Xuiya kampa tlen onka ijtik

Xuiya kampa tlen kipiya

 TLAMACHTIJLI 14

¿Melak kuajli tiktekichiuiliaj toTajtsin?

¿Melak kuajli tiktekichiuiliaj toTajtsin?

“Xpiya moyojlo para tikteijlis on kuajli tlajtojli [...] niman kuajli xchiua motekiu” (2 TIM. 4:5).

TLAKUIKAJLI 57 Nochimej tikinnojnotsaj

TLEN TIKITASKEJ *

Sakin ika oyoliuj, Jesús onosentlali imiuan inomachtijkauan niman okinnauati mauiyan niman matemachtikan. (Xkita párrafo 1).

1. ¿Tlenon tiknekij tikchiuaskej nochimej itekipanojkauan toTajtsin, niman tleka? (Xkita tlaixkopinajli tlen onka ixpan yejuin revista).

JESUCRISTO okinnauati inomachtijkauan: “Xuiyan [...] niman xmachtikan nochi tlakatl para yejuamej no nonomachtijkauan yeskej” (Mat. 28:19). Nochimej akin tiktekichiuiliaj toTajtsin tiknekij tikmatiskej kenon kuajli tikchiuaskej tekitl tlen yotechmakakej (2 Tim. 4:5). Yejon tekitl ueyi kijtosneki niman melak noneki manochiua. San ika, kemantika xueli titenojnotsaj ijkon ken tiknekiskiaj.

2. ¿Tleka kemantika ouijtika tikmachiliaj titenojnotsaskej?

2 Onka okseki tlen noneki tikchiuaskej tlen techkuilia miyek tiempo niman tochikaualis. Kanaj melak noneki titekitiskej niman ijkon tikintlakualtiskej tochanejkauan. Noso kanaj tejuamej noso se tochanejkauj kualo, melak najmana noso melak youeuentsintiak. ¿Kenon uelis tikixnamikiskej yejuin niman noijki melak kuajli tiktekichiuiliskej toTajtsin?

3. ¿Tlenon techmachtia tlen okijto Jesús ipan Mateo 13:23?

3 Xkipiya ika toyolkokoskej tla yejon tlen tikixnamikij xtechkauilia miyekpa matitenojnotsakan itech Jehová. Jesús kimatstoya ika xtinochimej san noijki tiueliskiaj tiktekichiuiliskiaj toTajtsin (xpoua Mateo 13:23). Jehová melak kipatiojkaita nochi tlen tikchiuaj niman ijkon tiktekichiuiliskej (Heb. 6:10-12). Kanaj tikitaj ika tiueliskiaj tikchiuaskej okseki ipan itekiyo Jehová. Matikitakan ipan yejuin tlamachtijli tlenon uelis tikchiuaskej niman ijkon kachtopa tiktejtemoskej titenojnotsaskej, kenon tinemiskej san ika tlen noneki niman kenon kuajli titenojnotsaskej  niman titemachtiskej. San ika, kachtopa matikitakan tlenon kijtosneki melak kuajli tiktekichiuiliskej toTajtsin.

4. ¿Tlenon kijtosneki melak kuajli tiktekichiuiliskej toTajtsin?

4 Melak kuajli tiktekichiuiliskej toTajtsin kijtosneki tikchiuaskej nochi kech tiuelij ijkuak titenojnotsaskej niman titemachtiskej. San ika, Jehová xkita tla miyek horas titenojnotsaj, yejua kita tleka tikchiuaj. Tla titenojnotsaj pampa tikintlasojtlaj tlaltikpakchanejkej niman Jehová, yejon kichiuas melak kuajli matiktekichiuilikan toTajtsin * (Mar. 12:30, 31; Col. 3:23). Niman melak kuajli tiktekichiuiliaj toTajtsin ijkuak tiktemakaj nochi tlen tikpiyaj, tokojtilis niman tochikaualis. Tla tikpatiojkaitaj titenojnotsaskej, tikyejyekoskej tikinnojnotsaskej melak miyekej tlaltikpakchanejkej.

5, 6. Xkijto ika se neskayotl kenon yakaj uelis nochipa kitejtemos kitekichiuilis toTajtsin maski xkipiyas miyek tiempo.

5 Matitlanemilikan itech se telpochtli akin kuelita kitsotsonas guitarra niman kichiua nochipa ijkuak ueli. Sakin, kitlakeuaj ipan se grupo tlen tlatsotsona ipan iluimej. San ika, pampa itomin xkajxilia, lunes a viernes noijki tekiti ipan se tienda de abarrotes. Kema, melak uejkaui tekiti ipan tienda, san ika, yejua melak kuelita tlatsotsonas. Kineki melak kuajli nomachtis kitsotsonas guitarra niman san ipan yejon tekitis. Kuakon, maski xkipiya miyek tiempo nochipa ijkuak ueli, kitsotsona guitarra.

6 Noijki ijkon, kanaj tejuamej xueli melak titenojnotsaj ijkon ken tiknekiskiaj. San ika, yejon tlen melak tikuelitaskiaj tikchiuaskej. Tokojtiliaj ika akin tikinnojnotsaj maajsi ipan inyojlo iTlajtol toTajtsin. San ika, pampa tikpiyaj miyek tlen tikchiuaskej, kanaj totlajtoltiaj kenon uelis nochipa tiktejtemoskej tiktekichiuiliskej toTajtsin.

 KENON KACHTOPA TIKTEKICHIUILISKEJ TOTAJTSIN

7, 8. ¿Kenon uelis tikchiuaskej ken Jesús ijkuak titenojnotsaskej?

7 Jesús kuajli otechititi kenon tiktekichiuiliskej toTajtsin. Yejua kitaya ika melak ueyi kijtosnekiya tlajtos itech iTekiuajyo toTajtsin (Juan 4:34, 35). Onejnen miyek kilómetros niman ijkon uelis melak miyekej kinnojnotsas. Nochipa ijkuak ouel, otenojnots techajchan niman kampa tojlan. Yejua nochipa okinek tenojnotsas.

8 Ijkuak titenojnotsaj itech iTekiuajyo toTajtsin nochipa ijkuak tiuelij niman maski san kanon, tikchiujtokej ken Jesús. Tiknektokej tijkauaskej tlen tikuelitaj niman ijkon titenojnotsaskej (Mar. 6:31-34; 1 Ped. 2:21). Sekimej tokniuan uelis nochiuaskej precursores especiales, regulares noso auxiliares. Oksekimej yonomachtijkej se yenkuik tlajtojli noso yoyajkej kampa xmiyekej nemij akin tenojnotsaj. Niman maka matikilkauakan ika publicadores melak ueyi tekitl kichiuaj, niman nokojtiliaj chikauak tenojnotsaskej. Jehová xtechtlajtlanilia tlen xuelis tikchiuaskej. Yejua kineki matipakikan ijkuak tikteijliskej “kuajli tlajtojli” itech toTajtsin akin paki (1 Tim. 1:11; Deut. 30:11).

9. a) ¿Kenon Pablo nochipa okitejtemo tenojnotsas maski ononek tekitis? b) ¿Tlenon techijlia Hechos 28:16, 30, 31 itech ken Pablo kitaya itenojnotsalis?

9 Apóstol Pablo noijki kuajli tlen techmachtia. Ijkuak ika okpa otenojnotsato Corinto ken misionero, ononek kinchijchiuas kajkaltin, ijkon kipiyas tlen ika nopanoltis. San ika, yejua xkitaya tla san yejon kipiaya ika kichiuas. Yejua okichiuj yejuin tekitl niman ijkon kipiyas tlen ika nopanoltis, ijkon ueliskia kinnojnotsas corintios, niman ijkon xyejuamej nochi makitlaxtlauilikan (2 Cor. 11:7). Maski apóstol Pablo nonekiya tekitis, yejua nochipa okitejtemo kenon tenojnotsas, niman tenojnotsaya nochi sábados. Sakin, ouel más tenojnotsa niman ijkuakon yejua “san ika nokauaya kiteijliaya on temachtijli niman kimixpantiliaya on hebreos ika Jesús yejua Cristo yejuan Dios okitlalij para tlamandaros” (Hech. 18:3-5; 2 Cor. 11:9). Sakin, ijkuak okitsajkej Roma ome xiuitl, kinnojnotsaya akin kontlajpalouayaj niman kinchijchiuaya cartas (xpoua Hechos 28:16, 30, 31). Kuajli yokinemilijka kitekichiuilis toTajtsin niman maka itlaj makitelti. Okijkuilo: “Dios ikan iteiknelilis yotechmakak in tekitl. Yejua ika, xkaman tikpolouaj totlamachalis” (2 Cor. 4:1). Ijkon ken Pablo, nochipa uelis tiktejtemoskej titenojnotsaskej itech iTekiuajyo toTajtsin maski nonekis titekitiskej.

Onka miyek ken uelis kuajli tiktekichiuiliskej toTajtsin. (Xkimita párrafos 10 niman 11).

10, 11. ¿Kenon uelis melak kuajli tiktekichiuiliskej toTajtsin tla tikualoj?

10 ¿Tlenon uelis tikchiuaskej tla xueli titenojnotsaj techajchan pampa itiuejueyimej noso tikualoj? Onka okseki kenon uelis titenojnotsaskej. Ipan kachtopa siglo, akin kichiuayaj ken Cristo san kanon tenojnotsayaj. Tenojnotsayaj nochiuiyan kampa nemiyaj tlaltikpakchanejkej: techajchan, kampa tojlan niman san kanon (Hech. 17:17; 20:20). ¿Niman tla xok más tiuelij tinejnemij? Kuakon, uelis totlaliskej kampa miyekej panouaj niman matikinnojnotsakan. Noijki uelis titenojnotsaskej ika teléfono, ika cartas niman san kanon. Miyekej  publicadores akin melak kualoj yolpakij pampa ijkon tenojnotsaj.

11 Kuakon, uelis melak kuajli tiktekichiuiliskej toTajtsin maski tikualoj. Oksejpa matikitakan tlenon okichiuj apóstol Pablo. Yejua okijto: “On ueyi poder yejuan topan onkaj xtotech kisa, yej ualeua itech Dios” (2 Cor. 4:7). Yejua ononek kipiyas miyek kojtilistli ijkuak okualok kampa otenojnotsato. Okimijli gálatas: “Ye nenkimatstokej ika nikualouaya ijkuak onemechijlij on kuajli tlajtojli yejuan kiteijlia ken Dios temakixtia” (Gál. 4:13). Noijki ijkon, tla tikualoj, kuakon kanaj uelis tikinnojnotsaskej tepajtikej itech iTekiuajyo toTajtsin. Miyekpa ijkuak tokniuan yauej inchan yejuin tepajtikej, xompa nemij pampa tekititokej.

KENON TINEMISKEJ SAN IKA TLEN NONEKI

12. ¿Tlenon kijtosneki ika toixtololo kuajli matlachixto?

12 Jesús okijto: “Tla mixtololojuan kuajli tlachaj, ueli tikita on tlen tikchiua” (Luc. 11:34). ¿Tlenon kijtosneki yejuin tlajtoltin? Ika noneki tinemiskej san ika tlen noneki, kijtosneki san se tlemach tikitstoskej, maka oksekan matontlachiakan. Jesús ijkon okichiuj, yejua san se tlemach konitstoya. Yejua nochipa okitejtemo tenojnotsas niman okinmachti inomachtijkauan san makinemilikan kenon tenojnotsaskej itech Jehová niman itech iTekiuajyo. Tejuamej tikchiuaj ken Jesús ijkuak nochipa tiktejtemouaj titenojnotsaskej itech iTekiuajyo niman imelajkayo toTajtsin (Mat. 6:33).

13. ¿Tlenon uelis techpaleuis san titlanemiliskej itech kenon tiktekichiuiliskej toTajtsin?

 13 Tla tinemij san ika tlen noneki, san titlanemiliskej itech kenon tiktekichiuiliskej toTajtsin niman ijkon uelis más tikinpaleuiskej oksekimej makixmatikan niman makitlasojtlakan Jehová. * Matiknemilikan, ¿uelis xmiyek horas noso tonaltin titekitiskej niman ijkon titenojnotsaskej okseki tonaltin? ¿Uelis tikitaskej ika maka matechkuili miyek tiempo tlen ika toyolpaktiaj?

14. ¿Tlenon okichiuj se tokniuj iuan isiuauj niman ijkon tenojnotsaskiaj okseki tonaltin?

14 Matikitakan tlenon okichiujkej se tlayekanketl itoka Elías iuan isiuauj. Elías kijtoua: “Xueliya tochiuayaj precursores, san ika, nonekiya itlaj tikchiuaskiaj. Otikchiujkej seki tlemach tlen maski xueyi kijtosneki techkauiliskia okseki tonaltin matitenojnotsakan. Xok tikpopolouayaj miyek tomin ken kachtopa; otikitakej ika nonekiya tikitaskej kech tiempo toyolpaktiayaj pampa otikitakej ika techkuiliaya miyek horas, noijki xok miyek horas titekitiyaj. Yejon otechpaleui matitenojnotsakan ika teotlak, matitemachtikan itech Biblia niman hasta ipan se metstli, noijki okpa titenojnotsayaj maski itlajkotian semana. Melak tipakiyaj ika tlen tikchiujtoyaj”.

KENON MELAK KUAJLI TITEMACHTISKEJ

Tla tikchiuaj tlen tiuelij ipan tlanechikojli tlen nochiua itlajkotian semana, techpaleuis kuajli matiktekichiuilikan toTajtsin. (Xkimita párrafos 15 niman 16). *

15, 16. Itech tlen kijtoua 1 Timoteo 4:13, 15, ¿kenon uelis melak kuajli titenojnotsaskej niman titemachtiskej? (Noijki xkita recuadro “ Tlenon techpaleuis melak kuajli matiktekichiuilikan toTajtsin”).

15 Tla tokojtiliaj melak kuajli titemachtiskej, yejon techpaleuis melak kuajli matiktekichiuilikan toTajtsin. Akin onomachtijkej  se carrera, kintlajtlaniliaj okseki manomachtikan niman ijkon más ueliskej kichiuaskej intekiyo. Tejuamej noijki noneki okseki matomachtikan kenon más kuajli titemachtiskej (Prov. 1:5; xpoua 1 Timoteo 4:13, 15).

16 ¿Kenon uelis tikchiuaskej yejon? Tla kuajli tijkakij tlen techmachtiaj nochi semanas ipan tlanechikojli Nemilistli niman Tekitl. Ompa kuajli techmachtiaj kenon más kuajli titenojnotsaskej. Se neskayotl, ijkuak akin kiyekana tlanechikojli kinnojnotsa akin panouaj tlayekapan, matijkakikan tlenon noijki uelis techpaleuis. Kuakon, ijkon matikchiuakan ijkuak tontenojnotsaskej. Noijki uelis tiktlajtlaniliskej akin kiyekana grupo kampa tontenojnotsaj ika matechpaleui noso touan matenojnotsa. Noijki uelis tikintlajtlaniliskej matechpaleuikan publicadores akin youejkaujkej tenojnotsaj, se precursor noso se tlayekanketl ipan circuito. Nochi yejuin techpaleuis kuajli matiktekitiltikan tlen ika titemachtiaj. Ijkon, tiyolpakiskej ijkuak titenojnotsaskej niman titemachtiskej.

17. ¿Tlenon tikmachiliaj ijkuak melak kuajli tiktekichiuiliaj toTajtsin?

17 Melak tikpatiojkaitaj ika Jehová techkauilia iuan matitekitikan (1 Cor. 3:9). Ijkuak tikchiuaj tlen melak ueyi kijtosneki niman tiknemiliaj kenon tiktekichiuiliskej toTajtsin, yejon techyolpaktia (Filip. 1:10; Sal. 100:2). Akin tiktekichiuiliaj toTajtsin tikmatstokej ika yejua techpaleuis kuajli matikchiuakan totekiyo maski tla tikpiyaj se tlauejli noso tla itlaj techteltisneki (2 Cor. 4:1, 7; 6:4). Tla tiuelij miyekpa titenojnotsaj noso ka, melak techyolpaktis tla tiktekichiuiliaj toTajtsin ika nochi toyojlo (Gál. 6:4). Ijkuak kuajli tiktekichiuiliaj toTajtsin, tikteititiaj ika tiktlasojtlaj Jehová niman tlaltikpakchanejkej. ¿Kenon techpaleuiya yejuin? Biblia kijtoua: “Tla ijkin tikchiuas, timomakixtis niman no tikinmakixtis on yejuan mitskakiskej” (1 Tim. 4:16).

TLAKUIKAJLI 58 Matikintejtemokan akin yolseujkej

^ párr. 5 Jesús otechnauati matitenojnotsakan itech Tekiuajyotl niman matikinpaleuikan oksekimej noijki makitekichiuilikan toTajtsin. Ipan yejuin tlamachtijli, tikitaskej kenon uelis melak kuajli tiktekichiuiliskej toTajtsin maski tikixnamikiskej tlen ouijtika. Noijki tiueliskej kuajli titemachtiskej niman kenon tiyolpakiskej ijkuak tontenojnotsaskej.

^ párr. 4 TLEN NONEKI MATIKMATIKAN: Tiktekichiuiliaj toTajtsin ijkuak titenojnotsaj, titemachtiaj, tikinchijchiuaj niman tikinyektlaliaj Kaltin kampa Tosentlaliaj, niman ijkuak titlapaleuiyaj kampa tlaixpoliui (2 Cor. 5:18, 19; 8:4).

^ párr. 13 Xkita recuadro “Kenon uelis tinemis san ika achijtsin”, itech Amatl Tekakistilijketl julio de 2016, página 12.

^ párr. 62 TLEN NESI IPAN TLAIXKOPINALTIN: Se tokniuj kiteititia ipan tlanechikojli tlen nochiua itlajkotian semana kenon nochiua se revisita. Sakin, ijkuak akin kiyekana tlanechikojli itlaj kijlia itech amatlajkuilojli Titlaamapouas niman titemachtis, yejua kijkuiloua. Itlamiyan semana kichiua tlen youel ijkuak ontenojnotsa.