Xuiya kampa tlen onka ijtik

Xuiya kampa tlen kipiya

¿Akinon kichiua ika matitlajyouikan?

¿Akinon kichiua ika matitlajyouikan?

Tla xtoTajtsin kichiujtok matitlajyouikan, kuakon, ¿akinon kichiua ika maonia miyek apistli, miyek mayantli, guerras, uejueyi kokolistin niman miyek tlemach tlen tlaixpoloua? Biblia, iTlajtol toTajtsin, kijtoua ika tlaltikpakchanejkej tlajyouiyaj ipampa yeyi tlemach:

  1. Pampa nemij akin san intech tlanemiliaj, kinejnekij miyek tomin niman tetlauelitaj. “Tlakatl yokinyekan tlaltikpakchanejkej niman ijkon matlajyouikan” (Eclesiastés 8:9). Miyekpa, tlaltikpakchanejkej tlajyouiyaj ipampa tlen xkuajli kichiuaj okseki tlaltikpakchanejkej tlajtlakolejkej akin xteikneliaj niman san intech tlanemiliaj.

  2. Pampa san kemanon niman ijkuak xtlaj nochia itlaj panoua. Biblia kijtoua ika tlaltikpakchanejkej noijki tlajyouiyaj “pampa san kemanon niman ijkuak xtlaj nochia nochimej itlaj inpan panoua” (Eclesiastés 9:11). Kijtosneki ika, tlen kemantika topan nochiua, panoua pampa tinemij kampa xkinamiki niman xnoneki tinemiskej, noso pampa itlaj xkuajli otiktlapejpenijkej noso itech itlaj otopopolojkej.

  3. Ipampa akin xkuajli tlayekanketl ipan tlaltikpaktli. Biblia kuajli kiteititia akinon melak kichiujtika ika maonia tlajyouilistli ijkuak kijtoua: “On diablo kinnauatia nochimej on oksekimej tlakamej ipan in tlaltikpaktli” (1 Juan 5:19). Akin xkuajli, yejua on Diablo, se iluikaktekitketl akin kuajli katka, san ika, xokinek nemis itech tlen melauak (Juan 8:44). Okseki iluikaktekitkej onosentlalijkej iuan Satanás niman okichiujkej tlen yejuamej kinekiyaj niman ijkon onochiujkej xkuakualtin espíritus (Génesis 6:1-5). Ijkuak yejuamej okixnamijkej toTajtsin, Satanás niman xkuakualtin espíritus opeuj kichiuaj tlen melak xkuajli ipan tlaltikpaktli, san ika, aman melak nesi kenon kichiuaj tlen xkuajli. Diablo melak kualantok niman kikajkayaujtikaj “nochi tlakatl chanej ipan in tlaltikpaktli”, yejua ika, Biblia kijtoua: “¡Lástima para nemejuamej yejuan nenchanejkej ipan tlaltikpaktli niman ipan mar!” (Apocalipsis 12:9, 12). Satanás melak xkuajli niman kuelita kitas kenon tlajyouiyaj tlaltikpakchanejkej. Yejua akin kichiujtok matitlajyouikan niman xtoTajtsin.

XNEMILI YEJUIN: San akin xteikneliani kichiuaskia matlajyouikan akin kuajli inyojlo. San ika, Biblia kijtoua ika “Dios yejua tetlajsojtlalistli” (1 Juan 4:8). Yejua ika, “¡maka manonemili ika toTajtsin akin melauak kichiua tlen xkuajli, akin nochi ueli kichiua, xtetlajyouiltia!” (Job 34:10).

Aman, kanaj tejua timotlajtoltia: “¿Kemanon kipopolos toTajtsin nochi tlen xkuajli kichiujtok Satanás?”. Ijkon ken yotikitakej, toTajtsin kitlauelita tlen xkuajli niman ika kiyolkokoua tlen techtlajyouiltia. Noijki, iTlajtol techyolchikaua: “Xmaktilikan Dios nochi on tlajtlamach yejuan san nenkomatstokej pampa yejua kineki mechpaleuis” (1 Pedro 5:7). ToTajtsin nochi ueli kichiua niman melak techtlasojtla, ika yejon, sa achijtsin poliui ijkuak kipopolos tlen techtlajyouiltia niman tlen xkuajli nochiua, ijkon ken tikitaskej ipan okse tlamachtijli. *

^ párr. 7 Tla tikneki tikmatis okseki itech tleka toTajtsin kitekauilia ok maonia tlajyouilistli, xkita capítulo 11 itech amoxtli ¿Tlenon melauak temachtia Biblia?, tlen okichijchiujkej iteixpantijkauan Jehová. Noijki onka ipan Internet www.jw.org/ngu.