Xuiya kampa tlen onka ijtik

Xuiya kampa tlen kipiya

 MATINEMIKAN KEN CRISTO

Matitlapaleuikan ika manotenojnotsa kampa tlajtouaj miyek tlajtoltin

Matitlapaleuikan ika manotenojnotsa kampa tlajtouaj miyek tlajtoltin

Tlaltikpakchanejkej kinekij kikakiskej iTlajtol toTajtsin ijkuak kimijliaj ika intlajtol. Kanaj ipampa yejon, ipan Pentecostés xiuitl 33, Jehová okichiuj ika judíos akin “uajualeuayaj de nochiuiyan ipan in tlaltikpaktli” makikakikan ika intlajtol kuajli tlajtoltin itech Tekiuajyotl, maski kanaj yejuamej ueliyaj tlajtouayaj hebreo noso griego (Hch 2:5, 8). Aman, onokej tlanechikoltin ika sesejneka tlajtoltin tlen tenojnotsaj ipan san no yejua kaltin. ¿Tlenon noneki nochiuas niman ijkon tenojnotskej itech yejon tlanechikoltin kuajli kitekitiltiskej tiempo niman xkinkualaniskej akin kinnojnotsaj?

  • Manonotsakan (Pr 15:22): Tlayekankej akin kiyekanaj tenojnotsalistli noneki san sekan kitaskej kenon kichiuiliskej niman ijkon uelis notenojnotsas. Tla seki tlanechikoltin akin tlajtouaj okse tlajtojli xueyi kampa tenojnotsaj, kanaj kinekiskej ika maka matitenojnotsakan ipan kaltin kampa yejuamej tenojnotsaj. San ika, tla kampa tenojnotsaj melak ueyi niman xueli nochipa ompa tenojnotsaj, kanaj kinekiskej ika maka matijkauakan nion se kajli niman ika matikimijlikan ijkuak yakaj tiknextiaj akin kineki okseki kimatis (od-S pág. 93 párr. 37). Noso kinekiskej ika totlanechikol matepaleui makinnextikan akin tlajtouaj intlajtol niman ijkon yejuamej kimatiskej kanon ika chantij (km-S 7/12 pág. 5, recuadro). Matikilnamikikan, ika ipan se kajli uelis nemiskej akin tlajtouaj okse tlajtojli. Tlen yononemili nochiuas niman ijkon notenojnotsas noneki kitlakamatis tlen yokitlalijkej tekiuajkej (ley de protección de datos).

  • Matitlapaleuikan (Ef 4:16): Noneki tikchiuaskej ijkon ken technauatia tlayekanketl akin kiyekana tenojnotsalistli. ¿Tikmachtijtokej itech Biblia yakaj akin tlajtoua okse tlajtojli tlen xtlajtouaj ipan totlanechikol? Kanaj yejua uelis totoka noskaltis itlaneltokil tla kimachtia se tenojnotsketl akin tlajtoua itlajtol niman nemi ipan se tlanechikojli noso se grupo tlen nisiuj onka.

  • Xmoyektlali (Pr 15:28; 16:1): Tla kampa titenojnotsa yakaj tlajtoua okse tlajtojli, xchiua nochi tlen tiueli niman ijkon tikijlis kuajli tlajtoltin. Xkita katlejua tlajtoltin tlajtouaj kampa titenojnotsa niman xtemolti Biblia niman seki videos ika yejon tlajtoltin niman ijkon uelis tikinnojnotsas. Noijki uelis tiktekitiltis aplicación JW Language tlen ika tiuelis kenon notlajpalouaj ipan seki tlajtoltin.