Xuiya kampa tlen onka ijtik

Xuiya kampa tlen kipiya

¿Akinon tijkauilijtokej makiyekana totlanemilil?

¿Akinon tijkauilijtokej makiyekana totlanemilil?

“Ma ka sa xmouikakan ken on tlaltikpaktlakamej nouikaj” (ROM. 12:2).

TLAKUIKALTIN: 88, 45

1, 2. a) ¿Kenon Jesús okinankili Pedro ijkuak okijli ika xnonekiya kixnamikis tlen yokimijlika? (Xkita tlaixkopinajli kampa peua tlen tomachtijtokej). b) ¿Tleka ijkon okinankili?

INOMACHTIJKAUAN Jesús xueliyaj kineltokayaj tlen kemach yokikajkaj. Yejuamej kineltokayaj ika Jesús kiyektlaliskia tekiuajyotl ipan Israel, san ika, yejua okimijli ika tlajyouiskia niman mikiskia. Pedro, itlatitlankauj Jesús, okijli: “NoTeko, ¡Ma ka Dios kineki ijkon nochiuas! ¡Tejua xmitstocaroua para ijkon mopan nochiuas!”. Jesús okinankili: “¡Xnechtlalkaui nikan Satanás! Tejua tinechteltia para xnikchiuas on tlen Dios kineki. Tejua xtiknemilia ken Dios, yej tiknemilia ken on tlakamej” (Mat. 16:21-23; Hech. 1:6).

2 Ijkuak Jesús okijto yejuin, okiteititi ika melak nopatla ken tlanemilia toTajtsin niman ken tlanemiliaj tlaltikpakchanejkej akin Satanás kinyekantok (1 Juan 5:19). Tlen Pedro okijli Jesús okiteititi ika san itech tlanemiliaya ijkon ken miyekej tlaltikpakchanejkej. San ika, Jesús kimatstoya ika Jehová xijkon tlanemiliaya. Yejua kimatstoya ika Jehová kinekiya manoyektlali niman ijkon tlajyouis niman mikis. Itlajtoluan Jesús kuajli okiteititi ika xkinekiya tlanemilis ken tlaltikpakchanejkej pampa yejua tlanemiliaya ken iTaj.

3. ¿Tleka ouijtika tikmapeuaskej ken tlanemiliaj tlaltikpakchanejkej niman titlanemiliskej ken Jehová?

 3 ¿Niman tejuamej? ¿Titlanemiliaj ken toTajtsin noso ken tlaltikpakchanejkej? Kanaj toyekanaj ika itlajtolyekanalisuan Jehová. San ika ¿ijkon tikyekanaj totlamachilis? ¿Tikyejyekouaj titlanemiliskej ken Jehová? Tla ijkon tiknekij tikchiuaskej, noneki melak tokojtiliskej. San ika, xouijtika titlanemiliskej ken tlaltikpakchanejkej pampa Satanás tekiti ipan inyojlo (Efes. 2:2). Noijki, kanaj tiknekiskej titlanemiliskej ken oksekimej pampa tikitaj ika ijkon san totech titlanemiliaj. Kema, ouijtika titlanemiliskej ken Jehová, san ika, nion xouijtika titlanemiliskej ken tlaltikpakchanejkej.

4. a) ¿Tlenon panos tla titlanemiliaj ijkon ken tlaltikpakchanejkej? b) ¿Kenon techpaleuis yejuin tlamachtijli?

4 Tla titlanemiliaj ijkon ken tlaltikpakchanejkej, san tiknekiskej totech titlanemiliskej niman san tejuamej tiknekiskej tikijtoskej tlen kuajli noso tlen xkuajli (Mar. 7:21, 22). Ika yejon, melak noneki matiuelikan matitlanemilikan ijkon ken Jehová niman maka ken tlaltikpakchanejkej. Yejuin tlamachtijli techpaleuis matitlanemilikan ken Jehová. Tikitaskej tleka tikijtouaj ika titlanemiliskej ken toTajtsin melak techpaleuiya niman ika xkijtosneki tla aman xok itlaj uelis tikchiuaskej. Noijki tikitaskej kenon xtijkauiliskej ika yejuin tlaltikpaktli makiyekana ken titlanemiliaj. Niman, ipan okse tlamachtijli tikitaskej tlenon techpaleuis nochipa matitlanemilikan ijkon ken toTajtsin ijkuak itlaj tikixnamikiskej.

TECHPALEUIS TLA TITLANEMILIAJ KEN JEHOVÁ

5. ¿Tleka sekimej xkinekij ika yakaj makiyekana ken tlanemiliaj?

5 Sekimej xkinekij ika yakaj makiyekana ken tlanemiliaj. Yejuamej kijtouaj: “Xnikneki yakaj nopampa matlanemili”. Kanaj kinemiliaj ika san yejuamej kitlapejpeniaj tlen kichiuaj, niman yejon xkijtosneki tla xkuajli. Yejuamej xkinekij makinyekanakan niman xkinekij makinchiualtikan manochiuakan ken oksekimej. *

6. a) ¿Tlenon techkauilia Jehová matikchiuakan? b) ¿Kijtosneki ika uelis tikchiuaskej nochi tlen tiknekiskej?

6 Uelis kuajli tikmatstoskej ika titlanemiliskej ken Jehová xkijtosneki ika tejuamej xok uelis itlaj tiknemiliskej. Ken kijtoua 2 Corintios 3:17 itech Traducción del Nuevo Mundo, “kampa onka iespíritu Jehová, onka tlamakaualistli”. Jehová techkauilia matiktlapejpenikan kenon tiyeskej, uelis tikijtoskej tlenon tikuelitaj niman tiktlapejpeniskej tlen tikitaj techpaleuis. Ijkon otexchijchiuj toTajtsin. San ika, yejuin xkijtosneki ika uelis tikchiuaskej nochi tlen tiknekiskej (xpoua 1 Pedro 2:16). Jehová kineki matoyekanakan ika iTlajtol ijkuak nonekis tikitaskej tla itlaj kuajli noso xkuajli. ¿Tiknemilia ika yejuin xtechkauilia itlaj matikchiuakan noso tiknemilia ika techpaleuiya?

7, 8. ¿Tleka tikijtouaj ika titlanemiliskej ken Jehová xkijtosneki ika xuelis itlaj tikchiuaskej? Xkijto se neskayotl.

7 Matiknemilikan se neskayotl. Tajtin kuajli kinmachtiaj inkoneuan niman ijkon matetlakaitakan, matekitkej niman mateasikamatikan. ¿Kijtosneki ika tajtin xkinkauiliaj inkoneuan maka itlaj makichiuakan? Ka. Yejuamej kinmachtijtokej niman ijkon kuajli manemikan. Ijkuak inkoneuan uejueyiyaskej niman kisaskej inchan, uelis kitlapejpeniskej tlenon kichiuaskej. Tla kichiuaj ijkon  ken okinmachtijkej intajuan melak kuajli tlen kitlapejpeniskej kichiuaskej niman xkipiyaskej ajmantli nion tlauejli.

8 Pampa Jehová se kuajli tajtli, yejua kineki ika ikoneuan kuajli manemikan (Is. 48:17, 18). Ika yejon, techmaka itlajtolyekanalisuan tlen nonekij niman techijlia kenon tinemiskej niman kenon touikaskej inuan oksekimej. Yejua techijlia matitlanemilikan ken yejua niman matikchiuakan ken yejua. ¿Tiknemilia ika yejuin xtechkauilia tejuamej matitlanemilikan? Ka, yejuin techpaleuiya kuajli matitlanemilikan (Sal. 92:5; Prov. 2:1-5; Is. 55:9). Techpaleuiya matiktlapejpenikan tlen techyolpaktis niman techkauilia matikchiuakan tlen tikuelitaj (Sal. 1:2, 3). Kuajli tikitaj ika titlanemiliskej ken Jehová techpaleuiya.

ITLANEMILILUAN JEHOVÁ UEJUEYIXTOKEJ

9, 10. ¿Tleka tikijtouaj ika itlanemililuan toTajtsin uejueyixtokej xijkon ken intlanemililuan tlaltikpakchanejkej?

9 Noijki tiknekij titlanemiliskej ken toTajtsin pampa itlanemililuan toTajtsin uejueyixtokej xijkon ken intlanemililuan tlaltikpakchanejkej. Yejuamej kiteijliaj kenon tikpiyaskej tonemilis, kenon touikaskej inuan tochanejkauan niman kenon tiyolpakiskej ipan totekiyo. San ika, miyek tlen kiteijliaj kixnamiki ken tlanemilia Jehová. Matiknemilikan yejuin, tlaltikpakchanejkej temachtiaj ika noneki tiktejtemos tlen tikneki ipan monemilis, niman kijtouaj ika xtlaj tlenon tla tiauilnemi. Kemantika kimijliaj akin yononamiktijkej ika uelis noxeloskej noso nokauaskej ixpan tekiuajkej maski tlen okichiujkej xueyi kijtosneki, niman kijtouaj ika ijkon uelis yolpakiskej. Ipan yejuin tonaltin, ¿uelis techpaleuis tlen kijtouaj tlaltikpakchanejkej xijkon ken iTlajtol toTajtsin?

10 Jesús okijto ika tlamachilistli “noteititia yejua  ika on tlen nochiua” (Mat. 11:19). Maski tlaltikpakchanejkej kitekitiltiaj miyek tecnología, xuelij kiyektlaliaj uejueyimej tlaueltin tlen kichiua maka matipakikan. Miyekej techikoitaj, onka guerras niman nochiua tlen xkuajli. Noijki melak kitekauiliaj maauilnemilo. ¿Tikitaj tla nochi yejuin yokichiuj ika tlaltikpakchanejkej maka sa makipiyakan tlaueltin inuan inchanejkauan, maka maoniakan kokolistin niman okseki tlaueltin? Ka, ken miyekej yokitakej, yejuin san yokichiuj mamiyekiya tlen xkuajli. San ika, akin kichiuaj ken Cristo niman tlanemiliaj ken toTajtsin yolpakij inuan inchanejkauan, xkimajsi kokolistin tlen kimajsi akin auilnemij niman yolpakij imiuan imikniuan ipan nochi tlaltikpaktli (Is. 2:4; Hech. 10:34, 35; 1 Cor. 6:9-11). ¿Xmelak ika itlanemililuan toTajtsin melak uejueyixtokej xijkon ken intlanemililuan tlaltikpakchanejkej?

11. ¿Akinon okiyekan itlanemililuan Moisés, niman kenon okisato?

11 Itekipanojkauan Jehová akin yeuejkaui onenkej, kuajli kimatstoyaj ika itlanemililuan toTajtsin melak uejueyixtokej xijkon ken intlanemililuan tlaltikpakchanejkej. Matikitakan tlen okichiuj Moisés. Yejua okitlajtlanili toTajtsin makimaka se iyojlo tlamatki maski okimachtijkaj “nochi on tlajtlamach yejuan on egipcios nomachtiaj” (Hech. 7:22; Sal. 90:12). Niman okitlatlaujti toTajtsin makititi iojuiuan (Éx. 33:13). Pampa okinokauili makiyekana Jehová, okichiuj se kuajli tekitl niman ijkon toTajtsin okichiuj tlen kinekiya kichiuas. Niman toTajtsin okitlakaitak pampa ipan iTlajtol okitlali ika Moisés okipix melak ueyi itlaneltokil (Heb. 11:24-27).

12. ¿Tlenon ika noyekanaya Pablo, itlatitlankauj Cristo?

12 Pablo, itlatitlankauj Cristo, ixtlamatki katka niman tlamachilise katka, noijki tlajtouaya ome tlajtojli (Hech. 5:34; 21:37, 39;  22:2, 3). Maski ijkon, xnoyekanaya ika tlamachilistli tlen kitemaka yejuin tlaltikpaktli, yejua noyekanaya ika iTlajtol toTajtsin (xpoua Hechos 17:2, 3; 1 Corintios 2:6, 7, 13). Niman pampa ijkon okichiuj, melak kuajli otenojnots niman kichiaya kiselis nemilistli tlen xkeman tlamis (2 Tim. 4:8).

13. ¿Akinon texchiualtis matitlanemilikan ken toTajtsin?

13 Kuajli tikmatstokej ika itlanemililuan toTajtsin uejueyixtokej xijkon ken intlanemililuan tlaltikpakchanejkej. Kuakon, tla tikchiuaj tlen yejua kijtoua, tipakiskej niman kuajli tinemiskej. San ika, Jehová xtexchiualtia matitlanemilikan ken yejua. Nion “tekitketl” yolmelauak niman tlamachilise nion tlayekankej xtexchiualtiaj ijkon matikchiuakan (Mat. 24:45; 2 Cor. 1:24). Toseselti noneki tikitaskej tla titlanemiliskej ken toTajtsin. ¿Kenon uelis tikchiuaskej?

MAKA MATIJKAUILIKAN IKA TLALTIKPAKTLI MATECHYEKANA

14, 15. a) Tla tiknekij titlanemiliskej ken Jehová, ¿itech tlenon noneki titlanemiliskej? b) Ijkon ken kijtoua Romanos 12:2, ¿tleka noneki tikmapeuaskej tlanemililtin tlen onka ipan yejuin tlaltikpaktli? Xkijto se neskayotl.

14 Romanos 12:2 technauatia yejuin: “Ma ka sa xmouikakan ken on tlaltikpaktlakamej nouikaj, yej xkauilikan Dios ma yejua kiyenkuili nemotlamachilis. Ijkin, tej, nenkimatiskej tlinon Dios kineki: on tlen kuajli, on tlen kipaktia niman nochi on tlen chipauak”. Yejuin kijtosneki ika uelis titlanemiliskej ken toTajtsin, maski xijkon otiknemachtijkej totlamachilis ijkuak xtikixmatiyaj tlen melauak. Melauak, ken otechmachtijkej niman tlen yotiuelkej ipan tonemilis yejon tlen kiyekana ken titlanemiliaj. San ika, totlamachilis ok uelis nopatlatias. Tlen tijkauiliaj makalaki ipan totlamachilis niman ompa tijkauaj, yejon tlen kipatlas totlamachilis. Niman, tla titlanemiliaj itech tlen toTajtsin kineki, tikasikamatiskej ika ijkon ken yejua tlanemilia melak kuajli. Niman ijkon, nochipa tiknekiskej titlanemiliskej ken toTajtsin.

15 Matiknemilikan yejuin, tla tiknekij tikyenkuiliskej totlamachilis xok kipiya tokauiliskej ika tlaltikpakchanejkej makiyekanakan totlanemililuan. Ika okseki tlajtoltin, kijtosneki ika noneki tikmapeuaskej yejon tlen kixnamiki itlanemililuan toTajtsin. Yejuin melak noneki ijkon matikchiuakan. Matikasikamatikan yejuin ika se neskayotl. Matiknemilikan ika pampa se tlaltikpakchane kineki kuajli nemis, peua kikua tlen uelis kipaleuis. San ika ¿uelis kuajli nemis tla ok kikua tlen xkipaleuiya? Noijki ijkon, tla xtikmapeuaj tlanemililtin tlen onka ipan yejuin tlaltikpaktli, kuakon, techtekiyomakas titlanemiliskej ken toTajtsin.

16. ¿Itech tlenon noneki totlajpiyaskej?

16 Kema, ouijtika xtikinkakiskej tlen kinemiliaj tlaltikpakchanejkej pampa xuelis tikisaskej itech yejuin tlaltikpaktli (1 Cor. 5:9, 10). Ijkuak tontenojnotsaj, tijkakij tlaneltokiltin tlen xmelajkej. San ika, tla tikinkakij tlanemililtin tlen onka ipan yejuin tlaltikpaktli, noneki maka san itech yejon matitlanemilijtokan, matikinkixtikan itech totlamachilis. Ijkon ken Jesús, noneki nimantsin matikmapeuakan tlanemililtin tlen Satanás kineki matikinpiyakan ipan totlamachilis. Noijki, uelis tikitaskej kenon xsajnoye tijkakiskej tlen kinemiliaj tlaltikpakchanejkej. Matikitakan kenon uelis tikchiuaskej (xpoua Proverbios 4:23). *

17. ¿Tlenon uelis tikchiuaskej niman ijkon xsajnoye tijkakiskej tlen kinemiliaj tlaltikpakchanejkej?

17 Se neskayotl, noneki kuajli matikitakan akinomej imiuan touikaskej. ITlajtol toTajtsin techijlia ika tla tosentlaliaj imiuan akin  xkitekichiuiliaj Jehová, noijki ijkon tipeuaskej titlanemiliskej (Prov. 13:20; 1 Cor. 15:12, 32, 33). Noijki, noneki kuajli tikitaskej tlenon ika toyolpaktiaj. Tla tikmapeuaj tlanemililtin tlen tlajtoua itech evolución, auilnemilistli niman tlen xkuajli, xtijkauilijtoskej makalaki ipan totlamachilis tlen kixnamiki tlen toTajtsin kinemilia (2 Cor. 10:5).

¿Tikinpaleuiyaj tokoneuan maka manoyolpaktikan ika tlen uelis kimijtlakos? (Xkimita párrafos 18 niman 19).

18, 19. a) ¿Tleka noneki totlajpiyaskej itech tlanemililtin tlen onka ipan yejuin tlaltikpaktli? b) ¿Tlenon noneki matotlajtoltikan, niman tleka?

18 Noijki noneki tikitaskej niman tikmapeuaskej tlanemililtin tlen onka ipan yejuin tlaltikpaktli maski xnesis tla techijtlakos. Se neskayotl, ipan se noticia uelis itlaj kijtoskej niman ijkon tetlanemililtiskej ika melak kuajli tlen sekimej kinemiliaj itech política. Noijki, uelis kipanoltiskej itlaj kampa kinyolchikauaj tlaltikpakchanejkej makichiuakan tlen miyekej kuelitaskiaj kichiuaskej. Ipan seki películas niman amoxtin, kijtouaj ika san tejuamej niman ika san tochanejkauan melak ueyi kijtosneki. San ika, yejuin kixnamiki iTlajtol toTajtsin pampa ompa techmachtia ika tla tiknekij tinemiskej ika toyojlo, noneki tiktlasojtlaskej Jehová, niman yejuin noijki kichiuas ika tochanejkauan mapakikan (Mat. 22:36-39). Itech seki cuentos tlen kinchijchiuiliaj kokonej, maski xnesis ika kipiya tlen xkuajli, kanaj ika yolik kinkalaktilijtiaskej ipan intlamachilis ika xtlajtlakojli tla se auilnemi.

19 Yejuin xkijtosneki ika xkuajli tla toyolpaktiaj ika tlen xkipiya tlen xkuajli. San ika, noneki matotlajtoltikan: “¿Nikixmatstika katlejua tlanemililtin ualeuaj itech yejuin tlaltikpaktli maski xnesi tla teijtlakoua? ¿Nikinkauilia nokoneuan nochi makipouakan niman makitakan? ¿Ninotlajpiya nejua? ¿Nikinmachtia nokoneuan tlen kinemilia Jehová niman ijkon xtlanemiliskej ken tlaltikpakchanejkej?”. Tla kuajli tikitaj kenon melak nopatla itlanemililuan Jehová niman intlanemililuan tlaltikpakchanejkej, kuakon, xtijkauiliskej ika yejuin tlaltikpaktli matechyekana.

¿AKINON TIJKAUILIJTOKEJ MATECHYEKANA?

20. ¿Kenon tikteititiaj akinon tijkauilijtokej makiyekana ken titlanemiliaj?

20 Matikilnamikikan ika nemij omemej akin techijliaj tlen kinemiliaj: Jehová niman Satanás. Tlen tikuelitaj nochipa tijkakiskej, yejon tlen kiyekanas totlamachilis. Tla tijkalaktiaj ipan totlamachilis tlanemililtin tlen onka ipan yejuin tlaltikpaktli, kuakon, yejon tlen techyekanas niman titlanemiliskej niman tikchiuaskej ken tlaltikpakchanejkej. Ika yejon, melak noneki matotlajpiyakan itech tlen tikitaj, tikpouaj, tijkakij niman tlen tiknemiliaj.

21. ¿Tlenon tikitaskej ipan okse tlamachtijli?

21 Ken yotikijtokej, tla tiknekij titlanemiliskej ken Jehová xsan noneki tikmapeuaskej tlen kijtlakoua totlamachilis. Noijki, noneki matikalaktikan ipan totlamachilis itlanemililuan toTajtsin niman ijkon titlanemiliskej ken yejua. Ipan okse tlamachtijli tikitaskej kenon uelis ijkon tikchiuaskej.

^ párr. 5 Maski yakaj melak manoxelo intech oksekimej, noijki uelis peuas tlanemilis ken oksekimej. Matiknemilikan yejuin, tinochimej tikchiuaj ijkon ken oksekimej, kanaj ijkuak tiknemiliaj kanon ualeua nemilistli noso ijkuak tiknemiliaj katlejua tlakentli tiktlaliskej. San ika, kema uelis tiktlapejpeniskej akinon tijkauiliskej makiyekana totlanemilil.

^ párr. 16 Proverbios 4:23: “Itech nochi tlemach tlen noneki notlajpiyas, xtlajpiya moyojlo, pampa ompa peujtika nemilistli”.