Xuiya kampa tlen onka ijtik

Xuiya kampa tlen kipiya

Ken kinamiki tikitaskej ijkuak topopolouaj

Ken kinamiki tikitaskej ijkuak topopolouaj

Don niman Margaret * melak yolpaktoyaj pampa ichpoch niman ichanejkauan okintlajpalotoj. Pampa sa iyeka san sekan tlakuaskiaj, Margaret, akin onomachti kenon tlakualchiuas niman xok tekitiya itech yejon, okinek kichijchiuas macarrones ika queso, tlen ixuiuan melak kueliliaj.

Margaret okuajkuik tlakuajli niman okitlali inepantla mesa, kampa nochimej yeuatoyaj. Okitentlapo niman xokuelitak pampa okitak ika san onkatka queso totonki. ¡Okilkauj kitlalilis tlen melak nonekiya: macarrones! *

Maski san kech xiuitl matikpiyakan, tla tikmatij miyek noso ka, tinochimej topopolouaj. Tikijtouaj tlen xtiknemiliaj, tikchiuaj itlaj ijkuak xnoneki, xtikchiuaj noso tikilkauaj itlaj. ¿Tleka topopolouaj? ¿Kenon tikyektlaliskej? ¿Uelis tikchiuaskej itlaj niman ijkon xok topopoloskej? Tikimitaskej ken noneki, techpaleuis tikinnankiliskej yejuin tlajtoltilistin.

KENON TIKIMITAJ NIMAN KENON KIMITA TOTAJTSIN

Ijkuak tikchiuaj itlaj tlen kuajli, tikseliaj ika pakilistli tlen kuajli kijtouaj totechkopa niman tlen ika techueyiteneuaj pampa tiknemiliaj ika technamiki. San ika, ijkuak topopolouaj, maski xsan otiknejkej noso maski sekimej nion xkitaj, ¿tikseliaj ika tejuamej otopopolokej? Uelis tikchiuaskej tla tiyolyemankej.

Tla toueyimatij, kanaj uelis tikitaskej ika xueyi kijtosneki ijkuak topopolouaj, xtikseliskej tla tejuamej otikchiujkej noso tikintlajtlakoltiskej oksekimej. Ijkuak nochiua yejuin nochipa xkuajli ontlami, pampa tlauejli xnoyektlalia niman uelis oksekimej kintlajtlakoltiskej maski xkipiyaj tlajtlakojli. Maski tla amantsin xtopan nochiua tlen xkuajli, noneki tikilnamikiskej, ika sakin, “cada se ika onkaj tikijliskej Dios nochi tlen kuajli niman on tlen xkuajli tikchiuaj” (Romanos 14:12).

ToTajtsin kita ken noneki ijkuak topopolouaj. Amoxtli Salmos kijtoua ika yejua “teikneliani niman tepaleuiya”. Noijki kijtoua: “Xnochipa kitstos tlen xkuajli nochiua, nion xnochipa kualantinemis”. Yejua kimati ika tlaltikpakchanejkej titlajtlakolejkej niman kimati tlenon techtekiyomaka; kema, “kilnamiki ika titlachijchiujtin ika tlalpoktli” (Salmo 103:8, 9, 14).

Noijki, ken se tajtli akin teikneliani, toTajtsin kineki ika tejuamej, ikoneuan, matikitakan ijkuak topopolouaj ijkon ken yejua kita (Salmo 130:3). Ipan iTlajtol, ika tlasojtlalistli techmaka miyek tlajtoltin niman tlayekanalistli tlen techpaleuiyaj kuajli matikixnamikikan ijkuak topopolouaj niman ijkuak oksekimej nopopolouaj.

KENON TIKIXNAMIKISKEJ IJKUAK TOPOPOLOUAJ

Miyekpa, ijkuak nopopolouaj, sekimej melak uejkauij niman nosiaujmiktiaj kintlajtlakoltijtokej oksekimej noso xkiselia intlajtlakol itech tlen okichiujkej noso okijtokej. Tejua maka ijkon tikchiuas,  ijkuak itlaj tikijtos tlen yakaj kiyolkokos, tlen melak kuajli tikchiuas yejua tiktlajtlanilis mamitstlapopolui, tikyektlalis tlauejli niman ok iuan timouikas, ¿xijkon tiknemilia? Noso tla tikchiua itlaj tlen mitsijtlakoua tejua noso yakaj okse, maka san notejua xmotlauelita noso maka okse xtlajtlakolti, xyejyeko xyektlali tlauejli. Tla san tikitojtika ika xtejua tikpiya tlajtlakojli kichiuas maueyiya tlauejli niman maonia ajmantli. Melak kuajli tla timomachtia itech tlen mopan onochiuj, tikyektlalia tlen noneki niman xtimoteltia ipampa yejon.

Ijkuak yakaj okse nopopoloua, xouijtika tikteititijtiuetsij ika xtikuelitaj tlen yokonchiuj. San ika, ijkuak ijkon melak kuajli tla tiktlakamatij yejuin itlajtoluan Jesús: “Xkinchiuilikan oksekimej nochi on tlajtlamach tlen nemejuamej nenkinekiskiaj ma mechchiuilikan oksekimej” (Mateo 7:12) Ijkuak topopolouaj, maski ipan itlaj tlen xueyi kijtosneki, melak tiktlasojkamatij ika sekimej techikneliaj noso kipanoltiaj tlen otikchiujkej. Kuakon, ¿tleka xtimokojtilia noijki ijkon tikimiknelis oksekimej? (Efesios 4:32).

TLAJTOLYEKANALISTIN TLEN TECHPALEUIYAJ MAKA MIYEKPA TOPOPOLOSKEJ

Se diccionario kijtoua ika tlen kichiua matopopolokan yejua ika xkuajli tiknemiliaj tlenon tikchiuaj, ika xnochi tikasikamatij noso ika xtikitaj tla ueyi kijtosneki. Noneki tikseliskej ika tinochimej kemantika ijkon topan nochiua. San ika, xmiyekpa topopoloskej tla tikchiuaj seki tlajtolyekanalistin tlen nesij ipan Biblia.

Se itech yejon tlajtolyekanalistin nestok ipan Proverbios 18:13: “Akin tlanankilia ijkuak xikuajli kikaki tlenon opanok, xtlamachilise niman tepinajti”. Kema, tla kuajli tijkakij nochi niman tiknemiliaj kenon titlanankiliskej kichiuas maka matikijtokan itlaj tlen xkinamiki noso matikchiujtikisakan itlaj. Nochi tlen tikmatiskej pampa kuajli otitlakajkej melak techpaleuis xtopopoloskej.

Okse tlajtolyekanalistli techijlia: “Xchiuakan kanika hasta kampa nenueliskej ken ijki nemoyolika nennemiskej iuan nochi tlakatl” (Romanos 12:18). Xchiua ika maonia yolseuilistli niman san sekan xnemikan. Ijkuak titekitis iuan oksekimej, kuajli xkinnotsa niman xkintlakaita. Noijki xkimijli ika kuajli okichiujkej itlaj niman xkinyolchikaua. Ijkuak ijkon nochiua, xouijtika titetlapopoluis noso nopanoltis tlen xkuajli onoijto noso onochiuj. Niman hasta uejueyimej tlaueltin ueliskej noyektlaliskej ika yolseuilistli.

Xmomachti tlen mitspaleuis itech tlen timopopoloua. Maka xtejtemouili tikteijlis tleka otikijto noso otikchiuj itlaj; xkita yejuin ken itlaj tlen mitspaleuis tikiskaltis se kualneskayotl. Kanaj ok nonekis kuajli tikiskaltis ijyouilistli, yolkuajlilistli, yolseuilistli, tlasojtlalistli niman timoteltis moselti (Gálatas 5:22, 23, TNM). Niman tiuelis tlenon xkipiya tikchiuas ijkuak oksejpa yes. Maka melak xmotekipacho itech tlen otimopopolo, san ika, noijki xseli tla otimopopolo. Tla peua ueyiya tlauejli, tepaleui tla tikita tlen teuetskiti itech tlen otikchiuj.

KENON MELAK TEPALEUI TLA TIKITAJ KEN KINAMIKI

Tla tikitaj ken kinamiki ijkuak topopolouaj, tikimixnamikiskej ken noneki. Tinemiskej ika yolseuilistli tejuamej niman iuan oksekimej. Ijkuak tikyejyekouaj tiueliskej itech tlen topopolouaj, melak titlamachilisejkej yeskej niman xsan tikualantinemiskej. Noijki, xtajmanaskej nion xtiknemiliskej ika tejuamej tikpeualtiaj tlauejli. Tikasikamatiskej ika oksekimej noijki noxixikojtokej ika tlen nopopolouaj, technisiuis intech. Niman ken melak techpaleuiya yejua ika tiueliskej tikixkopinaskej itlasojtlalis toTajtsin niman ken kinektika tetlapopoluis (Colosenses 3:13, TNM).

¿Kenon okisato itech ken onopopolo Margaret, akin kachtopa otikteneujkej? ¿Okixpolo yejon tonajli? Ka. Margaret melak okiuetskiti, niman oksekimej noijki, nochimej okuelilijkej tlakuajli, maski xkipiaya macarrones. Seki xiujtin sakin, ixuiuan Margaret ok kimijliayaj inkoneuan tlen inpan opanoka, niman ika pakilistli kilnamikiyaj tlen opanokej iuan inabuelos... pampa itech tlen onopopolo, nion xueyi kijtosnekiya.

^ párr. 2 Seki tokayomej yonopatlakej.

^ párr. 3 Macarrones ika queso se tlakuajli tlen kichijchiuaj ika pasta itoka macarrón niman tlapani kipiya queso.