Xuiya kampa tlen onka ijtik

Xuiya kampa tlen kipiya

Telpokamej, uelis nenyolpakiskej ipan nemonemilis

Telpokamej, uelis nenyolpakiskej ipan nemonemilis

“Tejua tinechixmachiltia ojtli itech nemilistli” (SAL. 16:11).

TLAKUIKALTIN: 133, 89

1, 2. ¿Tlenon tiuelij itech nochi tlen okipatlak Tony ipan inemilis?

TONY katka se telpochtli akin itaj xokiskalti. Maski yaya ipan kaltlamachtijli, yejua nion xkuelitaya nomachtis niman hasta ikinemilijtoya xok yas. Itlamiyan semanas, Tony nochipa kinuikatinemiya akin inuan nouikaya noso yaya cine. Yejua xteuisokiya nion xkikuiya drogas, san ika, xkimatiya tlenon kichiuas ipan inemilis niman kinemiliaya ika toTajtsin xnemi. Se tonajli, okimixmat omemej iteixpantijkauan Jehová niman okintlajtolti tlen kinekiya kimatis. Yejuamej okimakakej amatlajkuiloltin El origen de la vida niman ¿Es la vida obra de un Creador?

2 Ijkuak tokniuan oksejpa okitlajpalotoj, Tony melak yonopatlaka. Melak yonomachtijka amatlajkuiloltin tlen okikauilijkaj niman hasta yoxoxolochiujkaj niman yokintenkuejkuelpachojka. Tony okimijli: “Kipiya ika nemis se toTajtsin”. Opeuj nomachtia Biblia niman ika yolik opeuj kipatla ken achtopa kitaya nemilistli. Noijki, aman melak kuelitaya nomachtis, niman ijkon kixmatiyaj ipan kaltlamachtijli. Hasta director melak tlamojkaitaya. Okijli Tony: “Melak yotimopatlak niman tikitaj ika melak kuajli yopeuj timomachtia. ¿Ijkon tikchiujtok pampa timomachtijtika imiuan iteixpantijkauan Jehová?”. Tony okijli ika kema, niman okijli tlen youelka. Sakin, otlan preparatoria niman aman precursor regular  niman tlapaleuijketl. Tony melak paki pampa aman kipiya se itaj akin kitlasojtla, Jehová (Sal. 68:5).

XTLAKAMATI JEHOVÁ NIMAN KUAJLI TONKISAS IPAN MONEMILIS

3. ¿Tlenon kimijlia Jehová akin telpokamej?

3 Tlen ipan onochiuj Tony techilnamiktia ika Jehová najmana inpampa telpokamej. Yejua kineki xyolpaki niman kuajli xnemi. Ika yejon, yejua mitsijlia: “Xkilnamiki, aman, moUeyitlachijchiujkauj ipan tonaltin ijkuak titelpochtitika” (Ecl. 12:1). Ipan yejuin tonaltin ouijtika ijkon tikchiuas, san ika, kema uelis tikchiuas. Ika itlapaleuilis Jehová, uelis kuajli tonkisas ipan monemilis, niman xsan aman ika titelpochtli noijki ijkuak tiueyiyas. Matitlajtokan itech sekimej tlaltikpakchanejkej niman ijkon kuajli tikasikamatiskej yejuin. Tikitaskej tlenon okinpaleui israelitas niman ijkon makinotlatkitikan Tlajli tlen yokimijlikaj kinmakaskiaj, niman noijki tikitaskej tlenon okipaleui David makipiya kojtilistli niman ijkon kitlanis Goliat akin melak uejkapan katka.

4, 5. ¿Tlenon tiuelij itech israelitas ijkuak okinotlatkitijkej Tlajli tlen yokimijlikaj kinmakaskiaj niman ijkuak David okitlan Goliat? (Xkimita tlaixkopinaltin kampa peua tlen tomachtijtokej).

4 Ijkuak israelitas ikalakiskiaj ipan Tlajli tlen yokimijlikaj kinmakaskiaj, toTajtsin xokinnauatij mauelikan kuajli mateixnamikikan noso mateuisokikan (Deut. 28:1, 2). Yejua okimijli makichiuakan tlen kinnauatiaya niman itech matlaneltokakan (Jos. 1:7-9). Kanaj miyekej tlaltikpakchanejkej kinemiliskiaj ika yejuin xtepaleuiskia. San ika, yejon melak okinpaleui, pampa miyekpa okintlankej cananeos ika itlapaleuilis Jehová (Jos. 24:11-13). Kema, noneki titlaneltokaskej niman ijkon uelis tiktlakamatiskej toTajtsin. Tla tikpiyaj yejon tlaneltokijli, nochipa kuajli tonkisaskej. Yeuejkaui niman aman, yonoitak ika yejuin melauak.

5 Goliat melak ueliya tlauisokiya niman yeyi metros ika uejkapan katka. Noijki melak miyek kitkiya tlen ika notsakuilis niman tlen ika teixnamikis (1 Sam. 17:4-7). Niman David san kitkiya ome tlemach: imatematlauj niman itlaneltokil itech toTajtsin Jehová. Akin xkipiayaj tlaneltokijli, kanaj okinemilijkej ika David xkipiaya itlamachilis. San ika, nopopolojtoyaj. Goliat yejua akin xkipiaya itlamachilis (1 Sam. 17:48-51).

6. ¿Tlenon tikitaskej ipan yejuin tlamachtijli?

6 Ipan tlamachtijli tlen yotiuajpanokej, otikitakej naui tlemach tlen kichiua matiyolpakikan niman kuajli matinemikan: tikchikauaskej totlaneltokil, touikaskej iuan akin kitlasojtlaj Jehová, tikitaskej tlenon tikchiuaskej ipan tonemilis tlen matechpaleui niman tikpatiojkaitaskej tlamakaualistli tlen techmaka toTajtsin. Ipan yejuin tlamachtijli tikitaskej okseki itech yejuin tlemach. Niman tikitaskej seki tlajtolyekanalistin tlen tiknextiaj ipan Salmo 16.

XKITA KENON NOCHIPA TIKCHIKAUJTOS MOTLANELTOKIL

7. a) ¿Tlenon kichiua akin chikauak itlaneltokil? b) ¿Tlenon katka itetlayokolil David, niman kenon okipaleui yejon?

7 Akin kipiya chikauak itlaneltokil kuajli tlaneltoka itech toTajtsin niman nokojtilia tlanemilis ijkon ken toTajtsin tlanemilia. Kitejtemoua itlayekanalis niman nochipa kinektika ijkon kichiuas (1 Cor. 2:12, 13). David ijkon kichiuaya. Ipan se tlakuikajli, yejua okijto: “Jehová yejua notetlayokolil, tlen yonechmakakej, niman nocopa” (Sal. 16:5). Kema, yejua kijtotoya ika melak kuajli iuan nouikaya toTajtsin niman itech nopaleuiaya (Sal. 16:1). Ika yejon, okijkuilo: “Nochi nonemilis nemi ika pakilistli”. Kema, yejua melak kuajli nouikaya iuan Jehová, niman san yejon kichiuaya mayolpaki (xpoua Salmo 16:9, 11). *

8. ¿Tlenon kichiua yemelak matiyolpakikan ipan tonemilis?

8 Akin san kitejtemouaj tomin noso kenon noyolpaktiskej, xuelis kipiyaskej pakilistli tlen okipix David (1 Tim. 6:9, 10). Se tokniuj akin ualeua Canadá kijtoua: “Melauak pakilistli xualeua itech tlen tikchiuaj ipan tonemilis, ualeua itech nochi tlen tikmakaj  toTajtsin Jehová, akin techmaka nochi tlen kuajli” (Sant. 1:17). Kuakon, tla tejua melak titlaneltoka itech Jehová niman tiktekichiuilia, tiyolpakis ipan monemilis niman tikmatstos tleka tinemi. ¿Tlenon mitspaleuis machikaui motlaneltokil? Noneki uejkaujtipan iuan tinemis. ¿Kenon uelis tikchiuas yejuin? Xpoua iTlajtol, xkita tlen yokichijchiuj, xtlanemili itech ikualneskayouan, niman xkita kenon melak mitstlasojtla (Rom. 1:20; 5:8).

9. Ijkon ken David, ¿tlenon uelis tikchiuas niman ijkon mamitsyektlali iTlajtol toTajtsin?

9 Jehová se kuajli tajtli niman techtlasojtla, ika yejon, kemantika techyektlalia. David kipatiojkaitaya ika Jehová kiyektlaliaya, ika yejon, okijto: “Nejua nikueyichiuas Jehová, akin yonechinmakak tlajtolpaleuilistin. Maski ika yeuajli, notlanemililuan tlen melak iyantokej nechyektlaliaj” (Sal. 16:7). Kema, yejua tlanemiliaya itech itlanemililuan toTajtsin, nokojtiliaya tlanemilis ken yejua niman nokauiliaya ika itlanemililuan toTajtsin makiyektlalikan. Tla tejua noijki ijkon tikchiua, ueyiyas tlasojtlalistli tlen tikmachilia itech toTajtsin niman tiknektos tiktlakamatis. Noijki timochiuas ken yakaj akin kipiya chikauak itlaneltokil. Se tokniuj akin itoka Christin okijto: “Ijkuak ninomachtia niman nitlanemilia itech tlen nikpoua, nikmachilia ika Jehová onechijkuilouili yejon”.

10. Ken kijtoua Isaías 26:3, ¿kenon mitspaleuis tla tikpiya chikauak motlaneltokil?

10 Tla tikpiya chikauak motlaneltokil, Jehová mitsmakas tlaixmatilistli niman tlamachilistli tlen noneki niman ijkon tikitas tlaltikpaktli niman tlen ipan nochiuas ika tlayekapan ijkon ken yejua kita. Ijkon kichiuas pampa kineki xmati tlenon melak ueyi kijtosneki ipan tonemilis, kineki xtlapejpeni tlen kuajli niman maka mamitsmojti tlen panos ika tlayekapan (xpoua Isaías 26:3). * Se tokniuj akin itoka Joshua, akin chanti Estados Unidos, kijtoua itlaj tlen melauak: “Tla tejua nisiuj tinemi itech Jehová, kuajli tikitas tlenon melak ueyi kijtosneki niman tlenon xueyi kijtosneki”.

XMOUIKA IMIUAN AKIN KITLASOJTLAJ JEHOVÁ

11. ¿Kenon kintlapejpeniaya David akin imiuan nouikas?

11 (Xpoua Salmo 16:3). * David kimatstoya kenon kinnextis akin yemelak inuan nouikaskia. Yejua kintlapejpeniaya akin kitlasojtlayaj Jehová. Okintokayoti ken “akin chipaujkej” pampa yejuamej nokojtiliayaj kitlakamatiskej itlanauatiluan toTajtsin. Niman okijto ika melak kiyolpaktiaya imiuan nemis. Okse salmista noijki ijkon onomachili. Okijkuilo ika yejua nouikaya imiuan nochimej akin kimojkaitayaj niman kitlakamatiyaj toTajtsin (Sal. 119:63). Ken otikitakej ipan tlamachtijli tlen yotiuajpanokej, tejua noijki uelis tikinnextis miyekej akin imiuan timouikas, akin makitlasojtlakan niman makitlakamatikan Jehová. Niman uelis timouikas imiuan oksekimej maski tla iuejueyimej noso pipitikej.

12. ¿Tleka David niman Jonatán melak kuajli nouikayaj?

12 David xsan onouikak imiuan akin telpokamej katkaj ijkon ken yejua. ¿Tikilnamiki kenon itoka katka akin melak kuajli nouikaya iuan David? Itoka katka Jonatán. Yejuamej melak kualtsin nouikayaj, niman yejon kuajli tikitaj itech tlen kijtoua Biblia. San ika ¿tikmatstoya ika Jonatán kitlantiaya David kanaj 30 xiuitl? Kuakon, ¿tleka melak kuajli nouikayaj? Pampa yejuamej tlaneltokayaj itech toTajtsin, notlakaitayaj niman kipatiojkaitayaj kualneskayomej tlen kipiayaj, ken yejon yolchikaualistli tlen okiteititijkej ijkuak okimixnamijkej akin kitlauelitayaj toTajtsin (1 Sam. 13:3; 14:13; 17:48-50; 18:1).

13. ¿Kenon uelis tikinpiyas miyekej akin inuan timouikas? Xkijto se neskayotl.

13 Ijkon ken David niman Jonatán, uelis tiyolpakiskej tla touikaj imiuan akin kitlasojtlaj Jehová niman akin itech tlaneltokaj. Se tokniuj itoka Kiera, akin uejkaujtipan yokitekichiuili toTajtsin, kijtoua: “Melak miyekej imiuan ninouika, ualeuaj itech nochi tlaltikpaktli, ninouika imiuan akin tlatlamantikej niman akin oksekan onoskaltijkej”. Tla tejua ijkon tikchiua, tikitas kenon iTlajtol toTajtsin niman espíritu santo kichiuaj san sekan matinemikan imiuan nochimej tokniuan.

 XKITA TLENON UELIS TIKCHIUAS TLEN MAMITSPALEUI

14. a) ¿Tlenon mitspaleuis tikitas tlenon tikchiuas ipan monemilis? b) ¿Tlenon yokijtokej sekimej telpokamej itech titlapaleuis ipan itekiyo toTajtsin?

14 (Xpoua Salmo 16:8). * David, kitaya ika melak ueyi kijtosnekiya tiktekichiuilis toTajtsin. Tejua noijki uelis tiyolpakis ipan monemilis tla tikchiua ken yejua. Nochipa kachtopa xtlanemili itech itekiyo toTajtsin niman ijkuak itlaj tiknemilis tikchiuas, xkita tla toTajtsin kineki xchiua yejon. Se tokniuj akin itoka Steven okijto: “Ijkuak ninokojtilia nikchiuas itlaj, ijkuak ijkon nikchiua, niman sakin nikita kenon yonechpaleui, yejon kichiua melak kuajli maninomachili”. Se telpochtli akin ualeua Alemania niman tlapaleuiya ipan okse país okijto: “Ijkuak niueuentsintias, xnikneki nikitas tla nochi tlen onikchiuj ika tlakuitlapan san onikchiuj pampa notech onitlanemili”. Tiknekij ijkon xtlanemili ken yejuamej. Niman tla ijkon titlanemilia, kuakon, xmaka Jehová nochi tlen tiueltok niman ijkon xueyichiua, noijki xkinpaleui oksekimej (Gál. 6:10). Xkita tlenon uelis tikchiuas ipan itekiyo toTajtsin niman xtlajtlanili Jehová mamitspaleui. Yejua melak kuelitaskia kinnankilis moteoyouan (1 Juan 3:22; 5:14, 15).

15. ¿Tlenon uelis tikchiuas? (Xkita recuadro “ Seki tlen uelis tikchiuas”).

15 ¿Tlenon uelis tikchiuas? Uelis tikyejyekos titlanankilis ken tejua tikasikamati ipan totlanechikoluan, uelis timochiuas precursor noso uelis tias Betel. Noijki uelis tiknemilis timomachtis okse tlajtojli niman ijkon tikinpaleuis oksekimej tlaltikpakchanejkej makimatikan kuajli tlajtoltin. Barak, se telpochtli akin chikauak kitekichiuilia Jehová, kijtoua: “Melak niyolpaki ninokuiteuas ika kualkan niman nikmatstok ika ipan yejon tonajli chikauak niktekichiuilis Jehová, san yejon kichiua melak maniyolpaki”.

XPATIOJKAITA TLAMAKAUALISTLI TLEN MITSMAKA TOTAJTSIN

16. ¿Kenon kitaya David itlanauatiluan niman itlajtolyekanalisuan Jehová, niman tleka?

16 (Xpoua Salmo 16:2, 4). * Ipan tlamachtijli tlen yotiuajpanokej, otikitakej ika itlanauatiluan niman itlajtolyekanalisuan toTajtsin techmakaj tlamakaualistli pampa techpaleuiyaj matiktlasojtlakan tlen kuajli niman matiktlauelitakan tlen xkuajli (Amós 5:15). Salmista David kuajli okijto ika  itech Jehová “ualeua tlen kuajli”. Yejuin kijtosneki ika yolkuajli niman ika kuajli tlanemilia. David melak onokojtili kichiuas ken toTajtsin. Onokojtili kitlauelitas tlen toTajtsin kitlauelita, ken tikinueyichiuas okseki tajtsitsintin. Tlaltikpakchanejkej akin kichiuaj yejon melak tepinajtijkej niman toTajtsin xkiselia yejon ueyilistli tlen kinamiki (Is. 2:8, 9; Apoc. 4:11).

17, 18. a) ¿Tlenon okijto David ika inpan nochiua akin kinueyichiuaj tajtsitsintin xmelajkej? b) ¿Tleka sekimej tlaltikpakchanejkej kipiyaj ajmantli?

17 Itech tonaltin tlen kiteneua Biblia, miyekej auilnemiyaj ijkuak kinueyichiuayaj tajtsitsintin tlen xmelajkej (Os. 4:13, 14). Miyekej kuelitayaj kinueyichiuaskej okseki tajtsitsintin pampa kuelitayaj auilnemiskej. ¿Pakiyaj pampa ijkon kichiuayaj? Ka. David okijto ipan Salmo 16:4 ika akin kinueyichiuaj okseki tajtsitsintin “kimiyekiliaj inajmankayo”. Noijki hasta kinuentlaliayaj inkoneuan inpampa yejon tajtsitsintin xmelajkej (Is. 57:5). Jehová melak kitlauelitaya yejuin (Jer. 7:31). Tla tejua ijkuakon tinemiskia, ¿xmelak ika tiktlasojkamatiskia tla motajuan kitekichiuiliskiaj Jehová?

18 Ipan yejuin tonaltin, miyekej tlaneltokiltin tlen xmelajkej noijki kitekauiliaj maauilnemilo, niman hasta kitekauiliaj ika omemej tlakamej noso omemej siuamej manonamiktikan noso manotekakan. San ika, ijkon ken yeuejkaui, noijki inpan nochiua tlen xkuajli (1 Cor. 6:18, 19). Kinemiliaj ika uelij kichiuaj tlen kinekij, san ika, “kimiyekiliaj inajmankayo”. Kanaj tejua yotikitak ika yejuin yemelak ijkon panoua. Ika yejon, telpochtli, xkaki moTajtsin iluikakchane. Xkasikamati ika kuajli tonkisas tla tiktlakamati. Maka xkilkaua ika melak miyek tlen xkuajli mopan nochiuas tla tikchiua tlen xkuajli niman ika xuejkauis tikpiyas yejon pakilistli tlen ueliskia tikmachilis (Gál. 6:8). Joshua, akin otikteneujkej ipan párrafo 10, kijtoua: “Uelis tiktekitiltiskej tlamakaualistli tlen tikpiyaj ijkon ken tejuamej tiknekiskej. San ika, tla xkuajli tiktekitiltiaj, xtiyolpakiskej”.

19, 20. ¿Tlen tlateochiualistin kiseliskej telpokamej akin tlaneltokaj itech Jehová niman kitlakamatij?

19 Jesús okimijli inomachtijkauan: “Tla nenmelajkanemiskej ipan on tlen nemechijlia, nenmochiuaskej melauak nennomachtijkauan. Nenkixmatiskej tlen melauak, niman on tlen melauak yejua mechmanauis” (Juan 8:31, 32). “On tlen melauak” yotechmanaui noso yotechmakixti, yokichiuj ika maka matinemikan ipan tlaneltokijli tlen xmelauak, aman xok tiixtlapachiujtokej niman xok tikneltokaj tlen miyekej kineltokaj. Niman xsan yejon. Ken yotikitakej, ika tlayekapan noijki tikpiyas yejon kualtsin tlamakaualistli tlen kipiyaskej ikoneuan toTajtsin (Rom. 8:21). San ika, hasta amantsin uelis tiyolpakis itech yejon tlamakaualistli tlen tikpiya. ¿Kenon? Tla timelajkanemi ipan tlen mitsijlia Cristo noso tla tiktlakamati itlamachtiluan. Ijkon tikixmatis tlen melauak, niman xsan pampa timomachtis yejon, tikixmatis pampa tikchiujtos ipan monemilis.

20 Telpochtli, xpatiojkaita tlamakaualistli tlen toTajtsin mitsmaka. Tla tiktekitiltia ika tlamachilistli, mitspaleuis kuajli tiktlapejpenis tlen tikchiuas aman niman ijkon kuajli tonkisas ika tlayekapan. Se telpochtli akin iteixpantijkauj Jehová kijtoua: “Tla amantsin kuajli tiktekitiltia tlamakaualistli tlen tikpiya, mitspaleuis ijkuak tiueyiyas niman ijkuak nonekis tiktlapejpenis tlen melak ueyi kijtosneki, ken ijkuak tikitas ipan tlenon titekitis noso ken ijkuak tiktlapejpenis tla timonamiktis noso tla ok timochias seki xiujtin”.

21. ¿Tlenon mitspaleuis xpiya “on yejuan melauak nemilistli”?

21 Ipan yejuin tlaltikpaktli, tlen kitokayotiaj “kuajli nemilistli” nion xuejkaui. Xakaj kimati tlenon panos mostla (Sant. 4:13, 14). Ika yejon, melak kuajli tla nochipa tinejnemij ipan yejon ojtli tlen kitemaka “on yejuan melauak nemilistli”, nemilistli tlen xkeman tlamis (1 Tim. 6:19). Melauak, toTajtsin xtexchiualtia ompa matinejnemikan. Toseselti noneki tikijtoskej tla ompa tiaskej. Kuakon, xchiua ika Jehová manochiua motetlayokolil. Xpatiojkaita nochi tlen kuajli mitsmaka (Sal. 103:5). Niman kuajli xmatsto ika yejua kichiuas xnemi ika moyojlo niman kichiuas nochipa xpiya pakilistli (Sal. 16:11).

^ párr. 7 Salmo 16:9, 11: “9 Ika yejon, noyojlo paki, nochi nonemilis nemi ika pakilistli. Niman ika noyojlo ninemis. 11 Tejua tinechixmachiltia ojtli itech nemilistli. Mouan melak onka pakilistli; ipan moyekma nochipa onka pakilistli”.

^ párr. 10 Isaías 26:3: “Tejua tikintlajpiyas akin melak kuajli nopaleuiyaj motech; tejua tikinmakas nochipa yolseuilistli, pampa motech yotlaneltokakej”.

^ párr. 11 Salmo 16:3: “Niman akin chipaujkej akin nemij ipan tlaltikpaktli, akin uejueyixtokej, melak nechyolpaktiaj”.

^ párr. 14 Salmo 16:8: “Nochipa notechkopa nemi Jehová. Pampa yejua nemi nonakastlan kampa nomayekma, xkeman itlaj nechtlajkalis”.

^ párr. 16 Salmo 16:2, 4: “2 Nejua yonikijli Jehová: ‘Tejua tiJehová, motech ualeua tlen kuajli’. Akin kintejtemouaj oksekimej tajtsitsintin kimiyekiliaj inajmankayo. Nejua xkeman niktoyauas yejon yestli tlen ika tlauentlaliaj, nion noten xkintokayotis”.