Xuiya kampa tlen onka ijtik

Xuiya kampa tlen kipiya

“Akin yolmelaujki pakis itech Jehová”

“Akin yolmelaujki pakis itech Jehová”

DIANA ikipiya ipantsin 80 xiuitl. Iueuentsin kipiaya se kokolistli tlen itoka Alzheimer niman ijkuak poliuiya ome xiuitl ika mikis nemiya ipan kajli kampa san nemij ueuentsitsintin. Yejua noijki otlajyoui pampa omijkej omemej ikoneuan niman okualok ika cáncer de mama. Maski ijkon, ijkuak tokniuan itech itlanechikol kitaj ika ontenojnotsa noso yauj ipan tlanechikojli, kijtouaj ika nochipa ixpaktok.

John otlapaleui ipantsin 43 xiuitl ken tlayekanketl ipan circuito. Yejua melak kuelitaya itekiyo, san ika, ononek kikauas pampa nonekiya kitlajpiyas se ichanejkauj akin opeuj kualo. Ijkuak tokniuan akin kixmatij kinextiaj ipan se ueyi tlanechikojli, kijtouaj ika nion achijtsin xnopatla. John ok melak paki.

¿Tleka Diana niman John ok melak pakij? ¿Kenon uelis pakis akin tlajyouiya noso akin kikaua itekiyo ipan ikalpan Jehová tlen melak kuelita? Biblia technankilia: “Akin yolmelaujki pakis itech Jehová” (Sal. 64:10). Tla tiknekij kuajli tikasikamatiskej yejuin, matikitakan tlenon kichiua melak matiyolpakikan niman tlenon xtechyolpaktia.

PAKILISTLI TLEN SAN ONTLAMI

Ipan yejuin nemilistli, onka tlen kichiua matiyolpakikan, ken ijkuak se nonamiktia, ijkuak se kipiya ikonetsin noso kiselia se tekitl ipan ikalpan toTajtsin. Niman xtemojkatlachialti ika ijkon matomachilikan, pampa yejuin itlaj tlen Jehová techtlayokolia. Yejua akin okitlali namiktilistli, akin okichiuj matikinpiyakan tokoneuan niman akin techmaka tekitl tlen uelis tikchiuaskej ipan ikalpan toTajtsin (Gén. 2:18, 22; Sal. 127:3; 1 Tim. 3:1).

San ika, seki tlen techyolpaktia san ontlami. Teajman ika se akin yononamikti uelis mikis ixnamik noso uelis kikajkayauaskej (Ezeq. 24:18; Os. 3:1). Kanaj kokonej xkintlakamatiskej intajuan niman xkitlakamatiskej toTajtsin, niman kanaj hasta ueliskej kinkixtiskej itech tlanechikojli. Se neskayotl, ikoneuan Samuel xokitekichiuilijkej Jehová, ken notlajtlaniya; niman tekiuaj David okichiuj se tlajtlakojli niman yejon okichiuj makipiya miyek tlauejli iuan ichanejkauan (1 Sam. 8:1-3; 2 Sam. 12:11). Yejuin tlaueltin kipatla pakilistli ika ajmantli niman tlajyouilistli.

 Noijki ijkon, uelis tijkauaskej tekitl tlen tikpiyaj ipan ikalpan toTajtsin, pampa tikualoj, pampa noneki tikintlajpiyaskej tochanejkauan noso itlaj nopatla ipan ikalpan toTajtsin. Miyekej tokniuan akin yononek kikauaskej intekiyo ipan ikalpan toTajtsin kijtouaj ika kitemouaj pampa melak kinyolpaktiaya.

Tikitaj ika ipampa tlen otikteneujkej, yejuin pakilistli uelis san ontlamis. San ika, inneskayo Samuel, David niman oksekimej kiteititiaj ika onka okse pakilistli tlen xtlami ijkuak itlaj nopatla noso tikpiyaj tlauejli.

PAKILISTLI TLEN XTLAMI

Jesús kuajli okimat kenon melak tiyolpakis. Ijkuak nemiya iluikak melak kuajli chantiya. Ika yejon, nochipa oyolpak ixpan Jehová (Prov. 8:30). San ika, ijkuak ouajla ipan tlaltikpaktli, kemantika okixnamik itlaj tlen melak ouijtika. Maski ijkon, kiyolpaktiaya kichiuas tlen iTajtsin kinekiya (Juan 4:34). ¿Tlenon okipaleui kixikos tlen okijyoui ijkuak sa achijtsin poliuiya ika mikis? Biblia kijtoua: “Ipampa pakilistli tlen onkatka ixpan yejua otlaxiko ipan se kojtli melaktik” (Heb. 12:2, TNM). Matikitakan ome tlemach tlen Jesús okijto itech melauak pakilistli.

Se tonajli, 70 inomachtijkauan Jesús akin chikauak otenojnotsatoj onokuepkej ika pakilistli pampa okichiujkej milagros, okichiujkej ika xkuakualtin espíritus makisakan intech tlaltikpakchanejkej. Kuakon, Jesús okimijli: “Ma ka xpakikan pampa tla on xkuajkualtin espíritus mechtlakamatij, yej xpakikan pampa nemotoka ye tlajkuilolnestikaj ne iluikak” (Luc. 10:1-9, 17, 20). Kema, maski teyolpakti tekitl tlen tikseliaj ipan ikalpan toTajtsin, ijkuak tikmatij ika Jehová techselia, yejon tlen melak techyolpaktia.

Okse tonajli, ijkuak Jesús kinmachtiaya tlaltikpakchanejkej, se siuatl judía chikauak okijto ika inan akin melak kuajli temachtijtoya nonekiya melak pakis. San ika, Jesús okijto: “¡Ka, yolpakij akin kikakij itlajtol toTajtsin niman kitlakamatij!” (Luc. 11:27, 28, TNM). Tla se tajtli noso nantli kinpiya ikoneuan niman ikoneuan kichiuaj tlen kuajli, tikmatstokej  ika yejon kiyolpaktia. San ika, melak pakis tla yejua kuajli nouika iuan Jehová pampa kitlakamati.

Kuakon, tla tikmatij ika Jehová techselia yejon tlen kichiua melak matiyolpakikan. Melauak, tlaueltin xtechyolpaktiaj, san ika, noijki xtechkuiliaj pakilistli. Topakilis melak ueyiya ijkuak tikinxikouaj tlaueltin niman timelajkanemij itech Jehová (Rom. 5:3-5). Noijki matikilnamikikan ika Jehová kinmaka iespíritu santo akin itech tlaneltokaj, niman pakilistli, se kualneskayotl tlen kitemaka espíritu (Gál. 5:22TNM). Yejua ika, Salmo 64:10 kijtoua: “Akin yolmelaujki pakis itech Jehová”.

¿Tlenon yokipaleui John nochipa mayolpakto?

Ika nochi yejuin tikasikamatij tleka Diana niman John, akin kachtopa otikinteneujkej, xokipolojkej inpakilis maski melak tlajyouijtoyaj. Diana kijtoua: “Yoninopaleui itech Jehová, ijkon ken se konetl nopaleuiya itech itajuan”. Noijki kijtoua: “Nikmachilia ika toTajtsin yonechteochiuj pampa nechpaleuiya manitenojnotsa niman manixuetskatinemi”. Niman John kijtoua ika ipan 1998 otemachti ipan Escuela de Entrenamiento Ministerial niman yejon okichiuj melak manomachti. Yejon okipaleui maka makikajkaua ika tenojnotsas ijkuak xok otlayekan ipan circuito. Kijtoua ika yejua niman isiuatsin xokintekiyomakak pampa nochipa okinejkej kichiuaskej tlen Jehová kintlajtlaniliaya. Niman kijtoua: “Xtlaj itech toyolkuepaj”.

Miyekej oksekimej tokniuan yokitakej ika melauak tlen kijtoua Salmo 64:10. Matikitakan tlen inpan onochiuj se tokniuj iuan isiuauj, yejuamej otlapaleuijkej ipantsin 30 xiuitl ipan Betel tlen onka Estados Unidos, san ika, sakin okimijlikej matlapaleuikan ken precursores especiales. Yejuamej okijtokej: “Xtemojkatlachialti ika timajmanas ijkuak tikpoloua itlaj tlen melak tiktlasojtla. San ika, xuelis nochipa ijkon tinemis”. Yejuamej nimantsin opeujkej tenojnotsaj imiuan tokniuan ipan intlanechikol kampa tlapaleuiayaj. Noijki kijtouaj: “Tikchiuayaj teoyotl itech itlaj tlen tiknekiyaj. Ijkuak tikitayaj kenon Jehová technankiliaya, yejon kichiuaya melak matiyolpakikan niman kuajli matomachilikan. Ijkuak xitiuejkauiyaj ipan tlanechikojli, oksekimej tokniuan opeujkej tlapaleuiyaj ken precursores. Noijki, melak otiyolpajkej pampa otikinmachtijkej omemej tlaltikpakchanejkej, niman kuajli nomachtijtoyaj”.

“NOCHIPA XYOLPAKIKAN”

Melauak ika kemantika techtekiyomakas tipakiskej, pampa yejkos tonajli ijkuak tajmanaskej. San ika, Jehová techyolseuiya ika tlajtoltin tlen nesij ipan Salmo 64:10. Maski tajmanaskej, uelis tikneltokaskej ika “akin yolmelaujki pakis itech Jehová”. Yejuin kijtosneki, ika maski san tlenon topan nochiuas, tipakiskej tla tiyolmelaujkanemij itech Jehová. Niman tikchiaj ika mayejko tonajli ijkuak kichiuas tlen yokijto, ika onias “yenkuik iluikak niman se yenkuik tlaltikpaktli”. Kuakon, itekipanojkauan toTajtsin xok kipiyaskej tlajtlakojli niman nochipa yolpakiskej ipampa nochi tlen kichiuas Jehová (Is. 65:17, 18).

Matiknemilikan kenon yejuin techpaleuis: xok tikualoskej niman mojmostla tokuiteuaskej ika miyek kojtilistli. Tlanemililtin tlen xkuakualtin noso tlen techyolkokoua xok tikilnamikiskej. Jehová techijlia ika tlemach tlen yopanok “xok noilnamikis, nion xok teyolkokos”. Ipampa yoliuilistli, oksejpa tinemiskej imiuan tochanejkauan akin yomijkej. Nion xuelis tikonnemiliskej kenon melak pakiskej miyekej tlaltikpakchanejkej, nomachiliskej ijkon ken itajuan ichpokatsin akin Jesús okiyoliti (Mar. 5:42). Yejkos tonajli ijkuak nochimej akin chantiskej ipan tlaltikpaktli xkipiyaskej tlajtlakojli niman nochipa melak pakiskej itech Jehová.