Xuiya kampa tlen onka ijtik

Xuiya kampa tlen kipiya

Melak pakij akin kuelitaj kitemakaskej

Melak pakij akin kuelitaj kitemakaskej

“Más paki on yejuan kitemaka” (HECH. 20:35).

TLAKUIKALTIN: 76, 110

1. ¿Kenon tlen Jehová okichijchiuj kiteititia ika yejua kuelita kitemakas tlen kipiya?

YEUEJKAUI, Jehová san iselti nemiya. Sakin, okinemili kinchijchiuas iluikaktekitkej niman tlaltikpakchanejkej. Nochimej okinmakak innemilis. Yejua “toTajtsin akin paktika” niman melak kuelita kitemakas tlen kuajli (1 Tim. 1:11, TNM; Sant. 1:17). Niman pampa Jehová kineki noijki matipakikan, techmachtia matiktemakakan tlen tikpiyaj (Rom. 1:20).

2, 3. a) ¿Tleka tipakij ijkuak tiktemakaj tlen tikpiyaj? b) ¿Tlenon tikitaskej ipan yejuin tlamachtijli?

2 ToTajtsin okinchijchiuj tlaltikpakchanejkej ijkon ken yejua (Gén. 1:27). Yejuin kijtosneki ika Jehová otexchijchiuj ika kualneskayomej tlen yejua kinpiya. Aman tej, noneki tikixkopinaskej niman ijkon yemelak tipakiskej niman tikpiyaskej itlateochiualis. Noneki matiknemilikan kenon uelis tikinpaleuiskej oksekimej niman kenon tikinmakaskej tlen tikpiyaj (Filip. 2:3, 4; Sant. 1:5). ¿Tleka? Pampa toTajtsin ijkon otexchijchiuj. Maski titlajtlakolejkej, uelis tikixkopinaskej Jehová niman tiktemakaskej tlen tikpiyaj.

 3 Biblia techititia ika noneki tiktemakaskej tlen tikpiyaj. Aman tikitaskej seki tlemach tlen kijtoua iTlajtol toTajtsin itech yejuin. Tikitaskej tleka Jehová melak paki ijkuak tiktemakaj tlen tikpiyaj. Niman tikasikamatiskej tleka tikijtouaj ika ijkuak tiktemakaj tlen tikpiyaj tikchiuaj tekitl tlen toTajtsin yotechmakak. Noijki tikitaskej tleka tipakij ijkuak ijkon tikchiuaj, niman tleka nochipa noneki matiktemakakan tlen tikpiyaj.

JEHOVÁ YOLPAKI IJKUAK TIKTEMAKAJ TLEN TIKPIYAJ

4, 5. ¿Kenon yotechititijkej Jehová niman Jesús ika temakaj tlen kipiyaj, niman tleka noneki matikimixkopinakan?

4 Jehová kineki matikixkopinakan, ika yejon, melak yolpaki ijkuak tejuamej tiktemakaj tlen tikpiyaj (Efes. 5:1, TNM). Niman noijki kineki matiyolpakikan, yejuin kuajli nesi pampa melak temojkatlachialti ken otexchijchiuj. Yejua okichijchiuj yejuin kualtsin tlaltikpaktli niman nochi tlen ipan onka niman ijkon matiyolpakikan (Sal. 104:24; 139:13-16). Kuakon, ijkuak tokojtiliaj tikchiuaskej ika oksekimej mapakikan, tikueyichiuaj Jehová.

5 Tejuamej noijki tikixkopinaj Jesús, yejua kuajli otechititi hasta kenon se tlaltikpakchane uelis kitemakas tlen kipiya. Yejua okijto: “Nejua yejuan oninochiu Tlakatl xoniuajlaj para nechpaleuiskej, yej para nitepaleuis, niman niktemakas nonemilis para nikinmakixtis miyek tlakatl” (Mat. 20:28). Noijki, apóstol Pablo okinyolchikauj akin kichiuaj ken Cristo: “Xtlanemilikan no ijki ken Cristo tlanemiliaya”, akin “xokipix iueyilis Dios niman onochiu ken se tetekichiuilijketl” (Filip. 2:5, 7). Kuakon, uelis totlajtoltiskej: “¿Uelis nikchiuas okseki niman ijkon kuajli nikixkopinas Jesús?” (xpoua 1 Pedro 2:21).

6. ¿Tlenon otemachti Jesús ijkuak otlajto itech se samaritano? (Xkita tlaixkopinajli kampa peua tlen tomachtijtokej).

6 Tikyolpaktiaj Jehová ijkuak tikixkopinaj yejua niman ikoneuj. Ika yejon, noneki matikitakan kenon uelis tikinpaleuiskej oksekimej niman ijkon kuajli manemikan. Jesús otlajto itech se samaritano, niman ijkon okiteititi ika yejuin melak noneki matikchiuakan (xpoua Lucas 10:29-37). Yejua okinmachti inomachtijkauan ika nonekiya kinpaleuiskej oksekimej, maski san akinomej yeskiaj niman maski san kanon ualeuaskiaj. ¿Tikilnamikij tleka Jesús okiteijli yejon neskayotl? Pampa se judío okitlajtoltijka: “¿Akinonon notlaltikpakikniu yejuan noneki niktlajsojtlas?”. Tlen okijto Jesús techmachtia ika tla tiknekij tikyolpaktiskej Jehová, noneki matiktemakakan tlen tikpiyaj ijkon ken okichiuj yejon samaritano.

7. ¿Kenon tikteititiaj ika tikneltokaj ika nochi tlen kichiua toTajtsin yejon tlen melak kuajli? Xkijto tleka ijkon titlanankilia.

7 Tlen yeuejkaui opanok ipan Xochitlalpan Edén noijki techititia ika noneki matiktemakakan tlen tikpiyaj. Satanás okijtoka ika Adán niman Eva melak pakiskiaj tla kixnamikiyaj Jehová niman tla san intech tlanemiliayaj. Adán niman Eva san intech otlanemilijkej. Eva kinekiya nochiuas ken toTajtsin niman Adán xokinek kiyolpaktis Jehová, yejua san okinek kiyolpaktis isiuauj (Gén. 3:4-6). Melak xkuajli tlen sakin opanok. Kema, xakaj uelis pakis tla san itech tlanemilia. Ijkuak xtitsotsokamej niman tiktemakaj tlen tikpiyaj, tikteititiaj ika tikneltokaj ika nochi tlen kichiua toTajtsin yejon tlen melak kuajli.

KENON TIKCHIUASKEJ TEKITL TLEN TOTAJTSIN YOTECHMAKAK

8. ¿Tleka nonekiya ika Adán niman Eva matlanemilikan intech oksekimej?

8 Maski Adán niman Eva san inselti nemiyaj ipan Xochitlalpan Edén, nonekiya  tlanemiliskiaj intech oksekimej. ¿Tleka? Pampa toTajtsin okinmakak miyek tekitl. Yejua okimijli makinpiyakan inkoneuan, makitemiltikan yejuin tlaltikpaktli niman makikuepakan se xochitlalpan (Gén. 1:28). Ijkon ken Jehová okinek ika nochimej akin nemiskiaj ipan tlaltikpaktli mapakikan, Adán niman Eva noijki nonekiya tlanemiliskej itech kenon inkoneuan noijki ueliskiaj pakiskej. ToTajtsin kinekiya ika ikoneuan Adán niman Eva san sekan matekitikan niman ijkon kikuepaskiaj nochi tlaltikpaktli se xochitlalpan. ¡Yejon tekitl melak ueyi katka!

9. ¿Tleka tlaltikpakchanejkej pakiskiaj ijkuak kikuepaskiaj tlaltikpaktli se xochitlalpan?

9 Ijkuak tlaltikpakchanejkej kikuepaskiaj tlaltikpaktli se xochitlalpan, nonekiskia kitlakamatiskej toTajtsin niman ijkon kichiuaskiaj tlen yejua kineki. Tla ijkon kichiuayaj, toTajtsin kinseliskia (Heb. 4:11). Xnemili kenon melak pakiskiaj tla kichiuaskiaj yejuin tekitl. Jehová melak kinteochiuaskia pampa xtsotsokamej yeskiaj niman pampa kinpaleuiskiaj oksekimej.

10, 11. ¿Tlenon techpaleuis matitenojnotsakan niman matitemachtikan?

10 Ipan yejuin tonaltin, Jehová yotechmakak se kualtsin tekitl. Yejua kineki matitenojnotsakan niman matitemachtikan. Tla tiknekij tikchiuaskej yejuin tekitl, noneki tikitaskej kenon uelis tikinpaleuiskej oksekimej niman ijkon kuajli manemikan. Niman, san uelis tikchiuaskej yejuin tekitl tla tiktlasojtlaj Jehová niman tikintlasojtlaj tlaltikpakchanejkej.

11 Apóstol Pablo okijto ika yejua niman oksekimej tokniuan tekititoyaj iuan toTajtsin pampa yejuamej kinnojnotsayaj niman kinmachtiayaj tlaltikpakchanejkej itech tlen melauak (1 Cor. 3:6, 9). Ipan yejuin tonaltin, tejuamej noijki uelis titekitiskej iuan toTajtsin. ¿Kenon? Uelis tiktemakaskej noso tiktekitiltiskej totiempo, tokojtilis niman totomintsin niman ijkon tikchiuaskej tekitl tlen toTajtsin yotechmakak. ¡Yejuin se ueyi tlateochiualistli!

Melak tipakij ijkuak tikpaleuiyaj yakaj makasikamati tlen melauak itech Biblia. (Xkita párrafo 12).

12, 13. ¿Tlen tlateochiualistin tikseliaj ijkuak titemachtiaj?

12 Melak techyolpaktia ijkuak tiktemakaj noso tiktekitiltiaj totiempo niman tokojtilis ijkuak titenojnotsaj niman titemachtiaj. Yejon tlen kijtouaj miyekej tokniuan akin yakaj yokimachtijkej. Melak tipakij ijkuak tikitaj ika yakaj melak ixpaki ijkuak kasikamati tlenon yemelak temachtia Biblia, noijki ijkuak ueyiya itlaneltokil, ijkuak kipatla inemilis niman ijkuak kimijlia oksekimej tlen ueltiuj. Jesús noijki melak opak ijkuak 70 inomachtijkauan “onokuepkej ikan paktli” ijkuak otenojnotsatoj pampa melak kuajli tlen inpan onochiujka (Luc. 10:17-21).

13 Tokniuan itech nochi tlaltikpaktli melak yolpakij ijkuak kitaj ika tlen kijtoua Biblia kinpaleuiya tlaltikpakchanejkej ipan innemilis. Matitlajtokan itech se tokniuj akin  itoka Anna. Yejua kinekiya kichiuas okseki ipan itekiyo toTajtsin. Kuakon, oyaj ipan se kalpan tlen onka Europa oriental kampa melak nonekij tenojnotskej. * Yejua okijkuilo: “Melak nipaki pampa melak miyekej kinekij nomachtiskej itech Biblia. Nechyolpaktia ijkuak nitenojnotsa. Ijkuak najsi nochan, hasta xok nikajxilia nitlanemilis notech. Nitlanemilia intech akin nikinmachtia, itech tlen kixnamiktokej niman itech tlen kintekipachoua. Niktejtemoua kenon uelis nikinyolchikauas niman kenon nikinpaleuis. Niman kuajli yonikitak ika ʻmás paki on yejuan kitemaka xken on yejuan kiselia’” (Hech. 20:35).

Ijkuak titenojnotsaj ipan nochi kaltin, tlaltikpakchanejkej uelis kikakiskej kuajli tlajtoltin itech Tekiuajyotl. (Xkita párrafo 14).

14. ¿Tlenon uelis tikchiuaskej niman ijkon matechyolpakti titenojnotsaskej maski miyekej xtechkakiskej?

14 Tla tokojtiliaj titenojnotsaj niman tla titlajtouaj imiuan miyekej tlaltikpakchanejkej, melak techyolpaktis titenojnotsaskej. Matikteijlikan kuajli tlajtoltin, maski tla xkinekiskej techkakiskej. Jehová noijki kineki matikchiuakan tlen okinauati Ezequiel: “Kipiya ika tikimijlis tlen nimitsijlia, maski tla mitskakij noso ka” (Ezeq. 2:7; Is. 43:10). Kuakon, maski tlaltikpakchanejkej xtechkakij, Jehová kita nochi tlen tikchiuaj (xpoua Hebreos 6:10). Se tokniuj okijto yejuin: “Tejuamej yotiktokakej, yotikatekijkej niman yotiktlajtlanilijkej toTajtsin ipan teoyotl makipaleui akin kineki nomachtis” (1 Cor. 3:6).

KENON TIYOLPAKISKEJ

15. ¿San noneki tiktemakaskej tlen tikpiyaj tla tlaltikpakchanejkej techtlasojkamachiliaj? Xkijto tleka ijkon titlanankilia.

15 Ijkon ken Jehová, Jesús noijki kineki matipakikan. Ika yejon, otechnauati yejuin: “Xkinmakakan tlajtlamach on oksekimej, niman Dios no mechmakas. Xkinmakakan ken se kuajli tlanamakaketl kitemaka ikan se tlatemachiuajli yejuan kuajli tentikaj, yejuan kuajli kipachoua, niman yejuan kikoxonia niman yejuan kiteuitsoltia, pampa Dios mechmakas sa no ijki ken nemejuamej nenkiminmakaj oksekimej” (Luc. 6:38). Miyekej kichiuaj tlen kuajli ijkuak kinmakaj itlaj. Melauak ika xnochimej kiseliaj tlen ika toyojlo tikinmakaj. San ika, ijkuak se kema kitlasojkamati, yejua noijki kinekis kitemakas tlen kipiya. Kuakon, maski tikitaskej ika tlaltikpakchanejkej xkitlasojkamatij tlen  tikchiuaj, nochipa matiktemakatokan tlen tikpiyaj. Xtikmatij tlenon uelis panos tla tiktemakaj tlen tikpiyaj.

16. ¿Akinon noneki tikmakaskej tlen tikpiyaj, niman tleka?

16 Aman tej, akin tetlatlayokoliani xkichia ika noijki itlaj makimakakan. Jesús okijto: “Ijkuak tikpias itlaj iluitl, xkinnotsa on yejuan mayankej, on yejuan makokoxkej noso ikxitlajkomej, on yejuan koxomej niman on yejuan ciegos. Niman Dios mitstiochiuas pampa [...] yejuamej xueliskej mitskuepiliskej” (Luc. 14:13, 14). Biblia kijtoua: “Akin kuelita tetlayokolis kiteochiuaskej”. Noijki kijtoua: “Paki se akin kiteititia ika kasikamati akin xtlaj kipiya” (Prov. 22:9; Sal. 41:1). Kema, tikinpaleuiyaj oksekimej pampa yejon melak techyolpaktia.

17. ¿Tlenon uelis tiktemakaskej niman ijkon tipakiskej?

17 Jesús okijtoka ika “más paki on yejuan kitemaka xken on yejuan kiselia”. Niman ijkuak Pablo okiteneuj yejuin tlajtoltin xsan kijtosnekiya ika noneki tikinmakaskej oksekimej tlemach tlen patioj. Noijki uelis tikinyolchikauaskej, tikinnojnotsaskej ika tlen kijtoua Biblia niman tikinpaleuiskej (Hech. 20:31-35). Ika tlen Pablo okijto niman okichiuj, otechmachti ika melak ueyi kijtosneki tiktemakaskej totiempo, tokojtilis, totlasojtlalis niman tiknektoskej titepaleuiskej.

18. ¿Tlenon yokasikamatkej miyekej ixtlamatkej?

18 Ixtlamatkej akin kitaj kenon toyekanaj noijki yokitakej ika ijkuak tiktemakaj tlen tikpiyaj melak tipakij. Se amatlajkuilojli kijtoua ika miyekej tlaltikpakchanejkej okijtokej ika melak oyolpakej ijkuak okichiujkej itlaj inpampa oksekimej. Ixtlamatkej kijtouaj ika ijkuak titepaleuiyaj, tomachiliaj ika toyojlo. Kuakon, miyekej ixtlamatkej kijtouaj ika tla tiknekij tipakiskej niman xtikualoskej, matitepaleuikan maski xtechtlaxtlauiliskej. Tlen yejuamej yokijtokej xtechmojkatlachialtia, pampa toTajtsin Jehová akin otexchijchiuj, yotechijlika ika tla tikuelitaj titetlayokoliskej tipakiskej (2 Tim. 3:16, 17).

NOCHIPA MATIKTEMAKAKAN TLEN TIKPIYAJ

19, 20. ¿Tleka tiknektokej tiktemakaskej tlen tikpiyaj?

19 Pampa techyeualouaj akin san itech tlanemiliaj, kemantika uelis techtekiyomakas tiktemakaskej tlen tikpiyaj. San ika, Jesús okinteneuj ome tlanauatiltin tlen ueyi kijtosnekij. Se, technauatia matiktlasojtlakan Jehová ika nochi toyojlo, tonemilis, totlamachilis niman tochikaualis. Okse, technauatia matikintlasojtlakan oksekimej ijkon ken tejuamej totlasojtlaj (Mar. 12:28-31). Yotiuelkej ipan yejuin tlamachtijli ika akin kitlasojtlaj Jehová, kixkopinaj. Jehová niman Jesús kuelitaj kitemakaskej tlen kipiyaj, niman techyolchikauaj matikimixkopinakan, pampa yejuin kichiuas melak matipakikan. Tla tochikauaj tikmakaskej toTajtsin niman tlaltikpakchanejkej tlen tikpiyaj, tikueyichiujtoskej Jehová niman tikinpaleuijtoskej oksekimej, niman tejuamej noijki techpaleuis.

20 Tikmatstokej ika tokojtiliaj tiktemakaskej tlen tikpiyaj niman titepaleuiskej. Niman melak kuajli ika ijkon tikchiuaj iuan tokniuan (Gál. 6:10). Tla nochipa ijkon tikchiuaj, tlaltikpakchanejkej techtlasojkamachiliskej niman techtlasojtlaskej, niman tejuamej melak tipakiskej. Proverbios 11:25 kijtoua: “Akin kuelita kitemakas miyek kipiyas, niman akin kinyolseselia oksekimej, yejua noijki kiyolseseliskej”. Ipan tonemilis niman ipan totenojnotsalis melak miyek onka kenon uelis tiktemakaskej tlen tikpiyaj niman tikteititiskej ika xtitsotsokamej. Ipan okse tlamachtijli tikitaskej seki tlemach tlen uelis tikchiuaskej.

^ párr. 13 Tokayotl yonopatlak.