Xuiya kampa tlen onka ijtik

Xuiya kampa tlen kipiya

Tejua uelis tinemis nochipa ipan tlaltikpaktli

Tejua uelis tinemis nochipa ipan tlaltikpaktli

¡SE KUALTSIN TLAMACHIALISTLI! Akin otexchijchiuj kineki ika matinemikan nochipa ipan yejuin tlaltikpaktli. San ika, miyekej kintekiyomaka kineltokaskej. Kinemiliaj ika san kemanon kipiya ika timikiskej pampa ijkon uajnochiujtiuj. Niman oksekimej kinemiliaj ika ipan tlaltikpaktli xuelis tinemiskej nochipa, ika noneki timikiskej niman tiaskej iluikak niman san ijkon uelis tinemiskej nochipa. ¿Tejua tlenon tiknemilia?

Achto titlanankilis, xkita kenon Biblia kinnankilia yejuin tlajtoltilistin: ¿Kech noneki tiuejkauiskej ika tinemiskej itech ken otexchijchiuj toTajtsin? ¿Tleka toTajtsin otexchijchiuj niman okichijchiuj tlaltikpaktli? ¿Tleka timikij?

XNEMI OKSE KEN SE TLALTIKPAKCHANE

Tla tikitaj okseki tlen toTajtsin okichijchiuj tlen onka ipan tlaltikpaktli, tikitaj ika xnemi okse ken se tlaltikpakchane. ¿Tleka? Biblia kijtoua ika san tejuamej otexchijchiujkej ken itlachialis toTajtsin (Génesis 1:26, 27). ¿Tlenon kijtosneki yejuin? Ika toTajtsin otexchijchiuj matiuelikan matikpiyakan kualneskayomej, matikchiuakan seki tlen yejua ueli kichiua, ken titetlasojtlaskej niman tikchiuaskej tlen melajki.

Noijki, otexchijchiuj matiuelikan matitlanemilikan niman matikitakan tlen kuajli itech tlen xkuajli, matiknekikan tikixmatiskej niman iuan touikaskej. Ika yejon, ueli tiktlasojkamatij kenon melak ueyi universo niman tlen kualtsin onka ipan tlaltikpaktli, ken tlakuikajli, arte niman poesía. San ika, tejuamej ueli tikueyichiuaj toTajtsin, xijkon ken okseki tlemach. Niman tlaltikpakchanejkej kipiyaj kualneskayomej, xijkon ken okseki tlemach tlen okinchijchiujkej ipan tlaltikpaktli.

Xtlanemili itech yejuin: tla toTajtsin kinekiya matinemikan san achijtsin xiuitl, ¿tleka otexchijchiuj ika kualneskayomej tlen uelis tikimiskaltiskej? Pampa yejua kineki matipakikan nochipa ipan tlaltikpaktli.

TLEN YOUEJKAUJ TOTAJTSIN KINEKI MANOCHIUA

Sekimej kinemiliaj ika toTajtsin xkeman okinek ika tlaltikpakchanejkej manemikan nochipa ipan tlaltikpaktli. Kijtouaj ika okichijchiuj tlaltikpaktli kampa tlaltikpakchanejkej kintlatlataj niman ijkon noitas akinon kinamiki nemis iluikak iuan toTajtsin. San ika tla yejon melauak yeskia, ¿xkijtosnekiskia ika toTajtsin kichiujtok ika maonia tlen xkuajli ipan tlaltikpaktli? Yejuin xnotlajtolnamiki itech tlen yokijto toTajtsin. Biblia kijtoua itech yejua: “Nochi iojuiuan melaktikej. ToTajtsin akin xkeman tekaua, xkichiua  tlen xkinamiki; yejua kichiua tlen melaktik niman tlen kinamiki” (Deuteronomio 32:4).

Biblia kuajli kijtoua tleka toTajtsin okichijchiuj tlaltikpaktli: “Iluikamej, itlatkiuan Jehová, san ika, tlaltikpaktli yokinmakak inkoneuan tlaltikpakchanejkej” (Salmo 115:16). Kema, toTajtsin okichijchiuj tlaltikpaktli pampa kineki ika tlaltikpakchanejkej kuajli machantikan, kualtsin ken okiyektlali tlaltikpaktli niman ijkon nochipa manemikan ika yolseuilistli (Génesis 2:8, 9).

“Iluikamej, itlatkiuan Jehová, san ika, tlaltikpaktli yokinmakak inkoneuan tlaltikpakchanejkej” (Salmo 115:16).

Ipan Biblia noijki kijtoua tleka toTajtsin okinchijchiuj tlaltikpakchanejkej. Yejuin tlen toTajtsin okimijli makichiuakan tlaltikpakchanejkej akin kachtopa okinchijchiuj: “Xtemiltikan tlaltikpaktli niman xmotlatkitikan [...] nochi tlen yoltok niman nouiyonijtok ipan tlaltikpaktli” (Génesis 1:28). ¡Se kualtsin tlateochiualistli: kitlajpiyaskiaj tlaltikpaktli niman kikuepaskiaj se xochitlalpan! Adán iuan Eva ueliskiaj nemiskej nochipa iuan inkoneuan ipan tlaltikpaktli niman xipan iluikak.

¿TLEKA TIMIKIJ?

Kuakon, ¿tleka timikij? Biblia kijtoua ika se iluikaktekitketl akin toTajtsin okichijchiuj, akin sakin okitokayotijkej Satanás, okiyejyeko kijtlakos tlen toTajtsin kineki manochiua. ¿Kenon okichiuj?

Satanás okinkajkayauj kachtopa totajuan, Adán iuan Eva niman ijkon iuan makixnamikikan toTajtsin. Okimijli ika toTajtsin xkinkauiliaya makipiyakan tlen kuajli. Noijki ika san yejuamej ueliskiaj kitlapejpeniskiaj tlen kuajli niman tlen xkuajli. Yejuamej okitlakamatkej Satanás niman ijkon okitlalkauijkej toTajtsin. ¿Tlenon inpan onochiuj? Sakin, omijkej ijkon ken toTajtsin yokimijlika. Ijkon okipolojkej se kualtsin nemilistli ipan tlaltikpaktli tlen nokuepaskia se xochitlalpan (Génesis 2:17; 3:1-6; 5:5).

Pampa Adán iuan Eva xotetlakamatkej, yejuin yokichiuj ika tlaltikpakchanejkej melak matlajyouikan. ITlajtol toTajtsin kijtoua: “On achtoj tlakatl [Adán] otlajtlakoj niman ipampa on tlajtlakojli onkaj mikilistli. Niman aman nochimej mikiskej pampa nochimej tlajtlakouaj” (Romanos 5:12). Kuakon, timikij pampa otechpanoltilijkej tlajtlakojli niman mikilistli, xpampa toTajtsin ijkon kineki topan manochiua.

TEJUA UELIS NOCHIPA TINEMIS IPAN TLALTIKPAKTLI

Tlen opanok ipan xochitlalpan Edén xokichiuj ika toTajtsin makipatla tlen kinemiliaya kichiuas ipampa tlaltikpaktli niman inpampa tlaltikpakchanejkej. Itlasojtlalis niman imelajkayo okichiuj makichiua itlaj tlen ika techmakixtis itech tlajtlakojli niman mikilistli. Pablo, itlatitlankauj Cristo, okijto: “On tlajtlakojli kitemaka tlaxtlauijli ikan mikilistli pero Dios kitemaka tetlayokolijli ikan nemilistli yejuan para nochipa. Niman on nemilistli tikseliaj itechkopa Cristo Jesús toTeko” (Romanos 6:23). Tlasojtlalistli tlen kimachilia toTajtsin topampa okichiuj ika makitemaka “isenteKonetsin [Jesucristo] para nochi on akin kineltokas xpoliuis, yej kipias yenkuik nemilistli para nochipa” (Juan 3:16). Ijkuak Jesús onotemakak, okitlaxtlauj tlen nonekiya niman ijkon oksejpa uelis tikpiyaskej tlen Adán okipolo. *

Sa achijtsin poliui ijkuak toTajtsin kichiuas ika tlaltikpaktli manokuepa se xochitlalpan. Tla tikneki tikselis tlateochiualistli, noneki tikchiuas tlen okijto Jesús: “Xkalakikan ipan puerta pitstik; pampa tlen patlauak niman koyauak ojtli teuika ipan tlapopolouilistli, niman miyekej ompa kalakij; san ika, pitstik puerta niman pitsauak ojtli tlen teuika itech nemilistli, niman xmiyekej akin kinextiaj” (Mateo 7:13, 14TNM). Kema, tlen aman tiktlapejpenia yejon tlen mopan nochiuas ika tlayekapan. ¿Tlenon tiktlapejpenis?

^ párr. 17 Tla tikneki tikmatis kenon techpaleuiya pampa otechmakixti Jesús, xkita capítulo 5 itech amoxtli ¿Tlenon melauak temachtia Biblia?, tlen okichijchiujkej iteixpantijkauan Jehová niman noijki onka ipan Internet ipan jw.org.