Xuiya kampa tlen onka ijtik

Xuiya kampa tlen kipiya

 TLAJTOUA ITECH INEMILIS

Jehová nochi ueli kichiua

Jehová nochi ueli kichiua

“MIKILISTLI xok onias, niman akin yomijkej oksejpa nemiskej”. Nosiuatsin, Mairambubu, okikak yejuin tlajtoltin ijkuak yaya ipan se autobús. Melak okinek kimatis okseki. Kuakon, ijkuak onotelkets autobús niman akin ompa yayaj otemokej, okajsito yejon siuatl akin okijtoka yejon. Itoka katka Apun Mambetsadykova niman katka se iteixpantijkauj Jehová. Ipan yejon tonaltin, ueliskia tikpiyas tlauejli tla titlajtouaya imiuan iteixpantijkauan Jehová, san ika, tlen Apun otechmachti okipatlak tonemilis.

TISETONALOUAYAJ TITEKITIYAJ

Onitlakat ipan xiuitl 1937 ipan se koljós noso granja kampa miyekej tekitiyaj tlen onkatka nisiuj Tokmak (Kirguistán). Nochanejkauan ualeuaj intech akin kimixmatij ken kirguís, niman titlajtouaj kirguís. Notajuan tokayaj niman setonalouayaj tekitititoyaj ipan yejon koljós. Akin ompa tekitiyaj kiminmakayaj tlen kikuaskej, san ika, kintlaxtlauiliayaj ika tomin san sejpa ipan se xiuitl. Nonan melak kitekiyomakaya techiskaltis nejua niman nokniujtsin siuatl. Nejua san makuijli xiuitl oniaj ipan kaltlamachtijli, pampa sakin opeuj nitekiti ipan koljós nochi tonajli.

Tepemej intoka Teskey Ala-Too

Kampa tichantiyaj melak xtlaj onkatka tomin, niman nonekiya melak tokojtiliskej niman ijkon tomin matechaxili, yejuin melak techsiauitiaya. Ijkuak nitelpochtli katka xninotlajtoltiaya tleka tinemij nion tlenon panos tlayekapan. Xkeman oniknemili ika tlen melauak itech Jehová niman itech tlen kineki kichiuas kipatlaskia tonemilis. Nikuelitaskia nimechijlis kenon kualtsin oyejkok tlen melauak ipan Kirguistán niman kenon onosemoyauj. Nochi opeuj kampa nejua oninoskalti, ipan norte itech Kirguistán.

UAJNOKUEPAJ NIMAN KUAJKUIJ TLEN MELAUAK IPAN KIRGUISTÁN

Tlen melauak itech Jehová opeuj noskaltia ipan Kirguistán ipan xiuitl 1956. San ika, ononek noixnamikis iuan se tlanemilijli melak chikauak. ¿Tlenon panouaya? Ipan yejon tonaltin, Kirguistán teuan katka itech Unión Soviética, niman iteixpantijkauan Jehová xnokalaktiayaj ipan política itech nochi países tlen nemiyaj ipan yejon Unión Soviética  (Juan 18:36). Ika yejon, okimixmatkej ken itlauelikniuan Estado comunista niman okintlaueltokakej. San ika, nion se tlanemilijli uelis kichiuas ika iTlajtol toTajtsin maka maajsi ipan inyojlo akin yemelak kinekij kixmatiskej toTajtsin. Uelis nikijtos ika se tlen melak ueyi oninomachti ipan nochi nonemilis yejua ika Jehová nochi ueli kichiua (Mar. 10:27).

Emil Yantzen

Pampa okintlaueltokakej iteixpantijkauan Jehová yejon okichiuj ika tlen temachtiayaj manosemoyaua ipan nochi Kirguistán. ¿Kenijki? Siberia teuan katka itech Unión Soviética, niman ompa kinuikayaj akin kimitayaj ken itlauelikniuan tekiuaj. Ijkuak kinkixtiayaj, miyekej uajlayaj Kirguistán. Sekimej otechpaleuijkej matikixmatikan tlen melauak, ken Emil Yantzen, akin otlakatka ipan Kirguistán ipan 1919 niman okontitlankaj kampa nochiuaya chikauak tekitl niman sakin ompa okixmat tlen melauak. Emil oksejpa onokuep Kirguistán ipan 1956 niman onochanti nisiuj itech kalpan Sokuluk, kampa nejua nichantiya. Ipan 1958 ompa onochiuj kachtopa tlanechikojli ipan Kirguistán.

Victor Vinter

Kanaj se xiuitl sakin, Victor Vinter onochantito Sokuluk. Yejuin tokniuj akin oyolmelaujkanen okixnamik miyek tlen ouijtika. Pampa xonokalakti ipan política, okpa okitsajkej yeyi xiuitl, niman sakin oksejpa okitsajkej majtlaktli xiuitl, niman okseki makuijli xiuitl okititlankej okse país. Maski melak okintlaueltokakej tokniuan, xtlaj ouel okitelti ika tlen melauak maueyixtiuj.

TLEN MELAUAK YEJKO NOCHAN

Eduard Warter

Ipan xiuitl 1963 nemiyaj kanaj 160 Teixpantijkej ipan Kirguistán. Miyekej ualeuayaj Alemania, Ucrania niman Rusia. Ompa noijki nemiya Eduard Warter, se akin okikixtijkaj kampa chantiya niman onoapolaktijka ipan Alemania ipan xiuitl 1924. Sakin itech xiuitl 1940, nazis okontitlankej kampa nochiuaya chikauak tekitl, niman seki xiujtin sakin, akin tekitiyaj itech Unión Soviética okititlankej okse país. Yejuin tokniuj akin oyolmelaujkanen, onochantito ipan 1961 ipan kalpan Kant, nisiuj nokalpan.

Elizabeth Fot; Aksamai Sultanalieva

Ipan Kant noijki chantiya Elizabeth Fot, se tokniuj akin oyolmelaujkanen, yejua tetlajtsomiliaya niman ijkon kipiaya tlen ika nopanoltis. Pampa melak kuajli kichiuaya itekiyo, kintlajtsomiliaya tepajtikej, temachtikej niman okseki ixtlamatkej. Se siuatl akin kitlajtsomiliaya itoka katka Aksamai Sultanalieva, isiuauj se tlanauatijketl. Sejpa ijkuak Aksamai okitato Elizabeth miyek okitlajtolti itech tleka tinemij niman noijki itech kenon nemij akin yomijkej. Elizabeth okinankili ika Biblia. Sakin, Aksamai opeuj chikauak tenojnotsa.

Nikolai Chimpoesh

Ipan yejon tonaltin, Nikolai Chimpoesh, akin ualeuaya Moldavia, okitokayotijkej tlayekanketl ipan circuito. Niman okichiuj yejon tekitl kanaj 30 xiuitl. Nikolai xsan kintlajpalouaya tlanechikoltin, noijki kitaya ika manoixkopinakan amatlajkuiloltin niman manoxexelokan. Pampa tlanauatijkej okimatkej tlen kichiuaya, Eduard Warter okinajnauati: “Ijkuak tekiuajkej miyek mitstlajtoltiskej, san xkimijli ika tikinseliaj itech oficinas tlen onka Brooklyn. Xtlajtlata ixko yejon tlakatl akin tekiti itech KGB. Xkipiya itlaj tikmakasis” (Mat. 10:19).

Sakin ika yotlajtlajtojkaj, okijlikej Nikolai mauiya kampa ioficinas KGB tlen onka ipan kalpan Kant. Yejua kilnamiki: “Policía onechtlajtolti kanon tikominkuiyaj amatlajkuiloltin. Nejua onikijli ika techuajtitlaniliayaj ne Brooklyn. Yejua xokimat tlenon kichiuas. Onechkauili maniuiya niman xok keman onechonnots”. Yejon yolchikaujkej Teixpantijkej xokikajkaujkej ika kiteijliaj kuajli tlajtoltin itech Tekiuajyotl ipan norte itech Kirguistán, nisiuj kampa  nichantiya. Hasta ipan xiuitl 1981 nochanejkauan okikakej tlen melauak itech Biblia. Nosiuatsin Mairambubu, yejua akin kachtopa okikak.

NOSIUATSIN NIMANTSIN KISELIA TLEN MELAUAK

Mairambubu ualeua kampa kixmatij ken Naryn itech Kirguistán. Ipan agosto itech 1974 otoixmatkej ichan nokniuj siuatl. Ijkuak onikitak nimantsin onikuelitak Mairambubu, niman otonamiktijkej ipan yejon tonajli.

Apun Mambetsadykova

Se tonajli itech enero itech 1981, ijkuak Mairambubu yoyajka mercado niman uajlaya ipan autobús, okikak tlen onikijto ijkuak onipeuj. Pampa kinekiya kimatis okseki, okitlajtolti yejon siuatl kenon itoka niman kanon chantiya. Yejua okijli ika itoka Apun, san ika, xokijli kanon chantiya. Apun okitlajtlanili makijli kanon yejua chantiya, pampa ipan yejon tonaltin Teixpantijkej xkinkauiliayaj kichiuaskej intekiyo niman nonekiya melak notlajpiyaskej. Nosiuatsin melak uajpaktiaya ijkuak oyejkok tochan.

“Onijkak itlaj melak kualtsin”, onechijli Mairambubu, “se siuatl onechijli ika sa achijtsin poliui niman tlaltikpakchanejkej xok mikiskej. Hasta yolkamej akin tekuanimej xok tlauelejkej yeskej”. Nochi tlen okijto onijkak kentla yeskia san se cuento niman onikijli: “Matitlamachiakan hasta ijkuak uajlas niman kuajli matechtomili”.

Opanok yeyi metstli, niman Apun otechtlajpaloko. Sakin, noijki otechtlajpalokoj sekimej tokniuan siuamej akin katkaj kachtopa Teixpantijkej intech akin kimixmatij ken kirguís. Yejuamej otechmachtijkej tlen melauak itech Jehová tlen temojkatlachialti niman itech tlen kineki kichiuas inpampa tlaltikpakchanejkej. Otechmachtijkej ika amoxtli De paraíso perdido a paraíso recobrado. * Pampa onkatka san se amoxtli ika tlajtojli Tokmak, ononek tikmaixkopinaskej.

Itlaj tlen kachtopa otiuelkej yejua teotlajtojli itech Génesis 3:15. Yejuin teotlajtojli nochiuas itechkopa Tekiuaj Mesías akin toTajtsin okitekitlali: Jesucristo. Yejon se tlamachtijli tlen ueyi kijtosneki niman noneki nochimej makikakikan. ¡Tikmatiskej yejuin okichiuj matiknekikan titenojnotsaskej! (Mat. 24:14). Nimantsin, tlen otiuelkej itech Biblia opeuj kipatla tonemilis.

SAN ICHTAKA NOCHIUAJ TLANECHIKOLTIN NIMAN APOLAKTILISTIN

Ijkuak se Teixpantijketl akin ualeuaya Tokmak otechnots ipan se namiktilistli, nosiuatsin niman nejua nimantsin otikitakej ika iteixpantijkauan  Jehová tlamantikej katkaj. Xtlaj onkatka alcohol, niman akin oyajkaj melak tetlakaitayaj. Yejuin iluitl nion achijtsin xijkon katka ken okseki kampa yotiajkaj, kampa miyekej tlauanij, kichiuaj tlen xkuajli niman tlauijuikaltiaj.

Noijki otiajkej ipan seki tlanechikoltin tlen nochiuayaj ipan tlanechikojli tlen onkatka Tokmak. Yejuin nochiuayaj kampa kojyo, tla ueliya ipan yejon tonajli. Tokniuan kimatstoyaj ika policías san techitstinemiyaj, kuakon, tokniuan nochipa kitlaliayaj yakaj matlajpiya. Ijkuak seuaya tosentlaliayaj techan, niman policías kemantika techonitayaj niman ijkon kimatiskej tlenon tikchiuayaj. Tonajli ijkuak otoapolaktijkej, tlen onochiuj ipan atentli Chu ipan julio itech xiuitl 1982, ononek melak titlamachilisejkej yeskej (Mat. 10:16). San tiachijtsitsintin otajsitiajkej kampa kojyo, otokuikatijkej se tlakuikajli tlen ika otikueyiteneujkej toTajtsin niman otijkakej tlamachtijli itech apolaktilistli.

TIKCHIUAJ TLEN OTECHKAUILI CHIKAUAK MATIKTEKICHIUILIKAN TOTAJTSIN

Ipan 1987, se tokniuj onechtlajtlanili maniktlajpaloti yakaj akin kuajli okikak tlen melauak niman chantiya Balykchy. Tiuejkauiyaj naui hora ipan tren niman ijkon tajsiskej ompa. Ijkuak miyekpa yotitenojnotsatoyaj Balykchy, otikitakej ika miyekej kinekiyaj kikakiskej iTlajtol toTajtsin. Yejon otechkauili chikauak matiktekichiuilikan toTajtsin.

Mairambubu niman nejua melak tiayaj Balykchy. Miyekpa ompa tokauayaj itlamiyan semana, titenojnotsayaj niman tikchiuayaj tlanechikoltin. Tikitkiyaj amatlajkuiloltin ijtik tlen tiktokayotiaj mishok, se costal tlen ika tikimitkis papas. Sakin, nonekiyaj tikimitkiskej okseki amatlajkuiloltin, pampa maski tiktemiltiayaj ome mishok san kuajli kinmajxiliaya akin techintlajtlaniliayaj. Hasta ijkuak tiayaj niman tiuajtokuepayaj ipan tren ueliya tikinnojnotsayaj akin ompa yayaj.

Ipan 1995 onochijchiuj se tlanechikojli ipan Balykchy, yopanoka chikueyi xiuitl ika kachtopa otiktlajpalotoyaj yejon kalpan. Ononek tikpopoloskej miyek tomin niman ijkon tontenojnotsaskej ompa. ¿Niman kenon tikchiuiliayaj tla melak achijtsin tomin tikpiayaj? Se tokniuj techpaleuiaya ika tomin. Pampa Jehová kimatstoya ika tiknekiyaj chikauak tiktekichiuiliskej, otechtlapouili “iluikak” (Mal. 3:10). Melauak ika Jehová nochi ueli kichiua.

TIKPIYAJ MIYEK TEKITL IMIUAN TOCHANEJKAUAN NIMAN IPAN TENOJNOTSALISTLI

Ipan 1992 onechmakakej tekitl ken tlayekanketl itech tlanechikojli. Oninochiuj kachtopa tlayekanketl intech akin kimixmatij ken kirguís itech yejuin país. Ipan totlanechikol, tlen onkatka Tokmak, otikitakej ika uelis chikauak tiktekichiuiliskej Jehová. Se neskayotl, ouel otikinmachtijkej miyekej telpokamej niman ichpokamej akin kimixmatij ken kirguís ipan inkaltlamachtiluan. Itech yejon telpokamej akin otikinmachtijkej, se aman tekiti ipan Grupo akin tlayekana ipan se Sucursal, niman omemej telpokamej tekitij ken precursores especiales. Noijki otokojtilijkej tikinpaleuiskej oksekimej ijkuak tonechikouayaj. Sakin itech xiuitl 1990, san tikpiayaj amatlajkuiloltin ika ruso, niman tlanechikoltin nochiuayaj ipan yejon tlajtojli. San ika, imiyekixtoyaj tokniuan akin tlajtouayaj kirguís, kuakon nikintlajtolkuepiliaya. Yejon okinpaleui melak kuajli makasikamatikan tlen melauak.

Iuan nosiuatsin niman chikueyi tokoneuan ipan 1989

 Mairambubu niman nejua noijki melak tikpiayaj tekitl pampa tikinmiskaltiayaj tokoneuan. Imiuan tontenojnotsayaj niman tiayaj tlanechikoltin. Ijkuak toichpokatsin Gulsayra kipiaya 12 xiuitl, kuelitaya kinnojnotsas itech Biblia akin nejnentiayaj ipan ojtli. Nochimej tokoneuan kuelitayaj kintsontekontlaliskej tlaxeloltin itech Biblia. Tokoneuan, niman noijki toixuiuan, nochipa melak chikauak tekititokej ipan tlanechikojli. Itech chiknaui tokoneuan niman 11 toixuiuan akin ok nemij, 16 kitekichiuiliaj Jehová noso yauej ipan nochi tlanechikoltin imiuan intajuan.

MIYEK TLEN ONOPATLAK

Tokniuan akin opeujkej tenojnotsaj kampa tichantij sakin itech xiuitl 1950 mojkatlachiaskiaj tla kitaskiaj nochi kech yonopatlak. Se neskayotl, sakin itech xiuitl 1990 techkauiliaj matitenojnotsakan niman timiyekej matosentlalikan.

Nitenojnotstok iuan nosiuatsin.

Ipan 1991, nosiuatsin niman nejua otiajkej Kazajistán, ipan kalpan Alma-Atá (aman Almaty), niman ijkon uelis tiaskej ipan kachtopa ueyi tlanechikojli. Niman ipan 1993 onochiuj kachtopa ueyi tlanechikojli ipan Kirguistán ipan Estadio Spartak itech kalpan Biskek. Tenojnotskej ouejkaujkej se semana kichipaujtoyaj yejon estadio achto ika nochiuas ueyi tlanechikojli. Akin ompa tlanauatia melak okimojkatlachialti yejon niman xokinek matiktlaxtlauilikan ijkuak otiktekitiltijkej.

Ipan 1994 topan opanok itlaj tlen melak ueyi kijtosneki, pampa ipan yejon xiuitl okis kachtopa amatlajkuilojli ipan tlajtojli kirguís. Aman, amatlajkuiloltin notlajtolkuepaj ika tlajtojli kirguís ipan sucursal tlen onka Biskek. Ipan 1998, iteixpantijkauan Jehová okimijkuilojkej ixpan tekiuajkej ipan Kirguistán. Aman tinemij ipantsin 5,000 tenojnotskej, onka 83 tlanechikoltin niman 25 grupos ika tlajtoltin chino, inglés, kirguís, ruso niman tlajtojli ika señas ruso, turco, uigur niman uzbeko. Tokniuan melak tlamantik kanon ualeuaj niman tlen okichiujkej, san ika, san sekan kitekichiuiliaj Jehová. Tikmatstokej ika Jehová yejua akin okichiuj ika nochi yejuin manopatla.

Jehová okipatlak nonemilis. Oninoskalti ipan se familia akin tokayaj niman xkipiayaj tomin, niman san makuijli xiuitl oniaj ipan kaltlamachtijli. Maski ijkon, Jehová onechkauili maninochiua tlayekanketl itech tlanechikojli niman manikinmititi tlen melauak temachtia Biblia akin melak onomachtijkej xijkon ken nejua. Melauak, Jehová kichiua manochiua hasta tlen se nion xkinemilia. Nochi tlen yonikixnamik nechyolchikaua manitlajto itech Jehová, toTajtsin akin “nochi ueli kichiua” (Mat. 19:26).

^ párr. 21 Tlen okichijchiujkej iteixpantijkauan Jehová. Aman xok nochijchiua.