xkipiayaj miyek tlemach tlen kipiyaj oksekimej ipan okseki países, melak pakiyaj, yejon kiteititiaya ika xnonekiya tomintsin noso tikpiyas miyek tlemach tla tikneki tipakis. Maski xkipiayaj miyek tomin, ipan tlanechikoltin ajsiyaj melak chipaujkej niman kuajli noyektlaliayaj. Miyekej ajsiyaj ipan ueyi tlanechikojli ipan camiones niman bolekajas, * autobuses tlen tlapojtoyaj, ompa melak notekitiltiayaj yejon autobuses. Niman, miyekej ompa kijkuilouayaj tlen tepakti, ken yejuin: “Miyek tlachipintli ika atl kichiuaj se océano”.

¡Melauak tlen kijtouayaj yejon tlajtoltin! Nochi tlen se kichiua tepaleui; niman tejuamej otikchiujkej tlen tiuelij. Ipan 1974, Nigeria okipix 100,000 tenojnotskej noijki ijkon ken Estados Unidos. Tekitl melak ueyixtoya.

Ijkuak ijkon panotoya, opeuj guerra ipan Nigeria, tlen opeuj ipan 1967 niman otlan ipan 1970. Miyek metstli, sucursal xok itlaj okimat itech akin chantiyaj inakastlan atentli Níger. Xsan ijkon tokauaskiaj, nonekiya tikimitkiliskiaj amatlajkuiloltin. Ken onikijto ijkuak onipeuj, miyekpa otikpanauijkej yejon atentli, tikchiuayaj teoyotl niman titlaneltokayaj itech Jehová.

Nikilnamiki yejon kentla kemach yopanoka. Miyek tlen tikixnamikiyaj: nemiyaj soldados, kokolistli... Ijkuak tikpanauiayaj yejon atentli tikmatstoyaj ika ueliskia timikiskej. Melak ouijtika otipanokej kampa nemiyaj soldados, san ika, más ouijtika niman temojti katka tipanos Biafra. Se yeuajli, onikpanaui yejon atentli ika se canoa, ononeuj de Asaba hasta Onitsha niman onajsik Enugu onikinyolchikauato tlayekankej ipan circuito. Okse tonajli onikinyolchikauato tlayekankej akin nemiyaj Aba, kampa xkinkauiliayaj matlatlikuiltikan ika yeuajli. Ijkuak ninemiya Port Harcourt, ononek nimantsin titlamiskej tlanechikojli pampa soldados federales yokalajkaj Biafra.

Yejon tlanechikoltin melak nonekiyaj pampa ompa tikimilnamiktiayaj tokniuan ika Jehová kintlasojtlaya, kintlajpiyaskia niman noijki ompa tikimijliayaj ika maka manokalaktikan ipan política niman ika san sekan manemikan. Tokniuan ouel omelajkanenkej itech tlen okixnamijkej. Okiteititijkej ika xkintlauelitayaj okseki tribus, onotlasojtlakej niman san sekan onenkej. Nipaki ika imiuan oninen itech tlen okixnamijkej.

Ipan 1969, tokniuj Milton Henschel okiyekan Ueyi Tlanechikojli iuan Miyekej Países “Paz en la Tierra” ipan estadio de los Yankees (Nueva York). Nejua onikpaleui niman miyek oniuel itech. Melak kuajli ika onikpaleui pampa ipan 1970 onochiuj se Ueyi tlanechikojli iuan Miyekej países, itoka “Hombres de buena voluntad” ipan Lagos (Nigeria). Pampa kemach yotlanka guerra, yejuin san ouel onochiuj ika itlateochiualis Jehová. Oyajkej 121,128 tlaltikpakchanejkej niman onochiuj ika 17 tlajtoltin, xkeman ijkon panouaya. Tokniuan Knorr niman Henshel imiuan oksekimej oyejkokej, ipan aviones tlen ualeuayaj Estados Unidos niman Inglaterra, okitakej kenon melak miyekej onoapolaktijkej, ken ijkuak onochiujka ipan Pentecostés, 3,765 onoapolaktijkej. Niknemilia ika xkeman ijkon melak onikpix tekitl ken ipan yejon ueyi tlanechikojli. Melak miyekej opeujkej tenojnotsaj.

Ueyi Tlanechikojli iuan Miyekej Países itoka, “Hombres de buena voluntad” ononechikojkej 121,128 tlaltikpakchanejkej ika 17 tlajtoltin, se tlajtojli itoka ibo.

Oninen Nigeria ipantsin 30 xiuitl, kemantika ken tlayekanketl ipan circuito niman tlayekanketl itech nochi África Occidental. Misioneros melak kitlasojkamatiyaj makinyolchikauakan. Nejua melak nikuelitaya nikimijlis ika xkimilkauayaj. Yejuin tekitl onechmachti ika tokniuan kinekij manajmanakan inpampa niman ijkon makitekichiuilikan Jehová, machikaujtokan niman san sekan manemikan.

 San ika itlapaleuilis Jehová ouel otikixnamijkej kokolistli niman guerra. Nochipa kuajli otikitakej kenon otechteochiuj. Oris kijtoua:

“Tiomemej miyekpa otikpixkej malaria (paludismo). Se tonajli Worth oajsik hospital xok itlaj kimatiya. Onechijlikej ika xok kixikoskia, san ika, onipak ika oksejpa opajtik. Ijkuak otlachix okinojnots enfermero itech iTekiuajyo toTajtsin, akin itoka katka Nwambiwe. Sakin, otikitatoj niman ijkon otikpaleuijkej manomachti Biblia. Okiseli tlen onomachti niman onochiuj tlayekanketl ipan kalpan Aba. Nejua noijki onikinpaleui miyekej, noijki onikinpaleui musulmanes akin onochiujkej iteixpantijkauan Jehová. San ika, melak otechyolpakti ika otikimixmatkej niman otikintlasojtlakej nigerianos, ken nemij, ken kichiuaj niman intlajtol”.

Yejuin okse tlen otiuelkej: tla tiknekiyaj kuajli tonkisaskej kampa xtochan, nonekiya tikintlasojtlaskej tokniuan maski yejuamej xijkon ken tejuamej.

YENKUIK TEKITL

Ipan 1987 otechpatlakej, titekitiyaj Betel tlen onkatka Nigeria niman aman otechtitlankej ipan se kualtsin isla de Santa Lucía. Melak kualtsin katka, san ika, noijki kipiaya tlen ouijtika. Ijkuak otinenkej África, ompa tlakamej nonamiktiayaj iuan miyekej siuamej, san ika, Santa Lucía miyekej san sekan nemiyaj, san ika xnonamiktiayaj imixpan tekiuajkej. ToTajtsin iTlajtol okichiuj manopatlakan miyekej akin otikinmachtijkej.

Oniktlasojtlak Oris ika nochi noyojlo ipan 68 xiuitl tlen iuan oninen.

Oajsik tonajli ijkuak xok tichikaujkej katkaj. Kuakon, Grupo akin Tlayekana ipan nochi tlanechikoltin otechejkuani, niman ipan 2005 otechtitlan Brooklyn (Nueva York) ipan oficina kampa noyekanaj nochi sucursales. Ipan 2015, Oris omik, niman xuelis nikijtos kenon melak tekoko ijkuak yakaj miki. Mojmostla, niktlasojkamachilia Jehová ipampa Oris. Melak kuajli iuan oninopaleui niman yejua melak tetlasojtlaya. Oniktlasojtlak ika nochi noyojlo itech 68 xiuitl. Otikitakej ika tiyolpakis iuan moixnamik niman tiyolpakis ipan tlanechikojli san tla tiktlakaita tlanauatijkayotl, nochipa titetlapopoluiya, tiyolyemanki niman tikteititia okseki kualneskayomej.

Ijkuak tajmanayaj noso xkuajli tomachiliayaj, nochipa otiktejtemojkej Jehová. Yejua nochipa otechpaleui niman otikitakej kenon kuajli onkisaya tlen tikchiuayaj. Niman ok poliui yejkos tlen melak kualtsin (Is. 60:17; 2 Cor. 13:11).

Jehová okiteochiuj intekiyo notajuan niman oksekimej tokniuan ijkuak onenkej Trinidad y Tobago. Noijtoua ika aman nemij 9,892 iteixpantijkauan Jehová. Miyekej tokniuan okipaleuijkej kachtopa tlanechikojli kampa onitekichiuj tlen onka Aruba. Ipan yejuin isla aman onka 14 tlanechikoltin. Ipan Nigeria aman nemij 381,398 tenojnotskej. Niman ipan isla Santa Lucía nemij 783 akin kitekichiuilijtokej Jehová.

Inikpiya ipantsin 90 xiuitl. Salmo 92:14 kijtoua ika akin nochipa nemij ipan iteopan Jehová “ijkuak ye ueuentsitsimej yeskej, sanken tlakiskej nochipa kojtijkej yeskej, niman xoxojkej yeskej”. Melak niktlasojkamachilia Jehová pampa onechkauili maniktekichiuili. Tlen onechmakakej notajuan onechpaleui maniktekichiuili toTajtsin ika nochi noyojlo. Ipampa itlasojtlalis tlen xkeman tekaua, yejua yonechpaleui manikiskalti notlaneltokil (Sal. 92:13).

^ párr. 18 Xkita ¡Despertad! del 22 de junio de 1972, páginas 24 a 26.