Xuiya kampa tlen onka ijtik

Xuiya kampa tlen kipiya

 TLAMACHTIJLI 18

Matotlalokan hasta titetlaniskej

Matotlalokan hasta titetlaniskej

“Yonitlan ninotlaloua” (2 TIM. 4:7TNM).

TLAKUIKAJLI 129 Maka matosiaujkauakan

TLEN TIKITASKEJ *

1. ¿Tlenon noneki tikchiuaskej tinochimej akin tikchiuaj ken Cristo?

TLA tejua tikualo noso yotisiauj, ¿tikuelitaskia timotlalos imiuan oksekimej kampa tikmati ika ouijtika titetlanis? Kanaj xtiknekiskiaj. San ika, apóstol Pablo okijto ika tinochimej akin tikchiuaj ken Cristo totlalouaj ipan se ojtli (Heb. 12:1). Tinochimej, maski tla yotiueuentsintiakej noso tla xok tikojtikej, noneki titlaxikoskej niman tajsiskej kampa ontlami yejuin ojtli tla tiknekij tikseliskej tlen Jehová kineki techmakas (Mat. 24:13).

2. Itech tlen kijtoua 2 Timoteo 4:7, 8, ¿tleka Pablo ouel okimelajkaijto ika totlalojtokej ipan se ojtli?

2 Pablo okimelajkaijto ika totlalojtokej ipan se ojtli pampa yejua yoajsika kampa ontlamiya yejon ojtli (xpoua 2 Timoteo 4:7, 8TNM). * San ika ¿kanon notlalojtoya Pablo?

¿KANON TOTLALOJTOKEJ?

3. ¿Tlenon okijtosnek Pablo ijkuak okijto ika tejuamej kentla totlalojtoskiaj ipan se ojtli?

3 Pablo kemantika kiteneuaya itlaj tlen nochiuaya ne Grecia niman ijkon temachtis tlen ueyi kijtosneki (1 Cor. 9:25-27; 2 Tim. 2:5). Miyekpa okijto ika akin tikchiuaj ken Cristo kentla totlalojtoskiaj ipan se ojtli (1 Cor. 9:24; Filip. 3:14; 2 Tim. 4:7TNM). Tejuamej tipeuaj totlalouaj ijkuak tosentemakaj itech Jehová niman toapolaktiaj (1 Ped. 3:21TNM). Niman tajsij kampa ontlami yejuin ojtli ijkuak Jehová techmaka totlaxtlauil: se nemilistli tlen xkeman tlamis (Mat. 25:31-34; Mat. 25:46, TNM; 2 Tim. 4:8TNM).

4. ¿Tlenon tikitaskej ipan yejuin tlamachtijli?

 4 Akin tiktekichiuiliaj Jehová noneki tikchiuaskej ijkon ken akin uejkaujtipan notlalouaj. Matikteneuakan seki tlemach tlen noneki tikchiuaskej. Kachtopa, kipiya ika tiaskej ipan ojtli tlen noneki. Ika ome, noneki titlanemiliskej itech tlen tikseliskej. Niman ika yeyi, noneki tikxikoskej tlen tikixnamikiskej ipan ojtli.

MATOTLALOKAN IPAN OJTLI TLEN YOKITLALI JEHOVÁ

Tinochimej akin tikchiuaj ken Cristo noneki tiaskej ipan yejon ojtli tlen toTajtsin yokitlali. (Xkimita párrafos 5-7). *

5. ¿Ipan katlejua ojtli noneki tiaskej, niman tleka?

5 Nochimej akin notlalouaj noneki yaskej ipan yejon ojtli tlen yokimijlikej niman ijkon uelis tetlaniskej. Noijki ijkon, tla tejuamej tiknekij tiktlaniskej on nemilistli tlen xkeman tlamis, kipiya ika tiaskej ipan yejon ojtli tlen Jehová yokitlali, kema, noneki tinemiskej ijkon ken Jehová technauatia (Hech. 20:24; 1 Ped. 2:21). San ika, Satanás niman akin kichiuaj ken yejua, kinekij matijkauakan toojui niman matinemikan ijkon ken yejuamej (1 Ped. 4:4). Techpijpinaujtiaj pampa tiktlakamatij Jehová niman kijtouaj ika yejuamej melak kuajli nemij pampa kichiuaj nochi tlen kinekij. San ika, yejon xmelauak (2 Ped. 2:19).

6. ¿Tlenon tiuelij itech tlen ipan onochiuj Brian?

6 Akin kichiuaj ken kineki Satanás, nimantsin kitaskej ika xkeman nemiskej ika inyojlo, kitaskej ika yonochiujkej “esclavos” itech Satanás niman itech tlen kileuiyaj (Rom. 6:16). Matikitakan tlen ipan onochiuj se tokniuj itoka Brian. Ijkuak yejua ok pitentsin katka, itajuan okiyejyekojkej kimachtiskej makichiua tlen kijtoua Biblia. San ika, ijkuak opeuj telpochtia, okinemili ika kanaj xyolpakiskia tla kitlakamatiya Jehová. Kuakon, opeuj nemi ken kineki Satanás. Brian kijtoua: “Niknemiliaya ika más niyolpakiskia tla nikchiuaya tlen nikuelitaya, san ika, san okichiuj maniuetsi ipan miyek vicios”. Ika yolik opeuj kinkui drogas, opeuj tlauani niman opeuj auilnemi. Brian noijki kijtoua: “Sakin opeuj nikinkui drogas tlen más teijtlakouaj niman xok ueliya nikinkauaya. Hasta opeuj nikinnemaka drogas niman ijkon uelis niktlaxtlauas nochi novicios”. San ika, sakin okasikamat ika nonekiya kitlakamatis Jehová. Okipatlak inemilis niman onoapolakti ipan 2001. Aman Brian más yolpaki pampa notlaloua ipan ojtli tlen toTajtsin kineki. *

7. Ken kijtoua Mateo 7:13, 14, ¿katlejua yejon ome ojtin tlen tixpan onkatij?

7 ¡Melak noneki kuajli matiktlapejpenikan ipan katlejua ojtli totlaloskej! Satanás kineki matijkauakan on ojtli pitsauak “tlen teuika ipan nemilistli” niman matiakan ipan on ojtli patlauak kampa miyekej yauej. Miyekej kuelitaj ompa yaskej pampa kinkauiliaj  makichiuakan tlen kinekij, san ika, yejon ojtli kinuikas “ipan tlapopolouilistli” (xpoua Mateo 7:13, 14TNM). * Tla tejuamej tiknekij nochipa tiaskej ipan on ojtli tlen Jehová yokitlali, noneki itech titlaneltokaskej niman tijkakiskej tlen techijlia.

MAKA MATIJKAJKAUAKAN IKA TOTLALOUAJ

Maka matijkajkauakan ika totlalouaj niman maka matitetlajkalikan. (Xkimita párrafos 8-12). *

8. ¿Tlenon kichiuaj akin notlalouaj ijkuak uejuetsij?

8 Nochimej akin notlalouaj ontlachixtiuej tlayekapan pampa xkinekij uejuetsiskej. Maski ijkon, kanaj uelis oncholoskej ipan itlaj tlen kintlajkalis noso kanaj yakaj akin noijki notlaloua kintlajkalis maski xkinekiya. Tla yejuamej uejuetsij, oksejpa nokuiteuaj niman oksejpa notlalouaj. Xsan konnemilijtokej tlenon okintlajkal, yej kinemiliaj ika ajsiskej kampa ontlami yejon ojtli niman ika kinmakaskej intetlayokolil.

9. ¿Tlenon noneki tikchiuaskej tla kemantika tiuejuetsij?

9 Tejuamej akin tiktekichiuiliaj toTajtsin noijki uelis tiuejuetsiskej, kanaj tikijtoskej noso tikchiuaskej itlaj tlen xkuajli, noso kanaj se tokniuj techtlajkalis pampa kichiuas itlaj tlen techyolkokos. San ika, yejuin xkipiya ika techmojkatlachialtis. ¿Tleka? Pampa tinochimej titlajtlakolejkej niman tinochimej totlalojtokej ipan se ojtli tlen pitsauak. Kuakon, uelis tikijtoskej ika kemantika tomajmapeujtiaskej. Pablo okijto ika kemantika tokniuan kichiuaskej itlaj tlen uelis techyolkokos (Col. 3:13). San ika, maka san matitlanemilijtokan itech tlen otechtlajkal, yej matitlanemilikan itech tlen tikseliskej tla totlalouaj. Tla tiuejuetsij, matokuiteuakan niman oksejpa matotlalokan. Tla san tikualantokej pampa yotiuejuetskej, tla san tikijtotokej tlen xtikuelitaj niman xtiknekij tokuiteuaskej, xuelis tajsiskej kampa ontlami yejuin ojtli nion xuelis tikseliskej totlaxtlauil. Niman xsan yejon, tla xtokuiteuaj, uelis tikintsakuiliskej oksekimej akin nokojtilijtokej notlaloskej ipan yejuin ojtli pitsauak tlen teuika ipan nemilistli.

10. ¿Tlenon noneki tikchiuaskej niman ijkon xtikintsakuiliskej akin touan notlalouaj?

10 Tla xtiknekij tikintsakuiliskej akin touan notlalouaj, kipiya ika tikimijyouiskej niman xsan tiknekiskej manochiua tlen tejuamej tiknekij  (Rom. 14:13, 19-21; 1 Cor. 8:9, 13). Tejuamej xtikchiuaj ken akin notlalouaj kampa notlatlanij. San matikonnemilikan yejuin, yejuamej xkinekij yakaj okse matetlani. Xtlanemiliaj intech oksekimej. Ika yejon, tepapanauiyaj niman ijkon yejuamej tetlaniskej. San ika, tejuamej xtotlatlanij imiuan tokniuan (Gál. 5:26; 6:4). Tejuamej tiknekij tikinpaleuiskej oksekimej niman ijkon touan makiselikan nemilistli tlen xkeman tlamis. Ika yejon, xsan totech titlanemiliaj, yej tikinchiuiliaj “oksekimej on tlen kuajli”, ijkon ken okijto Pablo (Filip. 2:4).

11. ¿Tlenon kinemilijtiuej akin notlalouaj, niman tleka?

11 Akin notlalouaj xsan ontlachixtiuej tlayekapan, noijki kinemilijtiuej ika ajsiskej kampa ontlami yejon ojtli. Maski kanaj xyemelak konitstokej, kinemiliaj kenon nomachiliskej ijkuak ajsiskej niman kiseliskej intlaxtlauil. Yejuin kinpaleuiya maka manosiaujkauakan.

12. ¿Tlenon yotechijli Jehová techmakas pampa techtlasojtla?

12 Pampa Jehová melak tetlasojtla, yokijto ika nochimej akin ajsiskej itlamiyan yejuin ojtli, kinmakas se nemilistli tlen xkeman tlamis. Sekimej kiseliskej yejuin nemilistli ne iluikak niman oksekimej ipan se kualtsin xochitlalpan nikan ipan tlaltikpaktli. Biblia techijlia miyek tlemach tlen techpaleuiya matiknemilikan kenon melak kualtsin tinemiskej ipan yejon tonaltin. Tla tejuamej titlanemiliaj itech yejon, xitlaj tijkauiliskej matechtlajkali niman ok totlalojtoskej.

MATOTLALOJTOKAN MASKI MIYEK TIKIXNAMIKIJ

Matotlalojtokan maski miyek tikixnamikij. (Xkimita párrafos 13-20). *

13. ¿Tleka tikijtouaj ika akin tikchiuaj ken Cristo melak tikojtikej?

13 Yeuejkaui, ipan kalpan Grecia, akin notlalouayaj kixnamikiyaj tlen ouijtika: melak siauiyaj niman nokokouayaj. Ika yejon, san ueliskiaj tetlaniskej tla kuajli nomajmachtiayaj niman tla kipiayaj miyek kojtilistli. Akin tikchiuaj ken Cristo, noijki techmajmachtiaj niman ijkon kuajli totlaloskej ipan ojtli tlen teuika ipan nemilistli. San ika, tejuamej melak tikojtikej pampa Jehová techkojtilia. Yejuin melak kualtsin pampa ikojtilis Jehová xkeman tlami. Tla tejuamej itech topaleuiyaj, Jehová techijlia ika techpaleuis niman techkojtilis (1 Ped. 5:10).

14. ¿Kenon techpaleuiya 2 Corintios 12:9 matikxikokan tlen tikixnamikij?

14 Apóstol Pablo miyek tlen okixnamik. Yejua okipijpinaujtijkej niman okitlaueltokakej. San ika, xsan yejon, kemantika noijki kimachiliaya ika xok kojtik katka, niman okijto ika kipiaya se tlajyouilistli tlen katka “ken itlaj uitstli” ipan itlalnakayo (2 Cor. 12:7). Maski Pablo miyek tlemach tlen okixnamik, xkeman okinemili tla xok ueliskia notlalos, yej okinemili ika nochi tlen kixnamiktoya kipaleuiskia más matlaneltoka itech Jehová (xpoua 2 Corintios 12:9). Ika yejon, Jehová nochipa okipaleui.

15. ¿Tlenon panos tla tikchiuaj ijkon ken apóstol Pablo?

15 Ijkon ken okichiuilijkej apóstol Pablo, kanaj tejuamej noijki techpijpinaujtiaj noso techtlaueltokaj pampa tikchiuaj tlen toTajtsin techijlia. Niman kanaj tikualoj noso tikmachiliaj ika xok tikpiyaj kojtilistli. San ika, tla tejuamej tikchiuaj ken Pablo, tikitaskej ika nochi tlen tikixnamikij kichiuas matikmachilikan kenon Jehová techpaleuiya ika tlasojtlalistli.

16. ¿Tlenon uelis kichiuaskej akin kipiyaj se kokolistli?

16 ¿Xok tiuelij tokuiteuaj pampa tikpiyaj se ueyi kokolistli noso tinemij ipan se silla de ruedas? ¿Techkokouaj toikxiuan noso xok más titlachiaj? Tla ijkon topan nochiujtok, ¿uelis totlaloskej imiuan akin ok kipiyaj kojtilistli niman xkualoj? Kema. Melak miyekej tokniuan akin youeuentsintiakej noso kipiyaj se ueyi kokolistli notlalojtokej ipan yejuin ojtli tlen teuika ipan nemilistli. Yejuamej uelij notlalouaj pampa Jehová kinkojtilia. Kinkakij  tlanechikoltin ipan teléfono noso kimitaj ipan Internet. Noijki kinpaleuiyaj oksekimej makixmatikan toTajtsin ijkuak kinnojnotsaj inchanejkauan, tlapajtikej niman enfermeras.

17. ¿Kenon kimita Jehová akin kualoj niman xok miyek uelij kichiuaj?

17 Maka keman matiknemilikan ika, pampa tikualoj niman xok miyek tiuelij tikchiuaj, aman xok uelis totlaloskej ipan yejuin ojtli tlen teuika ipan nemilistli. Jehová techtlasojtla pampa itech titlaneltokaj niman kita ika chikauak yotiktekichiuilijkej. Ijkuak tikualoj, tiknekij matechpaleui Jehová. Niman yejua xtechkauas, yej más nisiuj touan nemis (Sal. 9:10). Matikitakan tlenon kijtoua se tokniuj siuatl akin kipiya se ueyi kokolistli: “Pampa yopeuj más nikualo, xok más ueli nikteijlia tlen temachtia iTlajtol toTajtsin. San ika, nikmatstika ika Jehová yolpaki ijkuak kita ika nikchiua tlen niueli. Yejon noijki nechyolpaktia”. Ijkuak xika toyojlo tinemiskej, matikilnamikikan ika Jehová touan nemi. Matitlanemilikan itech tlen okijto apóstol Pablo, yejua okijto ika tlen kixnamikiya kichiuaya makita “ika on ueyi poder yejuan topan onkaj xtotech kisa, yej ualeua itech Dios” (2 Cor. 4:7).

18. ¿Tlenon kixnamikij sekimej tokniuan?

18 Sekimej tokniuan, akin noijki notlalojtokej ipan yejuin ojtli tlen teuika ipan nemilistli, kixnamikij okse itlaj tlen melak ouijtika. Yejuin tokniuan kipiyaj seki tlaueltin tlen miyekej xkitaj niman xkasikamatij, kema, yejuin tokniuan tlajyouiyaj pampa noyolajmanaj noso ajmankamikij. ¿Tleka melak ouijtika tlen kixnamikij? Pampa ijkuak yakaj nomaposteki noso nemi ipan se silla de ruedas, nochimej kitaj ika tlajyouiya niman kijliaj tlenon ika kipaleuiskej. Maski akin melak noyolajmanaj noso noyolkokouaj xnesi tla tlajyouijtokej, yejuamej noijki tlajyouiyaj ijkon ken akin nomaposteki. Teajman ika sekimej kanaj xkimititiaj ika kintlasojtlaj niman nion xkintlajpiyaj.

19. ¿Tlenon tiuelij itech Mefibóset?

19 Tla xmiyek ueli tikchiuaj niman tikmachiliaj ika xakaj techasikamati, tlen ipan onochiuj Mefibóset uelis techyolchikauas (2 Sam. 4:4). Mefibóset xsan otlajyoui pampa kualouaya, noijki ononek kixikos ijkuak tekiuaj David okinemili ika okichiuj itlaj tlen xkuajli niman ijkuak okichiuili tlen xkinamiki. Maski Mefibóset xokinotejtemouilijka nochi tlen okixnamik, yejua xokinemili tlen xkuajli. Mefibóset kitlasojkamatiya tlen kipiaya niman kilnamikiya kenon yeuejkaui David okititijka ika kitlasojtlaya (2 Sam. 9:6-10). Ika yejon, ijkuak David okinemili ika yejua okichiuj tlen xkuajli, Mefibóset xokualan nion xokitlauelitak. Noijki, xokikauili makiyolajmana tlen David okichiuilijka niman xokitlajtlakolti Jehová ipampa tlen kixnamiktoya. Yejua nochipa  okipaleui yejon tekiuaj akin toTajtsin yokitlalijka (2 Sam. 16:1-4; 19:24-30). Jehová okichiuj ika manokaua ipan iTlajtol tlen ipan onochiuj Mefibóset niman ijkon matechpaleui (Rom. 15:4).

20. ¿Tlenon kimachiliaj tokniuan akin ajmankamikij, san ika, tlenon uelis kuajli kimatstoskej?

20 Tokniuan akin melak ajmankamikij, xkuajli nomachiliaj noso nomojtiaj ijkuak nemij imiuan oksekimej. Kanaj ouijtika kitaj nemiskej kampa tojlan, maski ijkon, xkikajkauaj ika touan nonechikouaj niman yauej ipan uejueyimej tlanechikoltin. Maski kinmojtia kinnotsaskej akin xkimixmatij, yejuamej touan ontenojnotsaj. Tla ijkon topan nochiua, maka matajmanakan, miyekej noijki ijkon nomachiliaj. Matikilnamikikan ika Jehová kiyolpaktia nochi tlen tikchiuaj ipampa. Kuajli nesi ika Jehová techteochiujtika niman techmakatika ikojtilis, pampa maski miyek tlen tikixnamikij, titlaxikojtokej * (Filip. 4:6, 7; 1 Ped. 5:7). Tla tejuamej ok tiktekichiuilijtokej Jehová maski xmiyek ueli tikchiuaj noso tiajmankamikij, uelis kuajli tikmatstoskej ika Jehová yolpaki pampa ok tiktekichiuiliaj.

21. ¿Tlenon uelis tikchiuaskej ika itlapaleuilis Jehová?

21 Akin notlalouaj kampa notlatlanij, san se tetlani, ijkon ken yeuejkaui nochiuaya. San ika, akin notlalojtokej ipan ojtli tlen teuika ipan nemilistli, nochimej uelis tetlaniskej tla tlaxikouaj (Juan 3:16). Akin notlalouaj kampa notlatlanij noneki kuajli chikaujtoskej, pampa tla xkuajli chikaujtokej, xuelis tetlaniskej. San ika, tejuamej, maski xmiyek ueli tikchiuaj, ok uelis totlalojtoskej (2 Cor. 4:16). Jehová techpaleuis matajsikan kampa tlami yejuin ojtli tlen teuika ipan nemilistli.

TLAKUIKAJLI 144 Maka xkixtenkaua tlaxtlauijli

^ párr. 5 Miyekej tokniuan xkuajli nomachiliaj pampa youeuentsintiakej noso kipiyaj se kokolistli tlen melak kinsiauitia. Kema, xakaj nemi akin maka keman masiaui. Ika yejon, kanaj techmojtia teuan totlaloskej. Ipan yejuin tlamachtijli, tikitaskej kenon titlaxikoskej chika totlalouaj ipan ojtli tlen teuika ipan nemilistli niman ijkon uelis tikseliskej tlen toTajtsin kineki techmakas.

^ párr. 2 2 Timoteo 4:7, 8: “7 Yonitetlan ipan yejuin kuajli tlauijsokilistli, yonitlan ninotlaloua, ok nikpiya notlaneltokil. Aman yonechyektlalilijkej se corona pampa yonimelajkanen. ToTeko, akin kuajli teyolkuitijketl, nechmakas yejuin tetlayokolijli ipan yejon tonajli, san ika, xsan nejua nechmakas, yej noijki nochimej akin sa kichiatokej mayejko”.

^ párr. 6 Xkita tlamachtijli “La Biblia les cambió la vida”, itech La Atalaya del 1 de enero de 2013.

^ párr. 7 Mateo 7:13, 14: “13 Xkalakikan ipan puerta pitstik, pampa patlauak on puerta niman koyauak on ojtli tlen teuika ipan tlapopolouilistli, niman miyekej kalakij ipan yejon puerta; 14 san ika, pitstik on puerta niman pitsauak on ojtli tlen teuika ipan nemilistli, niman xmiyekej kinextiaj”.

^ párr. 20 Ipan mayo de 2019, onopanolti ipan JW Broadcasting® tlen uelis techpaleuis maka sajnoye matajmankamikikan, niman noijki noteneuaj sekimej tokniuan akin kuajli yokixnamijkej yejuin tlauejli. Ipan jw.org® xuiya kampa kijtoua AMATLAJKUILOLTIN > JW BROADCASTING®.

^ párr. 65 TLEN NESI IPAN TLAIXKOPINAJLI: Yejuin tokniuj akin youeuentsintiak ok notlalojtika ipan ojtli tlen teuika ipan nemilistli pampa xkikajkaua ika tenojnotsa.

^ párr. 67 TLEN NESI IPAN TLAIXKOPINAJLI: Uelis tikintlajkaliskej oksekimej tla tikinchiualtiaj makonikan alcohol noso tla tejuamej miyek tikonij.

^ párr. 69 TLEN NESI IPAN TLAIXKOPINAJLI: Se tokniuj tlakatl kiteititia ika xkikajkaua ika notlaloua pampa kinojnotsa se tlapajtiketl.