Xuiya kampa tlen onka ijtik

Xuiya kampa tlen kipiya

 AKIN NOMACHTIAJ BIBLIA NOTLAJTOLTIAJ

¿Noneki kipanoltiskej Navidad akin kichiuaj ken Cristo?

¿Noneki kipanoltiskej Navidad akin kichiuaj ken Cristo?

Melak miyekej tlaltikpakchanejkej ipan nochi tlaltikpaktli kineltokaj ika ipan Navidad noiluichiua ijkuak Jesucristo okajxilti xiuitl. San ika ¿kemantika yotimotlajtoltijka tla akin kichiuayaj ken Cristo ipan kachtopa siglo, akin melak iuan nouikayaj Jesús, kipanoltiayaj Navidad? Niman, ¿tikmatstok tlenon kijtoua Biblia itech iluitl tlen nopanoltia pampa yakaj kajxiltia xiuitl? Ken nonankiliaj yejuin tlajtoltilistin uelis techpaleuis tikitaskej tla akin kichiuaj ken Cristo noneki tikpanoltiskej Navidad.

Kachtopa, ipan Biblia xnoteneua tla kichiuayaj iluitl ijkuak Jesús kajxiltiaya xiuitl nion itech okse yolmelauak itekipanojkauj toTajtsin. Biblia san tlajtoua itech omemej akin oiluichiujkej ijkuak okajxiltijkej xiuitl, niman nion se xkitekichiuiliaya Jehová, toTajtsin itech Biblia. Niman yejon iluimej xkuajli otlamitoj (Génesis 40:20; Marcos 6:21). Ken kijtoua Encyclopædia Britannica, akin kachtopa kichiuayaj ken Cristo xokinejkej kichiuaskej “iluitl ijkuak se kajxiltia xiuitl, se iluitl tlen ualeua itech tlaneltokijli xmelauak”.

¿Ipan tlen tonajli otlakat Jesús?

Biblia xkijtoua tlen tonajli otlakat Jesús. “Xonka itlaj tlen yeuejkaui opanok tlen kuajli matechititi tlen tonajli noso metstli otlakat Cristo” kijtoua Diccionario de historia de la Iglesia. Kuajli matikmatstokan ika tla Jesús kinekiskia ika inomachtijkauan makichiuilikan iluitl ijkuak kajxiltiskia xiuitl, yejua kichiuaskia makimatikan kemanon otlakat.

Ika ome, ipan Biblia xnesi tla Jesús noso se itech inomachtijkauan okipanoltij Navidad. Ken kijtoua New Catholic Encyclopedia, Navidad kachtopa onoteneuj “ipan Cronógrafo de Filócalo, calendario tlen kikuiyaj romanos niman kanaj tlajtoua itech xiuitl 336”. Kema, yejon onochiuj sakin ika otlan noijkuiloua Biblia niman ika yopanokaj miyek siglos ika Jesús onenka ipan tlaltikpaktli. Ika yejon, Cyclopedia McClintock niman Strong kijtoua ika iluitl itech Navidad xse tlanauatijli tlen ualeua itech toTajtsin nion xualeua itech Nuevo Testamento. *

¿Tlenon Jesús okimijli inomachtijkauan makilnamikikan?

Ueyi Tlamachtijketl, Jesús, kuajli okimijli inomachtijkauan tlenon kinekiya makichiuakan, niman yejon onka ipan Biblia. San ika, xkeman okimijli makipanoltikan Navidad. Ijkon ken se tlamachtijketl kichia ika inomachtijkauan makichiuakan san tlen kimijlia, Jesús xkineki ika inomachtijkauan makichiuakan okseki itech “ken on Yektlajkuilojli temachtia” (1 Corintios 4:6).

San ika, onka itlaj tlen melak ueyi kijtosneki tlen akin kachtopa kichiuayaj ken Cristo xkeman kilkauayaj: kilnamikiskej imikilis Cristo. Yejua okimijli inomachtijkauan kemanon kipanoltiskej niman okimititi kenon kichiuaskej. Tlen okimijli makichiuakan, ijkon ken tonajli ijkuak omik, nestok ipan Biblia (Lucas 22:19, TNM; 1 Corintios 11:25).

Ken yotikitakej, Navidad se iluitl kampa nopanoltia ika yakaj kajxiltia xiuitl, niman akin kachtopa kichiuayaj ken Cristo xkichiuayaj yejon iluitl tlen ualeua itech tlaneltokijli xmelauak. Noijki, ipan Biblia xnoijtoua tla Jesús noso yakaj okse okipanolti Navidad. Ika yejon, melak miyekej akin kichiuaj ken Cristo ipan nochi tlaltikpaktli yokitlapejpenijkej xkipanoltiskej Navidad.

^ párr. 6 Tiknextis okseki itech kenon opeuj tlen nochiua ipan Navidad ipan tlamachtijli “Nuestros lectores quieren saber: ¿Tiene algo de malo la Navidad?”, itech La Atalaya 1 diciembre 2014, noijki onka ipan jw.org.