Xuiya kampa tlen onka ijtik

Xuiya kampa tlen kipiya

 TLAMACHTIJLI 32

Maueyiya totlasojtlalis

Maueyiya totlasojtlalis

“Niktlajtlani ipan nooración para más ma miyekiya nemotetlajsojtlalis” (FILIP. 1:9).

TLAKUIKAJLI 106 Matikiskaltikan melauak tetlasojtlalistli

TLEN TIKITASKEJ *

1. ¿Akinomej otlapaleuijkej niman ijkon maonia se tlanechikojli ne Filipos?

IJKUAK apóstol Pablo, Silas, Lucas niman Timoteo oajsikej Filipos, miyekej akin ompa nemiyaj kinekiyaj kikakiskej iTlajtol toTajtsin. Yejuin nauimej itekipanojkauan toTajtsin otlapaleuijkej niman ijkon maonia se tlanechikojli. Nochimej akin yopeujkaj nomachtiayaj opeuj nosentlaliaj. Kanaj nosentlaliayaj ichan tokniuj Lidia akin melak kuajli kinseliaya tokniuan (Hech. 16:40).

2. ¿Tlenon okixnamijkej tokniuan itech tlanechikojli Filipos?

2 Tokniuan itech tlanechikojli Filipos nimantsin opeuj kixnamikij tlen ouijtika. Satanás okichiuj ika miyekej tlaltikpakchanejkej makintlaueltokakan yejon nauimej itekipanojkauan toTajtsin pampa tenojnotstinemiyaj. Tekiuajkej okimajsikej Pablo niman Silas, otlanauatijkej makinuijuitekikan niman okintsajkej. Uajmostla, okinkixtijkej kampa tsauktoyaj. ¿Tlenon kichiuaskiaj aman ika yokinmakaujkaj? Yejuamej okimitatoj tokniuan akin kemach yopeujkaj nomachtiayaj niman ijkon kinyolchikauaskej. Sakin, Pablo, Silas niman Timoteo oksekan oyajkej otenojnotsatoj, niman nesi ika Lucas onokauj Filipos. ¿Tlenon panoskia imiuan tokniuan? ¿Ok kitekichiuiliskiaj Jehová? Espíritu santo okinpaleui tokniuan chikauak makitekichiuilijtokan Jehová (Filip. 2:12). San matikonnemilikan kenon Pablo yolpakiya pampa tokniuan melajkanemiyaj.

3. Itech tlen kijtoua Filipenses 1:9-11, ¿tlenon kitlajtlaniya Pablo ipan iteoyouan?

3 Ijkuak yopanoka kanaj majtlaktli xiuitl, Pablo okintlajkuilouili tokniuan filipenses. Nimantsin tikitaj ipan yejuin  carta ika Pablo melak kintlasojtlaya, yejua okimijli: “Sanoyej nemechtlajsojtla nemochimej ikan on iselikatetlajsojtlalis yejua kisa itech iyojlo JesuCristo” (Filip. 1:8). Noijki okimijli ika kichiuaya teoyotl inpampa. Kitlajtlaniliaya Jehová maueyiya intlasojtlalis, makitakan tlen más ueyi kijtosneki, machipaujkanemikan, maka yakaj makiyemanilikan itlaneltokil niman makichiuakan nochi tlen kuajli. Niman uelis tikijtoskej ika yejuin tlen okijto Pablo ok uelis techpaleuis ipan yejuin tonaltin (xpoua Filipenses 1:9, 11; Filipenses 1:10, TNM). * Ipan yejuin tlamachtijli, tikitaskej tlen Pablo okimijli filipenses niman kenon tikchiuaskej ipan tonemilis.

MAUEYIYA TOTLASOJTLALIS

4. a) Itech tlen kijtoua 1 Juan 4:9, 10, ¿kenon otechititi Jehová ika techtlasojtla? b) ¿Kenon noneki tiktlasojtlaskej Jehová?

4 Jehová otechititi ika melak techtlasojtla ijkuak okuajtitlan iKoneuj niman ijkon makitemakaki inemilis ipampa totlajtlakoluan (xpoua 1 Juan 4:9, 10, TNM). * Ijkuak tikitaj kenon Jehová melak techtlasojtla, tejuamej noijki tiknekij tiktlasojtlaskej (Rom. 5:8). ¿Kenon noneki tiktlasojtlaskej? Matikitakan tlen Jesús okijli se fariseo, yejua okijto: “Xtlajsojtla moTEKO Dios ikan nochi moyojlo, ikan nochi moalma niman ikan nochi motlamachilis” (Mat. 22:36, 37). Xtiknekij san achijtsin tiktlasojtlaskej toTajtsin, tiknekij más maueyixtiuj totlasojtlalis tlen tikmachiliaj ipampa. Pablo okimijli filipenses ika intlasojtlalis nonekiya ueyiyas. ¿Tlenon uelis tikchiuaskej niman ijkon más tiktlasojtlaskej toTajtsin?

5. ¿Tlenon uelis tikchiuaskej niman ijkon más tiktlasojtlaskej toTajtsin?

5 Tla tiknekij tiktlasojtlaskej toTajtsin, noneki tikixmatiskej. Biblia kijtoua: “On yejuan xtetlajsojtla xkixmati Dios, pampa Dios yejua tetlajsojtlalistli” (1 Juan 4:8). Pablo noijki okijtoka ika totlasojtlalis ueyixtiuj ijkuak tikixmatstiuej Jehová niman ijkuak titlanemilijtiuej ken yejua tlanemilia (Filip. 1:9). Ijkuak opeuj tomachtiaj Biblia, opeuj tikixmatij toTajtsin niman opeuj tiktlasojtlaj. San ika, aman ika más yotikixmatkej, más tiktlasojtlaj. Kuajli tikitaj ika melak noneki mojmostla tomachtiskej iTlajtol toTajtsin niman itech titlanemiliskej (Filip. 2:16).

6. Itech tlen kijtoua 1 Juan 4:11, 20, 21, ¿akinomej noijki noneki tikintlasojtlaskej?

6 Tla tikitaj kenon Jehová melak techtlasojtla, noijki tiknekiskej tikintlasojtlaskej tokniuan (xpoua 1 Juan 4:11, 20, 21). Kanaj tiknemiliaj ika xouijtika tikchiuaskej yejon. Niman kanaj ijkon tiknemiliaj pampa tiktekichiuiliaj Jehová niman tokojtiliaj tikchiuaskej ken yejua niman ken Cristo, akin melak otechtlasojtlak niman hasta okitemakak inemilis topampa. Maski ijkon, kemantika kema ouijtika tikitaj tikintlasojtlaskej tokniuan. Matikitakan tlenon opanoka ipan tlanechikojli Filipos.

7. ¿Tlenon tiuelij itech tlen Pablo okimijli tokniuan Evodia niman Síntique?

7 Tokniuan Evodia niman Síntique melak chikauak kitekichiuiliayaj Jehová niman san sekan otekitkaj iuan Pablo. Maski ijkon, yejuin tokniuan kanaj onokualanijkej niman xok onouikakej. Pablo okinteneuj ipan icarta niman okinchikajkanots. Okimijli ika nonekiya kipiyaskej “san se inyojlo ken iknijtin” (Filip. 4:2, 3). Pablo noijki okitak ika nonekiya kijlis tlanechikojli yejuin tlajtoltin:  “Nochi tlen nenkichiuaskej, xchiuakan, pero maka tlamach xkijtokan nion maka xmokamauijsokikan” (Filip. 2:14). Kuajli tikitaj ika tlen Pablo okijto xsan okinpaleui Evodia niman Síntique, noijki okinpaleui tokniuan itech tlanechikojli niman ijkon más manotlasojtlakan.

¿Tleka noneki matikitakan tlen kuajli kichiuaj tokniuan? (Xkita párrafo 8). *

8. ¿Tlenon uelis kichiuas ouijtika matikmatikan tikintlasojtlaskej tokniuan, niman tlenon techpaleuis?

8 Ijkon ken Evodia niman Síntique, kanaj melak tikitaj kanon nopopolouaj tokniuan noso tlenon xkichiuaj. Yejon itlaj tlen uelis kichiuas ouijtika matikmatikan tikintlasojtlaskej tokniuan. Xakaj nemi akin maka keman manopopolo. Tla san tikitstokej kanon nopopolouaj tokniuan, xok sajnoye tikintlasojtlaskej. Matiknemilikan yejuin, se tokniuj kilkaua techpaleuis ijkuak titlachipauaj ipan Kajli kampa Tosentlaliaj, kuakon tikualanij. ¿Tlenon panos tla peua tiknemiliaj nochi tlen tokniuj xkichiua? Kanaj más titlauelmikiskej niman xok tiknekiskej tiktlasojtlaskej. ¿Tikixnamiktokej itlaj ken yejuin? Matikilnamikikan ika Jehová xsan kita kanon nopopoloua tokniuj, yejua noijki kita kanon tejuamej topopolouaj. Niman maski kita yejon, Jehová ok techtlasojtla. Yejua ika, noneki titetlasojtlaskej ken Jehová niman tikitaskej tlen kuajli kichiuaj tokniuan. Tla tokojtiliaj tikintlasojtlaskej tokniuan, melak kuajli imiuan touikaskej (Filip. 2:1, 2).

“TLEN MÁS UEYI KIJTOSNEKI”

9. Xteneua seki tlemach “tlen más ueyi kijtosneki”.

9 ToTajtsin okichiuj ika Pablo makimijli filipenses niman nochimej akin kichiuaj ken Cristo yejuin tlajtoltin: “Xkitakan tlen más ueyi kijtosneki” (Filip. 1:10, TNM). Matikteneuakan seki tlemach “tlen más ueyi kijtosneki”: ika manoueyichiua itoka toTajtsin, ika manochiua tlen yejua kineki niman ika nochimej ipan tlanechikojli kuajli manouikakan (Mat. 6:9, 10; Juan 13:35). Tla tikitaj ika yejuin tlemach melak ueyi kijtosneki, tikteititijtoskej ika tiktlasojtlaj Jehová.

10. ¿Tlenon noneki tikchiuaskej niman ijkon tichipaujkanemiskej?

10 Pablo noijki okijto ika noneki tichipaujkanemiskej. Yemelak ika xuelis tichipaujkanemiskej ijkon ken Jehová, akin xkipiya tlajtlakojli. San ika, Jehová uelis kitas ika tichipaujkanemij tla tokojtiliaj tikueyiliskej totlasojtlalis niman tla tikitaj “tlen más ueyi kijtosneki”. Noijki tikteititiaj ika titetlasojtlaj tla tokojtiliaj xtikintlajkaliskej tokniuan noso xtikinyemaniliskej intlaneltokil.

11. ¿Tleka xkipiya ika tikinyemaniliskej intlaneltokil oksekimej?

11 ToTajtsin yemelak techmelajkaijlia maka matikinyemanilikan intlaneltokil oksekimej. Kemantika totlaken, tlen ika toyolpaktiaj niman totekiyo uelis kichiuas mayemani intlaneltokil oksekimej. Kanaj xtikchiuaj se tlajtlakojli, san ika, melak xkuajli yeskia tla san topampa yemani intlaneltokil oksekimej. Jesús okijto yejuin itech yakaj akin ijkon kichiua: “Más kuajli yeskia [...] ikechtlan kipilouiliskiaj sen tetl ueyi [...] niman kontlajkaliskiaj ne ipan mar kampa más uejkatlan” (Mat. 18:6).

12. ¿Tlenon tiuelij itech tlen okichiujkej se tokniuj iuan isiuauj akin precursores?

12 Matikitakan kenon se tokniuj iuan isiuauj akin precursores okitlakamatkej tlen Jesús okijto. Ipan intlanechikol, nemiya se tokniuj iuan isiuauj akin kemach yonoapolaktijkaj. Yejuamej kinemiliayaj ika akin nomachtiayaj xkipiaya ika yaskej cine maski tla película xkipiaya tlen xkuajli. Inchanejkauan ijkon kinemiliayaj niman yejuamej ijkon ouelkej. Kuakon, ijkuak okimatkej ika yejon omemej tokniuan precursores okitatoj se película, melak xkuajli onomachilijkej. Ijkuak opanok  yejon, tokniuj iuan isiuauj akin precursores okijtokej xok yaskej cine hasta ijkuak tokniuan más kuajli kasikamatiskiaj tlenon kuajli niman tlenon xkuajli (Heb. 5:14). Tokniuan precursores xsan okijtokej ika kintlasojtlayaj yejuin tokniuan, yejuamej okiteititijkej (Rom. 14:19-21; 1 Juan 3:18).

13. ¿Kenon ueliskia tikchiuaskej ika yakaj matlajtlako?

13 Kanaj noijki ueliskia tikchiuaskiaj ika yakaj matlajtlako. ¿Kenon ueliskia tikchiuaskej yejon? Matitlanemilikan ipan yejuin, se tlakatl akin melak koni alcohol peua nomachtia Biblia niman nokojtilia xok konis alcohol. Maski melak ouijtika okimachili, ajsi tonajli ijkuak kuajli kikajkaua alcohol. Kasikamati ika xok kipiya ika oksejpa konis alcohol. Kuakon, kipatla inemilis niman noapolaktia. Sakin, se tokniuj kinotsa ichan iuan oksekimej tokniuan niman kitekiuiltia alcohol, kijlia: “Aman yotimoapolakti niman toTajtsin mitsmaka iespíritu. Ijkuak se kipiya iespíritu Jehová sa no yejua ueli noteltia. Uelis tikonis maski san achijtsin alcohol tla tiueli sa no tejua timoteltia”. San matikonnemilikan tlenon panoskia tla tokniuj akin yeuejkaui koniya alcohol kitlakamati yejuin tokniuj akin kijtoua tlen xkinamiki.

14. ¿Kenon tlanechikoltin techpaleuiyaj matikchiuakan tlen kijtoua Filipenses 1:10?

14 Tlanechikoltin melak techpaleuiyaj matikchiuakan tlen kijtoua Filipenses 1:10. ¿Kenon? Kachtopa, ompa techilnamiktiaj tlenon kita Jehová ika más ueyi kijtosneki. Ika ome, techititiaj kenon tikchiuaskej tlen tomachtiaj niman ijkon tichipaujkanemiskej. Niman ika yeyi, ompa techyolchikauaj matitetlasojtlakan  niman matikchiuakan tlen kuajli (Heb. 10:24, 25). Ijkuak tokniuan melak techyolchikauaj, yejon kichiua melak matikintlasojtlakan niman noijki melak matiktlasojtlakan Jehová. Niman yejon tlasojtlalistli kichiuas maka matikinyemanilikan intlaneltokil oksekimej.

MATIKCHIUJTOKAN “NOCHI TLEN KUAJLI”

15. ¿Tlenon kijtosneki tikchiuaskej “nochi tlen kuajli”?

15 Pablo okitlajtlanili Jehová ika filipenses makichiuakan “nochi tlen kuajli” (Filip. 1:11). Yejuamej ueliskiaj kichiuaskej “nochi tlen kuajli” tla kitlasojtlayaj Jehová niman ikalpan, noijki tla kiteijliayaj ika tlaneltokayaj itech Jesús niman ika toTajtsin kinteochiuaskia ika tlayekapan. Pablo noijki okijto ika nonekiya petlaniskej “ken on sitlalimej yejuan petlanij ipan cielo” (Filip. 2:15). Yejuin techilnamiktia ika Jesús okimijlika inomachtijkauan ika yejuamej “ken itlaj on tlauijli yejuan kintlauiluiya” tlakamej (Mat. 5:14-16). Jesús noijki okimijlika ika nonekiya temachtiskej niman tenojnotsaskej “nochiuiyan ipan in tlaltikpaktli” (Mat. 28:18-20; Hech. 1:8). Kuakon, tikchiuaj “nochi tlen kuajli” ijkuak titlapaleuiyaj ipan yejuin tekitl.

Ijkuak Pablo tsauktoya ipan se kajli ne Roma, okijkuilo se carta tlen okontitlanili tlanechikojli Filipos. Noijki okinnojnots “nochimej on soldados” niman akin konitayaj (xkita párrafo 16).

16. ¿Kenon techititia Filipenses 1:12-14 ika uelis tipetlaniskej “ken on sitlalimej yejuan petlanij” maski ijkuak tikixnamiktoskej tlen ouijtika? (Xkita tlaixkopinajli tlen onka ixpan yejuin revista).

16 Maski san tlenon tikixnamiktoskej, uelis tipetlaniskej “ken on sitlalimej yejuan petlanij”. Ijkuak tikixnamikij tlen ouijtika, kanaj tiknemiliaj ika xok uelis titenojnotsaskej, san ika, kemantika yejon uelis kichiuas más kuajli matitenojnotsakan. Yejon tlen ipan onochiuj Pablo. Ijkuak yejua okijkuilo carta tlen okomintitlanili filipenses, tsauktoya ipan se kajli ne Roma. Maski Pablo tsauktoya, yejua okinnojnots ika pakilistli “nochimej on soldados” niman akin konitayaj. Tlen kichiuaya Pablo  okinpaleui miyekej tokniuan makiteijlikan iTlajtol toTajtsin “ikan más yolchikaualistli, niman xikan nemojtijli” (xpoua Filipenses 1:12-14; 4:22).

Matikitakan kenon más uelis titenojnotsaskej. (Xkita párrafo 17). *

17. ¿Tlenon kichiuaj tokniuan akin kixnamiktokej tlen ouijtika niman ijkon tenojnotsaskej?

17 Miyekej tokniuan melak yolchikaujkej ijkon ken Pablo. Sekimej chantij kampa tekiuajkej xkinkauiliaj matenojnotsakan, yejua ika, noneki kuajli kitaskej kenon tenojnotsaskej (Mat. 10:16-20). Ipan se país, se tokniuj tlayekanketl ipan circuito okimijli tokniuan ika ueliskiaj kinnojnotsaskej inchanejkauan, iminvecinos, akin imiuan nomachtiaj, akin imiuan tekitij niman akin kimixmatstokej. San ipan ome xiuitl, omiyekiyakej tlanechikoltin ipan yejon circuito. Kanaj tejuamej xtichantij kampa xtechkauiliaj matitenojnotsakan. Maski ijkon, matikchiuakan ken yejuin tokniuan: matikitakan kenon más titenojnotsaskej niman matikneltokakan ika Jehová techmakas kojtilistli niman ijkon tikixnamikiskej maski san katlejua tlauejli (Filip. 2:13).

18. ¿Tlenon noneki tikchiuaskej?

18 Melak noneki ika ipan yejuin tonaltin matikchiuakan tlen okijkuilo Pablo ipan carta tlen okomintitlanili filipenses. Matikitakan tlen más ueyi kijtosneki, matichipaujkanemikan, maka yakaj matikyemanilikan itlaneltokil niman matikchiuakan “nochi tlen kuajli”. Tla ijkon tikchiuaj, ueyiyas totlasojtlalis niman tikueyichiuaskej toTajtsin Jehová akin melak techtlasojtla.

TLAKUIKAJLI 17 “Nikneki”

^ párr. 5 Ipan yejuin tonaltin noneki melak matikintlasojtlakan tokniuan. Carta tlen Pablo okimijkuilouili filipenses techpaleuiya matikmatikan kenon uelis más titetlasojtlaskej maski ijkuak ouijtika yes.

^ párr. 3 Filipenses 1:10: “Niman ijkon kuajli xkitakan tlen más ueyi kijtosneki, niman xchipaujkanemikan niman maka yakaj xyemanilikan itlaneltokil hasta ijkuak uajlas Cristo”.

^ párr. 4 1 Juan 4:9, 10: “9 Ipampa yejuin, itlasojtlalis toTajtsin onoteititi ipan tonemilis, pampa toTajtsin okuajtitlan isenteKonetsin ipan tlaltikpaktli niman ijkon matikselikan nemilistli itechkopa yejua. 10 Tlasojtlalistli kijtosneki yejuin, xpampa tejuamej otiktlasojtlakej toTajtsin, yej, ika yejua kachtopa otechtlasojtlak niman okuajtitlan iKonetsin kentla uentli ipampa totlajtlakoluan”.

^ párr. 56 TLEN NESI IPAN TLAIXKOPINALTIN: Joe iuan oksekimej tokniuan tlachipauaj ipan Kajli kampa Tosentlaliaj, san ika, Joe noteltia niman peua tlajtlajtoua iuan se tokniuj iuan ikoneuj. Tokniuj Mike akin tlachipaujtika ika aspiradora kualani niman kinemilia: “Joe nion xtechpaleuiya, san iuan oksekimej tlajtotinemi”. San ika, sakin, Mike kita ika Joe kipaleuiya se tokniuj lamajtsin. Kuakon, Mike kinemilia ika noneki más kitas tlen kuajli kichiua Joe.

^ párr. 60 TLEN NESI IPAN TLAIXKOPINALTIN: Ipan se país kampa iteixpantijkauan Jehová xkinkauiliaj matenojnotsakan, se tokniuj peua tlajtlajtoua iuan se akin kixmatstika. Xakaj kimati ika tokniuj kinojnotstika itech iTlajtol toTajtsin. Sakin, yejuin tokniuj kinojnotsa se akin iuan tekiti ijkuak omemej noseuiyaj ipan intekiyo.