Xuiya kampa tlen onka ijtik

Xuiya kampa tlen kipiya

 ITECH TLEN TLAJTOUA IXPAN | ¿TLEKA JESÚS OTLAJYOUI NIMAN OMIK?

¿Yemelak onochiuj?

¿Yemelak onochiuj?

Ipan xiuitl 33, Jesús akin ualeua Nazaret okimiktijkej. Yejua okitlajtlakoltijkej ika kixnamiki tlanauatijkayotl, melak okitlajyouiltijkej niman okipilojkej ipan se kojtli melaktik. Melak okikoko ijkuak omik. San ika, toTajtsin okiyoliti niman ijkuak yopanoka 40 tonaltin ika oyoliuj, yejua oyaj iluikak.

Yejuin tlen kemach otikonijtokej kisa itech naui Evangelios ipan tlajkuiloltin ika griego, noijki noixmati ken Nuevo Testamento. San ika ¿yemelak onochiuj yejon? Yejuin melak noneki matikmatikan, pampa ueyi kijtosneki. Tla nochi yejon xmelauak onochiuj, totlaneltokil xtlaj kijtosneki niman ika tikchiaj tinemiskej nochipa ipan se xochitlalpan kentla san se temiktli yeskia (1 Corintios 15:14). Aman, tla yejuin yemelak onochiuj, kuakon melak kualtsin tlen panos ika tlayekapan. Nonekis tikimijliskej oksekimej makimatikan yejuin. San ika ¿yemelak onochiuj tlen uajnestiuj ipan Evangelios noso xmelauak?

TLENON TECHITITIA IKA TLEN ONOCHIUJ

Akin okijkuilojkej Evangelios nesi ika okitlalijkej tlen noneki matikmatikan, okijkuilojkej nochi tlen noneki manomati niman xokitlalijkej tlen xmelauak. Xijkon ken okseki amatlajkuiloltin tlen kijtouaj tlen xmelauak opanok. Ipan Evengelios tlajtoua  itech kalpamej tlen aman uelis ompa tiaskej pampa yemelak onka. Tlajtoua itech tlaltikpakchanejkej akin yemelak onenkej, niman ixtlamatkej yokitakej ika kema onenkej (Lucas 3:1, 2, 23).

Jesús noijki noteneua ipan seki amamej tlen okimijkuilojkej ipan kachtopa siglo niman ipan ome siglo. * Ipan Evangelios noijtoua kenon omik Jesús. Niman yemelak ijkon temiktiayaj romanos ipan yejon tonaltin. Noijki kimelajkaijtoua seki tlemach, ken ijkuak sekimej inomachtijkauan Jesús xkichiuayaj tlen nonekiya (Mateo 26:56; Lucas 22:24-26; Juan 18:10, 11). Nochi yejon techititia ika akin okijkuilojkej Evangelios okitlalijkej tlen yemelak onochiuj itech Jesús niman xtlaj okiyankej.

¿YEMELAK OYOLIUJ JESÚS?

Maski melak miyekej kineltokaj ika Jesús onen niman omik, sekimej xueli kineltoka tla yemelak oyoliuj. Hasta itlatitlankauan xouel okineltokakej ijkuak kachtopa okimijlikej ika yejua yoyoliujka (Lucas 24:11). San ika, yemelak okineltokakej ijkuak yejuamej niman oksekimej inomachtijkauan miyekpa okitakej Jesús ika yoyoliujka. Niman se tonajli nemiyaj kanaj ipantsin 500 inomachtijkauan ijkuak okitakej ika yoyoliujka (1 Corintios 15:6).

Maski ueliskiaj kintlajyouiltiskiaj niman kinmiktiskiaj inomachtijkauan, yejuamej ika yolchikaualistli okimijlikej nochimej ika Jesús yoyoliujka: hasta akinon okimiktijkaj (Hechos 4:1-3, 10, 19, 20; 5:27-32). ¿Ueliskia miyekej inomachtijkauan Jesús yolchikaujkej yeskiaj tla xkuajli kimatstoskiaj ika Jesús yemelak yoyoliujka? Ika yejon, pampa Jesús yemelak oyoliuj, ipan yejon tonaltin niman hasta aman nochi tlaneltokiltin akin kineltokaj Cristo kichiuaj ken yejua.

Tlen kijtouaj Evangelios itech imikilis Jesús niman ika oyoliuj kichiua matikmatikan ika yemelak onochiuj. Kichiuas kuajli xmatsto ika nochi yejon yemelak opanok ijkuak tikasikamatis tleka onochiuj nochi yejon. Ipan okse tlamachtijli tikitaskej yejuin.

^ párr. 7 Tácito, akin otlakat nisiuj itech xiuitl 55, okijkuilo ika “Cristo, akin itech oualeuj tlajtojli cristianos, melak otlajyoui ipan tonaltin ijkuak Tiberio tlanauatiaya niman ika okuikakej ixpan se tlakatl ueyixtika, Poncio Pilato”. Noijki otlajtokej itech Jesús: Suetonio akin onen ipan kachtopa siglo; ixtlamatki judío itoka Josefo akin onen ipan kachtopa siglo; Plinio yejon telpochtli tlanauatijketl ipan Bitinia akin onen ipan ome siglo.