Xuiya kampa tlen onka ijtik

Xuiya kampa tlen kipiya

 ITECH TLEN TLAJTOUA IXPAN | ¿TIKSELIS IUEYI TETLAYOKOLIL TOTAJTSIN?

Se tetlayokolijli melak ueyi xken okseki

Se tetlayokolijli melak ueyi xken okseki

SACAPUNTAS tlen okimakakej Jordán, tlen tlachijchiujtli ken se barco, nesiya xueyi kijtosneki. San ika, yejuin melak kitlasojkaita itech okseki tlemach. “Rusell, se akin ueuentsin katka niman iuan nouikaya nochanejkauan, onechtlayokoli ijkuak ok nikonetl katka”, kijtoua Jordán. Sakin Rusell omik niman Jordán okimat ika Rusell melak okipaleui iabuelo niman itajuan ijkuak okixnamijkej tlen melak ouijtika. Jordán noijki kijtoua: “Aman ika inikmati nochi yejuin itech Rusell, yejuin tetlayokolijli tlen nesi pitentsin kichiua ika melak matlasojti xijkon ken ijkuak onechmakak”.

Tlen ipan onochiuj Jordán techmachtia ika sekimej uelis kitaskej ika se tetlayokolijli san achijtsin tlasojti noso nion achijtsin. San ika, ijkuak notlasojkaita itlaj, uelis yes melak tlasojti, noso hasta melak patioj. ITlajtol toTajtsin tlajtoua itech se tetlayokolijli tlen melak tlasojti ika yejuin tlajtoltin tlen miyekej kixmatij: “Dios sanoyej okintlajsojtlak on tlaltikpaktlakamej hasta okitemakak isenteKonetsin para nochi on akin kineltokas xpoliuis, yej kipias yenkuik nemilistli para nochipa” (Juan 3:16).

¡Yejuin tetlayokolijli uelis techmakas nemilistli tlen xkeman tlamis! ¿Uelis onias okse tetlayokolijli melak ueyi? Maski nemij akin xkitaj ken se tetlayokolijli tlen melak tlasojti, akin kichiuaj ken Cristo melak kitlasojkaitaj yejon tetlayokolijli (Salmo 49:8; 1 Pedro 1:18, 19). San ika ¿tleka okitemakak toTajtsin inemilis iKoneuj kentla tetlayokolijli ipampa tlaltikpakchanejkej?

Apóstol Pablo otetomili ika yejuin tlajtoltin: “Ipan in tlaltikpaktli on achtoj tlakatl otlajtlakoj niman ipampa on tlajtlakojli onkaj mikilistli. Niman aman nochimej mikiskej pampa nochimej tlajtlakouaj” (Romanos 5:12). Kachtopa tlakatl, Adán, otlajtlako ijkuak okitlapejpeni xkitlakamatis toTajtsin niman ipampa yejon omik. Ipampa Adán nochimej tlaltikpakchanejkej okiselijkej mikilistli.

“On tlajtlakojli kitemaka tlaxtlauijli ikan mikilistli pero Dios kitemaka tetlayokolijli ikan nemilistli yejuan para nochipa [...] itechkopa Cristo Jesús toTeko”  (Romanos 6:23). Tlaltikpakchanejkej uelis makisaskej itech mikilistli, pampa toTajtsin okuajtitlan iKoneuj Jesucristo ipan tlaltikpaktli makitemakaki inemilis tlen xkipiaya tlajtlakojli inpampa tlaltikpakchanejkej. Ipampa imikilis Jesús, tlen noixmati ken tlaxtlauijli, nochimej akin tlaneltokaj itech kiseliskej nemilistli tlen xkeman tlamis (Romanos 3:24).

Itech nochi tlateochiualistin tlen toTajtsin kinmaka itekipanojkauan ipampa Jesucristo, Pablo okijto: “Ma tikmakakan tlaxtlauijli Dios ipampa [...] se ueyi tetlayokolijli yejuan xakaj ueli kipantlantia ikan tlajtojli” (2 Corintios 9:15). Kema, tlaxtlauijli se tetlayokolijli melak kualtsin tlen xuelis tikijtoskej ika totlajtoluan kech ika ueyi. San ika, maski onka okseki tetlayokoliltin tlen toTajtsin techmaka, ¿tleka tlaxtlauijli se tetlayokolijli melak ueyi kijtosneki? ¿Tleka xonka okse tetlayokolijli ken yejuin? * ¿Niman kenon noneki tomachiliskej ipampa yejuin tetlayokolijli? Timitsyolchikauaj xpoua ipan Biblia itlanankilisuan yejuin tlajtoltilistin ipan okseki ome tlamachtiltin tlen uajlauej.

^ párr. 8 Jesús ika iyojlo “omik topampa” (1 Juan 3:16). San ika, pampa tlaxtlauijli tlen onotemakak tlapaleuiya manochiua tlen toTajtsin kineki, yejuin tlamachtiltin techtomilia itech tlenon toTajtsin okichiuj niman ijkon okitemakak yejuin tlaxtlauijli.