Xuiya kampa tlen onka ijtik

Xuiya kampa tlen kipiya

Nochipa matitetlasojkamachilikan

Nochipa matitetlasojkamachilikan

“¿NIKNEMILIA ika nochipa nitetlasojkamachilia?”. Tinochimej noneki totlajtoltiskej yejuin. Biblia yokijtoka ika ipan yejuin tonaltin nemiskiaj akin “xitlaj kitlajsojkamatiskej” (2 Tim. 3:2). Kanaj tikimixmatij akin kinemiliaj ika kinamiki kipiyaskej nochi tlen kipiyaj noso tlen kiseliaj, niman nesi ika kinemiliaj ika xnoneki tetlasojkamachiliskej. Xakaj kuelita nouikas imiuan akin ijkon kichiuaj.

San ika, Jehová technauatia: “Xpiyakan tetlajsojkamachilistli” (Col. 3:15). Melak techpaleuiya tla nochipa titetlasojkamachiliaj. ¿Tleka? Matikitakan kenon techpaleuiya.

TITETLASOJKAMACHILIS KICHIUAS KUAJLI XMOMACHILI

Tla titetlasojkamachiliaj, melak techpaleuis. Matikteneuakan se: kichiuas kuajli matomachilikan. Melak yolpakij akin tetlasojkamachiliaj niman noijki akin kintlasojkamachiliaj. ¿Tleka ijkon panoua? Matitlanemilikan ipan yejuin. Ijkuak yakaj kinektika techpaleuis, yejua ijkon kichiua pampa kita ika technamiki tikseliskej yejon niman pampa techtlasojtla. Yejon kichiua sa no tejuamej kuajli matomachilikan. Yejon tlen okimachili Rut. Ijkuak Boaz okipaleui, Rut melak oyolpak ijkuak okitak ika yakaj najmanaya ipampa (Rut 2:10-13).

Melak noneki matiktlasojkamachilikan toTajtsin (1 Tes. 5:18). Kuajli tikmatstokej ika kemantika tikilnamikij kenon Jehová yotechteochiuj niman kenon aman techteochiujtika (Deut. 8:17, 18; Hech. 14:17). San ika, xsan noneki tikchiuaskej yejon, yej noneki tikxeloskej tiempo niman ijkon titlanemiliskej itech nochi tlen toTajtsin yotechmakak niman tlen yokinmakak akin tikintlasojtlaj. Tla ijkon tikchiuaj, más titetlasojkamachiliskej niman kuajli tikmatstoskej ika toTajtsin melak techtlasojtla niman techpatiojkaita (1 Juan 4:9).

Xsa noneki tiktlasojkamachiliskej Jehová ipampa nochi tlen techmaka niman ipampa ken techteochiua, noijki noneki tiktlasojkamachiliskej pampa yejua melak yolkuajli (Sal. 100:4, 5). Noijtoua ika “tla titetlasojkamachiliaj, kichiuas melak matiyolpakikan”.

TITETLASOJKAMACHILIS KICHIUAS KUAJLI TEUAN XMOUIKA

Noijki, tla titetlasojkamachiliaj, kichiuas melak kuajli matouikakan imiuan oksekimej. Tinochimej tiknekij tikmachiliskej ika techpatiojkaitaj. Ijkuak ika nochi toyojlo tiktlasojkamachiliaj akin itlaj okichiuj topampa, kichiua más kuajli iuan matouikakan (Rom. 16:3, 4). Niman akin tetlasojkamachiliaj kanaj más kinektoskej kinpaleuiskej oksekimej. Pampa kitaj tlen oksekimej kichiuaj inpampa, yejuamej noijki kinekij itlaj kichiuaskej inpampa oksekimej. Ijkuak titepaleuiyaj, melak tiyolpakij, pampa ken okijto Jesús, “más paki yejuan kitemaka xken on yejuan kiselia” (Hech. 20:35).

Robert Emmons, se akin temachtia ipan Universidad de California, okijto: “Tla tiknekij titetlasojkamachiliskej, noneki kuajli tikitaskej kenon tinochimej topaleuiyaj; kemantika sekimej kichiuaj itlaj topampa, niman kemantika tejuamej tikchiuaj itlaj inpampa”. Kema, noneki tinochimej topaleuiskej. Se neskayotl, kanaj nemij akin techmakaj tlen tikuaskej noso techtlajpiyaj ijkuak tikualoj (1 Cor. 12:21). Akin tetlasojkamachiliaj kitaj tlen oksekimej kichiuaj inpampa. Kuakon, ¿yotomatkej nochipa titetlasojkamachiliskej?

TITETLASOJKAMACHILIS MITSPALEUIS XNEMILI TLEN TEPALEUI

Tla titetlasojkamachiliaj, techpaleuis san matiknemilikan tlen tepaleui. Totlamachilis kiselia seki tlemach niman okseki kimapeua.  Akin tetlasojkamachiliaj tlanemiliaj itech tlen tepaleui niman xsan tlanemilijtokej ipan intlaueluan. Tla nochipa titetlasojkamachiliaj, más tikitaskej tlen kuajli nochiua, niman yejon kichiuas más matitetlasojkamachilikan. Tla ijkin tikchiuaj, techpaleuis matiktlakamatikan tlen Pablo okijto, yejua okijkuilo: “Nochipa xpakikan itech toTEKO” (Filip. 4:4).

Tla titetlasojkamachiliaj, xtiknemiliskej tlen xtepaleui. Ouijtika ika akin tetlasojkamachilia matenexikolita, manajmana niman maka matetlapopolui. Noijki, akin tetlasojkamachiliaj xsan kitejtemojtokej tomin pampa kitlasojkamatij tlen kipiyaj niman xkiyejyekouaj kipiyaskej miyek tlemach (Filip. 4:12).

XTLANEMILI ITECH TLEN YOTIKSELI

Akin tikchiuaj ken Cristo tikmatstokej ika Satanás kuelitaskia matechajmana tlen tikixnamikij ipan sa ika tlami tonaltin. Kuelitaskia matiknemilikan tlen xtepaleui niman kinekiskia maka itlaj matikuelitakan. Tla ijkon tikchiuaskiaj, xok kuajli titenojnotsaskiaj itech iTlajtol toTajtsin. San ika, tla titetlasojkamachiliaj, tikiskaltiskej okseki kualneskayomej ken pakilistli, kema, uelis tipakiskej ijkuak tikitaskej nochi tlen toTajtsin techmaka, niman noijki más titlaneltokaskej itech nochi tlen toTajtsin yokijto kichiuas (Gál. 5:22, 23).

Akin tiitekipanojkauan toTajtsin kanaj itikmatiyaj ika melak tepaleui tla titetlasojkamachiliaj. San ika, kanaj noijki tikasikamatij ika xnochipa titetlasojkamachiliaj niman xnochipa tiknemiliaj tlen tepaleui. Maka matajmanakan. Uelis itlaj tikchiuaskej niman ijkon nochipa titetlasojkamachiliskej. Nochipa matitlanemilikan itech tlenon uelis titetlasojkamachiliskej. Tla nochipa ijkon tikchiuaj, ijkon tomatiskej. Niman más tipakiskej xijkon ken akin san tlanemilijtokej itech intlaueluan. Matitlanemilikan itech tlen toTajtsin niman oksekimej kichiuaj topampa niman ijkon techyolchikauaskej. Ipan se amatl, mojmostla uelis tikijkuilojtiaskej ome noso yeyi tlemach tlen ika uelis titetlasojkamachiliskej.

Ixtlamatkej yokitakej ika tla nochipa titetlasojkamachiliaj, totsontekon más kuajli tekiti, niman kichiua maka ouijtika matikitakan tiknemiliskej tlen tepaleui. Akin tetlasojkamachiliaj más yolpakij. Kuakon, matitlanemilikan itech tlen yotikselijkej, matechyolpakti tlen tikchiuaj niman nochipa matitetlasojkamachilikan. Maka san ijkon matikauakan, matikchiuakan tlen Biblia kijtoua: “Xmakakan tlasojkamachilistli toTEKO, pampa yejua sanoyej kuajli iyojlo”. Kema, nochipa matitetlasojkamachilikan (1 Crón. 16:34; Col. 3:15).