Xuiya kampa tlen onka ijtik

Xuiya kampa tlen kipiya

“Nejua ninejnemis ipan tlen melauak tlen tejua moyaxka”

“Nejua ninejnemis ipan tlen melauak tlen tejua moyaxka”

“Xnechmachti, oh Jehová, itech moojui. Nejua ninejnemis ipan tlen melauak tlen tejua moyaxka” (SAL. 86:11).

TLAKUIKALTIN: 31, 72

1-3. a) ¿Kenon noneki tikitaskej tlen melauak itech Biblia? Xkijto se neskayotl (xkimita tlaixkopinaltin kampa peua tlen tomachtijtokej). b) ¿Katlejua tlajtoltilistin tikinnankiliskej ipan yejuin tlamachtijli?

IPAN yejuin tonaltin, miyekej kikouaj itlaj niman sakin oksejpa kikuepaj kampa okikoujkej. Ipan seki países, yonoitak ika tlaltikpakchanejkej oksejpa kikuepaj kanaj 9% itech tlen kikouaj kampa tlanemakalo. Ijkon kichiuaj pampa kitaj ika xkinpaleuis ijkon ken kichiayaj, noso kitaj ika xkuajli noso pampa xokuelitakej. Ika yejon, kitlajtlanij makinpatilikan noso makinkuepilikan intomin.

2 Yejuin itlaj tlen tejuamej xkeman tiknekiskiaj tikchiuaskej ika tlen melauak itech Biblia. Ijkuak tijkouaj noso tomachtiaj tlen melauak, xkeman tiknekiskiaj tiknemakaskej noso tijkauaskej (1 Tim. 2:4; xpoua Proverbios 23:23). * Ken otikitakej ipan tlamachtijli tlen yotiuajpanokej, ononek tikxeloskej tiempo niman ijkon tiueliskej itech tlen melauak. Sekimej ononek kikauaskej intekiyo kampa kitlaniyaj miyek tomin. Sekimej kanaj inchanejkauan noso akin imiuan nouikayaj xok ijkon kinnotsaj ken yeuejkaui. Oksekimej ononek kipatlaskej ken tlanemiliayaj niman tlen kichiuayaj, noijki  kanaj okikajkaujkej ika kichiuaj tlen miyekej kuajchiujtiuej tlen xnesi ipan Biblia. San ika, tinochimej kuajli tikmatstokej ika melak achijtsin yotikchiujkej xijkon ken tlateochiualistin tlen yotikselijkej.

3 Ijkuak tiknextiaj tlen melauak itech Biblia, noijki ijkon tikmachiliaj ken tlakatl akin Jesús okiteneuj ipan se neskayotl. Jesús okinek kiteititis kenon miyekej melak kipatiojkaitaj tlen melauak itech iTekiuajyo toTajtsin. Ika yejon, yejua okiteneuj se tlakatl akin kitejtemojtinemiya “on perlas”. Ijkuak kinextia “se yejuan sanoyej patioj”, nimantsin yauj niman “kinamaka nochi tlen kipia” niman ijkon kikouas (Mat. 13:45, 46). Noijki ijkon, tejuamej melak tikpatiojkaitaj tlen melauak itech iTekiuajyo toTajtsin niman okseki tlamachtiltin itech Biblia. Nimantsin tijkauaj okseki tlemach niman ijkon tikpiyaskej nochi yejon. Tla nochipa tikpatiojkaitaj, xkeman tiknemakaskej. San ika, teajman ika sekimej itekipanojkauan toTajtsin xok kipatiojkaitaj tlen melauak niman hasta yokikaujkej. ¡Maka keman ijkon matikchiuakan! Noneki tikchiuaskej tlen technauatia Biblia kampa techijlia matinejnemikan ipan tlen melauak (xpoua 3 Juan 2-4). Yejuin kijtosneki ika noneki kachtopa tikchiuaskej tlen melauak niman noneki tikteititiskej ipan tonemilis ika tiktlakamatij. Ipan yejuin tlamachtijli, tikinnankiliskej yejuin tlajtoltilistin: ¿Tleka sekimej yokinemakakej tlen melauak, niman kenon yokichiujkej? ¿Tlenon techpaleuis maka ijkon matikchiuakan? ¿Tlenon techpaleuis nochipa matiknektokan tinejnemiskej ipan tlen melauak?

¿TLEKA NIMAN KENON SEKIMEJ YOKINEMAKAKEJ TLEN MELAUAK?

4. Ipan kachtopa siglo, ¿tleka sekimej okinemakakej tlen melauak?

4 Ipan kachtopa siglo, sekimej kuelkakiyaj kikakiskej tlen temachtiaya Jesús, san ika, sakin okikaujkej tlen melauak. Se neskayotl, sejpa Jesús okichiuj se milagro niman ijkon okintlakualti akin imiuan kistinemiya. Sakin, yejon tlaltikpakchanejkej iuan oyajkej hasta okse itempan mar tlen onka Galilea. San ika, ompa Jesús okimijli itlaj tlen melak okinmojkatlachialti, yejua okijto: “Tla nemejuamej xnenkikuaj nonakayo niman xnenkonij noyesyo, xnennemiskej para nochipa”. Yejuamej xokitlajtoltijkej tlenon kijtosnekiya, yejuamej okijtokej: “Yejua in tlen kijtoua sanoyej ouijtikaj para tikseliskej. ¿Akinon uelis kiselis in temachtijli?”. Kuakon, “miyekej on yejuan kuikatinemiyaj onokuepkej, niman xok iuan okistinenkej” (Juan 6:53-66).

5, 6. a) ¿Tleka sekimej yokikaujkej tlen melauak? b) ¿Kenon sekimej ika yolik kikaujtiuej tlen melauak?

5 Teajman ika sekimej yokikaujkej tlen melauak. Oksekimej ijkon yokichiujkej pampa xokuelitakej kenon onoijto ika noneki nasikamatis se tlaxelojli itech Biblia, noso pampa xokuelitakej tlenon okichiuj noso okijto se tokniuj akin miyekej kixmatij. Oksekimej okinkualani ika okinnotskej niman okimijlikej tlen kijtoua Biblia, noso kanaj onokualanijkej iuan se tokniuj. Niman oksekimej kanaj okineltokakej tlen kijtouaj akin kixnamikij tlen melauak noso akin xkuelitaj tlen tikneltokaj. Ika yejon, sekimej yokikaujkej Jehová niman tlanechikojli (Heb. 3:12-14). Melak kuajli yeskia tla nochipa tlaneltokatoskiaj itech Jesús ijkon ken okichiuj Pedro, itlatitlankauj Cristo. Ijkuak Jesús okintlajtolti itlatitlankauan tla kinekiyaj noijki kitlalkauiskej, Pedro nimantsin okinankili: “NoTeko, ¿akinon uelis itech tiaskej? San on motlajtoltsin yejuan tikijtoua yejua kitemaka nemilistli yejuan para nochipa” (Juan 6:67-69).

6 Oksekimej ika yolik okikaujtiakej tlen melauak, kanaj nion xokitakej ika ijkon inpan nochiujtoya. Akin ika yolik kikaujtiuej tlen melauak yeskiaj kentla se barco tlen yolik kitlalkauijtiuj itempan mar. Biblia kijtoua ika yejuamej kipolouaj “on ojtli” (Heb. 2:1).  Yejuamej, kanaj xkinemilijtoyaj kikauaskej tlen melauak, san ika, ika yolik okikajkaujtiajkej ika nouikaj iuan Jehová, niman sakin, kuajli okitlalkauijkej. ¿Tlenon techpaleuis maka ijkon matikchiuakan?

¿TLENON TECHPALEUIS MAKA MATIKNEMAKAKAN TLEN MELAUAK?

7. ¿Tlenon techpaleuis maka keman matiknemakakan tlen melauak?

7 Tla tiknekij tinejnemiskej ipan tlen melauak, noneki tikseliskej niman tikchiuaskej nochi tlen Jehová techmachtia. Noneki tikitaskej tlen melauak itech Biblia ken itlaj tlen melak ueyi kijtosneki ipan tonemilis, niman noneki tikchiuaskej ken kijtouaj itlajtolyekanalisuan Biblia. Sejpa, tekiuaj David okijli Jehová yejuin tlajtoltin: “Nejua ninejnemis ipan tlen melauak tlen tejua moyaxka” (Sal. 86:11). David kuajli yokijtoka ika nejnemiskia ipan tlen melauak. Tejuamej noijki noneki tikchiuaskej yejon. Tla xijkon tikchiuaj, kanaj uelis tipeuaskej titlanemiliskej itech nochi tlen otijkaujkej ipampa tlen melauak, noso hasta kanaj oksejpa tiknekiskej tikpiyaskej tlen otijkaujkej. Maka keman ijkon matikchiuakan. Tikmatstokej ika tejuamej xuelis tikijtoskej katlejua tlamachtiltin tikinseliskej niman katlejua xtikinseliskej, pampa noneki tinejnemiskej ipan “nochi tlen melauak” (Juan 16:13). Ipan tlamachtijli tlen yotiuajpanokej, otikteneujkej makuijli tlemach tlen kanaj ononek tijkauaskej niman ijkon otiuelkej tlen melauak, niman otikchiujkej tlen otikasikamatkej. Matikitakan tlenon techpaleuis maka oksejpa tiknekiskej tikpiyaskej tlemach tlen yotijkaujkej (Mat. 6:19).

8. ¿Tlenon ueliskia kichiuas ika yolik matijkauakan tlen melauak? Xkijto se neskayotl.

8 Tiempo. Tla xtiknekij tijkauaskej tlen melauak, noneki kuajli matiktekitiltikan totiempo. Tla xtotlajpiyaj, peuas melak tijkuiskej totiempo ipan tlen ika toyolpaktiaj, ipan tlen tikuelitaj tikchiuaskej, ipan Internet noso ipan televisión. Maski xtlajtlakojli tikchiuaskej yejuin tlemach, uelis kichiuas maka kuajli matijkuikan totiempo niman hasta xok uelis toselti tomachtiskej noso tikchiuaskej okseki tlen toTajtsin kineki. Matikitakan tlenon ipan onochiuj se tokniuj akin itoka Emma. * Ijkuak yejua ok konetl katka, melak kuelitaya tlejkos ipan caballo. Niman tlejkouaya ipan caballos nochipa ijkuak ueliya. San ika, okitak ika melak kikuiliaya tiempo, ika yejon, opeuj kinemilia tlenon kichiuas. Noijki, melak okiyolchikauj tlen okichiuj Cory Wells, se tokniuj akin yeuejkaui tlejkouaya ipan caballos niman inpan nauiltiaya niman ijkon tetlamauisoltiaya. * Ipan yejuin tonaltin, Emma kitekitiltia itiempo ika kitekichiuilia Jehová, niman noijki imiuan nosentlalia ichanejkauan niman akin imiuan nouika. Yejuamej noijki kitekichiuiliaj Jehová. Emma kimachilia ika yononisiui itech toTajtsin niman kiyolpaktia kimatis ika kuajli kitekitiltijtika itiempo.

9. ¿Tleka noneki matotlajpiyakan itech tlemach tlen ueliskia tikpiyaskej?

9 Tlemach tlen ueliskia tikpiyaskej. Tla nochipa tiknekij tinejnemiskej ipan tlen melauak, noneki tikitaskej ken kinamiki yejon tlemach tlen ueliskia tikpiyaskej. Ijkuak otiuelkej tlen melauak, otikasikamatkej ika melak ueyi kijtosneki tiktekichiuilis Jehová xijkon ken yejon tlen ueliskiaj tikpiyaskej. Ika toyojlo otiknejkej tijkauaskej seki tlemach niman ijkon tinejnemiskej ipan tlen melauak. San ika, kanaj yopanok seki xiujtin, niman tikitaj ika oksekimej kinokouiliaj yenkuikej aparatos electrónicos noso kipiyaj miyek tlemach, niman kanaj tikmachiliaj ika itlaj topolouilijtokej. Tla xtipakij pampa tikpiyaj san tlen noneki, kanaj peuas titlanemiliskej itech tlen ueliskia tikpiyaskej, niman xok titlanemiliskej  itech kenon kuajli tiktekichiuiliskej Jehová. Yejuin techilnamiktia tlen ipan onochiuj Demas. Yejua okitlasojtlak “tlajtlamach ipan in tlaltikpaktli” niman yejon okichiuj maka sa makitekichiuilijtinemi toTajtsin iuan Pablo, itlatitlankauj Cristo (2 Tim. 4:10). Biblia xtechijlia tla Demas melak okitlasojtlak yejon tlen ueliskia kipiyas xijkon ken kitekichiuilis toTajtsin, noijki xtechijlia tla xok kinekiya kikauas miyek tlemach niman ijkon iuan tlapaleuis Pablo. Maski san kenon, yejuin techmachtia ika noneki totlajpiyaskej maka tiknekiskej oksejpa tikpiyaskej miyek tlemach, pampa yejon uelis kichiuas maka sa matiktlasojtlakan tlen melauak.

10. Tla tiknekij nochipa tinejnemiskej ipan tlen melauak, ¿tlenon xnoneki tikchiuaskej?

10 Ken touikaj imiuan oksekimej. Tla tiknekij nochipa tinejnemiskej ipan tlen melauak, noneki tokojtiliskej maka tikchiuaskej tlen oksekimej texchiualtiskej. Ijkuak otikixmatkej tlen melauak, tochanejkauan niman akin imiuan touikayaj akin xkitekichiuiliaj Jehová xok ijkon otechnotskej ken yeuejkaui. Sekimej xtlaj otechijlikej ipampa tlen otikneltokakej, san ika, oksekimej xokuelitakej (1 Ped. 4:4). Melauak ika tikyejyekouaj nochipa kuajli touikaskej imiuan tochanejkauan niman tokojtiliaj tikinchiuiliskej tlen kuajli. San ika, noneki totlajpiyaskej maka tikchiuaskej tlen toTajtsin kitlauelita san pampa tiknekiskej tikinyolpaktiskej. Niman ijkon ken kijtoua 1 Corintios 15:33, san touikaskej imiuan akin kitlasojtlaj Jehová.

11. ¿Tlenon techpaleuis matikmapeuakan xkuakualtin tlanemililtin niman tlen xkuajli se kichiuaya?

11 Xkuakualtin tlanemililtin niman tlen xkuajli se kichiuaya. Nochimej akin nejnemij ipan tlen melauak noneki chipaujkanemiskej (Is. 35:8; xpoua 1 Pedro 1:14-16). Ijkuak otiuelkej tlen melauak, ononek seki tikpatlaskej ipan tonemilis. Sekimej melak ones ika onopatlakej. Maski san kenon, noneki totlajpiyaskej maka tochiuaskej ken tlaltikpakchanejkej akin xkitekichiuiliaj toTajtsin. ¿Tlenon techpaleuis? Titlanemiliskej itech tlen okichiuj Jehová niman ijkon uelis tichipaujkej yeskej. Yejua otlatlaxtlauj ika iyesyo iKoneuj, Jesucristo (1 Ped. 1:18, 19). Tla tikilnamikij kenon melak ueyi kijtosneki tlen Jesús okichiuj, nochipa tichipaujkanemiskej ixpan Jehová.

12, 13. a) ¿Tleka noneki matikimitakan iluimej ijkon ken Jehová kimita? b) ¿Tlenon okseki tikitaskej?

12 Tlen kuajchiujtiuej, san ika, xnesi ipan Biblia. Kanaj tochanejkauan, noso akin imiuan tomachtiaj ipan kaltlamachtijli, noso akin imiuan titekitij techijliskej imiuan matikpanoltikan iluimej. ¿Tlenon techpaleuis maka tikpanoltiskej yejon iluimej tlen kitlauelita Jehová? Noneki kuajli tikmatstoskej tleka Jehová xkineki matikpanoltikan yejon iluimej. Noijki uelis tomachtiskej toamatlajkuiloluan niman ijkon tikilnamikiskej kanon ualeuaj yejon iluimej. Ijkuak titlanemiliaj tleka xtikpanoltiaj yejon iluimej, kuajli tikasikamatij ika tikyolpaktijtokej toTajtsin (Efes. 5:10). Tla titlaneltokaj itech Jehová niman itech iTlajtol, xtechmojtis tlen oksekimej kijtoskej (Prov. 29:25).

13 Tiknekij nochipa tinejnemiskej ipan tlen melauak. ¿Tlenon techpaleuis nochipa matiknektokan tinejnemiskej ipan tlen melauak? Matikitakan yeyi tlemach tlen uelis tikchiuaskej.

¿TLENON TECHPALEUIS NOCHIPA MATIKNEKTOKAN TINEJNEMISKEJ IPAN TLEN MELAUAK?

14. a) ¿Tleka tikijtouaj ika tla xtijkajkauaj ika tomachtiaj Biblia xkeman tiknekiskej tijkauaskej tlen melauak? b) ¿Tleka melak noneki matikpiyakan tlamachilistli, melajkatlalilistli niman asikamatilistli?

14 Kachtopa, nochipa matikxelojtokan tiempo niman ijkon tomachtiskej iTlajtol toTajtsin niman itech titlanemiliskej. Tla  nochipa tomachtijtokej, melak tiktlasojtlaskej tlen melauak niman xtiknekiskej tijkauaskej. San ika, xsan noneki tikmatiskej tlenon kijtoua, noijki noneki tikchiuaskej ipan tonemilis. Proverbios 23:23 kijtoua ika noneki tijkouaskej “tlamachilistli niman melajkatlalilistli niman asikamatilistli”. Tijkouas tlamachilistli kijtosneki tikchiuas tlen timomachtia. Ijkuak tikpiyaj asikamatilistli, san sekan tiktlaliaj tlen tomachtiaj ika tlen itikmatstokej. Niman, kemantika tlen melauak itech Biblia techmelajkatlalia, pampa techititia tlenon noneki tikpatlaskej ipan tonemilis. Nochipa noneki matokauilikan matechmelajkatlali, pampa Biblia kijtoua ika yejon melak patioj xijkon ken plata (Prov. 8:10).

15. ¿Kenon tlen melauak itech Biblia techpaleuiya ijkon ken se cinturón?

15 Ika ome, mojmostla matikchiuakan tlen tiuelij itech Biblia. Matotlalilikan ilpikatl noso cinturón itech tlen melauak (Efes. 6:14). Itech tonaltin tlen kiteneua Biblia, soldados notlajkosalouayaj ika se cinturón tlen kintlapachouiliaya intlajkotian niman yejuin kinpaleuiaya ijkuak tlauijsokiyaj. Kema, nonekiya kuajli notiliniliskiaj, pampa tla xijkon kichiuayaj, xkinpaleuiskia. Tlen melauak itech Biblia yeskia kentla se cinturón. Tla kuajli totiliniliaj, techpaleuis itech tlanemililtin tlen xmelajkej niman techpaleuis matiktlapejpenikan tlen kuajli. Niman ijkuak tikixnamikiskej se tlauejli noso se tlatlatalistli, tlen melauak itech Biblia techpaleuis matiknekikan tikchiuaskej tlen kuajli. Se soldado xkeman yaskia ontlauijsokiskia tla xkitkiya icinturón. Noijki ijkon, maka keman matokixtilikan cinturón itech tlen melauak. Nochipa kuajli matotlalilikan niman nochipa matikchiuakan tlen melauak. Niman xsan yejon, noijki techpaleuiya matiknekikan nochipa tinejnemiskej ipan tlen melauak.

16. ¿Tleka ijkuak titemachtiaj tlen melauak techpaleuiya nochipa matiknekikan tinejnemiskej ipan tlen melauak?

16 Ika yeyi, matokojtilikan matikinmachtikan oksekimej tlen melauak itech Biblia. Ijkon ken se soldado noneki kuajli kajsitos iespada, tejuamej noijki ijkon noneki kuajli tikajsitoskej “itlajtoltsin Dios” (Efes. 6:17). Tinochimej uelis tokojtiliskej niman ijkon kuajli titemachtiskej niman melajki tikteijliskej “in tlajtojli tlen melauak” (2 Tim. 2:15). Tla tiktekitiltiaj Biblia niman ijkon tikinpaleuiyaj oksekimej makikouakan tlen melauak niman makimapeuakan tlen kiteititia yejuin tlaltikpaktli, kuakon, yejon tlen melauak onias ipan toyojlo niman ipan totlamachilis. Yejuin techpaleuis nochipa matiknektokan tinejnemiskej ipan tlen melauak.

17. ¿Tleka tikpatiojkaita tlen melauak?

17 Tlen melauak itech Biblia se tetlayokolijli tlen ueyi kijtosneki niman tlen ualeua itech toTajtsin iluikakchane. Techpaleuiya matouikakan iuan Jehová, niman yejuin itlaj tlen melak tikpatiojkaitaj. Jehová melak miyek yotechmachti, niman, yejuin san ika tipeuaj. Yejua yokijto ika nochipa techmachtijtos. Ika yejon, matikitakan tlen melauak itech Biblia ijkon ken se perla tlen melak patioj. Nochipa matijkoujtokan niman maka keman matiknemakakan. Kuakon, ijkon ken David, tikchiujtoskej tlen otikijlikej Jehová: “Nejua ninejnemis ipan tlen melauak tlen tejua moyaxka” (Sal. 86:11).

^ párr. 2 Proverbios 23:23: “Xkoua tlen melauak niman maka keman tiknemakas, noijki tlamachilistli niman melajkatlalilistli niman asikamatilistli”.

^ párr. 8 Tokayotl yonopatlak.

^ párr. 8 Xkalaki ipan JW Broadcasting niman xuiya kampa kijtoua ENTREVISTAS Y EXPERIENCIAS > LA VERDAD CAMBIA LA VIDA DE LAS PERSONAS.