Xuiya kampa tlen onka ijtik

Xuiya kampa tlen kipiya

¿Yemelak ika Jesús omik nopampa?

¿Yemelak ika Jesús omik nopampa?

IPAN Biblia ijkuiliujtika kenon onomachilijkej itekipanojkauan toTajtsin. Yejuamej noijki nomachiliayaj ken tejuamej (Sant. 5:17). Apostol Pablo okimelajkaijto: “Ijkuak nikneki nikchiuas on tlen kuajli, xniueli pampa on tlajtlakojli onkaj ipan notlalnakayo. [...] ¡Lástima de nejua!” (Rom. 7:21-24). Kanaj noijki ijkon tomachiliaj. Tlen okijto Pablo techyolseuiya pampa tejuamej noijki titlajtlakolejkej.

San ika, Pablo noijki okijto kenon kitaya ika Jesús okitemakak inemilis. Ipan Gálatas 2:20 yejua okijto: “IKonetsin Dios [...] sanoyej onechtlajsojtlak niman nopampa onotemakak”. ¿Noijki ijkon tiknemiliaj? Kanaj kemantika xtikneltokaj yejon.

Tla tajmanaj pampa yeuejkaui otitlajtlakojkej, kanaj kemantika xtiuelij tikneltokaj ika Jehová techtlasojtla niman ika techtlapopoluiya. Niman kanaj tikmachiliaj ouijtika tikneltokaskej ika Jesús omik topampa niman ika yejon se tetlayokolijli tlen yejua techmaka. ¿Yemelak ika Jesús kineki ijkon matikitakan tlen okichiuj topampa? Tla kema ijkon, ¿tlenon techpaleuis matikitakan ken yejua kineki? Matiknankilikan yejuin.

¿KENON KITA JESÚS IKA OMIK TOPAMPA?

Jesús kineki matikitakan tlen okichiuj topampa ken se tetlayokolijli. ¿Tleka uelis tikneltokaskej yejuin? Matitlajtokan itech Lucas 23:39-42. Ompa techijlia ika se tlakatl akin okipilojkaj inakastlan Jesús onokuiti ika yejua katka se xkuajli tlakatl. Kanaj okichiujka tlen sajnoye xkuajli pampa san kinpilouayaj ipan se kojtli melaktik akin ijkon kichiuayaj. Yejua melak najmantoya niman okitlajtlanili Jesús: “Xnechelnamiki ijkuak peuas titlamandaros ken Rey”.

¿Kenon okinankili Jesús? San matikonnemilikan kenon Jesús nokojtilia konitas yejon xkuajli tlakatl. Maski melak nokokojtika, Jesús kijlia ika tlasojtlalistli: “Melauak nimitsijlia ipan yejuin tonajli: Nouan tinemis ipan Xochitlalpan” (Lucas 23:43, TNM). Jesús ueliskia san kilnamiktiskia ika yejua ouajlaka niman ijkon kimakixtis “miyek tlakatl” (Mat. 20:28). San ika, Jesús okasikamachilti yejon tlakatl ika okitemakak inemilis ipampa. Ika tlasojtlalistli okijli “nouan tinemis” niman noijki okijli ika ueliskia nochipa nemis ipan se xochitlalpan.

Yejon xkuajli tlakatl nion xouel okitekichiuili toTajtsin. San ika, kuajli tikmatstokej ika Jesús kinekiya kasikamachiltis ika mikiskia ipampa niman ika nonekiya kitas yejon ken se tetlayokolijli. Tla Jesús kinekiya ika yejon tlakatl makasikamati yejuin, san matikonnemilikan kenon kineki makasikamatikan yejuin akin yonoapolaktijkej niman kitekichiuilijtokej toTajtsin. Kuakon, ¿tlenon techpaleuis matikselikan ika Jesús omik topampa niman ika yejon techpaleuiya maski yeuejkaui otikchiujkej tlajtlakojli?

¿TLENON OKIPALEUI PABLO?

Pampa Jesús okinauati matenojnotsa, Pablo okasikamat ika Jesús omijka ipampa, yejua okijto:  “Nikmaka tlaxtlauijli toTEKO JesuCristo yejuan onechmakak poder, pampa yejua onechititij ika kitlalia iyojlo notech ijkuak onechtlalij ipan itekiu. Maski nejua achtopa onikijtouilij Cristo tlen xkuajli, niman oniktlaueltotokatinen niman nikpijpinauiyaya” (1 Tim. 1:12-14). Pablo okasikamat ika Jesús okimakaka yejon tekitl pampa kikneliaya, kitlasojtlaya niman pampa tlaneltokaya itech. Jesús noijki yotechnauatij matitenojnotsakan itech Tekiuajyotl (Mat. 28:19, 20). Kuakon, ¿noijki ijkon titlanemiliaj ken Pablo?

Matikitakan tlen ipan onochiuj Albert, akin youejkaujka 34 xiuitl ika okikixtijkaj itech ikalpan toTajtsin niman san kemach ouajnokuep. Yejua kijtoua: “Xueli nikilkaua notlajtlakoluan. San ika, ijkuak nontenojnotsa, nikmachilia ika ijkon ken Pablo, Jesús noijki yonechnauati manitenojnotsa. Yejon kichiua maniyolpaki niman nechpaleuiya kuajli maninoita niman kuajli manikita nonemilis” (Sal. 51:3).

Ijkuak yakaj tikmachtijtoskej itech Biblia, matikasikamachiltikan ika Jesús kiknelia niman kitlasojtla.

Allan, tlauele katka niman kichiuaya tlen xkuajli ijkuak xnomachtiaya Biblia. Yejua kijtoua: “Ok niknemilia kenon onitetlajyouilti. Kemantika, yejon kichiua melak maninajmana. San ika, niktlasojkamachilia Jehová ika nechkauilia manikteijli iTlajtol maski nitlajtlakole. Ijkuak oksekimej kuajli kikakij iTlajtol toTajtsin, nechilnamiktia kenon Jehová techtlasojtla niman kenon kuajli iyojlo. Nikmachilia ika yejua nechkauilia manikinpaleui akin kichiuaj ken nejua nikchiuaya”.

Melak techpaleuiya ijkuak tontenojnotsaj pampa titlanemiliaj itech tlen kuajli, niman noijki techasikamachiltia ika Jehová techiknelia, techtlasojtla niman ika tlaneltoka totech.

JEHOVÁ MÁS NOCHI KIMATI XKEN TOYOJLO

Jehová ok xkipopoloua yejuin tlaltikpaktli kampa tlayekana Satanás, yejua ika, kanaj ok toyolkokojtoskej ipampa tlen xkuajli otikchiujkej yeuejkaui. ¿Tlenon techpaleuis maka ijkon matomachilikan?

Jean miyekpa notlajtlakoltia pampa ijkuak ichpochtli katka san ichtaka kichiuaya tlen xkuajli. Yejua kijtoua: “Nechyolseuiya nikilnamikis ika ‘Dios más nochi kimati xken toyojlo’” (1 Juan 3:19, 20). Tejuamej noijki tiyolseuij ijkuak tikmatij ika Jehová niman Jesús kasikamatij ika titlajtlakolejkej. Matikilnamikikan ika pampa Jehová techtlasojtla, okitemakak iKoneuj inpampa akin noyolkuepaj, xokitemakak inpampa akin xkeman nopopolouaj (1 Tim. 1:15).

Tla titlanemiliaj itech kenon Jesús kimiknelia akin tlajtlakolejkej niman tla tokojtiliaj titenojnotsaskej ken Jesús otechnauati, xkeman tikilkauaskej ika Jesús yemelak omik topampa niman ika yejon se tetlayokolijli tlen yejua techmaka. Kuakon, uelis tikijtoskej ijkon ken Pablo: Jesús “onechtlajsojtlak niman nopampa onotemakak”.